കെ. കേളപ്പൻ

വിക്കിപീഡിയ, ഒരു സ്വതന്ത്ര വിജ്ഞാനകോശം.
കേരള ഗാന്ധി
കെ. കേളപ്പൻ
കെ. കേളപ്പൻ.jpg
ജനനം കെ. കേളപ്പൻ നായർ
1889 ഓഗസ്റ്റ് 24(1889-08-24)
മുചുകുന്ന്, കോഴിക്കോട്
മരണം 1971 ഒക്ടോബർ 7(1971-10-07) (പ്രായം 82)
കോഴിക്കോട്
ദേശീയത ഇൻഡ്യ
മറ്റ് പേരുകൾ കോയപ്പള്ളി കേളപ്പൻ നായർ, കേരള ഗാന്ധി
വിദ്യാഭ്യാസം ബിരുദധാരി
തൊഴിൽ സ്വാതന്ത്ര്യസമര സേനാനി, അദ്ധ്യാപകൻ, പത്രാധിപർ, നായർ സർവീസ് സൊസൈറ്റിയുടെ സ്ഥാപകാംഗം
പ്രശസ്തി Indian independence movement
പദവി എൻ.എസ്.എസ്. പ്രസിഡന്റ്, കേരള ഗാന്ധി
രാഷ്ട്രീയപ്പാർട്ടി
Indian National Congress
Kisan Mazdoor Praja Party
മതം ഹിന്ദുമതം
ജീവിത പങ്കാളി(കൾ) ടി.പി ലക്ഷ്മി അമ്മ
കുട്ടി(കൾ) ടി.പി.കെ കിടാവ്

കേരളത്തിലെ പ്രമുഖ സ്വാതന്ത്ര്യസമര പോരാളിയും, ഗാന്ധിയനും, സോഷ്യലിസ്റ്റു ചിന്തകനുമായിരുന്നു കെ. കേളപ്പൻ (കെ. കേളപ്പൻ നായർ). (ജനനം: 1889 ഓഗസ്റ്റ് 24; മരണം: 1971 ഒക്ടോബർ 7). നായർ സർവ്വീസ് സൊസൈറ്റിയുടെ ആദ്യ പ്രസിഡന്റാണ് കേരളഗാന്ധി എന്നറിയപെടുന്ന കെ. കേളപ്പൻ.[1]

ജീവിതരേഖ[തിരുത്തുക]

1889 ഓഗസ്റ്റ് 24-നു കേരളത്തിലെ കോഴിക്കോട് ജില്ലയിലെ മൂടാടി എന്ന ഒരു ഗ്രാമത്തിലെ സാധാരണ ഒരു നായർ കുടുംബത്തിലാണ് കെ. കേളപ്പൻ ജനിച്ചത്. കലാലയ ജീവിതം കോഴിക്കോടും മദിരാശിയിലുമായിരുന്നു. ചങ്ങനാശ്ശേരി എസ്.ബി സ്കൂളിൽ അദ്ധ്യാപകനായി അദ്ദേഹം തന്റെ ഔദ്യോഗിക ജീവിതം ആരംഭിച്ചത്.[2] വക്കീൽ ഗുമസ്തനായ അച്ഛന്റെ അഭിലാഷം മകനെ വക്കീലാക്കുക എന്നതായിരുന്നു. അതിനാൽ ബോംബെയിൽ‍ തൊഴിൽജീവിതം നയിച്ച് ‍നിയമപഠനം നടത്തി. ഇക്കാലത്താണ് ഗാന്ധിജിയുടെ ആഹ്വാനത്താൽ പ്രചോദിതനായി പഠനമുപേക്ഷിച്ച് ദേശീയ വിമോചനസമരത്തിലേക്ക് ആകർഷിക്കപ്പെട്ടത്.

