പയ്യന്നൂർ

ഇംഗ്ലീഷ് വിലാസം

https://ml.wikipedia.org/wiki/Payyanur

പയ്യന്നൂർ എന്ന വാക്കാൽ വിവക്ഷിക്കാവുന്ന ഒന്നിലധികം കാര്യങ്ങളുണ്ട്. അവയെക്കുറിച്ചറിയാൻ പയ്യന്നൂർ (വിവക്ഷകൾ) എന്ന താൾ കാണുക.

പയ്യന്നൂർ
Skyline of , India
പയ്യന്നൂർ
12°06′N 75°12′E / 12.1°N 75.2°E / 12.1; 75.2
ഭൂമിശാസ്ത്ര പ്രാധാന്യം	പട്ടണം
രാജ്യം	ഇന്ത്യ
സംസ്ഥാനം	കേരളം
ജില്ല	കണ്ണൂർ
ഭരണസ്ഥാപനം(ങ്ങൾ)	നഗരസഭ
ചെയർപേഴ്സൺ	കെ.വി. ലളിത
'
'
വിസ്തീർണ്ണം	54.63ചതുരശ്ര കിലോമീറ്റർ
ജനസംഖ്യ	72,111
ജനസാന്ദ്രത	1320/ച.കി.മീ
കോഡുകൾ • തപാൽ • ടെലിഫോൺ	670307 +91 4985
സമയമേഖല	UTC +5:30
പ്രധാന ആകർഷണങ്ങൾ	പയ്യന്നൂർ സുബ്രഹ്മണ്യസ്വാമിക്ഷേത്രം, പയ്യന്നൂർ പവിത്ര മോതിരം

കേരളത്തിലെ കണ്ണൂർ ജില്ലയുടെ വടക്കേയറ്റത്ത് സ്ഥിതിചെയ്യുന്ന ഒരു പ്രധാന പട്ടണമാണ്‌ പയ്യന്നൂർ. ദേശീയപാത 66ൽ പെരുമ്പ പുഴയുടെ തീരത്താണ് ഈ പട്ടണം സ്ഥിതി ചെയ്യുന്നത്. ഇന്ത്യൻ സ്വാതന്ത്ര്യ സമര ചരിത്രത്തിലെ നാഴികക്കല്ലായ ഉപ്പ് സത്യാഗ്രഹത്തിന് വേദിയായ പയ്യന്നൂർ കേരള ചരിത്രത്തിലും പ്രധാന പങ്ക് വഹിച്ചിട്ടുണ്ട്.

പേരിനു പിന്നിൽ

പയ്യന്നൂർ എന്ന പേരിന്റെ നിഷ്പത്തിയെക്കുറിച്ച് പല വാദങ്ങൾ നിലവിലുണ്ട്. സംഘരാജവായിരുന്ന പഴൈയെന്റെ ഊരാണ് പയ്യന്നൂർ ആയതെന്നാണ് ഡോ. എം. ജി എസ് നാരായണൻ പറയുന്നത്. സുബ്രഹ്മണ്യസ്വാമിക്ഷേത്രം സ്ഥിതി ചെയ്യുന്നതിനാൽ പയ്യന്റെ (സുബ്രഹ്മണ്യസ്വാമി) ഊര് എന്ന അർത്ഥത്തിലാണ് ഈ പേരു വന്നത് എന്നും വാദിക്കുന്നവരുണ്ട്. ^{[അവലംബം ആവശ്യമാണ്]}.

ഐതിഹ്യം

പരശുരാമൻ മഴുവെറിഞ്ഞു സിന്ധു സമുദ്രത്തിൽ നിന്നും വീണ്ടെടുത്ത കന്യാകുമാരി മുതൽ ഗോകർണം വരെയുള്ള കര 64 ഗ്രാമങ്ങളായി വിഭജിച്ചു - 32 മലയാള ഗ്രാമങ്ങളും 32 തുളു ഗ്രാമങ്ങളും. അവസാന മലയാള ഗ്രാമം പയ്യന്നൂർ ആയിരുന്നു. ശ്രീ സുബ്രമണ്യ സ്വാമി ക്ഷേത്രമായിരുന്നു പയ്യന്നുരിന്റെ ഗ്രാമക്ഷേത്രം. തുളുവന്നൂർ ആയിരുന്നു തൊട്ടടുത്ത തുളുഗ്രാമം.^{[അവലംബം ആവശ്യമാണ്]}

