പൊന്നാനി

വിക്കിപീഡിയ, ഒരു സ്വതന്ത്ര വിജ്ഞാനകോശം.
(പൊന്നാ‍നി എന്ന താളിൽ നിന്നും തിരിച്ചുവിട്ടതു പ്രകാരം)
Jump to navigation Jump to search
പൊന്നാനി
അപരനാമം: ചെറിയ മക്ക
Kerala locator map.svg
Red pog.svg
പൊന്നാനി
10°54′04″N 75°55′16″E / 10.9010°N 75.9211°E / 10.9010; 75.9211
ഭൂമിശാസ്ത്ര പ്രാധാന്യം തീരദേശ ഗ്രാമം, പട്ടണം.
രാജ്യം ഇന്ത്യ
സംസ്ഥാനം കേരളം
ജില്ല മലപ്പുറം
ഭരണസ്ഥാപനങ്ങൾ മുനിസിപ്പാലിറ്റി
പഞ്ചായത്ത്
ചെയർമാൻ മുഹമ്മദ്‌ കുഞ്ഞി
വിസ്തീർണ്ണം 23.32ചതുരശ്ര കിലോമീറ്റർ
ജനസംഖ്യ 90442
ജനസാന്ദ്രത 3878/ച.കി.മീ
കോഡുകൾ
  • തപാൽ
  • ടെലിഫോൺ
 
679586-679577-679583
+0494
സമയമേഖല UTC +5:30
പ്രധാന ആകർഷണങ്ങൾ പുറത്തൂർ പക്ഷിസങ്കേതം, ബിയ്യം കായൽ, പുതുപൊന്നാനി മുനബം, പൊന്നാനി അഴിമുഖം

കേരളത്തിലെ മലപ്പുറം ജില്ലയിലെ ഒരു പുരാതന തുറമുഖ നഗരമാണ് പൊന്നാനി. അറബിക്കടലിന്റെ തീരത്താണ് ഈ നഗരം സ്ഥിതിചെയ്യുന്നത്. മലപ്പുറം ജില്ലയിലെ ഒരേയൊരു തുറമുഖവും പൊന്നാനിയിലാണ്. എ.ഡി ഒന്നാം നൂറ്റാണ്ടിൽ എഴുതപ്പെട്ട 'എരിത്രിയൻ കടലിലെ പെരിപ്ലസ്' (English: Periplus of the Erythraean Sea) എന്ന ഗ്രീക്ക് ഗ്രന്ഥത്തിൽ പരാമർശിക്കപ്പെടുന്ന തിണ്ടിസ് (English: Tyndis) എന്ന തുറമുഖ നഗരം പൊന്നാനിയാണെന്ന് പ്രമുഖ ചരിത്രകാരന്മാർ അഭിപ്രായപ്പെടുന്നു[1].

ചരിത്രം[തിരുത്തുക]

പൊന്നാനിയുടെ ചരിത്രം മിത്തുകളുമായും പുരാണങ്ങളുമായും കൂടിക്കുഴഞ്ഞു കിടക്കുന്നു. പൊന്നാനി എന്ന പേരിന്റെ ഉത്ഭവത്തെക്കുറിച്ച് പല മിത്തുകളും പ്രചാരത്തിലുണ്ട്. പുരാതന കാലത്ത് 'പൊന്നൻ' എന്നു പേരായ ഒരു രാജാവ് ഈ നാട് ഭരിച്ചിരുന്നു എന്നും അദ്ദേഹത്തിൽ നിന്നാണ് ഈ പേര് വന്നതെന്നുമാണ് അതിലൊന്ന്. 'പൊൻ വാണി' എന്ന് പേരുള്ള ഒരു നദി ഈ പ്രദേശത്തിലൂടെ ഒഴുകിയിരുന്നു എന്നും അങ്ങനെയാണ് പൊന്നാനി എന്ന പേര് സിദ്ധിച്ചതെന്നുമാണ് മറ്റൊരു മതം. അറബ്- പേർഷ്യൻ നാടുകളുമായി നില നിന്നിരുന്ന കച്ചവട ബന്ധത്തിന്റെ ഭാഗമായി ധാരാളം 'പൊൻ നാണ്യ'ങ്ങൾ ഇവിടെയെത്തിയിരുന്നു എന്നും പൊൻ നാണ്യങ്ങളുടെ നാടാണ് പിന്നീട് 'പൊന്നാനി'യായതെന്നുമാണ് വേറൊരു അഭിപ്രായം. ആഴ്‌വാഞ്ചേരി തമ്പ്രാക്കളുടെ ഭരണകാലത്ത് പൊന്നുകൊണ്ടുള്ള ആനകളെ ക്ഷേത്രങ്ങളിൽ സമർപ്പിച്ചിരുന്നു എന്നും പൊന്നാനകളിൽ നിന്നാണ് പൊന്നാനി എന്ന പേര് വന്നതെന്നും മറ്റൊരു വാദവുമുണ്ട്. ഇതല്ല ആഴ്‌വാഞ്ചേരി തമ്പ്രാക്കൾ പാക്കനാർ പറഞ്ഞപ്രകാരം പൊന്നിന്റെ ആനയെ നടത്തിയ ഇടം പൊന്നാനയും പിന്നീട് പൊന്നാനിയുമായി എന്നൊരു കഥയുമുണ്ട്[2]

സാമൂതിരിയുടെ കാലത്തിനു മുമ്പുള്ള പൊന്നാനിയുടെ ചരിത്രത്തെക്കുറിച്ച് ആധികാരികമായ രേഖകളൊന്നും ലഭ്യമായിട്ടില്ല. സാമൂതിരിക്കു മുമ്പ് പൊന്നാനി തിരുമനശ്ശേരി രാജാക്കളുടെ കീഴിലായിരുന്നെന്ന് കരുതപ്പെടുന്നു. സാമൂതിരിയുടെ ഭരണകാലം പൊന്നാനിയുടെ സുവർണ്ണകാലമായി വിശേഷിപ്പിക്കപ്പെടുന്നു. സാമൂതിരിമാർ പൊന്നാനിയെ അവരുടെ രണ്ടാം തലസ്ഥാനമായി പരിഗണിച്ചു. വാസ്കോ ഡി ഗാമ കോഴിക്കോടിനടുത്തുള്ള കാപ്പാട് എത്തിയപ്പോൾ അന്നത്തെ സാമൂതിരി രാജാവ് പൊന്നാനിയിലായിരുന്നു. സാമൂതിരിയുടെ നാവിക പടത്തലവനും പോർച്ചുഗീസുകാരുടെ പേടിസ്വപ്നവുമായിരുന്ന കുഞ്ഞാലി മരക്കാറിനും പൊന്നാനിയുമായി അടുത്ത ബന്ധങ്ങൾ ഉണ്ടായിരുന്നു. കുഞ്ഞാലിമരക്കാരും കുടുംബവും പൊന്നാനിയിൽ കുറച്ചുകാലം താമസിച്ചിരുന്നു. 1507-ൽ പോർച്ചുഗീസ് നാവികനും പടയാളിയുമായ ഡി അൽമേഡ ഈ നഗരം ചുട്ടെരിച്ചതിനെ തുടർന്നാണ് കുഞ്ഞാലി മരക്കാർ ഇവിടെ നിന്ന് താമസം മാറിയതെന്ന് കരുതപ്പെടുന്നു.

1766-ൽ ടിപ്പുവിന്റെ പടയോട്ടത്തോടു കൂടി സാമൂതിരി യുഗത്തിന് അന്ത്യമാവുകയും പൊന്നാനി മൈസൂർ രാജ്യത്തിന്റെ അധീനതയിലാവുകയും ചെയ്തു. ടിപ്പുവിന്റെ പതനത്തിനു ശേഷം പൊന്നാനി ബ്രിട്ടീഷ് ഭരണത്തിനു കീഴിലാവുകയും കുറച്ചു കാലം ബോംബെ പ്രവിശ്യക്ക് കീഴിൽ വരികയും ചെയ്തു. പിന്നീട് ഇവിടം മലബാറിൽ ഉൾപ്പെട്ട് ഒന്നര നൂറ്റാണ്ടോളം മദ്രാസ് പ്രവിശ്യക്ക് കീഴിൽ വന്നു. അന്നത്തെ മലബാർ കൊടുങ്ങല്ലൂരിനടുത്തുള്ള ആല മുതൽ കാസർഗോടുള്ള ചന്ദ്രഗിരിപ്പുഴ വരെ വിശാലമായിരുന്നു. 1861 വരെ കൂറ്റനാട് താലൂക്കിന്റെ ആസ്ഥാനമായിരുന്നു പൊന്നാനി. അക്കാലത്ത് പൊന്നാനിയിലെ മുൻസിഫ് കോടതി കൂറ്റനാട് കോടതി എന്നായിരുന്നു അറിയപ്പെട്ടിരുന്നത്. പിന്നീട് ചാവക്കാട്, കൂറ്റനാട്, വെട്ടത്തുനാട് താലൂക്കുകളുടെ ഭാഗങ്ങൾ കൂട്ടിച്ചേർത്ത് പൊന്നാനി താലൂക്ക് രൂപവത്കരിച്ചു. 1956-ൽ കേരള സംസ്ഥാന രൂപവത്കരണത്തിനു ശേഷം പൊന്നാനി പാലക്കാട് ജില്ലയുടെ ഭാഗമായി. 1969-ൽ മലപ്പുറം ജില്ലാ രൂപവത്കരണത്തിനു ശേഷമാണ് പൊന്നാനി മലപ്പുറം ജില്ലയുടെ ഭാഗമായത്.

