ലക്ഷ്മി

ഇംഗ്ലീഷ് വിലാസം

https://ml.wikipedia.org/wiki/Lakshmi_(Goddess)

മഹാലക്ഷ്മി
ധനം, സമ്പത്ത്, ആഹാരം, ഐശ്വര്യം, വൃത്തി, ശുചിത്വം, വിജയം, അഭിവൃദ്ധി
മഹാലക്ഷ്മി
ദേവനാഗരി	लक्ष्मी
Sanskrit Transliteration	lakṣmī
Affiliation	പരാശക്തി, മഹാവിഷ്ണു, ഭഗവതി, ദുർഗ്ഗ, ജഗദംബ
നിവാസം	വൈകുണ്ഠം
ആയുധം	ശംഖ്, ചക്രം
ജീവിത പങ്കാളി	മഹാവിഷ്ണു
Mount	താമരപ്പൂവ്

ഹൈന്ദവ വിശ്വാസപ്രകാരം സാമ്പത്തികത്തിന്റെയും ഐശ്വര്യത്തിന്റെ ഭഗവതിയാണ് ലക്ഷ്മി. ത്രിമൂർത്തികളിൽ ഒരാളായ മഹാവിഷ്ണുവിന്റെ പത്നിയാണ് ലക്ഷ്മിദേവി എന്നാണ് വിശ്വാസം. മഹാവിഷ്ണുവിന്റെ വിവിധ അവതാരങ്ങളിലും ലക്ഷ്മി ദേവിയുടെ സാന്നിധ്യം കാണാം. ദേവി മാഹാത്മ്യ പ്രകാരം മഹിഷാസുരനെ വധിക്കാൻ വേണ്ടിയാണ് മഹാലക്ഷ്മി അവതരിച്ചതെന്ന് വിശ്വാസം.

കയ്യിൽ താമരപ്പൂവും, സ്വർണ്ണക്കുടവും പിടിച്ചിരിക്കുന്നതും അഭയ, വരദ മുദ്രകളോടു കൂടിയതുമാണ് ലക്ഷ്മിയുടെ രൂപം. രണ്ടു വെളുത്ത ആനകൾ ദേവിയുടെ ഇരുവശത്തുമായി നിൽക്കുന്നു.

എന്നാൽ ലക്ഷ്മിയിൽ നിന്ന് വ്യത്യസ്തമായി മഹാലക്ഷ്മി (ദുർഗ്ഗ) ആദിപരാശക്തിയായ ഭഗവതിയുടെ മൂന്ന് പ്രധാന ഭാവങ്ങളിൽ ഒന്നാണ്. ഇത് പ്രധാനമായും ശാക്തേയ വിഭാഗങ്ങളുടെ ആരാധനമൂർത്തിയാണ്. മഹാകാളി, മഹാസരസ്വതി എന്നിവരാണ് മറ്റ് രണ്ട് ഭാവങ്ങൾ.

മഹാലക്ഷ്മിക്ക് എട്ടു ഭാവങ്ങളുണ്ട്. ഇവർ അഷ്ടലക്ഷ്മിമാർ എന്നറിയപ്പെടുന്നു. ആദിലക്ഷ്മി (മഹാലക്ഷ്മി അഥവാ ആദിപരാശക്തി), ധനലക്ഷ്മി, ധാന്യലക്ഷ്മി, ഗജലക്ഷ്മി, സന്താനലക്ഷ്മി, വീരലക്ഷ്മി (ദുർഗ്ഗ), വിജയലക്ഷ്മി, വിദ്യാലക്ഷ്മി (സരസ്വതി) എന്നിവരാണ് അഷ്ട ലക്ഷ്മിമാർ.

ദീപാവലി, നവരാത്രി, തൃക്കാർത്തിക, വരലക്ഷ്മി വെള്ളിയാഴ്ച, പൗർണ്ണമി എന്നിവ വിശേഷ ദിവസങ്ങൾ. കൊല്ലൂർ മൂകാംബിക, ചോറ്റാനിക്കര, പാലക്കാട്‌ ഹേമാംബിക പോലെയുള്ള ചില ഭഗവതി ക്ഷേത്രങ്ങളിൽ മഹാലക്ഷ്മിയെ ആരാധിച്ചു കാണുന്നു.

