ആലി മുസ്‌ലിയാർ

വിക്കിപീഡിയ, ഒരു സ്വതന്ത്ര വിജ്ഞാനകോശം.
(ആലി മുസ്ലിയാർ എന്ന താളിൽ നിന്നും തിരിച്ചുവിട്ടതു പ്രകാരം)
ആലി മുസ്‌ലിയാർ
Ali Musliyar.jpg
ആലി മുസ്‌ലിയാർ, കോയമ്പത്തൂർ ജയിലിൽ (1922)
ജനനം 1864
നെല്ലിക്കുത്ത് ഗ്രാമം, ഇപ്പോൾ മഞ്ചേരി മുനിസിപാലിറ്റി
മരണം 1922 ഫെബ്രുവരി 02
സെൻട്രൽ ജയിൽ, കോയമ്പത്തൂർ.
ദേശീയത ഭാരതീയൻ
പ്രശസ്തി സ്വാതന്ത്ര്യസമരം, ഖിലാഫത്ത് പ്രസ്ഥാനം


19 ാ നൂറ്റാണ്ടിൽ കേരളത്തിലെ മലബാർ കേന്ദ്രമാക്കി അരങ്ങേറിയ ബ്രിട്ടീഷ് വിരുദ്ധ കലാപത്തിന്റെ നേതൃനിരയിലുണ്ടയിരുന്ന പ്രമുഖ ഖാദിരിയ്യ സൂഫിയും, ഇസ്ലാമികപണ്ഡിതനുമായിരുന്നു ആലി മുസ്‌ലിയാർ.

ജീവിത രേഖ[മൂലരൂപം തിരുത്തുക]

ഏറനാട് താലൂക്കിൽ ഇപ്പോഴത്തെ മഞ്ചേരി നഗരസഭയുടെ കിഴക്കേ അതിർത്തി ഗ്രാമമായ നെല്ലിക്കുത്ത് എരിക്കുന്നൻ പാലത്തും മൂലയിൽ ആലി മുസ്‌ലിയാർ 1864 ൽ ജനിച്ചു. എരിക്കുന്നൻ പാലത്ത് മൂലയിൽ കുഞ്ഞിമൊയ്തീൻ, കോടക്കൽ ആമിന എന്നിവരാണ് മാതാപിതാക്കൾ[1]. ആലിമുസ്‌ലിയാരുടെ മാതാവ് ആമിന പൊന്നാനിയിലെ മഖ്ദൂം കുടുംബത്തിന്റെ പിന്തുടർച്ചക്കാരായിരുന്നു. മുടിക്കോട് ഖാസി(ന്യായാധിപൻ) യായിരുന്ന ഒറ്റക്കാട്ടു മമ്മദു മുസ്‌ലിയാർ ആണ് ആമിനയുടെ പിതാവ്. ഖാസിയെന്ന നിലയിൽ മമ്മദുകുട്ടി മുസ്‌ലിയാർ മുസ്‌ലിംകൾക്കിടയിൽ പ്രശസ്തനായിരുന്നു. ആലി മുസ്‌ലിയാരുടെ മാതാവിന്റെ കുടുംബക്കാർ അറിയപ്പെടുന്ന ഇസ്‌ലാംമത പണ്ഡിതൻമാരും കേരളത്തിലെ വിവിധ ഭാഗങ്ങളിൽ ഖാസിമാരായി സേവനം അനുഷ്ഠിച്ചവരുമായിരുന്നു. പിതാവ് പാലത്തുമൂലയിൽ കുഞ്ഞിമൊയ്തീൻ സാഹിബ് മലബാറിലെ പ്രമുഖ സൂഫി വര്യനായിരുന്ന സയ്യിദ് അലവിയുടെ പിന്തുടർച്ചക്കാരനാണ്