സ്വാതന്ത്ര്യസമരചരിത്രം

സൈമൺ കമ്മിഷൻ ബഹിഷ്കരണ സമരത്തെ തുടർന്നു 1928ലാണ് പയ്യന്നൂരിന്റെ രാഷ്ട്രീയ സമരച്ചരിത്രം ആരംഭിക്കുന്നത് . ജവഹർ ലാൽ നെഹ്രുവിന്റെ അധ്യക്ഷതയിൽ പയ്യന്നൂരിൽ ചേർന്ന കെ പി സി സി സമ്മേളണം പൂർണസ്വരാജ് പ്രമേയം പാസ്സാക്കി കോൺഗ്രസിന്റെ ചരിത്രത്തിലെ സുപ്രധാന നാഴികക്കല്ലുകളിലൊന്നായ ദണ്ഡിയാത്രയ്ക്ക്‌ ഐക്യദാർഡിയമായി 1930 ഏപ്രിൽ 13ന്‌ ഉപ്പുണ്ടാക്കി സത്യഗ്രഹം നടത്താൻ കേരളത്തിലെ നേതാക്കൾ തയ്യാറായി. കെ. കേളപ്പന്റെ നേതൃത്വത്തിൽ പയ്യന്നൂർ കടപ്പുറമാണ്‌ കേരളത്തിലെ ഉപ്പുസത്യാഗ്രഹത്തിന്‌ വേദിയായത്‌. കോഴിക്കോട്‌ നിന്നായിരുന്നു ജാഥ പുറപ്പെട്ടത്‌. ഒയ്യാരത്ത്‌ ശങ്കരൻ നമ്പ്യാരും സി.എച്ച്‌. ഗോവിന്ദൻ നമ്പ്യാരുമായിരുന്നു ജാഥ നയിച്ചത്‌. അവർ ഏപ്രിൽ 22ന്‌ പയ്യന്നൂരിലെത്തി 23ന്‌ കാലത്ത്‌ കെ. കേളപ്പന്റെ നേതൃത്വത്തിൽ പയ്യന്നൂർ കടലിൽ നിന്നും വെള്ളം എടുത്ത്‌ കുറിക്കി ഉപ്പുണ്ടാക്കുകയും പയ്യന്നൂർ അങ്ങാടിയിൽ അത്‌ വിൽക്കുകയും ചെയ്തു.

വിദേശവസ്ത്ര ബഹിഷ്കരണം, ഖാദി പ്രചരണം മദ്യവർജ്ജനം, അയിത്തോച്ചാടനം എന്നീ സാമൂഹ്യപ്രവർത്തനങ്ങളെല്ലാം പയ്യന്നൂരിൽ സജീവമായിരുന്നു. 1934ൽ ഹരിജൻ ഫണ്ട് ഏറ്റുവാങ്ങുന്നതിനായി ഗാന്ധിജി പയ്യന്നൂരിൽ വന്നിരുന്നു. 1953ൽ ആചാര്യ വിനോബാ ഭാവേയും പയ്യന്നൂരിൽ വരികയുണ്ടായി^[1].

ചിറക്കൽ ‌‌‌തമ്പുരാന്റെ അധികാര പരിധിയിലായിരുന്നു പയ്യന്നൂരിലെ ഭൂമിയിൽ കർഷകർക്കും തൊഴിലാളികൾക്കും അടിമകളെ പോലെ ജീവിക്കേണ്ടി വന്നിരുന്നു. ചൂഷണവും മർദ്ദനവും കൊണ്ട് പൊറുതിമുട്ടിയ ജീവിതം. വഴിനടക്കാനും വിദ്യനേടാനും ഇവിടെയും പോരാട്ടം നടന്നു. വഴിനടക്കാനുള്ള അവകാശത്തിനു വേണ്ടിയുള്ള സമരത്തിൽ എ.കെ.ജി. തല്ല് കൊണ്ട് ബോധംകെട്ടുവീണത് പയ്യന്നൂരിലാണ്^[1]. തുടർന്നുണ്ടായ പോലീസ് വെടിവെപ്പിൽ ബി. പൊക്കനെന്ന ഹരിജൻ കർഷകത്തൊഴിലാളി മരണപ്പെട്ടു. കോറോം വെടിവെപ്പിനെ തുടർന്ന് ഒളിവിൽ പോയവരാണ് 1948ൽ മുനയൻകുന്നിൽ വെടിയെറ്റ് മരിച്ചത്^[1].

സ്വാമി ആനന്ദതീർത്ഥരുടെ ശ്രീനാരായണ വിദ്യാലയം ഹരിജനോദ്ധാണ പ്രവർത്തനങ്ങൾക്ക് നേതൃത്വം നൽകി.

പവിത്ര മോതിരം

പയ്യന്നൂർ പവിത്രമോതിരം ഏറെ പ്രശസ്തമാണ്. ക്ഷേത്രത്തിന്റെ പുനഃനിർമ്മാണ സമയത്ത് രൂപകല്പന ചെയ്യപ്പേട്ടതാണ്‌ പവിത്രമോതിരം.

ഗതാഗതം

പയ്യന്നൂരിൽ നഗരസഭാ ബസ് സ്റ്റാൻഡ് കേന്ദ്രീകരിച്ചാണ് ഈ മേഖലയിലെ സ്വകാര്യ ബസുകൾ സർവീസ് നടത്തുന്നത്. പുതുതായി ഒരു ബസ് സ്റ്റാൻഡ് നിർമിക്കുവാൻ നഗരസഭ പദ്ധതിയിൽ ഉൾപ്പെടുത്തിയിട്ടുണ്ട്. ദീർഘദൂര സർവീസുകൾ ഉൾപ്പടെയുള്ളവ പെരുമ്പയിൽ സ്ഥിതി ചെയ്യുന്ന പയ്യന്നൂർ കെഎസ്ആർടിസി സബ് ഡിപ്പോയിൽ നിന്നും സർവീസ് നടത്തുന്നു.