വർഷം തോറും കർക്കിടക മാസത്തിൽ ഐശ്വര്യത്തിനും സമ്പത് സമൃദ്ധിക്കും വേണ്ടി ശ്രീ ഭഗവതി, ദുർഗ്ഗ അഥവാ മഹാലക്ഷ്മിയെ ആരാധിക്കുന്ന ദിവസങ്ങൾ കൂടിയാണ് ഇത്. അതിന്റെ മുന്നോടിയായി അവർ വീടും പരിസരവും വൃത്തിയാക്കി സൂക്ഷിക്കുന്നു. പലരും ദേവി മാഹാത്മ്യം, ലളിത സഹസ്രനാമം, കനകധാരാ സ്തോത്രം, മഹാലക്ഷ്മി അഷ്ടകം തുടങ്ങിയവ ഈ സമയത്ത് വായിക്കുന്നു. കേരളത്തിലെ പല ഭഗവതി ക്ഷേത്രങ്ങളിലും കർക്കിടക മാസം വിശേഷമാണ്.

അവതാരങ്ങൾ

വിഷ്ണുവിന്റെ പല അവതാരങ്ങളിലെ പത്നിയായി ലക്ഷ്മിയുടെ അവതാരവും കാണാം. ശ്രീരാമാവതാരത്തിൽ സീതയായും ശ്രീകൃഷ്ണാവതാരത്തിൽ രുക്മിണിയായും രാധയായും ലക്ഷ്മി അവതരിച്ചതായി പുരാണങ്ങളിൽ പറയപ്പെടുന്നു. പാലാഴിമഥനവേളയിൽ ലക്ഷ്മി അവതരിച്ചതായി മഹാഭാരതത്തിൽ, ഭാഗവതത്തിൽ പറയുന്നു. ദീപാവലി ലക്ഷ്മിയുടെ അവതാര ദിനമായി കണക്കാക്കപ്പെടുന്നു. ദുർഗാ പൂജയിൽ ബംഗാളിൽ, ലക്ഷ്മിയെ ദുർഗയുടെ മകളായി കരുതുന്നു.

ഐതീഹ്യം

ദേവീമാഹാത്മ്യത്തിൽ ത്രിമൂർത്തികളെയും ത്രിദേവിമാരെയും സൃഷ്ടിച്ചത് മഹാലക്ഷ്മി ആണെന്നും ദുർഗ്ഗയ്ക്കും, ഭുവനേശ്വരിയ്ക്കും മഹാലക്ഷ്മിയുമായി ഭേദമില്ല എന്നും പറയുന്നു. ‍മഹിഷാസുരനെ വധിക്കാൻ സിംഹാരൂഢയായി സർവ്വായുധധാരിയായി മഹാലക്ഷ്മി പ്രത്യക്ഷപ്പെട്ടതായി വിശ്വസിക്കപ്പെടുന്നു. നവരാത്രി, ദീപാവലി, വെള്ളിയാഴ്ച, ശ്രാവണ മാസത്തിലെ വരലക്ഷ്മി പൂജ ദിവസം എന്നിവ മഹാലക്ഷ്മി പ്രധാനമാണ്.