ചെറിയ കുട്ടിയായിരിക്കുമ്പോൾ തന്നെ ആലി മുസ്‌ലിയാർ ധീരനും സത്യസന്ധനും ബുദ്ധിമാനുമായിരുന്നു. നെല്ലിക്കുത്തെ ഓത്ത് പള്ളിയിൽ പ്രാഥമിക അറബി പഠനനം. വെള്ളങ്ങാട്ടെ കുഞ്ഞിക്കമ്മു മുല്ലയായിരുന്നു അദ്ദേഹത്തിന്റെ ഖുർആൻ അറബി വ്യാകരണവും ഇസ്‌ലാമിലെ സദാചാര നിയമങ്ങളും പഠിപ്പിച്ചത്. മലയാളം അക്ഷരമാലകളും ചെറുപ്പത്തിൽ തന്നെ അദ്ദേഹം ഹൃദിസ്ഥമാക്കി. കിതാബുകൾ(മതഗ്രന്ഥങ്ങൾ), സർഫ്, നഹ്‌വ്,(അറബി വ്യാകരണ ഗ്രന്ഥങ്ങൾ) എന്നിവയിൽ പ്രാവീണ്യം നേടിയ ശേഷം അക്കാലത്തെ പ്രമുഖ മത വിദ്യാഭ്യാസ കേന്ദ്രമായിരുന്ന പൊന്നാനിയിൽ പത്തുകൊല്ലക്കാലം അദ്ദേഹം പഠിച്ചു. മതപഠനകേന്ദ്രമെന്ന നിലയിൽ പൊന്നാനി അക്കാലത്ത് ‘ചെറിയ മക്ക’ എന്ന പേരിലാണ് അറിയപ്പെട്ടിരുന്നത്. മലായ, ഇന്തോനേഷ്യ, ജാവ, ലക്ഷദ്വീപ് തുടങ്ങിയ നാടുകളിൽ നിന്നുള്ളവരും പഠനത്തിനായി അവിടെ എത്താറുണ്ടായിരുന്നു. മുസ്‌ലിയാർ പൊന്നാനിയിൽ തഫ്‌സീർ (ഖുർആൻ വ്യാഖ്യാനം), ഹദീസ് (പ്രവാചക ചര്യ), ഫിഖ്ഹ്, തസവ്വുഫ്, ഇൽമുൽ കലാം, ഇൽമുൽ മീക്കത്ത്, ഇൽമുൽ ഹഖാഇഖ്, ഇൽമുൽ നഹസ്, ഇൽമുൽ മആനി എന്നിവയിൽ പ്രാവീണ്യം നേടി. ഖാദിരിയ്യ സൂഫി വര്യൻ ശൈഖ് സൈനുദ്ദീൻ മുസ്‌ലിയാരാണ് ആലിമുസ്‌ലിയാരുടെ ഗുരു . നിരവധി സൂഫികളുമായും ,പണ്ഡിതരുമായും വിദ്യാഭ്യാസമേഖലയുമായി ബന്ധപ്പെട്ടവരുമായും ധാരാളം പുസ്തകങ്ങളുമായും ഇടപഴകുന്നതിന് മുസ്‌ലിയാർക്ക് ഇക്കാലത്ത് അവസരമുണ്ടായി. . ഏഴുന്നൂറു ഹദീസും സനദും മനഃപാഠമാക്കിയതിന് സഹപാഠികളാലും അധ്യാപകരാലും അദ്ദേഹം അഭിനന്ദിക്കപ്പെട്ടു . തുടർന്ന് ദശാബ്ദക്കാലത്തോളം മമ്പുറം പള്ളി ദർസ്സിൽ മുദരിസായി ജോലി ചെയ്തു .

മമ്പുറം മഖം എന്നറിയപ്പെടുന്ന തീർത്ഥാടന കേന്ദ്ര പരിപാലനം ഈ കാലയളവിൽ ആലി മുസ്ലിയാരുടെ ചുമതലയിലായിരുന്നു. ശേഷം ഉപരിപഠനാർഥം മക്കയിലേക്ക് പോവുകയും അവിടെ ഹറം ശരീഫിൽ ഏഴുവർഷം താമസിച്ച് ഹദീസ്, ഖുർ‌ആൻ ഫിഖ്ഹ്, ഇസ്‌ലാമിക ചരിത്രം എന്നിവയിൽ പാണ്ഡിത്യം നേടുകയും, ഖുർആൻ മനഃപ്പാഠമാക്കുകയും ചെയ്തു. സയ്യിദ് ഹുസൈൻ ഹബ്ശി ,അല്ലാമാ സയ്യിദ് അഹ്മദ് സൈനി ദ്ദഹ്‌ലാൻ,ശൈഖ് മുഹമ്മദ് ഹിസ്ബുല്ലാഹി ബിൻ സുലൈമാനുൽ മക്കി തുടങ്ങിയ വിശ്വ പ്രസിദ്ധ സൂഫികളും മഹാ പണ്ഡിതരുമായിരുന്നു മക്കയിലെ ആലി മുസ്ലിയാരുടെ ഗുരുക്കന്മാർ.[2] അനന്തരം അദ്ദേഹം കവരത്തി ദ്വീപിലെത്തുകയും ഖാസിയായും , മുദരിസായും അവിടത്തെ ഇസ്ലാമിക പ്രവർത്തനങ്ങൾക്ക് നേതൃത്വം നൽകുകയുമുണ്ടായി[3] [4].

ബ്രിട്ടീഷ് വിരുദ്ധ സമരരംഗത്ത്[മൂലരൂപം തിരുത്തുക]