പ്രധാന പാതകൾ

ദേശീയപാത 66 പെരുമ്പയിലൂടെ കടന്നുപോകുന്നു. ഇത് പയ്യന്നൂരിനെ വടക്ക് മംഗലാപുരമായും മുംബൈയുമായും തെക്ക് കൊച്ചിയുംമായും തിരുവനന്തപുരമായും ബന്ധിപ്പിക്കുന്നു.

പയ്യന്നൂരിനെ കിഴക്കൻ മലയോര മേഖലയുമായി ബന്ധിപ്പിക്കുന്ന ഒരു പ്രധാന പാതയാണ് വെള്ളൂർ(കോത്തായിമുക്ക്)-പുളിങ്ങോം-രാജഗിരി റോഡ്. മലബാർ കുടിയേറ്റവുമായി ബന്ധപ്പെട്ടാണ് ഈ പാതയുടെ വികസനപ്രാധാന്യം വർധിച്ചത്. മലയോര മേഖലയിലെ പെരിങ്ങോം, പാടിയോട്ടുചാൽ, ചെറുപുഴ, പുളിങ്ങോം, കോഴിച്ചാൽ, രാജഗിരി എന്നീ പ്രദേശങ്ങളെ പയ്യന്നൂരുമായി ബന്ധിപ്പിക്കുന്നു.

പയ്യന്നൂർ പട്ടണത്തെ പയ്യന്നൂർ തീവണ്ടി നിലയം, ഏഴിമല നാവിക അക്കാദമി, രാമന്തളി, പാലക്കോട്, എട്ടിക്കുളം എന്നീ പടിഞ്ഞാറൻ തീരപ്രദേശങ്ങളെ ബന്ധിപ്പിക്കുന്ന സുപ്രധാന പാതയാണ് പയ്യന്നൂർ ഏഴിമല റോഡ്. പയ്യന്നൂർ പട്ടണത്തിൻ്റെ ജീവനാഡിയാണ് ഈ പാത.

പയ്യന്നൂർ പട്ടണത്തെ തൃക്കരിപ്പൂരുമായും കാസറഗോഡ് ജില്ലയുമായും ബന്ധിപ്പിക്കുന്ന പ്രധാന പാതകളാണ് പയ്യന്നൂർ റെയിൽവേ മേൽപ്പാലം-ഒളവറ-തൃക്കരിപ്പൂർ റോഡും കാര-തലിച്ചാലം-തൃക്കരിപ്പൂർ-മണിയാട്ട്-ചന്തേര പാതയും.

പയ്യന്നൂരിനെ മാതമംഗലവുമായി ബന്ധിപ്പിക്കുന്ന മറ്റൊരു മലയോര പാതയാണ് പെരുമ്പ-മണിയറ-മാതമംഗലം റോഡ്. ഈ അടുത്ത കാലത്താണ് പാത നവീകരിച്ച് ഗതാഗതത്തിനായി തുറന്നുകൊടുത്തത്.

റെയിൽവേ മാർഗം

പയ്യന്നൂർ തീവണ്ടി നിലയം പയ്യന്നൂർ ബസ് സ്റ്റാൻഡിൽ നിന്നും 2.8 കിലോമീറ്റർ അകലെയാണ്. ദക്ഷിണ റെയിൽവേയ്ക്കു കീഴിൽ മംഗലാപുരം-ഷൊർണൂർ റെയിൽ പാതയിലെ പ്രധാന സ്റ്റേഷനായ പയ്യന്നൂരിൽ നിന്നും രാജ്യത്തിൻ്റെ വിവിധ ഭാഗങ്ങളിലേക്ക് ട്രെയിനുകൾ ലഭ്യമാണ്.

വിമാന മാർഗം

പയ്യന്നൂരിൽ നിന്നും 57 കിലോമീറ്റർ അകലെയുള്ള കണ്ണൂർ വിമാനത്താവളമാണ് ഏറ്റവും അടുത്ത് സ്ഥിതി ചെയ്യുന്ന അന്താരാഷ്ട്ര വിമാനത്താവളം. ഗൾഫ് രാജ്യങ്ങളിലേക്കാണ് അന്താരാഷ്ട്ര വിമാനങ്ങൾ സർവീസ് നടത്തുന്നത്. ഇന്ത്യയിലെ പ്രധാന നഗരങ്ങളിലേയ്ക്ക് ആഭ്യന്തര വിമാന സർവീസുകളും ലഭ്യമാണ്. മംഗലാപുരം, കോഴിക്കോട് വിമാനത്താവളങ്ങളും അധികം ദൂരെയല്ല.