മഹിഷാസുരൻ ഒരിക്കൽ ബ്രഹ്മാവിനെ തപസ്സ് ചെയ്തു. കഠിനമായ പരീക്ഷണങ്ങൾക്ക് ഒടുവിൽ ബ്രഹ്മാവ് അവനിൽ പ്രസാദിച്ചു. എന്ത് വരമാണ് വേണ്ടത് എന്ന ഭഗവാന്റെ ചോദ്യത്തിന് അവൻ ഇങ്ങനെ മറുപടി പറഞ്ഞു.' ഭഗവാനെ, എനിക്ക് മരണമുണ്ടാകരുത്. മരണമില്ലാത്തവനാക്കണം'. ഭൂമിയിൽ പിറന്ന ആർക്കും എന്നെ വധിക്കാൻ കഴിയരുത്. മനുഷ്യരുടെ കൈ കൊണ്ട് എനിക്ക് മരണമുണ്ടാകരുത്, ദേവന്മാർക്ക് എന്നെ കൊല്ലാൻ കഴിയരുത്. മരണം അനിവാര്യമാണെങ്കിൽ അത് ഒരു സ്ത്രീയിലൂടെ മാത്രമാകണം. സ്ത്രീകൾ അബലയാണ്, അവർക്ക് ഒരിക്കലും ശക്തിമാനായ എന്നോട് പൊരുതാൻ കഴിയില്ല. അപ്പോൾ എനിക്ക് മരണവും ഉണ്ടാകില്ല.' ബ്രഹ്മാവ് ആ വരം നൽകി മഹിഷാസുരനെ അനുഗ്രഹിച്ചു. വരബലത്തിൽ അഹങ്കരിച്ച ഈ അസുരൻ ഭൂമിയിലും, ദേവലോകത്തും അക്രമം അഴിച്ചു വിട്ടു. ദേവൻമാരുടെ അപേക്ഷപ്രകാരം ത്രിമൂർത്തികൾ തങ്ങളുടെ ശക്തി സമന്വയിപ്പിച്ച് ഒരു പുതിയ സൃഷ്ടി നടത്തി. അതാണ് മഹാലക്ഷ്മി. തുടർന്ന് ദേവിയും മഹിഷാസുരനും തമ്മിൽ യുദ്ധമാകുകയും, അസുരനെ ചണ്ഡിക വധിക്കുകയും ചെയ്തു.

മഹാലക്ഷ്മി മഹിഷാസുരനെ നിഗ്രഹിച്ച ദിവസമാണ് വിജയദശമി. ഈ വേളയിൽ വ്രതമനുഷ്ഠിച്ച് ഭക്തന്മാർ കുമാരിമാരെയും ദമ്പതിമാരെയും ആചരിക്കണമെന്ന് പറയുന്നു.

വരലക്ഷ്മി പൂജയുടെ ഐതിഹ്യം

ശ്രാവണ മാസത്തിലെ (കർക്കടകം-ചിങ്ങം) പൗർണമിക്ക് തൊട്ടുമുമ്പുള്ള വെള്ളിയാഴ്ചയാണ് സാധാരണയായി വരലക്ഷ്മി പൂജ ആചരിക്കുന്നത്. വരലക്ഷ്മി വ്രതം അനുഷ്ഠിക്കുന്നതിലൂടെ അഷ്ടലക്ഷ്മിമാരുടെയും (ലക്ഷ്മീദേവിയുടെ എട്ട് ഭാവങ്ങൾ) അനുഗ്രഹം ലഭിക്കുമെന്നാണ് വിശ്വാസം. ധനം, ഭൂമി, വിദ്യ, വിജയം, ധൈര്യം, സന്താനം, ധാന്യം, ശക്തി എന്നിവയുടെ ദേവതകളാണ് ഈ എട്ട് ലക്ഷ്മിമാർ. അതിനാൽ ഈ പൂജ കുടുംബത്തിന് സമൃദ്ധിയും സന്തോഷവും നൽകുമെന്ന് വിശ്വസിക്കപ്പെടുന്നു.

വരലക്ഷ്മി പൂജയ്ക്ക് പിന്നിൽ രണ്ട് പ്രധാന കഥകളുണ്ട്, ഇവ രണ്ടും സ്കന്ദപുരാണത്തിൽ പരാമർശിച്ചിട്ടുണ്ട്.

• ഒന്നാമത്തെ കഥ

ചാരുമതി എന്ന ഒരു ദേവി ഭക്തയായ സ്ത്രീ മഗധ രാജ്യത്തിൽ ജീവിച്ചിരുന്നു. കുടുംബത്തോടൊപ്പം അതീവ ഭക്തിയോടെയാണ് അവൾ ജീവിച്ചിരുന്നത്.