ആലി മുസ്ലിയാർ സ്മാരകം. നെല്ലിക്കുത്ത്

കുലീനരും ഉറച്ച മതവിശ്വാസികളുമായിരുന്ന ആലി മുസ്ലിയാരുടെ കുടുംബം പരമ്പരാഗതമായി ബ്രിട്ടീഷുകാരുമായി ശത്രുതയിലായിരുന്നു. ആലി മുസ്‌ലിയാരുടെ കുടുംബത്തിൽപെടുന്ന പയ്യനാട്ടു ഗുരുക്കൾ, മഞ്ചേരി ഹസ്സൻ(അത്തൻ)കുരിക്കൾ, ഇളംപുരളിശ്ശേരി ഉണ്ണിമൂപ്പൻ മുതലായവർ ബ്രിട്ടീഷുകാരോട് നേർക്കുനേരെ പടവെട്ടിയവരായിരുന്നു. 1896-ൽ മഞ്ചേരിയിലെ കർഷകസമരത്തിൽ മുസ്‌ലിയാരുടെ അടുത്ത ബന്ധുക്കളും സുഹൃത്തുക്കളുമായിരുന്ന ധാരാളം പേർ കൊല്ലപ്പെട്ടിരുന്നു. ലോക നാഡിയിടിപ്പുകൾ സൂഷ്മമായി വീക്ഷിച്ചിരുന്ന ആലിമുസ്ലിയാർ ഉസ്മാനിയ ഖിലാഫത്തിന് എതിരായി തുർക്കിയിലും മറ്റു മുസ്‌ലിം രാജ്യങ്ങളിലും ബ്രിട്ടീഷ് സാമ്രാജ്യത്വം നടത്തിവന്ന കടന്നാക്രമങ്ങളിൽ അസ്വസ്ഥനായിരുന്നു. നാട്ടിൽ തന്റെ ആളുകളെ പീഡിപ്പിക്കുകയും കൊന്നൊടുക്കുകയും ചെയ്തുകൊണ്ടിരുന്ന ബ്രിട്ടീഷുകാരോടുള്ള പക അദ്ദേഹത്തിൽ പുകഞ്ഞുകൊണ്ടിരുന്നു [5].

ബ്രിട്ടീഷ് വിരുദ്ധ സമരങ്ങളാൽ പ്രക്ഷുബ്ധമായിരുന്ന മലബാറിൽ നിന്ന് 1894 ൽ തൻറെ ജേഷഠൻ രക്തസാക്ഷിയായ വിവരം മറ്റൊരു സഹോദരനായ മമ്മിക്കുട്ടി മുസ്ലിയാർ മുഖേന അറിഞ്ഞാണ് ആലി മുസ്‌ലിയാർ കേരളത്തിലെത്തുന്നത്. സഹോദരൻ മമ്മിക്കുട്ടിയെ തൻറെ ചുമതല ഏൽപ്പിച്ചാണ് അദ്ദേഹം കവരത്തിയിൽ നിന്ന് പുറപ്പെട്ടത്. മലബാറിലെത്തിയ ആലി മുസ്‌ലിയാർ സ്ഥിതിഗതികൾ വിലയിരുത്തിയ ശേഷം ഖിലാഫത്ത് പ്രസ്ഥാനത്തിൽ ചേരുകയും ബ്രിട്ടീഷ്കാർക്കെതിരിലുള്ള സമാധാനപരമായ സമരപ്രവർത്തനങ്ങളിൽ വ്യാപൃതനാവുകയും ചെയ്തു. ഖിലാഫത്ത് പ്രസ്ഥാനത്തിലേക്കുള്ള അദ്ദേഹത്തിൻറെ പ്രവേശത്തെ പ്രചോദിച്ചത് കട്ടിലശ്ശേരി മുഹമ്മദ്‌ മുസ്‌ലിയാർ, എം.പി. നാരായണ മേനോൻ എന്നിവരായിരുന്നു.പിന്നീട് നിസ്സഹകരണ പ്രസ്ഥാനത്തിലും അദ്ദേഹം ഭാഗഭാക്കായി. അദ്ദേഹം പള്ളികളിൽ വെച്ച് നടത്തിയിരുന്ന പഠനക്ലാസുകൾ ബ്രിട്ടീഷ് വിരുദ്ധ ജനകീയ പ്രക്ഷോഭങ്ങൾക്ക് ജനങ്ങളെ സജ്ജരാക്കുന്നതായിരുന്നു[6]. ആത്മീയ പുരോഹിതനായതിനാൽ ആലി മുസ്ലിയാർക്ക് എളുപ്പത്തിൽ ജനക്കൂട്ടത്തെ ആകർഷിക്കാൻ കഴിഞ്ഞു . വാരിയൻ കുന്നടക്കമുള്ള പല ഖിലാഫത്തുക്കാരും മുസ്ലിയാരുടെ ശിഷ്യന്മാരായിരുന്നു . ഭക്തിയാദരവോടെ തങ്ങളുപ്പാപ്പ എന്നായിരുന്നു അദ്ദേഹത്തെ അനുയായികൾ വിളിച്ചിരുന്നത് . ആലി മുസ്‌ലിയാർ കടന്നു വരുന്ന സമയത്തു തക്ബീറുകൾ (ദൈവ കീർത്തനം) മുഴക്കുമായിരുന്നു . ഇതൊക്കെ കൊണ്ട് തന്നെ ആത്മീയത മറയാക്കി മുസ്‌ലിയാർ ബ്രിട്ടീഷ് വിരുദ്ധത പ്രചരിപ്പിക്കുകയായിരുന്നുവെന്നു കളക്ടർ വിലയിരുത്തുകയും പ്രദേശത്തെ സൂഫി പുണ്യളൻമാരുടെയും , രക്തസാക്ഷികളുടെയും ശവ കുടീരങ്ങൾ കേന്ദ്രീകരിച്ചു നടക്കുന്ന പ്രാർത്ഥനകൾ , തീർത്ഥ യാത്രകൾ , റാതെബുകൾ എന്നിവയ്ക്ക് വിലക്ക് ഏർപ്പെടുത്തുകയും ചെയ്തു. വിലക്ക് ലംഖിച്ചു തടയാൻ ഒരുങ്ങിയ പോലീസുകാരനെ തള്ളി വീഴ്ത്തി ആലി മുസ്ലിയാരും അനുയായികളും സിയാറത്തു യാത്ര നടത്തി. മലബാർ കലാപത്തിലെ ആദ്യ അക്രമണമായാണ് ചരിത്രകാരന്മാർ ഇതിനെ വിശേഷിപ്പിക്കുന്നത്.