സംസ്കാരം[തിരുത്തുക]

പുറംനാടുകളുമായി പൊന്നാനിക്ക് പുരാതന കാലം മുതലേ ഉണ്ടായിരുന്ന കച്ചവടബന്ധം ഒരു സാംസ്കാരിക വിനിമയത്തിനു കളമൊരുക്കി. പേർഷ്യൻ - അറേബ്യൻ കലാരൂപങ്ങളും ഉത്തരേന്ത്യൻ സംസ്കാരവും പൊന്നാനിയിലെത്തിയത് ആ വഴിയാണ്. ഭാഷയിലും ഇതിന്റെ അനുരണനങ്ങളുണ്ടായി. അറബ്-മലയാളം എന്ന സങ്കര ഭാഷ രൂപപ്പെട്ടത് ഇങ്ങനെയാണ്. ധാരാളം കവിതകൾ ഈ സങ്കര ഭാഷയുപയോഗിച്ച് രചിക്കപ്പെട്ടിട്ടുണ്ട്. സാംസ്കാരിക വിനിമയത്തിന്റെ ഭാഗമായി ഇവിടെയെത്തിയ ഹിന്ദുസ്ഥാനിയിലെ ഖവ്വാലിയും ഗസലും ഇപ്പോഴും ഉർവ്വരമായി തന്നെ പൊന്നാനിയിൽ ‍നിലനിൽക്കുന്നു. ഇ.കെ അബൂബക്കർ, മായിൻ,ഖലീൽ ഭായ് ( ഖലീലുറഹ്മാൻ )എന്നിവർ പൊന്നാനിയിലെ പ്രമുഖ ഖവാലി ഗായകരാണ്. പൊന്നാനിയുടെ ഗസൽ ഗായകനിരയിൽ ഏറെ ശ്രദ്ധേയനായ ബക്കർ മാറഞ്ചേരിക്കൊപ്പം വെളിയങ്കോട്ടുകാരിയായ ശാരിക ഗിരീഷ്,പുതുപൊന്നാനി എം.ഐ.ട്രെയ്നിംഗ് കോളേജ് അധ്യാപികയും കൊല്ലൻപടിയിൽ താമസക്കാരിയുമായ ഇശ്റത്ത് സബാഹ് എന്നിവരുടെ സാന്നിദ്ധ്യം ഇവിടത്തെ ഗസൽ പാരമ്പര്യത്തിന് ഏറെ തിളക്കമേകുന്നുണ്ട്. ഇരുവരും സംസ്ഥാന സ്കൂള് കലോത്സവങ്ങളിൽ ഉർദു പദ്യോച്ചാരണ മത്സര ജേതാക്കളാണ്.

ഹിന്ദു മുസ്ലിം മത വിഭാഗങ്ങൾക്ക് തുല്യ ജനസംഖ്യയുള്ള പൊന്നാനി, മതമൈത്രിക്കും സഹിഷ്ണുതക്കും പേരുകേട്ട പ്രദേശമാണ്. പൊന്നാനിയിലെ വലിയ ജുമാഅത്ത് പള്ളി വാസ്തുശില്പമാതൃക കൊണ്ടും മതപഠനകേന്ദ്രം എന്ന നിലയിലും ശ്രദ്ധേയമാണ്. ക്രിസ്തുവർഷം 1510- നാണ് ജുമാമസ്ജിദ് നിർമ്മിക്കപ്പെട്ടതെന്ന്‌ ബ്രിട്ടീഷ്‌ ചരിത്രകാരനായ വില്ല്യം ലോഗൻ മലബാർ മാനുവലിൽ രേഖപ്പെടുത്തിയിട്ടുണ്ട്. തൃക്കാവിലെ ക്ഷേത്രവും,കണ്ടകുറമ്പകാവ്‌, ഓം ത്രിക്കാവ് തുടങ്ങഇവിടുത്തെ ഹിന്ദു ക്ഷേത്രങ്ങളും പ്രശസ്തമാണ്. തിരുനാവായയിലെ നാവാമുകുന്ദ ക്ഷേത്രവും അവയിൽ പെടുന്നു. നൂറിൽപരം ക്രിസ്തിയ കുടുംബങ്ങളുണ്ട് ഇവിടെ. സെൻറ്. അന്തോനീസ് ചര്ച്ച് 1931 ൽ സ്ഥാപിതമായി. മാർത്തോമ വിഭാഗത്തിനും ചര്ച്ച് ഉണ്ട്.

പ്രാചീന നാടൻ കലാരൂപങ്ങളായ കാളവേല, തെയ്യം, തിറ, മൗത്തളപ്പാട്ട്, കോൽക്കളി, ഒപ്പന, ദഫ്മുട്ട്, പുള്ളുവൻപാട്ട്, പാണൻപാട്ട് എന്നിവ പൊന്നാനിയിൽ ഇപ്പോഴും സജീവമാണ്.

പൊന്നാനിക്കാരുടെ ചില രുചികൾ[തിരുത്തുക]

പുരാതന നഗര  സംസ്‌കൃതിയുടെ  ശേഷിപ്പുകൾ ഇപ്പോഴും   കാത്തുവെയ്ക്കുന്ന മലബാറിലെ തുറമുഖനഗരങ്ങളിലൊന്നാണ്  പൊന്നാനി ..വിവിധ കാലങ്ങളിൽ സാമ്രാജ്യത്വ മോഹവുമായി  മലബാറിലേക്ക് വന്ന അധിനിവേശ ശക്തികളുമായി നിരന്തരം  സംഘർഷത്തിലേർപ്പെട്ടതിന്റെ ചരിത്രവും ഈ ദേശത്തിനുണ്ട്.  കലയിലും കച്ചവടത്തിലും  സാഹിത്യത്തിലുമെല്ലാം മലബാറിന്റെ കേന്ദ്രസ്ഥാനത്ത് നിർത്താവുന്ന പ്രദേശമാണ്  പൊന്നാനി. അറബിക്കടലും,  ഭാരതപ്പുഴയും, അഴിമുഖവും പൂക്കൈതപ്പുഴയും  ചേർന്ന് ഒരുക്കുന്ന ദൃശ്യഭംഗി പോലെ തന്നെ ഗംഭീരമാണ് പൊന്നാനിയുടെ അന്നപ്പെരുമയും              