ഒരു ദിവസം, ഭഗവാൻ മഹാവിഷ്ണു അവളുടെ സ്വപ്നത്തിൽ പ്രത്യക്ഷപ്പെട്ടു. ശ്രാവണമാസത്തിലെ പൗർണമിക്ക് തൊട്ടുമുമ്പുള്ള വെള്ളിയാഴ്ച വ്രതമെടുത്ത് വരലക്ഷ്മിയെ ആരാധിക്കാൻ ഭഗവാൻ ചാരുമതിയോട് ആവശ്യപ്പെട്ടു. അങ്ങനെ ചെയ്താൽ എല്ലാ ആഗ്രഹങ്ങളും നിറവേറുമെന്നും സമ്പത്തും ഐശ്വര്യവും എപ്പോഴും ജീവിതത്തിൽ ഉണ്ടാകുമെന്നും ഭഗവാൻ പറഞ്ഞു. ഉണർന്നപ്പോൾ ചാരുമതി ഈ സ്വപ്നത്തെക്കുറിച്ച് ഭർത്താവിനോടും കുടുംബത്തോടും പറഞ്ഞു. ചാരുമതി പട്ടണത്തിലെ മറ്റ് സ്ത്രീകളെയും ഈ വിവരം അറിയിച്ചു. അതനുസരിച്ച്, അവളും പട്ടണത്തിലെ മറ്റു സ്ത്രീകളും ചേർന്ന് ഭക്തിയോടെ വ്രതമെടുക്കുകയും പൂജകൾ നടത്തുകയും ചെയ്തു. ചാരുമതിയുടെ ഭക്തിയിൽ പ്രസാദിച്ച് മഹാലക്ഷ്മി എല്ലാവർക്കും ഐശ്വര്യവും സൗഭാഗ്യവും നൽകി അനുഗ്രഹിച്ചു. അന്നുമുതൽ വരലക്ഷ്മി വ്രതം ഒരു പ്രധാന ആചാരമായി മാറി.

• രണ്ടാമത്തെ കഥ*

ശിവൻ പാർവതിക്ക് വരലക്ഷ്മി വ്രതത്തിന്റെ പ്രാധാന്യം വിശദീകരിക്കുന്ന മറ്റൊരു കഥയുമുണ്ട്. ഐശ്വര്യവും സമ്പത്തും ദാരിദ്ര്യമുക്തിയും ലഭിക്കുന്നതിന് വേണ്ടി സ്ത്രീകൾക്ക് ചെയ്യാൻ സാധിക്കുന്ന പൂജ ഏതാണ് എന്ന ചോദ്യത്തിന് അത് വരലക്ഷ്മി പൂജയാണ് എന്ന്‌ മഹാദേവൻ മറുപടി പറയുന്നു. ഇതിൽ, സാക്ഷാൽ ലക്ഷ്മിദേവി തന്നെയാണ് പദ്മാവതിയോട് ഈ വ്രതവും പൂജയും അനുഷ്ഠിക്കാൻ ആവശ്യപ്പെടുന്നത്. പത്മവതിയുടെ ഭക്തിയിൽ സംതൃപ്തയായ ഭഗവതി, അവൾക്ക് മോക്ഷം ലഭിക്കാൻ ഈ പൂജ സഹായകമാകുമെന്ന് പറഞ്ഞു. ഈ രണ്ടു കഥകളുടെയും സാരം, ഭക്തിയോടെ വരലക്ഷ്മി പൂജ ചെയ്യുന്നവർക്ക് അഷ്ടലക്ഷ്മികളുടെ (ധനം, ധാന്യം, ധൈര്യം, വിജയം, ആരോഗ്യം, സന്താനം, ഗജ, വിദ്യ) അനുഗ്രഹം ലഭിക്കുമെന്നും കുടുംബത്തിൽ ഐശ്വര്യവും സന്തോഷവും നിലനിൽക്കുമെന്നുമാണ്.

പ്രധാന ക്ഷേത്രങ്ങൾ

പ്രധാനപ്പെട്ട ചിലക്ഷേത്രങ്ങൾ താഴെ കൊടുക്കുന്നു.