ലഹളയുടെ ആരംഭം[മൂലരൂപം തിരുത്തുക]

ജന്മിമാരുടെ കരപിരിവ് ഒഴിവാക്കുന്നതിനും ആലി മുസ്ലിയാർ ശ്രമിക്കുകയുണ്ടായി . കുടിയൻമാർ സംഘടിക്കുന്നത് ആപത്താണെന്നു മനസ്സിലാക്കിയ ബ്രിട്ടീഷ് അനുകൂലികളായ ജന്മികൾ സർക്കാരിലേക്ക് സഹായമഭ്യർത്ഥിച്ചു [7] . ഇതോടെ കൂടുതൽ നിയന്ത്രണങ്ങൾ ഏർപ്പെടുത്തി പ്രദേശത്തെ മാപ്പിളമാരെ ബ്രിട്ടീഷ് സർക്കാർ വലിഞ്ഞു മുറുക്കി.

1921 ആഗസ്റ്റ് മാസം ആലി മുസ്‌ലിയാരുടെ നേതൃത്വത്തിൽ ഖാദി വസ്ത്രധാരികളായ മുന്നൂറിനും നാന്നൂറിനുമിടയിലുള്ള ഖിലാഫത്തു വോളന്റിയർമാർ മമ്പുറം കിഴക്കേ പള്ളിയിൽ നിന്നും, ആദ്യ കലാപങ്ങളിൽ മരിച്ചു ശുഹദാക്കളുടെ (രക്ത സാക്ഷികളുടെ ) ശവകൂടീരങ്ങളിലേക്ക് സിയാറത് (പ്രാർത്ഥനാ യാത്ര ) നടത്തി . ജാഥാംഗങ്ങളിൽ ചിലർ ക്രോസ് ബെൽറ്റു ധരിച്ചിരുന്നു. ചിലരുടെ കയ്യിൽ കത്തികളുമുണ്ടായിരുന്നു. അവർ രക്ത സാക്ഷികൾക്ക് പ്രണാമം അർപ്പിച്ചു പ്രാർത്ഥിച്ചു.[8] മുൻകാല അനുഭവങ്ങൾ വച്ചുനോക്കിയാൽ ഇവിടെ പ്രാർത്ഥന നടത്താറുള്ളത് ബ്രിട്ടീഷ് പട്ടാളത്തിനെതിരായ ലഹളക്ക് മുൻപാണ് . മാത്രമല്ല ശവ കുടീരങ്ങളിലും , കല്ലറകളിലും സംഘടിതമായി പ്രാർത്ഥിക്കുന്നതിന് ബ്രിട്ടീഷ് സർക്കാർ വിലക്കേർപ്പെടുത്തിയിരുന്നു [9]. എന്നാൽ അന്ന് നടത്തിയ പ്രാർത്ഥന ഖിലാഫത്തു പ്രസ്ഥാനത്തിന്റെ വിജയത്തിന് വേണ്ടിയായിരുന്നു. അല്ലാതെ ഒരു കലാപം നടത്താനുള്ളതിന്റെ മുന്നോടിയായിരുന്നില്ല. എന്നാൽ ഇതുസംബന്ധിച്ച് ജില്ലാ പോലീസ് സൂപ്രണ്ട് കളക്ടർക്ക് നൽകിയ വിലയിരുത്തൽ നടക്കാൻ പോകുന്ന കലാപത്തിന്റെ ആദ്യ ചുവടുവെപ്പ് എന്നായിരുന്നു.[10] ഇതേ തുടർന്ന് 1921 ആഗസ്റ്റ് 19 ാം തിയ്യതി മലബാർ കളക്ടർ തോമസ്, ഡി.എസ്.പി. ഹിച്ച്‌കോക്ക്, എ.എസ്.പി. ആമു എന്നിവരുടെ നേതൃത്വത്തിൽ അഞ്ഞുറോളം വെള്ളപ്പട്ടാളക്കാർ തിരൂരങ്ങാടിയിലേക്ക് ഇരച്ചുകയറി. അവർ കിഴക്കേപ്പള്ളിയും നിരവധി മുസ്‌ലിം വീടുകളും പരിശോധന നടത്തുകയും പൊറ്റയിൽ മുഹമ്മദ് ഹാജി, കോഴിശ്ശേരി മമ്മദ്, അദ്ദേഹത്തിന്റെ മകൻ മൊയ്തീൻകുട്ടി എന്നിവരെ അറസ്റ്റുചെയ്യുകയും ചെയ്തു. മാപ്പിളമാരെ പ്രകോപിപ്പിച്ച് ഒരു കൂട്ടക്കൊലയായിരുന്നു കലക്ടറുടെ ലക്ഷ്യമെന്ന് വ്യക്തമായിരുന്നു.

