ഉള്ളടക്കത്തിലേക്ക് പോവുക

സുബ്രഹ്മണ്യൻ

വിക്കിപീഡിയ, ഒരു സ്വതന്ത്ര വിജ്ഞാനകോശം.
സുബ്രഹ്മണ്യൻ
യുദ്ധം
ആറുമുഖത്തോട് കൂടിയ സുബ്രഹ്മണ്യൻ ഇരുഭാര്യമാരോടൊപ്പം - രാജാ രവിവർമ്മയുടെ ചിത്രം
ദേവനാഗരിसुब्रह्मण्यः
Sanskrit TransliterationKārttikeya
തമിഴ് ലിപിയിൽமுருகன்
ഗ്രഹംചൊവ്വ
ആയുധംവേൽ
ജീവിത പങ്കാളിദേവസേനയും (ദേവയാനി), വള്ളിദേവിയും
Mountമയിൽ

ഹൈന്ദവവിശ്വാസപ്രകാരം പരമശിവന്റേയും പാർവ്വതി ദേവിയുടേയും പുത്രനാണ് സുബ്രഹ്മണ്യൻ. കാർത്തികേയൻ, മുരുകൻ, കുമാരൻ, സ്കന്ദൻ, ഷണ്മുഖൻ, വേലായുധൻ, ആണ്ടവൻ, ശരവണൻ എന്നീ പേരുകളിലും സുബ്രഹ്മണ്യ സ്വാമി അറിയപ്പെടാറുണ്ട്. കൗമാര മതത്തിലെ പ്രധാന ആരാധനാ മൂർത്തിയാണ് പരമാത്മാവായ സുബ്രഹ്മണ്യൻ. പ്രാചീന സിദ്ധ വൈദ്യന്മാരുടെ ആരാധനാമൂർത്തിയും മുരുകൻ ആണെന്ന് കരുതപ്പെടുന്നു. ലോകത്ത് എല്ലായിടത്തും തമിഴ് വംശജരുടെ ഒരു പ്രധാന ആരാധനാമൂർത്തിയായി മുരുകനെ കാണാം. പഴനി ഉൾപ്പെടെയുള്ള മുരുകന്റെ പ്രധാനപ്പെട്ട ക്ഷേത്രങ്ങൾ തമിഴ് നാട്ടിൽ സ്ഥിതി ചെയ്യുന്നതായി കാണാം. 'സ്കന്ദ ബോധിസത്വൻ' എന്ന പേരിൽ ബൗദ്ധർ മുരുകനെ ആരാധിക്കാറുണ്ട്. തമിഴ് കടവുൾ (തമിഴരുടെ ദൈവം) എന്നൊരു വിശേഷണവും സുബ്രഹ്മണ്യന് ഉണ്ട്. വിശ്വാസികൾ പരബ്രഹ്മസ്വരൂപനായ സുബ്രഹ്മണ്യനെ അറിവിന്റെ മൂർത്തി എന്ന അർത്ഥത്തിൽ "ജ്ഞാനപ്പഴം" എന്ന് വിശേഷിപ്പിക്കാറുണ്ട്. ഭാരതീയ ജ്യോതിഷം രചിച്ചത് സുബ്രമണ്യനാണെന്ന് വിശ്വസിക്കപ്പെടുന്നു. മയിലാണ് വാഹനം, കൊടിയടയാളം കോഴി. വേൽ ആയുധവും. പഴന്തമിഴ് കാവ്യങ്ങളിൽ പറയുന്ന ചേയോൻ മുരുകനാണെന്ന് കരുതപ്പെടുന്നു. ദേവസേനയും വള്ളിയുമാണ് പത്നിമാർ. സ്കന്ദപുരാണത്തിൽ മുരുകനെ പ്രധാന ദൈവമായി ചിത്രീകരിച്ചിരിക്കുന്നു.