കേരളത്തിൽ

• ചോറ്റാനിക്കര ശ്രീ ഭഗവതി ക്ഷേത്രം, എറണാകുളം
• കുമാരനെല്ലൂർ ശ്രീ ഭഗവതി ക്ഷേത്രം, കോട്ടയം
• പാലക്കാട്‌ ശ്രീ ഹേമാംബിക ക്ഷേത്രം, എമൂർ
• ഊരകം അമ്മത്തിരുവടി ക്ഷേത്രം, തൃശൂർ
• പഴയ കല്പാത്തി ലക്ഷ്മിനാരായണ ക്ഷേത്രം, പാലക്കാട്‌
• ശ്രീവരാഹം ലക്ഷ്മി വരാഹമൂർത്തി ക്ഷേത്രം, തിരുവനന്തപുരം
• ശാസ്‌തമംഗലം മഹാലക്ഷ്മി പ്രത്യംഗിരിദേവി ക്ഷേത്രം, തിരുവനന്തപുരം
• മരുതത്തൂർ മഹാലക്ഷ്മി ക്ഷേത്രം, നെയ്യാറ്റിൻകര
• ലക്ഷ്മിനട മഹാലക്ഷ്മി ക്ഷേത്രം, കൊല്ലം
• കടവിൽ ശ്രീ മഹാലക്ഷ്മി ക്ഷേത്രം, ചേർത്തല, ആലപ്പുഴ ജില്ല
• പാഞ്ഞാൾ ലക്ഷ്മിനാരായണ ക്ഷേത്രം, തൃശൂർ
• പാരിപ്പള്ളി വവ്വാക്കുന്ന് ലക്ഷ്മി നാരായണ ക്ഷേത്രം, കൊല്ലം
• ശ്രീ അമരാവതി മഹാലക്ഷ്മി ക്ഷേത്രം, ചെങ്ങന്നൂർ.
• ചൊവ്വൂർ ശ്രീ മഹാലക്ഷ്മി ക്ഷേത്രം, തൃശൂർ
• മുണ്ടേരി ശ്രീ മഹാലക്ഷ്മി ക്ഷേത്രം
• ശബരിമല മാളികപ്പുറം ഭഗവതി ക്ഷേത്രം (ക്ഷേത്ര ശ്രീകോവിലിന്റെ ഭിത്തിയിൽ അഷ്ടലക്ഷ്മിമാരെ കൊത്തി വച്ചിരിക്കുന്നതായി കാണാം)

ഇന്ത്യയിൽ

• കൊല്ലൂർ മൂകാംബിക, കർണാടക
• കാഞ്ചിപുരം കാമാക്ഷി ക്ഷേത്രം, തമിഴ്നാട്
• ശ്രീപുരം മഹാലക്ഷ്മി സുവർണ്ണ ക്ഷേത്രം, വെല്ലൂർ, തമിഴ്നാട്
• തിരുച്ചാനൂർ പദ്മാവതി ക്ഷേത്രം, തിരുപ്പതി, ആന്ധ്രാ പ്രദേശ്
• മുംബൈ മഹാലക്ഷ്മി ക്ഷേത്രം, മഹാരാഷ്ട്ര
• കോലാപ്പൂർ മഹാലക്ഷ്മി ക്ഷേത്രം, മഹാരാഷ്ട്ര
• കത്ര വൈഷ്ണോദേവി ക്ഷേത്രം, ജമ്മുകശ്മീർ

വിശേഷ ദിവസങ്ങൾ, അനുഷ്‌ഠാനങ്ങൾ

വെള്ളിയാഴ്ച, പൗർണ്ണമി എന്നിവ പ്രധാന ദിവസങ്ങൾ. നവരാത്രി, ദീപാവലി, തൃക്കാർത്തിക, അക്ഷയതൃതീയ, ശ്രാവണ മാസത്തിലെ/ ആടിമാസത്തിലെ (ജൂലൈ-ഓഗസ്റ്റ്) പൗർണമിക്ക് മുമ്പുള്ള വരലക്ഷ്മി വെള്ളിയാഴ്ച (വരലക്ഷ്മി പൂജ), മാസത്തിലെ ആദ്യത്തെ വെള്ളിയാഴ്ച അഥവാ മുപ്പട്ടു വെള്ളിയാഴ്ച എന്നിവയാണ് മഹാലക്ഷ്മിക്ക് അതീവ പ്രാധാന്യം ഉള്ള വിശേഷ ദിവസങ്ങൾ.