       *******

ഒരു  സമൂഹത്തിന്റെയും  ഭക്ഷണശീലങ്ങളെ  രൂപപ്പെടുത്തുന്നതിൽ  വ്യത്യസ്ത  ഘടകങ്ങൾക്കുള്ള പ്രാധാന്യത്തെ സംബന്ധിച്ച്   "feast  and fast in south india " എന്ന  ഗ്രന്ഥമെഴുതിയ കോളിൻസ് ടൈലർ സെൻ ചില  നിരീക്ഷണങ്ങൾ മുന്നോട്ടു വെക്കുന്നുണ്ട് .  ഭൂമിശാസ്ത്രം, കാലാവസ്ഥ, വാണിജ്യബന്ധങ്ങൾ. മതം എന്നീ ഘടങ്ങൾ  സമന്വയിച്ചുകൊണ്ടുള്ള ഒരു  സാംസ്കാരിക  പരിസരത്തിൽ  നിന്നാണ് ഓരോ  പ്രദേശത്തെയും ഭക്ഷണശീലങ്ങൾ രൂപപ്പെടുന്നത് അല്ലെങ്കിൽ ഈ സാംസ്കാരിക അംശങ്ങളുടെയെല്ലാം  മൂർത്തമായ  ആവിഷ്കാരമാണ്  ഭക്ഷണം എന്ന് പറയാം. തനത്  എന്ന് നാം  അവകാശപ്പെടുന്ന ഏതൊരു  ഭക്ഷണവും നിരവധിയായ  കൊടുക്കൽ  വാങ്ങലുകളിലൂടെയാണ്  രൂപപ്പെട്ടിട്ടുള്ളത് . നാം  നിത്യജീവിതത്തിൽ പാചകത്തിനുപയോഗിക്കുന്ന  ചേരുവകൾ നോക്കിയാൽ ഇവയെല്ലാം  പല നാടുകളിൽ നിന്ന് എത്തിയതാണെന്നു കണ്ടെത്താൻ കഴിയും.  പോർച്ചുഗീസ്,അറേബ്യ,  ഡച്ച്‌,  യൂറോപ്പ് തുടങ്ങി പല നാടുകളുടെയും സ്വാധീനത്താൽ നിർമ്മി ക്കപ്പെട്ടതാണ് നമ്മുടെ  രുചികളിൽ  ഏറെയും.  .   ഇങ്ങനെ ദേശാന്തരങ്ങൾ  താണ്ടിയെത്തിയ  ചേരുവകൾ എല്ലാം  ചേർത്ത്  ഓരോ  പ്രദേശവും തങ്ങളുടേതായ രീതിയിൽ  രൂപപ്പെടുത്തിയെടുക്കുന്ന ചില  ഭക്ഷണരീതികൾ  ഉണ്ട്.   അതിനെയാണ്   തനത്  എന്ന പരികല്പന കൊണ്ട് നാം  വിശേഷിപ്പിക്കുന്നത്. അത്തരത്തിൽ നിർമ്മിക്കപ്പെട്ട  പൊന്നാനിയുടെ  ഭക്ഷണ ശീലങ്ങളെ  ചെറിയ  രീതിയിൽ  ഒന്നു  പരിചയപ്പെ ടുത്തുക  എന്നതാണ് ഈ കുറിപ്പിന്റെ  ഉദ്ദേശം

        **************

ജീവിതത്തിലെ എല്ലാ സവിശേഷ സന്ദർഭങ്ങളിലും പലഹാരങ്ങൾ  ഉണ്ടാക്കിയും അത് പരസ്പരം കൈമാറിയും തിന്നും  തീറ്റിച്ചും  ആഘോഷിക്കുന്നവരാണ് പൊന്നാനിക്കാർ. വൈവിധ്യം നിറഞ്ഞ  ഒരു പലഹാരജീവിതം ഈ നാട്ടുകാർക്കുണ്ട്.  പ്രധാനമായും  പൊന്നാനി  അങ്ങാടിയെ കേന്ദ്രീകരിച്ചാണ് ഈ  പലഹാരലോകം  നില നിൽക്കുന്നത്  .അട മുതൽ അലീസ വരെ (പ്രയോഗത്തിന് കടപ്പാട്:Khaleem Kalmaj) യുള്ള വിവിധങ്ങളായ  അപ്പത്തരങ്ങളാൽ സമ്പന്നമാണ്  പൊന്നാനിയിലെ  ഓരോ അടുക്കളയും.നോമ്പ്,  പെരുന്നാൾ, കല്യാണം,  ജനനം, മരണം എന്നിങ്ങനെ എല്ലാം ആചാരങ്ങളുടെയും ആഘോഷങ്ങളുടെയും ഭാഗമായി  ഇവർ പലഹാരങ്ങൾ ഉണ്ടാക്കുന്നു. വ്യത്യസ്ത ചേരുവകളും നിർമ്മാണക്രമങ്ങളും ഉള്ള ധാരാളം പലഹാരങ്ങൾ പൊന്നാനിക്കാർക്ക് സ്വന്തമായുണ്ട്. കയ്യിൽ കിട്ടുന്ന എന്തും  പലഹാരമാക്കി മാറ്റാൻഉള്ള പ്രത്യേക വൈധഗ്ധ്യം  പൊന്നാനിയിലെ  പെണ്ണുങ്ങൾ  ആർജിച്ചെടുത്തിട്ടുണ്ട്.   സ്ത്രീകൾ അവരുടെ  അധ്വാനത്തിന്റെ വലിയൊരു പങ്കും  ചെലവഴിച്ചിരുന്നത് ഈ പലഹാരം നിർമ്മാണത്തിനു വേണ്ടിയായിരുന്നു.വ്യത്യസ്ത രുചികളും മണങ്ങളിലുമുള്ള    പല പേരിലുള്ള പലഹാരങ്ങൾ  ഈ  സ്ത്രീകളിലൂടെ  പിറവിയെടുത്തു.

       *******    

ഗോതമ്പും ആട്ടിറച്ചിയും ചേർത്തുണ്ടാക്കുന്ന 'അലീസ' അതിവിശിഷ്ടമായ ഒരു പലഹാരമാണ്. മുട്ടയുടെ വെള്ളയും  പഞ്ചാരയും ചേർത്തുണ്ടാക്കുന്ന  'മുട്ടസുർക്ക',  മുട്ടയുടെ  മഞ്ഞക്കരുവും പഞ്ചാരപ്പാനിയും ചേർത്തുണ്ടാക്കുന്ന 'മുട്ടമാല',  മൈദയും, മുട്ടയും പഞ്ചാരയും കണ്ണൻ ചിരട്ടയിലൂടെ  ഒഴിച്ച്  ഉണ്ടാക്കിയെടുക്കുന്ന 'ചിരട്ടമാല'.  അമ്പാലത്തിന്റെ അട, പച്ചരിയും  ഉഴുന്നും  ചേർത്തരച്ചുണ്ടാക്കുന്ന മുട്ടയില്ലാത്ത  'മുട്ടപ്പത്തിരി'. ഈ  പലഹാരം പൊന്നാനിക്കാരുടെ  ആത്മാവിന്റെ അപ്പമാണ്.അത്രമേൽ പൊന്നാനിക്കാരുടെ ജീവിതവുമായി  ചേർന്നു നിൽക്കുന്ന പലഹാരമാണത്.  നോമ്പുകാലത്ത് മുട്ടപ്പത്തിരിയും  ഇറച്ചിച്ചാറും തിന്നാൻ വേണ്ടി  മാത്രം ആയൽനാടുകളിൽ നിന്നെല്ലാം   ആളുകൾ  പൊന്നാനിയിലേക്ക്  വരും. വലിയജുമുഅത്ത് പള്ളിക്കു സമീപമുള്ള മുട്ടപ്പത്തിരി  വിൽക്കുന്ന  കട നോമ്പുതുറ മുതൽ  സുബ്ഹി ബാങ്ക്  കൊടുക്കുന്നത്  വരെ  സജീവമായിരിക്കും. റംസാൻ  കാലം  പൊന്നാനിക്കാരെ  സംബന്ധിച്ച്  ഇരവ്  പകലായി  മാറുന്ന  കാലമാണ്. രാത്രിയിൽ അങ്ങാടിയും  പരിസരവും ആളുകളെ കൊണ്ട്  നിറയും .  പലഹാരങ്ങൾക്ക് വിശേഷപ്പെട്ട ഒരു  കാലം കൂടിയാണ് ഇത് .  ഓരോ  വീടുകളിൽ  നിന്നും പുതിയാപ്പിള  വീടുകളിലേക്കും ബന്ധുവീടുകളിലേക്കും അയൽവീടുകളിലേക്കും കൂടകളിലാക്കി  പലഹാരങ്ങൾ കൊടുത്തുവിടും. മൂന്നു കൂട, ഏഴു കൂട എന്നിങ്ങനെ യൊക്കെയാണ്  കണക്കുകൾ, എല്ലാ വീട്ടുകാരും  പരസ്പരം പലഹാരം  കൈമാറും അവസാനം കൈമാറി കൈമാറി ആ  പലഹാരം അത്  ഉണ്ടാക്കിയ  വീട്ടിൽ  തന്നെ എത്തും. ഇത്തരം   രസകരമായ ഏറെ  പലഹാരക്കഥകൾ   അവർക്കു പങ്കുവെക്കാനുണ്ട് . പൊന്നാനിയിലെ  വിശേഷപ്പെട്ട മറ്റൊരു  പലഹാരം ആണ് ബിണ്ടി ഹൽവ .ലക്ഷദ്വീപിൽ നിന്ന് കൊണ്ട് വരുന്ന   ചക്കരയും അരിപ്പൊടിയും ചേർത്തുണ്ടാക്കുന്ന പലഹാരം ആണ്  ബിണ്ടി ഹൽവ. പഴയ കാലത്ത്  ഈ പലഹാരം  ഉണ്ടാക്കാൻ  അറിയുന്നവർ  ധാരാളം ഉണ്ടായിരുന്നുവെങ്കിലും  ഇന്ന് അപൂർവ്വം  കുടുംബങ്ങൾ  മാത്രമേ ബിണ്ടി ഹലുവയുടെ  കൂട്ട്  അറിയുന്നവരായുള്ളൂ. രുചിയിൽ  മാത്രമല്ല പൊന്നാനി പലഹാരങ്ങൾക്ക്  പേരിലും  ചില  സവിശേഷതകൾ ഉണ്ട്.   പലഹാരങ്ങൾ  ഉണ്ടാക്കാൻ ഉപയോഗിച്ച കൂട്ടുകൾ  ബാക്കിയായപ്പോൾ  ആ കൂട്ടുകൾ ചേർത്തു  പുതിയ പലഹാരം  ഉണ്ടാക്കി. പുതിയതായി  ഉണ്ടാക്കിയ പലഹാരത്തിന്റെ  പേര് ചോദിച്ചയാളോട് പാചകക്കാരി "അല്ലാഹു അഅലം"(പടച്ചോനെ അറിയൂ )   എന്ന്  പറഞ്ഞപ്പോൾ  കേട്ടയാൾ  ആ  പലഹാരത്തിന്റെ  പേര് "അല്ലാഹു അഅലം" എന്നാണെന്നു ധരിക്കുകയും    ആ പലഹാരത്തിന്റെ  പേര് അല്ലാഹുഅഅലം എന്നായി മാറുകയും ചെയ്തു . അരിമണി വറുത്തതും ചക്കരച്ചായയും പൊന്നാനിയിലെ നാലുമണി  പലഹാരങ്ങളിലെ  നിത്യ സാന്നിധ്യം ആയിരുന്നു. ഇതു കൂടാതെ  വെട്ടപ്പം, ബിസ്ക്കറ്റപ്പം,  ചുക്കപ്പം,  കിമ്മത്ത്,  കുറൈവത്ത്,കിടുത, മണ്ട,  കോഴിയട, വായക്ക നിറച്ചത്,  , കാരക്ക അപ്പം,  പാലിയത്ത് അപ്പം, തേങ്ങാ മിട്ടായി, ചുക്കപ്പം,   കലത്തപ്പം, പൂവപ്പം,  കാജ, മൂസാൻ ഉണ്ട,  വായക്കട,  അരീരപ്പം,കുഴിയപ്പം,കുരി യപ്പം എന്നിങ്ങനെ ഇനിയുമുണ്ട്  പലഹാരങ്ങൾ.