അറസ്റ്റുചെയ്യപ്പെട്ട നിരപരാധികളായ മൂന്നുപേരെ വിട്ടയക്കണമെന്നാവശ്യപ്പെട്ടുകൊണ്ടുള്ള നിവേദനവുമായി ആലി മുസ്‌ലിയാരുടെ നേതൃത്തിലുള്ള ഒരു പ്രതിനിധി സംഘം 1921 ആഗസ്റ്റ് 20 ാം തിയ്യതി തിരൂരങ്ങാടി പോലീസ് സ്‌റ്റേഷനിലേക്ക് തിരിച്ചു. സ്‌റ്റേഷനിൽ നിന്ന് അൽപം ദൂരത്തുവച്ച് പട്ടാളക്കാർ അവരെ തടഞ്ഞുനിർത്തി. എ.എസ്.പി റൗളി അവരോട് വിവരം തിരക്കി. അറസ്റ്റുചെയ്തവരെ വിട്ടയക്കുക. ആലി മുസ്‌ലിയാർ പറഞ്ഞു. ഇരിക്കൂ, ഉടൻ വിട്ടയക്കാം. ഹെഡ്‌കോൺസ്റ്റബിൾ മൊയ്തീൻ പ്രതികരിച്ചപ്പോൾ ആലിമുസ്‌ലിയാരും സംഘവും ക്ഷമയോടെ കാത്തിരുന്നു. പിന്നെ കേട്ടത് ഫയർ എന്നൊരലർച്ചയും അതേതുടർന്ന് വെടിവെപ്പിന്റെ ശബ്ദവുമായിരുന്നു. ജനങ്ങൾ പട്ടാളത്തെ ധീരമായി നേരിട്ടു. പിന്നെ അവിടെ നടന്നത് അതിരൂക്ഷമായ പോരാട്ടമായിരുന്നു. വടികളും കത്തികളും ഉപയോഗിച്ച് ജനക്കൂട്ടം പട്ടാളത്തോട് ഏറ്റുമുട്ടി. പട്ടാളം സ്റ്റേഷനുള്ളിലേക്ക് പിൻവാങ്ങി. ഈ സംഘട്ടനത്തിൽ റൗളിയും ഹെഡ്‌കോൺസ്റ്റബിൾ മൊയ്തീനും ഉൾപെടെ സർക്കാർ ഭാഗത്തുനിന്നും ആറുപേർ മരിച്ചുവീണു. മറുഭാഗത്ത് 17 പേർ കൊല്ലപ്പെടുകയും 7 പേർക്ക് പരിക്കേൽക്കുകയും ചെയ്തു. ഈ സംഭവത്തോടെയാണ് മലബാറിൽ ഖിലാഫത്തു ലഹള പൊട്ടിപ്പുറപ്പെട്ടത് .

സ്വാതന്ത്ര്യ പ്രഖ്യാപനം[മൂലരൂപം തിരുത്തുക]

ദീർഘ വീക്ഷണമില്ലാതിരുന്ന തോമസ് എന്ന മലബാർ കളക്ടർ കാട്ടിക്കൂട്ടിയ മഠയത്തരങ്ങളാണ് മലബാറിലെങ്ങും കലാപം ആളിപ്പടരാൻ കാരണമായി തീർന്നത്. കലക്ടർ നൽകിയ റിപ്പോർട്ട് പ്രകാരം ആയുധങ്ങൾക്കും കുറ്റവാളികൾക്കും വേണ്ടിയുള്ള തെരച്ചിലിന്റെ ഭാഗമായി മാപ്പിള പോലീസുദ്യോഗസ്ഥന്മാർ പള്ളികളിൽ കയറി പരിശോധന ആരംഭിച്ചു . അതോടെ ഏറനാട്ടിലെ സിദ്ധനായിരുന്ന മമ്പുറം തങ്ങളുടെ ആസ്ഥാനമായ മമ്പുറം പള്ളിസമുച്ചയവും , ശവ കുടീരവും ആക്രമിക്കപ്പെട്ടെന്നും പള്ളിക്കെട്ടിടം ഇടിച്ചുനിരത്തിയെന്നുമുള്ള വാർത്തകളും നാടെങ്ങും പ്രചരിച്ചു . ഇത് എരിതീയിൽ എണ്ണയൊഴിച്ചതിന് സമാനമായിരുന്നു . യഥാർത്ഥത്തിൽ പോലീസ് മമ്പുറം പള്ളിയിൽ കയറിയിരുന്നില്ല പുഴയുടെ മറുകരയിലുള്ള കിഴക്കേപ്പള്ളിയിലാണ് കയറി പരിശോധന നടത്തിയിരുന്നത് . അവർ പള്ളിയിൽ കയറുന്നതിന് മുമ്പ് ചെരിപ്പുകൾ ഊരിമാറ്റിയിരുന്നു. തുടക്കത്തിൽ സമാധാനപരമായിരുന്ന പ്രക്ഷോഭം ഈ സംഭവങ്ങളോട് കൂടി സായുധ പോരാട്ടത്തിലേക്കു വഴി മാറി.