വരലക്ഷ്മി പൂജ

സമ്പത്തിന്റെ ഭഗവതിയായ ലക്ഷ്മിയുടെ അനുഗ്രഹത്തിനായി ദക്ഷിണേന്ത്യൻ സംസ്ഥാനങ്ങളിൽ ആചരിക്കുന്ന ഉത്സവമാണ് വരലക്ഷ്മി പൂജ അഥവാ വരലക്ഷ്മി വ്രതം അല്ലെങ്കിൽ വരമഹാലക്ഷ്മി വ്രതം. തമിഴ്‌നാട്, ആന്ധ്രാപ്രദേശ്, തെലങ്കാന, കർണാടക തുടങ്ങിയ സംസ്ഥാനങ്ങളിൽ വരലക്ഷ്മി വ്രതം വിശാലമായി ആഘോഷിക്കുന്നു. ഉത്തരേന്ത്യൻ സംസ്ഥാനങ്ങളിൽ വരമഹാലക്ഷ്മി പൂജ എന്ന പേരിൽ ഇത് ആഘോഷിക്കപ്പെടുന്നു. കേരളത്തിലും ഈ പൂജ കാണപ്പെടുന്നുണ്ട്. വീടുകളിൽ മഹാലക്ഷ്മിയെ കുടിയിരുത്തി പൂജ ചെയ്യുന്നു.

പൊതുവേ ശ്രാവണ മാസത്തിലെ/ ആടിമാസത്തിലെ (ജൂലൈ-ഓഗസ്റ്റ്) പൗർണമിക്ക് മുമ്പുള്ള വെള്ളിയാഴ്ചയാണ് വരലക്ഷ്മി വ്രതം ആചരിക്കുന്നത്. ആഹാരം ഒഴിവാക്കി പട്ടിണി കിടന്ന് കൊണ്ട് ഈ വ്രതം എടുക്കാൻ പാടില്ല എന്നാണ് വിശ്വാസം. മഹാലക്ഷ്മിയെ വീട്ടിലേക്ക് ക്ഷണിച്ചു കൊണ്ടാണ് ഈ പൂജ നടത്തുന്നത്. ഇന്ന് ബിസിനസ്‌ സ്ഥാപനങ്ങളിൽ വച്ചും ഓഫീസുകളിൽ വച്ചും ഈ പൂജ നടത്താറുണ്ട്. സ്ഥാപനത്തിന്റെ ‌അഭിവൃദ്ധിക്ക്‌ വേണ്ടിയാണ് ഇങ്ങനെ ചെയ്യുന്നത് എന്നാണ് വിശ്വാസം. ഭഗവതി ഭക്തരായ ഏതൊരു വ്യക്തികൾക്കും സ്ത്രീപുരുഷ ഭേദമന്യേ ആർക്കും നേരിട്ട് ഈ പൂജ ചെയ്യാവുന്നതാണ് എന്നാണ് വിശ്വാസം. ലളിതമായ ഈ പൂജ വീട്ടിൽ വച്ചു ഭക്തർ സ്വകാര്യമായി ചെയ്യുന്നു. ഈ പൂജയ്ക്ക് ഒരു പുരോഹിതന്റെ ആവശ്യമില്ല. പൊതുവേ ദേവി ഭക്തരായ സ്ത്രീകൾ ഈ പൂജ ചെയ്യുന്നതാണ് ഉത്തമം എന്ന്‌ പുരാണങ്ങൾ പറയുന്നു. സ്ത്രീകൾക്ക്‌ യാതൊരു വിധ അശുദ്ധിയും ഈ ഭഗവതി പൂജയിൽ ഇല്ല എന്നാണ് വിശ്വാസം.

ഈ ദിവസം വരലക്ഷ്മി ഭാവത്തെ ആരാധിക്കുന്നത് സമ്പത്തിന്റെ എട്ട് രൂപങ്ങളെ പ്രതിനിധീകരിക്കുന്ന അഷ്ടലക്ഷ്മിമാരെയും ആരാധിക്കുന്നതിന് തുല്യമാണെന്ന് വിശ്വസിക്കുന്നു. വെള്ളിയാഴ്ച രാവിലെയോ വൈകുന്നേരമോ ആളുകൾ അവരുടെ സൗകര്യത്തിനനുസരിച്ച് പൂജ നടത്തുന്നു. അതിന്റെ ചടങ്ങുകൾ ഇങ്ങനെയാണ്.