      ************

നോമ്പ് സൽക്കാരം  പോലെ തന്നെ വളരെ വിശേഷപ്പെട്ട മറ്റൊരു സൽക്കാരം ആണ്  പുതിയാപ്പിള സൽക്കാരം.                    വധുവിന്റെ വീട്ടിലേക്ക് വരുന്ന വരനെ   സൽക്കരിക്കുന്ന ഏർപ്പാടിനെ ആണ് പുതിയാപ്ല സൽക്കാരം എന്നുപറയുന്നത്.  പുതിയാപ്പിള സൽക്കാരത്തിന് വിഭവങ്ങൾ ഒന്നുകൂടി വൈവിധ്യം നിറഞ്ഞതാണ് നെയ്ച്ചോറ്, തേങ്ങച്ചോറ്,   നുറുക്കരിച്ചോറ്, അലീസ,  പോത്തുകുറുമ,  ആട് കുറുമ,  കോഴി നിർത്തി പൊരിച്ചത്, ചേന പൊരിച്ചത്,  മുരിങ്ങന്റലകറി,  ചക്കര പുളി, പുളികൂട്ടാൻ,  കടുമാങ്ങ ഈ വിഭവങ്ങളെല്ലാം പുതിയാപ്പിള സൽക്കാരത്തിന് മാത്രമായി ഒരുക്കുന്നതാണ്.  പല തരം പത്തിരികളും   മുട്ടപ്പത്തിരി,  ചട്ടിപ്പത്തിരി, അട്ടിപ്പത്തിരി  ഇറച്ചി പത്തിരി, നൈസ് പത്തിരി  എന്നിങ്ങനെ പത്തിരിയിയിലും  പൊന്നാനി ക്കാർ  വലിയ വൈവിധ്യം വെച്ചു പുലർത്തുന്നുണ്ട്. "പാത്തുമ്മ വിറ്റാളരിപത്തിരി ചാറിൽ മുക്കി മൂക്കറ്റം തിന്നേ, നിന്നച്ചീരണി"പൊന്നാനിക്കാരുടെ പത്തിരി തീറ്റയെ കുറിച്ച്എം. ഗോവിന്ദൻ തന്റെ കവിതയിൽ  ഇങ്ങനെ   പരാമർശിക്കുന്നുണ്ട്.  (പൊന്നാനിക്കാരന്റെ മനോരാജ്യം )  . പത്തിരി പൊന്നാനിക്കാരുടെ ഇഷ്ടവിഭവമാണ്.പത്തിരിയും  ഇറച്ചിക്കറിയും പൊന്നാനിക്കാരുടെ  തീറ്റ രസങ്ങളിൽ മുമ്പനാണ്

*****************-

     പൊന്നാനിയിലെ സാഹിത്യത്തിലും  സംഗീതത്തിലുമെല്ലാം  ഈ  പലഹാരലോകം ആവിഷ്കരിക്കപെട്ടിട്ടുണ്ട്. വക്കീൽ രാമൻ മേനോന്റെ  ഗുമസ്തനായിരുന്ന  മഹാകവി  ഇടശ്ശേരി പൊന്നാനിയിലെ  മുസ്ലീം  വീടുകളിലെ നിത്യസന്ദർശകനായിരുന്നു. അമ്പാടിയിലേക്കു  വീണ്ടും എന്ന തന്റെ കവിതയിൽ  ജീവിതത്തെ  പലഹാരമായി സങ്കല്പിക്കുന്ന കവിയെ നമുക്ക്   കാണാം  ." ഇടയ്ക്ക്  കണ്ണീരുപ്പു  പുരട്ടാതെന്തിന് ജീവിത പലഹാരം" തനിക്ക് ചിരപരിചിതമായ പൊന്നാനിയിലെ  പലഹാരലോകം ആയിരിക്കാം  ജീവിതത്തെ  പലഹാരമായി  കാണാൻ കവിയെ  പ്രേരിപ്പിച്ചത്.

*****************

പൊന്നാനിയിലെ അകങ്ങളിൽ മരുമക്കത്തായ  സമ്പ്രദായമാണ്  നിലനിന്നിരുന്നത്.ഈ വീടുകളിൽ സ്ത്രീകൾ  പുറത്തിറങ്ങുന്നത്   അപൂർവ്വമാണ്. പകലന്തിയോളം  വീട്ടിലേ പുതിയാപ്പിളമാരെയും  മറ്റുള്ളവരെയും  തീറ്റിപ്പോറ്റുക എന്നതായിരുന്നു   പെണ്ണിന്റെ  ഉത്തരവാദിത്വം. ഒരുപക്ഷേ ജീവിതത്തിന്റെ  സിംഹഭാഗവും  അവർ  ചിലവഴിച്ചത്  ഇതിനു  വേണ്ടിയായിരുന്നു.വ്യത്യസ് ത രുചികളിലും  മണങ്ങളിലും  ആയി   സ്ത്രീകൾ തങ്ങളുടെ ജീവിതത്തെ തന്നെയാണ് പലപ്പോഴും  ഈ പലഹാരങ്ങളിലൂടെ ആവിഷ്കരിച്ചത്.  അമ്പത്  അംഗങ്ങൾ  വരെ  ഒരേ  സമയം  താമസിച്ചിരുന്ന പൊന്നാനിയിലെ  അകങ്ങൾ   (വീടുകൾ) പലതും  കാലയവനികക്കുള്ളിൽ  മറയുകയും അപൂർവ്വമായി  താമസമുള്ളിടങ്ങളിൽ  തന്നെ ഇന്ന് മൂന്നും  നാലും  അംഗങ്ങൾ   മാത്രമായി  ചുരുങ്ങുകയും  ചെയ്തു .  മാത്രമല്ല ഇത്തരം  അദ്ധ്വാനങ്ങൾക്ക്  വേണ്ടി  ഏറെ   സമയം ചിലവഴിക്കാൻ    കഴിയാതെ  വരികയും  ചെയ്തതോടെ   പൊന്നാനിയുടെ  പലഹാരപകിട്ടിന് ചില  മങ്ങലുകൾ സംഭവിച്ചിട്ടുണ്ട്. എന്നാലും  പൊന്നാനി അതിന്റെ ആത്‌മാവിൽ    ആ  പലഹാര ലോകത്തെ ഇപ്പോഴും  കാത്ത് വെക്കുന്നുണ്ട്.