നായർ സർവീസ് സൊസൈറ്റി[തിരുത്തുക]

ചങ്ങനാശ്ശേരി സെൻറ്. ബർക്കുമാൻസ് സ്കൂളിൽ അദ്ധ്യാപകനായി കഴിയുന്ന കാലത്താണ് മന്നത്ത് പത്മനാഭനുമായി പരിചയപ്പെടുന്നത്. ഇതിലൂടെ അദ്ദേഹം നായർ സർവീസ് സൊസൈറ്റിയുടെ സ്ഥാപക അംഗമായി. എൻ.എസ്.എസിന്റെ ആദ്യ ജനറൽ സെക്രട്ടറിയായി മന്നത്ത് പത്മനാഭനും ആദ്യ പ്രസിഡണ്ടായി കെ.കേളപ്പനും തിരഞ്ഞെടുക്കപ്പെട്ടു.[3]


സ്വാതന്ത്ര്യസമരത്തിൽ[തിരുത്തുക]

ബ്രിട്ടീഷ് ഭരണം ബഹിഷ്കരിക്കാൻ മഹാത്മാഗാന്ധി ആഹ്വാനം ചെയ്തപ്പോൾ കേളപ്പൻ തന്റെ ജോലി ഉപേക്ഷിച്ച് തന്റെ ജീവിതം മാതൃരാജ്യത്തിനായി ഉഴിഞ്ഞുവെയ്ക്കുവാൻ തീരുമാനിച്ചു. ഒരു വശത്ത് ഭാരതീയ സമൂഹത്തിലെ അനാചാരങ്ങൾക്ക് എതിരെയും മറുവശത്ത് ബ്രിട്ടീഷ് ഭരണത്തിന് എതിരായും അദ്ദേഹം പോരാടി. ഒരു മാതൃകാ സത്യാഗ്രഹിയായിരുന്നു അദ്ദേഹം. ഊർജ്ജസ്വലനായ വിപ്ലവകാരിയും സാമൂഹിക പരിഷ്കർത്താവും അധഃസ്ഥിതരുടെ നീതിക്കുവേണ്ടി പോരാടിയ പോരാളിയുമായിരുന്നു കേളപ്പൻ.

മലബാർ ലഹളയുടെ കാലത്ത് ഒരുകൂട്ടം വിപ്ലവകാരികൾ പൊന്നാനി ഖജനാവ് കൊള്ളയടിക്കുവാനെത്തി. ഇവരെ അവരുടെ തെറ്റ് പറഞ്ഞുമനസ്സിലാക്കി തിരിച്ചയക്കുവാൻ കേളപ്പനു സാധിച്ചു. പയ്യന്നൂരിലെയും കോഴിക്കോട്ടെയും ഉപ്പു സത്യാഗ്രഹങ്ങൾക്ക് അദ്ദേഹം നേതൃത്വം നൽകി. ഗാന്ധിജിയുടെ സത്യാഗ്രഹ പ്രസ്ഥാനത്തിൽ ചേർന്ന ആദ്യത്തെ കേരളീയനായിരുന്നു കേളപ്പൻ. വൈക്കം സത്യാഗ്രഹത്തിൽ അദ്ദേഹം ഒരു പ്രധാന പങ്കുവഹിച്ചു.

ഗുരുവായൂർ സത്യാഗ്രഹം[തിരുത്തുക]

1932-ലെ ഗുരുവായൂർ സത്യാഗ്രഹത്തിന്റെ നേതാവ് കേളപ്പനായിരുന്നു. ഗാന്ധിജിയുടെ അപേക്ഷ പ്രകാരമാണ് അദ്ദേഹം ഗുരുവായൂരിലെ തന്റെ നിരാഹാര സമരം അവസാനിപ്പിച്ചത്.