ആഗസ്റ്റ് 21 ാം തിയ്യതി ലഹള കത്തി പടർന്നതോടു കൂടി നേരിടാനാവാതെ ബ്രിട്ടീഷ് മജിസ്‌ട്രേറ്റും പോലീസും പട്ടാളവും പ്രദേശത്തു നിന്നും പിൻ വാങ്ങി . ഒരു കൂട്ടം കലാപകാരികൾ ഏറനാട്ടിലെ എല്ലാ സർക്കാർ ഓഫീസുകളും ആക്രമിച്ചു. പോലീസ് സ്‌റ്റേഷൻ, സബ് മജിസ്‌ട്രേറ്റു കോടതി, സബ് രജിസ്ട്രാർ ആഫീസ് എന്നിവ തീവച്ചു നശിപ്പിച്ചു. തപാൽ ഓഫീസും അംശം കച്ചേരിയും കൊള്ളയടിക്കുകയും അവിടെയുള്ള രേഖകൾ തീവെക്കുകയും ചെയ്തു. ടി.ബി. കെട്ടിടത്തിനും കേടുപാടുകൾ വരുത്തി. അന്നേ ദിവസം തന്നെ ആലി മുസ്‌ലിയാർ ഭരണാധികാരിയായി പ്രഖ്യാപിക്കപ്പെട്ടു[11]. കലാപത്തിന്റെ ആദ്യ ദശയിൽ ഖിലാഫത്തു സർക്കാർ രൂപീകരിക്കുന്നതിനെക്കുറിച്ച് മുസ്‌ലിയാർ ചിന്തിച്ചിട്ടുപോലും ഉണ്ടായിരുന്നില്ല ബ്രിട്ടീഷ് വിരുദ്ധ സമരം വിജയിച്ചാൽ കോൺഗ്രസ് തങ്ങളുടെ സഹായത്തിനെത്തുമെന്ന് മുസ്‌ലിയാർ പ്രതീക്ഷിച്ചിരുന്നു. എന്നാൽ കോൺഗ്രസ് അക്രമ സമരത്തെ തള്ളി പറയുകയും ഒഴിഞ്ഞു മാറുകയും ചെയ്തതോടെ മറ്റ് അധികാര കേന്ദ്രങ്ങളുടെ അഭാവത്തിൽ അദ്ദേഹം നേരിട്ട് രാജ്യകാര്യങ്ങൾ നോക്കാൻ തുടങ്ങി. സ്വയം ഖലീഫയായി പ്രഖ്യാപിച്ചു . ഏതാനും ആഴ്ച കേരള മുസ്ലിംകളുടെ ഖലീഫയായി അദ്ദേഹം നിലകൊണ്ടു. അദ്ദേഹത്തിനു രണ്ടര ലക്ഷത്തോളം അനുയായികൾ അനുസരണ പ്രതിജ്ഞ ചെയ്തതായും അറുപതിനായിരത്തോളം കേഡർ വളണ്ടിയർമാർ ഉണ്ടായിരുന്നതായും പറയപ്പെടുന്നു.

ആലിമുസ്‌ലിയാർ തന്റെ ഹ്രസ്വമായ ഭരണം ആരംഭിച്ചത് കലാപത്തിന് എതിരു നിന്ന നാലകത്തു കുഞ്ഞിപ്പോക്കർ, ആളുവളപ്പിൽ കുഞ്ഞഹമ്മദ് എന്നിവരെ പിടികൂടി വിചാരണ നടത്തി ശിക്ഷിച്ചുകൊണ്ടാണ്.ബ്രിട്ടീഷ് അനുകൂലികളായ ജന്മിമാരും ശിക്ഷിക്കപ്പെട്ടവരിൽ പെടുന്നു. 1921 ആഗസ്റ്റ് 21 ാം തിയ്യതി അദ്ദേഹത്തിന്റെ സേനാവ്യൂഹം തിരൂരിലെത്തി വൻതോതിൽ ആയുധങ്ങളും വെടിക്കോപ്പും പിടിച്ചെടുത്തു. ഖിലാഫത്ത് പ്രക്ഷോഭകരുമായി ഉണ്ടാക്കിയ ഉടമ്പടി പ്രകാരം പോലീസും പട്ടാളവും ഈ ആയുധങ്ങൾ സുരക്ഷിതമായ ഒരു സ്ഥലത്ത് സൂക്ഷിക്കുന്നതിന് കൊണ്ടുപോകുകയായിരുന്നു.