*********-***--

അങ്ങാടിയിലെ ഭക്ഷണരീതികളിൽ നിന്നും  തികച്ചും വ്യത്യസ്തമാണ് പൊന്നാനിയിലെ  മത്സ്യതൊഴിലാളികളുടെ ഭക്ഷണശീലങ്ങൾ .അമ്പരപ്പിക്കുന്ന  രുചി വൈവിധ്യങ്ങൾക്ക് പുറത്ത് നിൽക്കുന്ന ജനതയാണ് പൊന്നാനിയിലെ  മത്സ്യത്തൊഴിലാളികൾ. കടൽ കനിഞ്ഞു നല്കുന്നതെന്തും അവർക്ക്  അന്നമാണ്. മീനുകൾ  പലതുണ്ടെങ്കിലും മത്തിയോളം വരില്ല  അവയൊന്നും.. അപ്പോൾ പിടിച്ചമത്തി  ചെതുമ്പൽ  പോലും കളയാതെ കടപ്പുറത്ത്  വെച്ചുതന്നെ ചുട്ടെടുക്കും  ഇരുപതും മുപ്പതും മത്തികൾ ഒറ്റയിരിപ്പിനു തിന്നുതീർക്കും.   അങ്ങനെ മത്തി കഴിച്ചുണ്ടാക്കിയ തടിയാണ്  തങ്ങളുടേതെന്ന് അഭിമാനം വെച്ചു പുലർത്തുന്നവരാണ് പൊന്നാനിയിലെ  പഴയകാല  മത്സ്യതൊഴിലാളികൾ.  കപ്പയും  മത്തിയും  ചേർന്നുണ്ടാക്കുന്ന ചേലാക്കിയാണ്  ഇവരുടെ  വിശിഷ്ടഭോജ്യം."കപ്പയും കടൽ മത്തി കുഴമ്പും ചമ്മന്തിയും പൂക്കൈത തഴപ്പായിൽ കപ്പലിൻ നാട്ടിൽ തിന്നാം" (പൊന്നാനിക്കാരന്റെ മനോരാജ്യം : എം ഗോവിന്ദൻ  )  ഇത്തരത്തിൽ   വിശ്രുതമാണ്  പൊന്നാനിക്കാരുടെ  ഈ  മത്തിത്തീറ്റ   ..സ്രാവ്  കറിവെച്ചത്, ഏട്ടത്തല കറി, മത്തി മുളകിട്ടത്, ചെമ്മീൻ പലകൂട്ടുകൾക്കൊപ്പം  ചേർത്തു  വെക്കുന്നത്  ഇങ്ങനെ  പലതരം മീൻ  വിഭവങ്ങളും ഇതിനൊപ്പം ചേർക്കാം.     ആഴക്കടലിലേക്ക് മത്സ്യം പിടിക്കാൻ പോയവർ  എത്തുന്നതും  കാത്ത് വിശന്നിരിക്കുന്ന  കുഞ്ഞുങ്ങളുടെ  കരച്ചിൽമാറ്റാനായി വെറും കലത്തിൽ വെള്ളം  വെച്ച്  തീകത്തിച്ച്‌  ഇളക്കിക്കൊണ്ടിരിക്കും അമ്മമാർ,   കഞ്ഞി വെന്തോ  എന്ന് ചോദിക്കുമ്പോൾ ഇപ്പൊവേവും എന്നു പറഞ്ഞു   കുട്ടികളെ  ആശ്വസിപ്പിക്കും.ചോദിച്ച് ചോദിച്ച് കുട്ടികളങ്ങനെ ഉറങ്ങിപ്പോകും പലഹാരങ്ങളുടെ   രുചിവൈവിധ്യങ്ങൾക്കപ്പുറത്ത് വറുതിയുടെ മറ്റൊരു ലോകത്തിൽ ജീവിക്കുന്നവരാണ്

മത്സ്യത്തൊഴിലാളികൾ.. എന്നാൽ  എല്ലാ ഇല്ലായ്മകളെയും  അതിജീവിക്കുന്ന വലിയ സംഘബോധം  ഈ  മനുഷ്യർക്കിടയിൽ ഉണ്ട്  

   ****************

വിശേഷപ്പെട്ടതെന്തും  പങ്കുവെച്ചും കൂടിയിരുന്നും  കഴിക്കണമെന്ന് ആഗ്രഹിക്കുന്നവരാണ് പൊന്നാനിക്കാർ.. ഒരു  പക്ഷെ  ഈ പങ്കുവെക്കൽ  അവരുടെ    വിശ്വാസത്തിന്റെ കൂടി ഭാഗമാണ്. വിശേഷപ്പെട്ടതെന്തും അവർക്ക്   ചീരണിയാണ്(കാഴ്ച വെക്കുന്ന വസ്തു, പ്രസാദം ). എല്ലാവരും കൂടി പങ്കിടുമ്പോൾ മാത്രമേ അത്  ഫലപ്പെടുകയുള്ളൂ എന്ന്  അവർ  ഉറച്ചു വിശ്വസിക്കുന്നു  "അയൽക്കാരൻ പട്ടിണി കിടക്കുമ്പോൾ വയറുനിറച്ചുണ്ണുന്നവൻ എന്റെ വംശത്തിൽ  പെട്ടവനല്ല" എന്ന   നബി  വചനമാണ്  അവരുടെ  പ്രമാണം. ഇസ്ലാമിലെ വന്മല എന്ന  കവിത "അലവി" എന്ന  തന്റെ കൂട്ടുകാരനെ സങ്കല്പിച്ച് എഴുതിയതാണെന്ന് ഇടശ്ശേരി പറയുന്നു.  അലവി ചായക്കടക്കാരൻ മൊയ്‌തീൻ കുട്ടിയുടെ മകനാണ്.   കഴിക്കാൻ ഉണ്ട് എന്നാൽ  അവന്റെ  കൂട്ടുകാരൻ ആ ആര്യബാലകൻ അവൻ നിത്യപ്പട്ടിണിയിലാണ്. അത് മനസ്സിലാക്കിയ അലവി തന്റെ  ബാപ്പയുടെ കടയിൽ നിന്നും  എന്നും പഴം മോഷ്ടിച്ച്  കൂട്ടുകാരന്  നൽകും. ഒരു ദിവസം അലവിയുടെ മോഷണം മൊയ്തീൻകുട്ടി  കയ്യോടെ പിടികൂടുന്നു. അലവിയെ  പൊതിരെ  തല്ലുന്നു . അടികൊണ്ട് അലവി ഇപ്പോൾ  തന്റെ  പേര് പറയുമെന്നും തന്റെ മാനം എന്നന്നേക്കുമായി ഇടിഞ്ഞു വീഴുമെന്നു കരുതി  ആ ആര്യബാലകൻ  നിന്ന്  വിറയ്ക്കുന്നു."ഇപ്പോഴേ യെൻ പേർ പുറത്തു ചാടും ഇപ്പോഴെൻ മാനമിടിഞ്ഞു വീഴും "  എന്നാൽ പൊതിരെ തല്ലു കിട്ടിയിട്ടും  അലവി യൊരിക്കലും തന്റെ കൂട്ടുകാരന്റെ  പേര് പറയാൻ തയ്യാറാകുന്നില്ല.  ആ ചുള്ളലിന്റെ തുള്ളലിന് മുമ്പിൽ ഒരു വന്മല പോലെ നിന്ന്  തന്റെ  കൂട്ടുകാരന്റെ  അഭിമാനത്തിനും   വിശ്വാസത്തിനും  മേൽ അലവിയൊരു  കോട്ടകെട്ടുന്നു. "നൂറു ശതമാനമെന്റെ മിത്രം കൂറും പെരുമയുമുള്ള മുസ്ലീം. തുള്ളി പിടഞ്ഞതവന്റെ ദേഹം ഉള്ളമോ വന്മല പോലെ  നിന്നു" തന്റെ സഹോദരനോട് കാണിക്കേണ്ട ഈ വിശ്വാസവും, കരുതലും പങ്കുവെക്കലുമാണ്  പൊന്നാനിക്കാരുടെ ഈ  അന്നവിചാരത്തിന്റെ ആകെ ഉള്ളടക്കം

സാഹിത്യം[തിരുത്തുക]

ആധുനിക മലയാള ഭാഷയുടെ പിതാവ് എന്ന്‌ വിശേഷിപ്പിക്കപ്പെടുന്ന തുഞ്ചത്തെഴുത്തച്ഛൻ എന്ന തുഞ്ചത്ത് രാമാനുജൻ എഴുത്തച്ഛൻ ജീവിച്ചിരുന്നത് പഴയ പൊന്നാനി താലൂക്കിൽപ്പെടുന്ന തിരൂരിലാണ്.  പതിനഞ്ചാം നൂറ്റാണ്ടിനും പതിനാറാം നൂറ്റാണ്ടിനുമിടയിലാണ് ഇദ്ദേഹത്തിന്റെ ജീവിത കാലഘട്ടം. പ്രാചീന കവിത്രയങ്ങളിൽപ്പെട്ട ഭാഷാകവിയാണ് എഴുത്തച്ഛൻ.