ആദ്യം ഗണേശപൂജ, അതിനു ശേഷം വരലക്ഷ്മി പൂജ എന്നിങ്ങനെ ആണ് ഇതിന്റെ ക്രമം. അതിനുവേണ്ടി ആദ്യമായി ഗണപതിക്ക്‌‌ വയ്ക്കൽ അഥവാ ഗണപതി ഒരുക്ക് വച്ച് ഗണപതിയോട് പ്രാർഥന നടത്തുന്നു. അവൽ, മലർ, പഴം, ഒരു കിണ്ടിയിൽ ജലം എന്നിവയാണ് ഗണപതിക്ക്‌ വയ്ക്കാറുള്ളത്. തുടർന്ന് മഹാലക്ഷ്മിയെ വീട്ടിലേക്ക് ഔപചാരികമായി സ്വീകരിക്കുന്നതോടെയാണ് പൂജ ആരംഭിക്കുന്നത്.

ഒരു താമ്പാളത്തിൽ അഥവാ താലത്തിൽ അരിയോ ഗോതമ്പോ വിതറി അതിനു മുകളിൽ കലശം, പഴം, വെറ്റില, പൂക്കൾ തുടങ്ങിയവ വെക്കുന്നു. അതിനുശേഷം പായസം, അപ്പം, ലഡ്ഡു, തൈര്, പാൽ, നെയ്യ്, തേൻ എന്നിവയിൽ പറ്റാവുന്നവ കഴിവുപോലെ കലശത്തിന് മുന്നിൽ സൂക്ഷിക്കുന്നു. വാഴപ്പഴം, ഓറഞ്ച്, മാതളം, നാരങ്ങ, മാമ്പഴം, മുന്തിരി തുടങ്ങിയ ഏതെങ്കിലുമൊക്കെ പഴങ്ങളും ഭഗവതിക്ക് നിവേദ്യത്തിനായി വെക്കുന്നു. ചിലർ കലശത്തിന് പകരം ലളിതമായി മഹാലക്ഷ്മിയുടെ ചിത്രം വച്ചും ചെയ്യുന്നു.

അതിനു ശേഷം ഭക്തർ അകത്തേക്ക് പ്രവേശിക്കുന്ന മുൻവശത്തെ പ്രധാന വാതിലിനടുത്ത് നിൽക്കുകയും പുറത്തേക്ക് കർപ്പൂര ആരതി ഉഴിയുകയും മഹാലക്ഷ്മിയെ വീട്ടിലേക്ക് പ്രാർഥനയോടെ ക്ഷണിക്കുകയും ചെയ്യുന്നു. മഹാലക്ഷ്മി ഭവനത്തിൽ പ്രവേശിച്ചുവെന്ന് വിശ്വസിച്ച്, താമ്പാള പാത്രത്തിൽ ഇരിക്കാൻ ഭഗവതിയോട് പ്രാർത്ഥിക്കുന്നു. തുടർന്ന് വിളക്ക് കൊളുത്തി ലക്ഷ്മിദേവിക്ക് പൂക്കൾ അർപ്പിച്ചു കൊണ്ട് ദേവി സ്തുതികൾ ചൊല്ലി പ്രാർഥിക്കുന്നു. ലക്ഷ്മി സ്തോത്രങ്ങളും ചൊല്ലുന്നു. ഉദാഹരണത്തിന് മഹാലക്ഷ്മി അഷ്ടകം, ലക്ഷ്മി അഷ്ടോത്തരം, കനകധാരാ സ്തോത്രം, മഹാലക്ഷ്മി സ്തവം തുടങ്ങിയവ. എന്നിരുന്നാലും ഈ പൂജയ്ക്ക് ഏറ്റവും കൂടുതൽ ചൊല്ലുന്ന രണ്ട് കീർത്തനങ്ങൾ താഴെ കൊടുക്കുന്നു. “ഭാഗ്യാദ ലക്ഷ്മി വാരമ്മ", "ലക്ഷ്മീ രാവേ മാ ഇന്തികി ക്ഷീരബ്ധി പുത്രി” തുടങ്ങിയവ ആണത്.