സോഷ്യലിസ്റ്റ്[തിരുത്തുക]

സ്വാതന്ത്ര്യസമരത്തിന്റെ ഭാഗമായി പലതവണ അദ്ദേഹം ജയിൽ വാസം അനുഭവിച്ചിട്ടുണ്ട്. അയിത്തം ഉച്ചാടനം ചെയ്യുവാൻ അദ്ദേഹം പരിശ്രമിച്ചു. ഹരിജനങ്ങളുടെ ഉന്നമനത്തിനായി അദ്ദേഹം പ്രയത്നിച്ചു. കേരളത്തിൽ പല ഹരിജന ഹോസ്റ്റലുകളും വിദ്യാലയങ്ങളും അദ്ദേഹം ആരംഭിച്ചു. സ്വദേശി പ്രസ്ഥാനത്തിന്റെ മുൻപന്തിയിലായിരുന്നു അദ്ദേഹം. ഖാദി, കുടിൽ വ്യവസായങ്ങൾ കേരളത്തിൽ വേരുറപ്പിക്കുന്നതിന് അദ്ദേഹം പരിശ്രമിച്ചു.

പ്രജാ സോഷ്യലിസ്റ്റ് പാർട്ടി[തിരുത്തുക]

പത്രാധിപർ[തിരുത്തുക]

ഒരു വിദ്യാഭ്യാസ വിചക്ഷണനും നല്ലൊരു പത്രലേഖകനുമായിരുന്നു അദ്ദേഹം. മാതൃഭൂമി ദിനപത്രം ആരംഭിച്ചതിൽ അദ്ദേഹത്തിനും പങ്കുണ്ട്. രണ്ടു പ്രാവശ്യം (1929ലും, 1936ലും അദ്ദേഹം മാതൃഭൂമിയുടെ പത്രാധിപരായിരുന്നു. 1954 ൽ സമദർശിനിയുടെ പത്രാധിപരായും പ്രവർത്തിച്ചു.

സർവ്വോദയപ്രസ്ഥാനത്തിൽ[തിരുത്തുക]

സ്വാതന്ത്ര്യ ലബ്ധിക്കു ശേഷം അദ്ദേഹം രാഷ്ട്രീയം ഉപേക്ഷിച്ച് സർവോദയ പ്രസ്ഥാനത്തിൽ ചേർന്നു. കേരള സർവോദയ സംഘം, കേരള ഗാന്ധി സ്മാരക നിധി, കേരള സർവോദയ മണ്ഡൽ, കോഴിക്കോട് ഗാന്ധി പീസ് ഫൗണ്ടേഷൻ തുടങ്ങിയ കേരളത്തിലെ മിക്കവാറും എല്ലാ ഗാന്ധിയൻ സംഘടനകളുടെയും അദ്ധ്യക്ഷനായി അദ്ദേഹം പ്രവർത്തിച്ചു. ഇതിനുപരി കേരള സംസ്ഥാനത്തിന്റെ രൂപവത്കരണത്തിൽ അദ്ദേഹം ഒരു വലിയ പങ്കുവഹിച്ചു. ഒരിക്കലും പദവിക്കോ അധികാരത്തിനോ വേണ്ടി കേളപ്പൻ ആഗ്രഹിച്ചിരുന്നില്ല.

രാഷ്ട്രത്തിനുവേണ്ടി സമർപ്പിച്ച നിസ്സ്വാർത്ഥമായ ഒരു ജീവിതമായിരുന്നു കേളപ്പന്റേത്. ഗാന്ധിജിയുടെ ജീവിതവും ആദർശങ്ങളും കേരളത്തിലെ ജനങ്ങൾ അറിഞ്ഞത് ഒരു വലിയ അളവുവരെ കേളപ്പനിലൂടെയായിരുന്നു. സേവനത്തിന്റെ ആ ജീവിതം 1971 ഒക്ടോബർ 7-നു അവസാനിച്ചു.