ആധുനിക കവിത്രയങ്ങളിൽഒരാളും കേരളകലാമണ്ഡലത്തിന്റെ സ്ഥാപകനുമായ വള്ളത്തോൾ നാരായണ മേനോൻ‍ന്റെ കാവ്യജീവിതവും പൊന്നാനിയിലായിരുന്നു. പ്രശസ്തമായ വള്ളത്തോൾകളരി ആ കാലത്തെ ഒരു കവികൂട്ടായ്മയായിരുന്നു. പിന്നീടുണ്ടായ പൊന്നാനിക്കളരി വള്ളത്തോൾ കളരിയുടെ തുടചർച്ചയോ പരിണാമമോ ആയാണ് വിലയിരുത്തുന്നത്. 

സാഹിത്യത്തിലെ പൊന്നാനിക്കളരി വളരെ പ്രസിദ്ധമാണ്. കുട്ടികൃഷ്ണമാരാര്‍,എം. ടി. വാസുദേവൻ‌ നായർ, എം. ഗോവിന്ദൻ, നാലപ്പാട് നാരായണ മേനോൻ,ബാലാമണിയമ്മ,കമലസുരയ്യ(മാധവികുട്ടി),വി. ടി. ഭട്ടതിരിപ്പാട്,എം. ആർ... ബി പ്രമുഖ നോവലിസ്റ്റ്‌ ഉറൂബ്, അക്കിത്തം, കടവനാട് കുട്ടികൃഷ്ണൻ , സി. രാധാകൃഷ്ണൻ , കവി ഇടശ്ശേരി ഗോവിന്ദൻ നായർ പി.എം.പള്ളിപ്പാട് തുടങ്ങിയവർ ഈ പൊന്നാനിക്കളരിയിൽ ഉൾപ്പെടുന്നു.

പുതിയ തലമുറയിലെ എഴുത്തുകാരായ കെ.പി. രാമനുണ്ണി, പി. സുരേന്ദ്രൻ , കോടമ്പിയേ റഹ്മാൻ പി.പി. രാമചന്ദ്രൻ , ആലങ്കോട് ലീലാകൃഷ്ണൻ, സി. അഷറഫ്, മോഹനകൃഷ്ണൻ കാലടി, വി. വി. രാമകൃഷ്ണൻ, ഇബ്രാഹിം പൊന്നാനി,ഷാജി ഹനീഫ്,താഹിർ ഇസ്മായിൽ ചങ്ങരംകുളം കെ.വി നദീർ തുടങ്ങിയവരിലൂടെ സാഹിത്യത്തിലെ ഈ സമ്പന്നത പൊന്നാനിയിൽ നില നിൽക്കുന്നു.

1467-1522 കാലത്ത് ജീവിച്ച സൈനുദ്ധീൻ മഖ്‌ദൂം ഒന്നാമൻ സ്ഥാപിച്ച വലിയ പള്ളിയും ദർസും 1571 ൽ സാമുതിരിയോടോന്നിച്ചു രണ്ടാം മഖ്‌ദൂം അല്ലാമാ അബ്ദുൽ അസീസ്‌ പോർടുഗീസ്കാരുടെ ചാലിയം കോട്ട തകർക്കാൻ നേത്രത്വം നല്കിയതും കേരളത്തിന്റെ ആദ്യത്തെ ചരിത്രകാരനായി പരിഗണിക്കപ്പെടുന്ന ശൈഖ് സൈനുദ്ദീൻ മഖ്ദൂം രണ്ടാമന്റെ കൃതികളും പൊന്നാനിക്ക് ലോകമെങ്ങും കീർത്തി നേടിക്കൊടുത്തിട്ടുണ്ട്. അദ്ദേഹത്തിന്റെ തുഅഫത്തുൽ മുജാഹിദീൻ (പോരാളികളുടെ വിജയം) എന്ന പുസ്തകം കേരളത്തിന്റെ ആദ്യത്തെ ചരിത്ര പുസ്തകമായി പരിഗണിക്കപ്പെടുന്നു. ഇവ പൊന്നാനിക്ക് ചെറിയ മക്ക യെന്ന വിശേഷണം നൽകി.1900 ത്തിൽ മൌനതുൽ ഇസ്ലാം സഭയും സ്ഥാപിതമായി. ഷെയ്ഖ്‌ സൈനുദ്ധീൻ ഇബ്നു അലി(ഷെയ്ഖ്‌ സൈനുദ്ധീൻ ഒന്നാമൻ - ഒന്നാം മഖ്‌ദൂം),അല്ലാമ അബ്ദുൽ അസീസ്‌ ഇബ്നു സൈനുദ്ധീൻ (രണ്ടാം മഖ്‌ദൂം),ഷെയ്ഖ്‌ അഹമ്മദ്‌ സൈനുദ്ധീൻ ഇബ്നു ഗസ്സാലി(ഷെയ്ഖ്‌ സൈന്ധീൻ രണ്ടാമൻ-----1 -മൂന്നാം മഖ്‌ദൂം)1470 നും 1620 നും ഇടയിൽ ജീവിച്ച ഈ മൂന്ന് പേരാണ് മഖ്‌ദൂമുകളിൽ ഏറ്റവും പ്രശസ്തരും പ്രഗൽഭരുഉം അധിനിവേശ വിരുദ്ധ പോരട്ടത്തിന് ആദ്യമായി ആഹ്വാനം ചെയ്ത മുസ്ലിം നവോത്ഥാന നായകൻ സൈനുദ്ധീൻ മഖ്‌ധൂം ഒന്നാമന്റെ പരമ്പരയിലെ നാല്പതാം സ്ഥനിയാണ് ഇപോഴത്തെ മഖ്‌ധൂമും ഖാസിയും വലിയ പള്ളി പ്രസിഡന്റുമായ സയ്യിദ് എം. പി. മുത്തുകോയ തങ്ങൾ പൊന്നാനി.[3]

ജസ്റ്റിസ്‌ കുഞ്ഞഹമ്മദ്‌കുട്ടി, പി.കൃഷ്ണവാര്യർ, പ്രൊഫ.കെ.വി.അബ്ദു‍റഹ്‌മാൻ, പ്രൊഫ.കടവനാട്‌ മുഹമ്മദ്‌, പ്രൊഫ. എ.വി. മൊയ്തീൻകുട്ടി, പ്രൊഫ.എം.എം നാരായണൻ, ചരിത്രകാരൻ ടി. വി. അബ്ദുറഹിമാൻ കുട്ടി, ടി. കെ. പൊന്നാനി എന്നിവരും പൊന്നാനിയുടെ സാഹിത്യ-സാംസ്കാരിക മേഖലയിലെ ശ്രദ്ധേയ വ്യക്തിത്വങ്ങളാണ്.

ചിത്രകല[തിരുത്തുക]

പൊന്നാനിയിലെ ചിത്രകലാ പാരമ്പര്യം വിശാലമാണ്. കെ.സി.എസ്. പണിക്കർ, അക്കിത്തം നാരായണൻ , ആർട്ടിസ്റ്റ് നമ്പൂതിരി, ടി.കെ. പത്മിനി, ആർട്ടിസ്റ്റ് ഗോപിനാഥ് തുടങ്ങിയ പ്രമുഖർ പൊന്നാനിയുടെ ഈ പാരമ്പര്യത്തെ സമ്പുഷ്ടമാക്കുന്നു.

സ്വാതന്ത്ര്യ സമരം[തിരുത്തുക]

സ്വാതന്ത്ര്യത്തിനായി പോരാടിയ ദേശീയപ്രസ്ഥാനങ്ങളുമായി ബന്ധപ്പെട്ടും പൊന്നാനിയുടെ സ്ഥാനം വലുതാണ്. കെ. കേളപ്പൻ , ഇ. മൊയ്തു മൗലവി എന്നിവരുടെ സാന്നിദ്ധ്യം നിരവധി പേരെ സ്വാതന്ത്ര്യ സമരത്തിലേക്കടുപ്പിച്ചു.

താഴെ പറയുന്ന ദേശാഭിമാനികളെ സ്വാതന്ത്ര്യ സമരക്കാലത്ത് പൊന്നാനി രാജ്യത്തിന് സമർപ്പിച്ചു.