തമിഴ് ജനത വസിക്കുന്ന ലോകത്തിന്റെ വിവിധ ഭാഗങ്ങളിലെല്ലാം സുബ്രഹ്മണ്യ ക്ഷേത്രങ്ങൾ കാണാൻ സാധിക്കും. അമേരിക്കൻ ഐക്യനാടുകൾ, കാനഡ, യുകെ, യൂറോപ്പ്, ഓസ്ട്രേലിയ, ശ്രീലങ്ക, മൗറീഷ്യസ്, ഇന്തോനേഷ്യ, മലേഷ്യ, സിംഗപ്പൂർ, ദക്ഷിണാഫ്രിക്ക, റീയൂണിയൻ ദ്വീപുകൾ എന്നിവിടങ്ങളിലെല്ലാം മുരുക ക്ഷേത്രങ്ങൾ സ്ഥിതിചെയ്യുന്നുണ്ട്. തമിഴ്നാട്ടിലും മുരുകന്റെ പ്രശസ്തമായ ധാരാളം കോവിലുകൾ ഉണ്ട്. പഴനി ദണ്ഡായുധപാണി ക്ഷേത്രമാണ് ഇക്കൂട്ടത്തിൽ ഏറ്റവും പ്രസിദ്ധം. ദക്ഷിണേന്ത്യ കൂടാതെ ഇന്ത്യയുടെ മറ്റു ഭാഗങ്ങളിലും ശിവ കുടുംബത്തോടൊപ്പം മുരുകനെ ആരാധിക്കുന്നു.[1]

മറ്റു നാമങ്ങൾ

[തിരുത്തുക]
  • സ്കന്ദൻ
  • ഗുഹൻ
  • ഷണ്മുഖൻ
  • വേലൻ
  • വേലായുധൻ
  • കാർത്തികേയൻ
  • ആറുമുഖൻ
  • കുമരൻ
  • മയൂരവാഹനൻ
  • സുബ്രഹ്മണ്യൻ
  • മുരുകൻ
  • ശരവണൻ
  • വടിവേലൻ
  • വള്ളിമണാളൻ
  • ബാഹുലേയൻ

തൈപ്പൂയം

[തിരുത്തുക]
മലേഷ്യയിലെ ബാതു ഗുഹാക്ഷേത്രത്തിലെ തൈപൂയ മഹോത്സവം

മകരമാസത്തിലെ പൂയം.സുബ്രഹ്മണ്യൻ ജനിച്ച നാളായി കരുതപെടുന്നു. ഈ ദിവസങ്ങളിൽ സുബ്രഹ്മണ്യ ക്ഷേത്രത്തിൽ കാവടിയാട്ടവും ആഘോഷങ്ങളും നടത്താറുണ്ട്‌ .

മൂലമന്ത്രം

[തിരുത്തുക]

ഓം ശരവണ ഭവായ നമഃ

ധ്യാനശ്ലോകം

[തിരുത്തുക]

സ്ഫുരൻമകുടപത്ര കുണ്ഡല വിഭൂഷിതം ചമ്പക-
സ്രജാകലിതകന്ധരം കരയുഗീന ശക്തിം പവിം
ദധാനമഥവാ കടീകലിതവാമഹസ്തേഷ്ടദം
ഗുഹം ഘുസൃണഭാസുരം സമരതു പീതവാസോവസം.

അർത്ഥം:- ശോഭിച്ചിരിക്കുന്ന മകുടങ്ങളെകൊണ്ടും പത്രകുണ്ഡലങളെകൊണ്ടും ഭൂഷിതനും, ചമ്പകമാലകൊണ്ട് അലങ്കരിക്കപെട്ടിരിക്കുന്ന കഴുത്തോടുകൂടിയവനും രണ്ടു കൈകളെകൊണ്ട് വേലും വജ്രവും ധരിക്കുന്നവനും സിന്ദൂരവർണം പോലെ ശോഭിക്കുന്നവനും മഞ്ഞപ്പട്ടുടുത്തവനുമായ സുബ്രഹ്മണ്യനെ ധ്യാനിക്കുന്നു

സ്കന്ദപുരാണം

[തിരുത്തുക]
കറുപ്പു സ്വാമി എന്നും അറിയപ്പെടുന്ന സ്കന്ദൻ അഥവാ മുരുകൻ, പളനി മലകളിൽ പലയിടങ്ങളിലും പ്രതിഷ്ഠിച്ചിരിക്കുന്നതു കാണാം.