വിമർശനം[തിരുത്തുക]

വർഗീയത മനസ്സിൽ സൂക്ഷിച്ച കോൺഗ്രസ്കാരനായിരുന്നു കെ. കേളപ്പൻ എന്ന വിമർശനം ചിലരെങ്കിലും അദ്ദേഹത്തിനെതിരെ ആക്ഷേപം ഉന്നയിച്ചിട്ടുണ്ട്. മലപ്പുറം ജില്ല രൂപീകരിച്ചപ്പോൾ കൊച്ചുപാകിസ്താൻ സൃഷ്ടിക്കുകയാണെന്ന് വിമർശനം ഉയർത്തി അതിനെതിരെയുള്ള പ്രക്ഷോഭത്തിൽ മുൻപന്തിയിൽ നിന്നതും 1968 ൽ അങ്ങാടിപ്പുറത്തെ അനാഥമായി കാണപ്പെട്ട ശിവലിംഗത്തെ(തളിക്ഷേത്രം) പുനരുദ്ധരിക്കാൻ മുന്നിട്ടിറങ്ങിയതും വിമർശകർ അദ്ദേഹത്തിനെതിരെ എടുത്തുകാട്ടുന്നു.[ക][ഖ]

കുറിപ്പുകൾ[തിരുത്തുക]

  • .^ " ആറുമാസത്തിലധികം പയ്യോളിയിൽ സർവോദയ സംഘത്തിന്റെ മദ്യഷാപ്പ് പിക്കറ്റിംഗിനു നേതൃത്വം കൊടുത്തശേഷം തികച്ചും വർഗീയമായ ഒരു മുഖഛായ കേളപ്പനിൽ കാണപ്പെട്ടു. ഇം.എം.എസ് സർക്കർ മലപ്പുറം ജില്ലരൂപീകരിച്ചപ്പോൾ കേരളത്തിലൊരു കൊച്ചു പാകിസ്താൻ സൃഷ്ടിച്ച് ഇന്ത്യയുടെ ദേശീയതയെതന്നെ വെല്ലുവിളിക്കുന്ന നടപടിയാണതെന്ന് അദ്ദേഹത്തിനു തോന്നി....1968 ൽ സെപ്റ്റംബറിൽ അങ്ങാടിപ്പുറത്തെ പൊതുമരാമത്ത് പുറമ്പോക്കിൽ അനാഥമായി കാണപ്പെട്ട ശിവലിംഗത്തെ ഉദ്ധരിക്കാൻ അദ്ദേഹം ഇറങ്ങിത്തിരിച്ചു. തൊട്ടടുത്ത നിസ്കാരപ്പള്ളി മുൻനിർത്തി തങ്ങളുടെ മതവികാരം വ്രണപ്പെടുന്നതിനെതിരെ മുസ്ലിങ്ങളും രംഗത്തു വന്നു.[4]
  • .^ "ബംഗാളിലെ പ്രമുഖ കവിയും ആക്റ്റിവിസ്റ്റുമായിരുന്ന സമർ സെന്നിന്റെ പത്രാധിപത്യത്തിൽ ഇറങ്ങിയിരുന്ന ഫോണ്ടിയർ പത്രത്തിന്റെ 1968 ഡിസംബർ 7 ലക്കത്തിൽ റാംജി എഴുതിയ "A Mini-Pakistan ?" എന്ന തലക്കെട്ടിലുള്ള റിപ്പോർട്ടിൽ ഇങ്ങനെ കാണാം.: The trump card of the opposition now seems to be the whipping up of communal frenzy. Feelings are now running high between Hindus and Muslims on account of the hullabaloo over the formation Malappuram District. Mr. K. Kelappan, the true-blue Gandhite and Sarvodayite is now staging satyagraha for reviving a long discarded derelict temple. The temple, in ruins, is on a "Porampoku" land which is surrounded by Muslim houses. It is alleged that the temple has not been used for any Hindu religious rites for a long time now. The Move to revive the temple was ill received by the local Muslims who have a mosque near it. Communal feelings have run high:clashes took place in which several were injured and one killed. The Satyagraha by Mr. Kelappan finds a prominent place in the leading progress dailies and this publicity has sparked off sentiments in different centres in the state................."[5]

അവലംബം[തിരുത്തുക]