മരണം[മൂലരൂപം തിരുത്തുക]

ഒരാഴ്ചയാണ് കാലളവെങ്കിലും ബ്രിട്ടീഷ് രേഖകളിൽ ഒരു മാസം മുതൽ ആറ് മാസം വരെ ആലി മുസ്ലിയാർ പ്രദേശത്തു ഭരണം നടത്തിയതായി പറയപ്പെടുന്നു[12] . ഇതിനിടെ കെ.പി. കേശവമേനോൻ, മുഹമ്മദ് അബ്ദുറഹ്മാൻ സാഹിബ്, കെ.എം. മൗലവി സാഹിബ്, കെ.വി ഗോപാലകൃഷ്ണ മേനോൻ, പൊൻമാടത്തു മൊയ്തീൻ കോയ, കൊടുങ്ങല്ലൂർ ശേഖരമേനോൻ, ഇ. മൊയ്തീൻ മൗലവി, യു. ഗോപാലമേനോൻ, മാണിക്യത്ത് ഗോപാലമേനോൻ, കെ. മാധവമേനോൻ, ടി.വി ചന്തുക്കുട്ടി നായർ, എ.പി. മൊയ്തീൻ കോയ മധുരവനം ഗോവിന്ദക്കുറുപ്പ് തുടങ്ങിയവരുടെ നേതൃത്വത്തിൽ കോൺഗ്രസ് പ്രതിനിധി സംഘം ആലി മുസ്ലിയാരെ സന്ദർശിക്കുകയും ബ്രിട്ടീഷ് സർക്കാരിന് മുന്നിൽ കീഴടങ്ങാനാവിശ്യപ്പെടുകയും ചെയ്തു [13]. മുസ്‌ലിയാർ ഒന്നും പ്രതികരിച്ചില്ലെങ്കിലും ലവക്കുട്ടി , കുഞ്ഞലവി, ചെമ്പ്രശ്ശേരി തങ്ങൾ , വാരിയൻ കുന്നൻ എന്നിവർ ആ നിർദ്ദേശം തള്ളി കളഞ്ഞു . ബാംഗ്ലൂരിൽ നിന്ന് കൂടുതൽ പട്ടാളമെത്തുകയും കോഴിക്കോട് ,തിരൂർ , മലപ്പുറം എന്നീ സ്ഥലങ്ങൾ കേന്ദ്രീകരിച്ചു തിരൂരങ്ങാടിയിലേക്കു സൈനിക നീക്കം നടത്തുകയും ചെയ്തു .ബ്രിട്ടീഷ് പട്ടാളത്തിന്റെ ആക്രമണങ്ങളിൽ നിന്നും രക്ഷപ്പെടുന്നതിനുവേണ്ടി ഖിലാഫത്ത് അനുകൂലികൾ കലുങ്കുകൾ തകർത്തും മരങ്ങൾ മുറിച്ചിട്ടു മാർഗതടസ്സമുണ്ടാക്കിയെങ്കിലും ഫലം കണ്ടില്ല[14] .

1921 ആഗസ്റ്റ് 28 ാം തിയ്യതി ഒരു വൻസേനാ വ്യൂഹം ജുമുഅത്ത് പള്ളി വളഞ്ഞു വേദി വെച്ചു . പള്ളിയുടെ മുകളിലത്തെ നിലയിൽ ആലി മുസ്‌ലിയാരും അനുയായികളും ഉണ്ടായിരുന്നു. വെടിവെപ്പിൽ 24 മാപ്പിളമാർ കൊല്ലപ്പെട്ടു.. പള്ളി തകരുന്നത് ഒഴിവാക്കാൻ ആലിമുസ്ലിയാരടക്കം 38 പേർ പട്ടാളത്തിന് മുന്നിൽ കീഴടങ്ങി [15] . ആലിമുസ്‌ലിയാരെ കോഴിക്കോട്ടുവെച്ച് സ്‌പെഷ്യൽ ട്രൈബ്യൂണൽ വിചാരണ നടത്തി. ബ്രിട്ടീഷ് ചക്രവർത്തിക്കെതിരായി യുദ്ധത്തിലേർപ്പെട്ടുവെന്നതായിരുന്നു അദ്ദേഹത്തിൽ ആരോപിക്കപ്പെട്ട കുറ്റം. നവംബർ 2 തിയ്യതി അദ്ദേഹമടക്കം പത്തു പേരെ വധശിക്ഷക്ക് വിധിച്ചു[16].