പുരാണങ്ങളിൽ വലിപ്പം കൊണ്ട് എറ്റവും വലുതാണ് സ്കന്ദപുരാണം. ഇതിൽ മുരുകന്റെ മാഹാത്മ്യങ്ങൾ ആണ് വർണ്ണിച്ചിരിക്കുന്നത്. 80000 ൽ പരം ശ്ലൊകങ്ങൾ ആണ് സ്കന്ദപുരാണത്തിലുള്ളത്. ഇതിൽ മുരുകനെ ഈശ്വരനായി അവതരിപ്പിച്ചിരിക്കുന്നു. സ്കന്ദപുരാണം മുരുകനെ പരമാത്മാവായി കണക്കാക്കുന്നു. കേദാരഘണ്ഡം, തുടങ്ങി പലഘണ്ഡങ്ങളായി ഭാരതത്തിലെ വിവിധ തീർത്ഥസ്ഥാനങ്ങളെക്കുറിച്ചും നദികളെക്കുറിച്ചും എല്ലാം ഇതിൽ പരാമർശിക്കപ്പെട്ടിരിക്കുന്നു. സ്കന്ദന്റെ കഥയും പലപ്പൊഴായി പറയുന്നുണ്ട്.[2]. 2016 ദിസംബർ 1 മുതൽ 31 വരെ മലപ്പുറം ജില്ലയിൽ മഞ്ചേരിയ്ക്കടുത്തുള്ള കരിക്കാട് ക്ഷേത്രത്തിൽ വച്ച് നടന്ന സ്കന്ദപുരാണമഹായജ്ഞത്തിൽ ഇദം പ്രഥമമായി ഇത് മുഴുവൻ പാരായണം ചെയ്തു.[3]കാവൽ ദൈവമായി മലകളിൽ പലയിടങ്ങളിൽ കറുപ്പു സ്വാമിയായി അറിയപ്പെടുന്നു

പുരാണം, ഐതിഹ്യം

[തിരുത്തുക]

സ്കന്ദപുരാണപ്രകാരം സുബ്രഹ്മണ്യൻ സർവേശ്വരനായ ഭഗവാനാണ്. ശൂക്രാചാര്യരുടെ ശിഷ്യയായ മായ എന്ന അസുരസ്ത്രീക്ക് കശ്യപമഹർഷിയിൽ ജനിച്ച ശൂരപത്മൻ, താരകൻ, സിംഹമുഖൻ എന്നീ അസുരന്മാരെ വധിക്കാനാണ് സുബ്രഹ്മണ്യൻ അവതരിച്ചത്. ശിവപുത്രനു മാത്രമെ തങ്ങളെ വധിക്കാനാകാവൂ എന്ന് വരം നേടിയ ഇവർ ത്രിലോകങ്ങളും അടക്കിഭരിച്ചു.

ദേവന്മാരുടെ അഭ്യർഥന പ്രകാരം ശിവൻ പാർവതിയെ വിവാഹം കഴിച്ചു. തുടർന്ന് ശിവഭഗവാന്റെ പഞ്ച മുഖങ്ങളിൽ നിന്നും അഞ്ചു ദിവ്യജ്യോതിസ്സുകൾ പുറപ്പെട്ടു. അതേ സമയം തന്നെ പാർവതിയുടെ മുഖത്ത് നിന്നും ഒരു ദിവ്യജ്യോതിസ്സുണ്ടായി. ആ ആറ് ദിവ്യജ്യോതിസ്സുകളെ അഗ്നിദേവനും, വായൂദേവനും ചേർന്ന് ഗംഗയിൽ നിക്ഷേപിച്ചു. ഗംഗ അവയെ ശരവണ പൊയ്കയിൽ എത്തിച്ചു. ആറ് താമരപ്പൂക്കളിൽ വീണയുടനെ അവ ആറ് ദിവ്യ ശിശുക്കളായി മാറി. വിഷ്ണുവിന്റെ നിർദ്ദേശപ്രകാരം കാർത്തിക നക്ഷത്രത്തിന്റെ അധിദേവതമാരായ ആറു ദേവിമാർ ആ ശിശുക്കളെ പാലൂട്ടി വളർത്തി. അതിനാൽ തന്നെ വൃശ്ചിക മാസത്തിലെ തൃക്കാർത്തിക നാൾ മുരുകന് ഏറെ വിശേഷമാണ്.