“മഹാലക്ഷ്മി ‌ഞങ്ങളുടെ വീട്ടിൽ സ്ഥിരമായി താമസിക്കണം. നീ ഞങ്ങൾക്ക്‌ എല്ലാ സമ്പത്തും ആഹാരവും അനുഗ്രഹങ്ങളും തരണം. തൊഴിലിൽ അഭിവൃദ്ധിയും സൗഭാഗ്യവും നൽകണം. സാമ്പത്തിക പ്രശ്നങ്ങൾ, ദാരിദ്ര്യം എന്നിവ തീർത്ത് തരണം. ഞങ്ങൾക്ക് ഒരിക്കലും ദാരിദ്ര്യവും കടവും ഉണ്ടാകരുത്. ഇക്കൊല്ലം നല്ല വിളവ് ലഭിക്കണം. ലോകത്തിലെ സകല സജ്ജനങ്ങളെയും അനുഗ്രഹിക്കണം' എന്ന പ്രാർഥനയോടെയാകും വരലക്ഷ്‌മി പൂജ നടത്തുക. പൂജ ചെയ്യുന്ന സ്ത്രീ കർപ്പൂരം കത്തിച്ചു ആരതി ഉഴിയുന്നതോടെ ചടങ്ങുകൾ പൂർത്തിയാകുന്നു.

പൂജ പൂർത്തിയായാൽ കുടുംബത്തിലെ മുതിർന്ന സ്ത്രീകൾക്കാണ് ആദ്യം പ്രസാദം നൽകേണ്ടത്. തുടർന്ന് മറ്റ് യുവതികൾക്കും നൽകുന്നു. ഇവിടെ സ്ത്രീകളെ ലക്ഷ്മിയുടെ പ്രതീകമായി കാണുന്നു. അതിനുശേഷം മാത്രമാണ് പുരുഷന്മാർക്ക് നൽകുക. പായസം, പഴങ്ങൾ പോലെയുള്ള മേല്പറഞ്ഞ പൂജയ്ക്ക് ഉപയോഗിച്ച നിവേദ്യങ്ങൾ ആണ് പ്രസാദമായി നൽകുക. ഇത് എല്ലാവരും ഭക്ഷിക്കുന്നു.

ഭക്തർ വർഷം തോറും ശ്രാവണ മാസം ഈ പൂജ ചെയ്യുന്നു. മറ്റു ചിലർ വരലക്ഷ്മി വ്രതാനുഷ്‌ഠാനം മാസത്തിലെ ഒരു വെള്ളിയാഴ്ചയോ (മുപ്പട്ടു വെള്ളിയാഴ്ച) നവരാത്രി ദിവസങ്ങളിലൊ ദീപാവലി സമയത്തോ ചെയ്യുന്നു. ഈ പൂജ കൊണ്ട് ഭവനത്തിൽ മഹാലക്ഷ്‌മിയുടെ അനുഗ്രഹം ലഭിക്കും എന്നതാണ് വിശ്വാസം. ശ്രാവണ മാസം (ആടി മാസം) ലക്ഷ്മീ പൂജ തുടങ്ങുവാൻ ഏറ്റവും അനുകൂലമായ മാസമാണ് എന്നാണ് വിശ്വാസം. പൊതുവേ ശ്രാവണ മാസം ജൂലൈ ആരംഭിച്ച് ആഗസ്ത് മാസത്തിൽ അവസാനിക്കും.

കേരളത്തിൽ സമാനമായി കർക്കിടക മാസത്തിൽ ശ്രീ ഭഗവതി പൂജ, ഭഗവതി സേവ, ഭുവനേശ്വരി പൂജ എന്നിവ കാണാം. ഇതും ഐശ്വര്യത്തിന് വേണ്ടി നടത്തുന്ന പൂജയാണ്.

സ്തോത്രങ്ങൾ

കനകധാരാ സ്തോത്രം, മഹാലക്ഷ്മി അഷ്ടകം, മഹാലക്ഷ്മി സ്തവം, ദേവിമാഹാത്മ്യം, ദേവി ഭാഗവതം, ലളിത സഹസ്രനാമം എന്നിവ ഭഗവതിയുടെ സ്തുതിക്കുന്ന സ്തോത്രങ്ങൾ ആണ്.