  1. http://www.nss.org.in/founder.html
  2. http://pib.nic.in/feature/feyr98/fe0898/f0308982.html
  3. http://www.nss.org.in/founder.html എൻ.എസ്.എസ് ഒഫിഷ്യൽ വെബ്സൈറ്റ്
  4. മലയാളം വാരിക- നവംബർ 2, 2012-എന്റെ മദ്യന്വേഷണ പരീക്ഷണങ്ങൾ എന്ന പരമ്പരയിലെ മൂന്നാം ഭാഗം-ഭിന്നിപ്പിച്ച മതവും ഒരുമിപ്പിച്ച മദ്യവും -ഗിരീഷ് ജനാർദ്ദനൻ
  5. http://www.frontierweekly.com/archive/vol/vol-1/vol-1-issues/1_35_7december1968.pdf


India1931flag.png      ഇന്ത്യൻ സ്വാതന്ത്ര്യസമര നേതാക്കൾ           Marche sel.jpg
അക്കാമ്മ ചെറിയാൻ - ആനി ബസൻറ് - ഇക്കണ്ടവാര്യർ - കസ്തൂർബാ ഗാന്ധി - എ.വി. കുട്ടിമാളു അമ്മ - ഐ.കെ. കുമാരൻ - സി. കേശവൻ - കെ.പി. കേശവമേനോൻ - കെ. കേളപ്പൻ - കെ.കെ. കുഞ്ചുപിള്ള - ഗാഫർ ഖാൻ -ഗോഖലെ - എ.കെ. ഗോപാലൻ - സി.കെ. ഗോവിന്ദൻ നായർ - ചന്ദ്രശേഖർ ആസാദ് -ചെമ്പകരാമൻ പിള്ള - നെഹ്‌റു - ജോർജ്ജ് ജോസഫ് - ഝാൻസി റാണി - താന്തിയാ തോപ്പി - ദാദാഭായ് നവറോജി - കെ.എ. ദാമോദരമേനോൻ - പട്ടം താണുപിള്ള - എ. ജെ. ജോൺ, ആനാപ്പറമ്പിൽ - വക്കം മജീദ് - പനമ്പിള്ളി ഗോവിന്ദമേനോൻ - പി. കൃഷ്ണപിള്ള - എ.കെ. പിള്ള - ബാല ഗംഗാധര‍ തിലകൻ - ഭഗത് സിംഗ് - മംഗൽ പാണ്ഡേ - മഹാത്മാ ഗാന്ധി - ജയപ്രകാശ് നാരായൺ- റാം മനോഹർ ലോഹിയ- മഹാദേവ് ഗോവിന്ദ് റാനാഡേ - ഭിക്കാജി കാമ -കെ. മാധവൻ നായർ -മുഹമ്മദ് അബ്ദുൾ റഹിമാൻ - മൗലാനാ ആസാദ് - മുഹമ്മദലി ജിന്ന - മദൻ മോഹൻ മാളവ്യ - രാജഗോപാലാചാരി - ലാലാ ലജ്പത് റായ്- മഹാദേവ് ദേശായ് - വക്കം മൗലവി - വിജയലക്ഷ്മി പണ്ഡിറ്റ് - സി.ശങ്കരൻ നായർ - സരോജിനി നായിഡു - പട്ടേൽ - ബോസ് - സ്വദേശാഭിമാനി രാമകൃഷ്ണപിള്ള - റാഷ്‌ ബിഹാരി ബോസ് - ബിപിൻ ചന്ദ്രപാൽ - പുരുഷോത്തം ദാസ് ടാണ്ടൻ - കുഞ്ഞാലി മരക്കാർ - ടിപ്പു സുൽത്താൻ - കുറൂർ നീലകണ്ഠൻ നമ്പൂതിരിപ്പാട് - ഇ.എം.എസ്. നമ്പൂതിരിപ്പാട് - വി.എസ്. അച്യുതാനന്ദൻ - ബീഗം ഹസ്രത്ത്‌ മഹൽ - കൂടുതൽ...



"https://ml.wikipedia.org/w/index.php?title=കെ._കേളപ്പൻ&oldid=2585620" എന്ന താളിൽനിന്നു ശേഖരിച്ചത്