പിന്നീട് ശിവപാർവ്വതിമാർ അവിടെ എത്തുകയും അതിയായ വാത്സല്യത്തോടെ ശ്രീപാർവ്വതി ആറ് ശിശുക്കളെയും ചേർത്ത് പിടിച്ചപ്പോൾ ആറുപേരും ഒന്നുച്ചേർന്ന് ഷൺമുഖനായിത്തീരുകയും ചെയ്തു.

അപ്പോൾ മഹാദേവൻ ഇപ്രകാരം പറഞ്ഞു. "പാർവതിയ്ക്ക് ഇവൻ സ്‌കന്ദൻ, ഗംഗയ്ക്ക് കുമാരൻ, അഗ്നിയ്ക്ക് മഹാസേനൻ, കൃത്തികമാർക്ക് കാർത്തികേയൻ, ശരവണ പൊയ്കയിൽ പിറന്നതിനാൽ ശരവണൻ, എനിക്ക് ഗുഹൻ."

പിന്നീട് ദേവസേനാപതിയായി അഭിഷേകം ചെയ്യപ്പെട്ട സുബ്രഹ്മണ്യൻ താരകൻ, സിംഹമുഖൻ എന്നിവരുമായി യുദ്ധത്തിൽ ഏർപ്പെടുകയും അമ്മ നൽകിയ ശക്തിവേലിനാൽ അവരെ വധിക്കുകയും ചെയ്തു.

തൻ്റെ അന്ത്യം അടുത്തു എന്നറിഞ്ഞപ്പോൾ ശൂരപത്മൻ ഒരു ഭീമാകാരവൃക്ഷമായി മാറി. മുരുകൻ തൻ്റെ വേലിനാൽ അതിനെ രണ്ടായി പിളർത്തി.

ഒരു പകുതിയിൽ നിന്ന് മയിലും മറ്റേ പകുതിയിൽ നിന്ന് പൂവൻ കോഴിയും ഉണ്ടായി. മയിലിനെ വാഹനമാക്കിയ മുരുകൻ തൻ്റെ കൊടി അടയാളമാക്കി പൂവനെ മാറ്റി.

ദേവസേന, വള്ളി എന്നിവരാണ് മുരുകൻ്റെ പത്നിമാർ. വേടരുടെ രാജാവായ നമ്പിരാജൻ്റെ വളർത്തുമകളാണ് വള്ളി. ഇന്ദ്രപുത്രിയായ ദേവസേന ഗജരാജനായ ഐരാവതത്തിൻ്റെ സംരക്ഷണത്തിൽ വളർന്നതിനാൽ അവൾക്ക് ദേവയാനി എന്ന നാമം ഉണ്ടായി . കൂടാതെ ഷഷ്ഠി, മനസാദേവി എന്നി പേരുകളിലും ദേവസേന അറിയപ്പെടുന്നുണ്ട്.

നവരാത്രിയിലെ അഞ്ചാം ദിവസം ബാലമുരുകനെ മടിയിലിരുത്തിയ സ്‌കന്ദമാതയുടെ സ്വരൂപത്തിലാണ് പാർവതി ദേവിയെ ആരാധിക്കുന്നത്.