രാഷ്ട്രിയ നേതാക്കൾ[തിരുത്തുക]

പൊന്നാനി നഗരം തപാലോഫീസ്
  • ഇ.കെ. ഇമ്പിച്ചി ബാവ
  • വി. പി. സി. തങ്ങൾ
  • കൊളാടി ഗോവിന്ദൻ കുട്ടി
  • പി. ടി. മോഹനകൃഷ്ണൻ
  • പാലോളി മുഹമ്മദ് കുട്ടി
  • അബ്ദുൽ ഹൈ ഹാജി
  • സി. ഹരിദാസ്
  • എം. എം. കുഞ്ഞാലൻ ഹാജി
  • പ്രൊഫ്‌. എം. എം. നാരായണൻ
  • എ. വി. ഹംസ
  • അഷ്‌റഫ്‌ കൊക്കുർ
  • പി. ടി. അജയ് മോഹൻ
  • വി. പി. ഹുസൈൻ കോയ തങ്ങൾ
  • ഫാത്തിമ ഇമ്പിച്ചി ബാവ
  • സൈദ് മുഹമ്മദ് തങ്ങൾ
  • ഉണ്ണികൃഷ്ണൻ പൊന്നാനി
  • ടി.എം സിദ്ധിഖ്
  • സിദ്ധീഖ് പന്താവൂർ

ദേശീയ പ്രസ്ഥാനത്തിന്റെ ഉദയത്തിനും മുമ്പേ ബ്രിട്ടീഷുകാരോടു പോരാടിയ അവിസ്മരണീയ നാമമാണ് വെളിയങ്കോട് ഉമർഖാസിയുടേത്. കടുത്ത സാമ്രാജ്യത്വവിരോധിയായിരുന്ന ഉമർഖാസി ഒരു നിമിഷകവി കൂടിയായിരുന്നു.

കെ കേളപ്പനോടൊപ്പം പ്രവർത്തിച്ച സ്വാതന്ത്ര്യസമര സേനാനിയും പ്രശസ്ത ഗാന്ധിയനുമാണ് പൊന്നാനിയിലെ തവനൂർ മനയ്ക്കൽ വാസുദേവൻ നമ്പൂതിരി .

ഖിലാഫത്ത് പ്രവർത്തകരുടെ ഒരു യോഗം 1921 ജൂൺ 24 നു ആലി മുസ്‌ല്യാരുടെയും മറ്റും നേതൃത്വത്തിൽ പുതുപൊന്നാനിയിൽ വെച്ച് നടന്നിരുന്നു. ഈ യോഗം മുടക്കാൻ ആമു സൂപ്രണ്ടിന്റെ കീഴിലുള്ള ബ്രിട്ടീഷ് പട്ടാളം നടത്തിയ ശ്രമങ്ങൾ അബ്ദുറഹിമാൻ സാഹിബിന്റെ അവസരോചിത ഇടപെടൽ കാരണം തത്കാലം ശാന്തമായി പിരിഞ്ഞു. ഈ സംഭവത്തിനു മുന്ന് ആഴ്ച കഴിഞ്ഞു ഓഗസ്റ്റ്‌ 20 നാണു മലബാർ കലാപം ആരംഭിച്ചത്. [4]

പൊന്നാനിയിലെ ബീഡിത്തൊഴിലാളികൾ നയിച്ച അഞ്ചരയണ സമരം ഇന്ത്യയിലെ തൊഴിലാളി പ്രസ്ഥാനത്തിന് കരുത്ത് നൽകിയ ഒന്നാണ്. പൊന്നാനിയിലെ തുറമുഖതൊഴിലാളികൾ നടത്തിയ ഐതിഹാസികമായ മറ്റൊരു സമരം ഇന്ത്യൻ തൊഴിലാളികളുടെ സംഘടിതപ്രവർത്തനങ്ങൾക്ക് ഊർജ്ജം നൽകി. തൊഴിലാളി പ്രസ്ഥാനത്തിലൂടെ മുഖ്യധാരയിലെത്തിയ രാഷ്ട്രീയ പ്രവർത്തകനായ ഇ.കെ. ഇമ്പിച്ചി ബാവ പൊന്നാനിക്ക് നൽകിയ സംഭാവനകൾ വളരെ വലുതാണ്. ഏറ്റവും കുടൂതൽ കാലം പൊന്നാനി പഞ്ചായത്ത്‌ പ്രസിഡന്റും 1960 ല്ലും 19967 ല്ലും രണ്ടു തവണ പൊന്നാനിയിൽ നിന്ന് വിജയിച്ചു M. L. A. യായ പൊന്നാനികാരൻ എന്ന പദവിയും വി. പി. സി. തങ്ങൾക്കു സ്വന്തമാണ്. സി. ഹരിദാസ് രാജ്യസഭാ മെമ്പർ, എം എൽ എ, പൊന്നാനി നഗരസഭാ ചെയർമാൻ തുടങ്ങിയ പദവികൾ വഹിചിടുണ്ട്. അഡ്വ.കൊളാടി ഗോവിന്ദൻകുട്ടി, ‍എം. റഷീദ്, വിപി ഹുസൈൻ കോയ തങ്ങൾ, എ.വി  ഹംസ, ഫാത്തിമ്മ ടീച്ചർ, പ്രൊഫ.എം.എം നാരായണൻ , ടി.എം സിദ്ധിഖ് ‍ തുടങ്ങിയവരും പൊന്നാനിയുടെ രാഷ്ട്രീയ മണ്ഡലത്തിൽ പ്രധാന സ്ഥാനമുള്ളവരാണ്.

കേരളത്തിലെ ഇരുപത്‌ ലോകസഭാ മണ്ഡലത്തിലൊന്നാണ് പൊന്നാനി. തിരൂർ, തിരൂരങ്ങാടി, താനൂർ, തവനൂർ, തൃത്താല, പൊന്നാനി, കോട്ടക്കൽ‍ എന്നീ അസംബ്ളി മണ്ഡലങ്ങൾ ചേർന്നതാണ് പുനർ നിർണയത്തിനു ശേഷമുള്ള പൊന്നാനി ലോകസഭാ മണ്ഡലം. 1957 മുതൽ 1977 കാലയളവ്‌ വരെ ഇതൊരു സംവരണ മണ്ഡലമായിരുന്നു. ആ കാലയളവിൽ ഇടതുപക്ഷ മേൽക്കൈ നിലനിന്നിരുന്നെങ്കിലും പിന്നീട്‌ ഈ മണ്ഡലം ഇന്ത്യൻ യൂണിയൻ മുസ്ലിം ലീഗിന്റെ അധീനതയിൽ വന്നു. 2004-ലെ തിരഞ്ഞെടുപ്പ് വരെ പെരിന്തൽമണ്ണ, മങ്കട എന്നീ നിയമസഭാ മണ്ഡലങ്ങൾ പൊന്നാനിക്കു കീഴിലായിരുന്നു. തുടർന്ന് മണ്ഡല പുനർ നിർണയം വന്നപ്പോൾ പെരിന്തൽമണ്ണയും മങ്കടയും മലപ്പുറം ലോക്‌സഭാമണ്ഡലത്തിലേക്ക് പോകുകയും പുതുതായി രൂപവത്കരിച്ച തവനൂർ,കോട്ടക്കൽ മണ്ഡലങ്ങൾ പൊന്നാനിയോട് കൂട്ടിച്ചേർക്കപ്പെടുകയും ചെയ്തു.മുസ്ലിം ലീഗിലെ ഇ. അഹമ്മദ് ആണ്‌ 14-ം ലോക്‌സഭയിൽ പൊന്നാനി മണ്ഡലത്തെ പ്രതിനിധീകരിച്ചത്. 2019 ൽ നടന്ന ലോകസഭാ തിരഞ്ഞടുപ്പിൽ വിജയിച്ച മുസ്ലിം ലീഗിലെ ഇ.ടി. മുഹമ്മദ് ബഷീർ ഇപ്പോൾ‍ ഈ ലോക്‌സഭാ മണ്ഡലത്തെ പ്രതിനിധീകരിക്കുന്നത്. പൊന്നാനി നഗരസഭയും പൊന്നാനി താലൂക്കിലെ ആലംകോട്, മാറഞ്ചേരി, നന്നംമുക്ക്, പെരുമ്പടപ്പ്, വെളിയംകോട്, എന്നീ ഗ്രാമപഞ്ചായത്തുകളും ഉൾപെടുന്ന നിയമസഭാ മണ്ഡലമാണ് പൊന്നാനി നിയമസഭാ മണ്ഡലം.

ലോകസഭാംഗങ്ങൾ

2016 ൽ നടന്ന നിയമസഭാ തിരഞ്ഞടുപ്പിൽ വിജയിച്ച സിപിഎമ്മിലെ പി. ശ്രീരാമകൃഷ്ണനാണ് പൊന്നാനി നിയമസഭാ മണ്ഡലത്തെ പ്രതിനിധീകരിക്കുന്നത്.