മറ്റൊരു ഐതിഹ്യപ്രകാരം അഗ്നിദേവൻ സപ്തർഷിമാരുടെ പത്നിമാരിൽ മോഹിതനാകുകയും തുടർന്നു അഗ്നിയുടെ പത്നിയായ സ്വാഹ സപ്തർഷി പത്നിമാരിൽ അരുന്ധതി ഒഴികെയുള്ളവരുടെ രൂപത്തിൽ അഗ്നിയുമായി രമിക്കുകയും സുബ്രഹ്മണ്യൻ അവതരിക്കുകയും ചെയ്തു. അഗ്നി ശിവസ്വരൂപനും സ്വാഹ ശക്തിസ്വരൂപിണിയും ആയതിനാൽ സുബ്രഹ്മണ്യൻ ശിവപാർവതിമാരുടെ പുത്രനാണെന്ന് മഹാഭാരതം പറയുന്നു.

പ്രധാന ക്ഷേത്രങ്ങൾ

[തിരുത്തുക]
പഴനിയിലെ ആണ്ടവൻ ക്ഷേത്രം
മലേഷ്യയിലെ ബാതു ക്ഷേത്രത്തിനുമുന്നിലുള്ള സുബ്രഹ്മണ്യ പ്രതിമ
മലേഷ്യയിലെ പെനാങ്ങിലുള്ള ബാലദണ്ഡായുധസ്വാമി ക്ഷേത്രം
ആലപ്പുഴയിലെ ഹരിപ്പാട് സുബ്രഹ്മണ്യസ്വാമി ക്ഷേത്രം

തമിഴ്നാട്ടിലും മറ്റു ദക്ഷിണേന്ത്യൻ സംസ്ഥാനങ്ങളിലും നിരവധി മുരുക ക്ഷേത്രങ്ങൾ സ്ഥിതിചെയ്യുന്നുണ്ട്. തമിഴ് നാട്ടിലെ ആറുപടൈവീടുകൾ (ആറു വീടുകൾ) എന്നറിയപ്പെടൂന്ന 6 ക്ഷേത്രങ്ങൾ സുബ്രഹ്മണ്യന്റെ പ്രധാൻ ക്ഷേത്രങ്ങളായി കരുതുന്നു.[4][5] കണ്ണൂർ ജില്ലയിലെ അരിമ്പ്ര സുബ്രഹ്മണ്യ സ്വാമി ക്ഷേത്രം ശ്രി പരശുരാമൻ പ്രതിഷ്ഠിച്ച ഒരു പുണ്യ ക്ഷേത്രമാണ്.

സുബ്രഹ്മണ്യ സ്വാമിയുടെ ഈ ദിവ്യ ക്ഷേത്രങ്ങളെക്കുറിച്ച് സംഘകാല സാഹിത്യത്തിലും, പരാമർശിക്കപ്പെടുന്നുണ്ട്.[6] [7]

അറുപടൈ വീടുകൾ[8] സ്ഥാനം

(വടക്കുനിന്ന് തെക്കോട്ട്)

സ്വാമിമലൈ സ്വാമിനാഥസ്വാമി ക്ഷേത്രം സ്വാമിമലൈ, കുംഭകോണം
പഴനി മുരുകൻ ക്ഷേത്രം പഴനി
തിരുച്ചെന്തൂർ മുരുകൻ ക്ഷേത്രം തിരുചെന്തൂർ
തിരുപ്പറങ്കുൻറം മുരുകൻ ക്ഷേത്രം തിരുപ്പറംകുന്രം, മദുരൈ
തിരുത്തണി മുരുകൻ ക്ഷേത്രം തിരുത്തണി
പഴമുതിർസോലൈ മുരുകൻ ക്ഷേത്രം പഴമുതിർചോലൈ, മദുരൈ

കേരളത്തിലെ പ്രധാന സുബ്രഹ്മണ്യ ക്ഷേത്രങ്ങൾ

[തിരുത്തുക]

വിഡാങ്ങര സുബ്രഹ്മണ്യ സ്വാമി ക്ഷേത്രം, കാഞ്ഞിരമറ്റം, എറണാകുളം.

  • ബാലമുരുകൻ കോവിൽ, വാളകം, കൊട്ടാരക്കര
  • പെരുന്ന മുരുകൻ ക്ഷേത്രം, കോട്ടയം
  • പയ്യന്നൂർ സുബ്രഹ്മണ്യ സ്വാമി ക്ഷേത്രം , കണ്ണൂർ
  • ശ്രീ.സുബ്രഹ്മണ്യസ്വാമി ക്ഷേത്രം, കുഴൂർ, തൃശൂർ ജില്ല.
  • ബന്തടുക്ക ശ്രീ സുബ്രഹ്മണ്യ സ്വാമി ക്ഷേത്രം ബന്തടുക്ക ,കാസർഗോഡ് ജില്ല
  • ആനാകോട് തിരുവളന്തൂർ ശ്രീ സുബ്രഹ്മണ്യസ്വാമി ക്ഷേത്രം കാട്ടാക്കട, തിരുവനന്തപുരം
  • പയ്യൂർ സുബ്രഹ്മണ്യ സ്വാമി ക്ഷേത്രം
  • കന്നാരത്തൊട്ടി ശ്രീ സുബ്രഹ്മണ്യ സ്വാമി ക്ഷേത്രം, കോതമംഗലം
  • മയിലാടുംകുന്ന് ശ്രീ മുരുകൻകോവിൽ ഏരൂർ, അഞ്ചൽ, കൊല്ലം
  • വഞ്ചിക്കോവിൽ ശ്രീശരവണ ക്ഷേത്രം ഇരവിപുരം കൊല്ലം.
  • പുത്തൻപുര ശ്രീ സുബ്രഹ്മണ്യ സ്വാമി ക്ഷേത്രം,പിണയ്ക്കൽ,തട്ടാമല, കൊല്ലം
  • കിഴക്കൻ പഴനി-തമ്പുരാൻ കുന്ന്

ശ്രീ സുബ്രഹ്മണ്യ സ്വാമി ക്ഷേത്രം, നരിക്കുഴി, വടശ്ശേരിക്കര, പത്തനംതിട്ട Archived 2022-09-14 at the Wayback Machine

  • കീഴുവായ്‌പ്പൂർ സുബ്രഹ്മണ്യ സ്വാമി ക്ഷേത്രം - പത്തനംതിട്ട. •മട്ടന്നൂർ പരിയാരം ശ്രീ സുബ്രഹ്മണ്യ സ്വാമി ക്ഷേത്രം കണ്ണൂർ

കൂടാതെ നിരവധി ക്ഷേത്രങ്ങളിൽ ഉപദേവത കൂടിയാണ് സുബ്രഹ്മണ്യൻ. കൂടുതലും ശിവന്റെയും ദേവിയുടെയും ക്ഷേത്രങ്ങളിലാണ് ഇത്തരത്തിലുള്ള പ്രതിഷ്ഠകളുണ്ടാകാറുള്ളത്. തിരുവഞ്ചിക്കുളം ശിവക്ഷേത്രം, മമ്മിയൂർ മഹാദേവക്ഷേത്രം, കൊട്ടാരക്കര ശ്രീ മഹാഗണപതി ക്ഷേത്രം, ചൊവ്വല്ലൂർ ശിവക്ഷേത്രം , തൃശ്ശൂർ തിരുവമ്പാടി ഗണപതി ക്ഷേത്രം, വിയ്യൂർ മണലാർക്കാവ് ഭഗവതിക്ഷേത്രം, തായങ്കാവ് ധർമ്മശാസ്താ ക്ഷേത്രം, മൂക്കുതല കീഴേക്കാവ് തുടങ്ങിയ ക്ഷേത്രങ്ങൾ സുബ്രഹ്മണ്യൻ ഉപദേവതയായി വരുന്ന ക്ഷേത്രങ്ങളിൽ പ്രധാനപ്പെട്ടവയാണ്.