മണ്ഡലത്തെ പ്രതിനിധീകരിച്ചവർ

ആധുനിക വിദ്യാഭ്യാസം[തിരുത്തുക]

കുട്ടാവു ആശാന്റെ കുടിപ്പള്ളിക്കൂടമായിരുന്നു ആദ്യകാല ശിശു പഠനശാല.ആധുനിക വിദ്യാഭ്യാസത്തിന്റെ തുടക്കം 1880 ൽ സ്ഥാപിതമായ ബി. ഇ. എം. യു. പി. സ്കൂൾ ആണ്. ഇപ്പോൾ ടൗൺ ജി.എൽ.പി. സ്കൂൾ എന്നറിയപ്പെടുന്ന മാപ്പിള ബോർഡ് സ്കൂൾ ആണ് ആധുനിക രീതിയിലുള്ള നഗരത്തിലെ ആദ്യത്തെ വിദ്യാലയം. 1887-ൽ എഴുതിയ മലബാർ മാനുവലിൽ ഈ വിദ്യാലയത്തെക്കുറിച്ച് വില്യം ലോഗൻ പരാമർശിക്കുന്നുണ്ട്.

1914-ൽ അംഗികാരം ലഭിച്ച പൊന്നാനി നഗരത്തിലെ ഹയർ എലിമെന്റെരി വിദ്യാലയമായ ടി. ഐ. യു. പി. സ്കൂല്ലിന്റെ സ്ഥാപകൻ വിദ്യഭ്യാസ പരിഷ്കര്താവ് കുന്നികലകത് ഉസ്മാൻ മാസ്റ്റർ ആണ്.

പൊന്നാനിയിലെ ആദ്യത്തെ ഹൈസ്കൂൾ ആയ എ.വി. ഹയ്യർ സെക്കണ്ടറി സ്കൂൾ തുടങ്ങിയത് 1895-ലാണ്. 1947-ൽ എം.ഐ. ഹൈസ്കൂളും പ്രവർത്തനമാരംഭിച്ചു. പെൺകുട്ടികൾക്കായി ആരംഭിച്ച ആദ്യത്തെ വിദ്യാലയമാണ് ഇന്നത്തെ തൃക്കാവ് ഹൈസ്കൂൾ.[5]

വിനോദ സഞ്ചാരം[തിരുത്തുക]

ഭാരതപ്പുഴയും തിരൂർ-പൊന്നാനിപ്പുഴയും ഒത്തുചേർന്ന് അറബിക്കടലിൽ പതിക്കുന്ന പൊന്നാനിയിലെ അഴിമുഖം ദേശാടന പക്ഷികളുടെ ഒരു തുരുത്താണ്. നൂറുകണക്കിനു പക്ഷി സ്നേഹികളും നിരീക്ഷകരും ഇക്കാലത്ത്‌ സന്ദർശനത്തിനായി അഴിമുഖത്തും പരിസര ഭാഗങ്ങളിലുമായി എത്തിച്ചേരാറുണ്ട്. മാർച്ചുമുതൽ മെയ്‌ വരെയുള്ള കാലയളവിലാണ് ദേശാടനപ്പക്ഷികൾ കൂടുതലായും വന്നെത്താറുള്ളത്. ഈ തുറമുഖത്തോട് ചേർന്നു കിടക്കുന്ന പുറത്തൂർ ഒരു പക്ഷിനിരീക്ഷണ കേന്ദ്രമാണ്.

വിനോദസഞ്ചാരികളുടെ മറ്റൊരു ആകർഷണമാണു ബിയ്യം കായൽ. എല്ലാ വർഷവും ഓണാഘോഷത്തോടനുബന്ധിച്ച് ഇവിടെ വള്ളംകളി മത്സരം നടന്നു വരുന്നു. രണ്ടു ഡസനോളം നാടൻ വള്ളങ്ങൾ മത്സരത്തിൽ പങ്കെടുക്കുന്നു. വനിതാ തുഴക്കാരുള്ള വള്ളങ്ങളും ഇവയിൽ ഉൾപ്പെടും. കായൽ തീരത്തുള്ള വിശ്രമ കേന്ദ്രം വിനോദ സഞ്ചാരികൾക്ക് സുഖകരമായ താമസമൊരുക്കുന്നു. കൂടുതൽ വലിയ വിനോദസഞ്ചാര സമുച്ചയത്തിന്റെ നിർമ്മാണ പദ്ധതി ഇവിടെ പുരോഗതിയിലാണ്.ഇപ്പോൾ ഇവിടെ പാർക്ക് ആരംഭിച്ചിട്ടുണ്ട് 

മലബാറിൻറെ തീരമേഖലയ്ക്ക് പുതിയ ഗതാഗതമാർഗ്ഗം തുറക്കുകയും മലപ്പുറം ജില്ലയിലെ കാർഷിക, ടൂറിസം, ശുദ്ധജലം വിതരണമേഖലകളിൽ വൻ നേട്ടം സാധ്യമാക്കുകയും ചെയ്യുന്നതാന് പൊന്നാനിയിലെ പുതിയ ചമ്രവട്ടം റഗുലേറ്റർ കം ബ്രിജ്. പാലത്തിന് 978 മീറ്റർ നീളവും 7.5 മീറ്റർ വീതിയുമുണ്ട്. റഗുലേറ്ററിന് 70 ഷട്ടറുകളാണുള്ളത്. സമുദ്രനിരപ്പിൽനിന്ന് ആറു മീറ്റർ ഉയരത്തിലാണ് പാലം നില നിൽക്കുന്നത്. 1982ൽ തറക്കല്ലിട്ട ചമ്രവട്ടം റഗുലേറ്റർ-പാലം പദ്ധതി യാഥാർത്ഥ്യമാകുന്നതോടെ പൊന്നാനിയിലെ വിനോദസഞ്ചാര, ജലസേചന, ഗതാഗത രംഗങ്ങൾ വലിയ മാറ്റങ്ങൾക്ക് വിധേയമാകുമെന്ന് പ്രതീക്ഷിക്കപ്പെടുന്നു.

ഭരണം[തിരുത്തുക]

പൊന്നാനിയുടെ ഭരണ മേഖലയെ രണ്ടായി തരംതിരിച്ചിരിക്കുന്നു:

  • റവന്യൂ.
  • തദ്ദേശ സ്വയംഭരണം.

ബ്ലോക്ക്‌ പഞ്ചായത്തും പൊന്നാനി മുനിസിപ്പലിറ്റിയും തദ്ദേശസ്വയംഭരണ വിഭാഗത്തിൽ പെടുന്നു.അമ്പത്‌ വാർഡുകൾ ഉൾപ്പെടുന്നതാണ് പൊന്നാനി മുനിസിപ്പാലിറ്റി. ഓരോ വാർഡിനും തിർഞ്ഞെടുക്കപ്പെട്ട ഒരു മുനിസിപ്പൽ കൌൺസിലറുണ്ടായിരിക്കും റവന്യൂ ഭരണ വിഭാഗത്തിൽ താലൂക്കിനെ പതിനൊന്ന് വില്ലേജുകളായി തിരിച്ചിരിക്കുന്നു.വില്ലേജുകൾ താഴെ പറയുന്നവയാണ്.

പൊന്നാനി മുനിസിപ്പാലിറ്റിയിലെ 1991 ലെ സ്ഥിതിവിവരണക്കണക്ക്‌ ഇപ്രകാരമാണ്:

  • വിസ്തീർ‍ണം :199.42 ച. കി
  • ജനസംഖ്യ : 320,888
  • സാക്ഷരത : 71.3%

അവലംബം[തിരുത്തുക]

  1. The maritime trade of ancient Tamils in plant products. Accessed on 31 August 2009.
  2. തമ്പ്രാക്കളുടെ തമ്പ്രാക്കൾ- സി. രാധാകൃഷ്ണൻ. മലയാള മനോരമ ദിനപത്രം 2011 ഫെബ്രുവരി 19
  3. മലബാറിലെ മക്ക - ടി. വി. അബ്ദുറഹിമാൻ കുട്ടി
  4. ചരിത്രമുറങ്ങുന്ന പൊന്നാനി(മൂന്നാം പതിപ്പ്)- ടി. വി. അബ്ദുറഹിമാൻ കുട്ടി (എഡ്യുമാർട്ട് തിരൂരങ്ങാടി)
  5. പൊന്നാനി:പൈതൃകവും നവോത്ഥാനവും- ടി. വി. അബ്ദുറഹിമാൻ കുട്ടി (പൂങ്കാവനം ബുക്ക്സ്)

ചിത്രശാല[തിരുത്തുക]

പുറത്തേക്കുള്ള കണ്ണികൾ[തിരുത്തുക]

"https://ml.wikipedia.org/w/index.php?title=പൊന്നാനി&oldid=3334547" എന്ന താളിൽനിന്ന് ശേഖരിച്ചത്