സുബ്രഹ്മണ്യൻ പരദേവതയായിട്ടുള്ള തറവാടുകൾ

  • കേരളത്തിലെ തൃശ്ശൂർ ജില്ലയിലെ വടക്കേക്കാട് ഗ്രാമത്തിൽ സ്ഥിതി ചെയ്യുന്ന പ്രസിദ്ധ നമ്പൂതിരി തറവാടാണ് കൊളത്താപ്പള്ളി മന. കൊളത്താപ്പള്ളി മനയുടെ പരദേവതയാണ് സുബ്രഹ്മണ്യൻ.
  • കണ്ണമംഗലം മന ( പൂരാടം മന )

വിശേഷ ദിവസങ്ങൾ

[തിരുത്തുക]

തൈപ്പൂയം, ഷഷ്ടി വ്രതം, വൃശ്ചിക തൃക്കാർത്തിക വിശേഷ ദിവസങ്ങൾ. ചൊവ്വാഴ്ചയും ദിവസം.

പ്രധാന ദിവസങ്ങൾ

[തിരുത്തുക]

ചൊവ്വാഴ്ച, ഞായറാഴ്ച എന്നിവ പ്രധാനം. പൊതുവേ ചൊവ്വാഴ്ചയാണ് മുരുകന്റെ ആരാധനയ്ക്ക് പ്രധാന ദിവസം. ജ്ഞാനപ്പഴമെന്നു അറിയപ്പെടുന്ന മുരുകൻ അറിവു പകരുന്ന ദിവസമെന്ന നിലയ്ക്ക് ഞായറാഴ്ചയും മുരുകന് പ്രധാനമാണ്.

അവലംബം

[തിരുത്തുക]

ക്ഷേത്ര ചൈതന്യ രഹസ്യം ( മാധവജി ,ക്ഷേത്ര സംരക്ഷണ സമിതി )


ഹിന്ദു ദൈവങ്ങൾ

ഗണപതി | ശിവൻ | ബ്രഹ്മാവ് | മഹാവിഷ്ണു | ദുർഗ്ഗ | ലക്ഷ്മി | സരസ്വതി | ഭദ്രകാളി | രാമൻ | ഹനുമാൻ | ശ്രീകൃഷ്ണൻ | സുബ്രമണ്യൻ‍ | ഇന്ദ്രൻ | ശാസ്താവ്| കാമദേവൻ | യമൻ | കുബേരൻ | സൂര്യദേവൻ | വിശ്വകർമ്മാവ്

  1. ↑ James G. Lochtefeld 2002, pp. 655–656.
  2. ↑ Ganesh Vasudeo Tagare (1996). Studies in Skanda Purāṇa. Published by Motilal Banarsidass, ISBN 81-208-1260-3
  3. ↑ "ആർക്കൈവ് പകർപ്പ്". Archived from the original on 2016-12-31. Retrieved 2017-01-16.
  4. ↑ "Welcome To LordMurugan.com Home Page". Archived from the original on 2015-09-06. Retrieved 2017-06-08.
  5. ↑ "Lord Muruga Names - 108 names of Lord Muruga with meanings".
  6. ↑ நக்கீரதேவநாயனார். "திருமுருகாற்றுப்படை".
  7. ↑ gmail.com, kaumaram @. "முருகன் Murugan Devotees - Lord Muruga - அடியார்கள் - முருகபக்தர்". Archived from the original on 2008-07-05. Retrieved 2017-06-08.
  8. ↑ Fred Clothey (1972), Pilgrimage Centers in the Tamil Cultus of Murukan, Journal of the American Academy of Religion, Oxford University Press, Vol. 40, No. 1 (Mar., 1972), pp. 79-95
"https://ml.wikipedia.org/w/index.php?title=സുബ്രഹ്മണ്യൻ&oldid=4615470" എന്ന താളിൽനിന്ന് ശേഖരിച്ചത്