ബാക്കിയുള്ള ഖിലാഫത് പ്രവർത്തകരിൽ ലവക്കുട്ടി പരിക്ക് കാരണം മരണപ്പെട്ടു. കുഞ്ഞലവിയാകട്ടെ വലിയോറയിൽ നടന്ന പോരാട്ടത്തിൽ രക്തസാക്ഷിത്വം വരിച്ചു. വാരിയംകുന്നത്ത് കുഞ്ഞഹമ്മദ് ഹാജിയും ചെമ്പ്രശ്ശേരി തങ്ങളും പിടിയിലായി. ഇവരെ വിചാരണ ചെയ്തു പരസ്യമായി വെടിവെച്ചുകൊന്നു. ഏറനാട്, വള്ളുവനാട്, പൊന്നാനി, കോഴിക്കോട് എന്നീ താലൂക്കുകളിലെ 110 ഗ്രാമങ്ങളിൽ സൈന്യം തേർവാഴ്ച നടത്തി. പന്തീരായിരത്തോളം മാപ്പിളമാർ ഈ സൈനിക നീക്കത്തിൽ കൊലചെയ്യപ്പെട്ടു. ആയിരകണക്കിന് ആളുകളെ ആന്തമാൻ ദ്വീപുകളിലേക്ക് നാടുകടത്തി. എണ്ണമറ്റ മാപ്പിളമാർ ജയിൽവാസത്തിന് വിധേയരായി. യുദ്ധച്ചെലവ് ഈടാക്കുന്നതിന് വേണ്ടി സർക്കാർ മാപ്പിളമാർക്ക് കൂട്ടപ്പിഴയിട്ടു. അങ്ങനെ അതോട് കൂടി മലബാർ കലാപം വിരാമമായി.

വധശിക്ഷയ്ക്ക് വിധിച്ച ആലി മുസ്ലിയാരെ കോയമ്പത്തൂരിലേക്ക് കൊണ്ട് പോയി . ജനക്കൂട്ടത്തിന്റെ ആക്രമണം ചെറുക്കാനും , പുണ്യാളനായ മുസ്ലിയാരുടെ ഖബറിടം തീർത്ഥാടന കേന്ദ്രമാകുന്നത് ഒഴിവാക്കാനുമായിരുന്നു അത് . 1922 ഫെബ്രുവരി 2 ന്‌ കോയമ്പത്തൂർ സെൻട്രൽ ജയിലിൽ വെച്ച് ആലി മുസ്ല്യാരെ തൂക്കിലെറ്റി.[17] ഒപ്പം പന്ത്രണ്ട് അനുയായകളെയും കോയമ്പത്തൂർ ജയിലിൽ വെച്ചു തൂക്കിക്കൊന്നു. കോയമ്പത്തൂരിലെ മലയാളികൾ മലബാർ മുസ്ലിം അസോസിയേഷൻ രൂപീകരിച്ച്‌ തൂക്കിലേറ്റപ്പെട്ടവരുടെ മൃതദേഹങ്ങൾ ഏറ്റു വാങ്ങി, കോയമ്പത്തൂർ സുൽത്താൻപേട്ടയിലെ മുസ്‌ലിം ശ്മശാനത്തിൽ അവരുടെ മൃതദേഹങ്ങൾ ഖബറടക്കി. 1958 ൽ കോയമ്പത്തൂരിൽ അവർക്കായി ഒരു സ്മാരകം പടുത്തുയർത്തപ്പെട്ടു. കേരളത്തിലെ പ്രമുഖ പണ്ഡിതൻമാരിൽ ഒരാളായിരുന്ന കെ.സി. അബ്ദുല്ലക്കുട്ടി മുസ്‌ലിയാർ ആലി മുസ്ലിയാരുടെ മകനും, പ്രമുഖ ചരിത്രകാരനും പണ്ഡിതനുമായ നെല്ലിക്കുത്ത് മുഹമ്മദ് മുസ്‌ലിയാർ പൗത്രനുമാണ്[18]

വിവാദങ്ങൾ[മൂലരൂപം തിരുത്തുക]

ഒട്ടേറെ വിവാദങ്ങൾക്കു വഴി മരുന്നിട്ട കലാപമായിരുന്നു ആലി മുസ്‌ലിയാർ നേതൃത്വം നൽകിയ മലബാർ കലാപം ഈ കലാപത്തിന് ശേഷമാണ് മുസ്ലിം സമുദായത്തിൽ പരിഷ്ക്കരണ വാദികൾ ഉദയം ചെയ്യുന്നത് . സൂഫികളുടെയും ,യഥാ സ്ഥിതികരുടെയും പ്രവർത്തനങ്ങൾ മുസ്ലിം സമുദായത്തെ പിന്നോട്ട് നയിച്ചെന്നു അവർ ആരോപിച്ചായിരുന്നു അവരുടെ രംഗ പ്രവേശനം . . മലബാർ ഗെസ്റ്റും അത്തരം വാദങ്ങളെ പിന്തുണയ്ക്കുന്നു . ഇവരുടെ അത്യന്തം അപകടകരമായ പ്രവൃത്തികൾ കാരണം ഒരു നൂറ്റാണ്ട് പിന്നിലേക്ക് മുസ്‌ലിം സമുദായം അധഃപതിച്ചുപോയതായി ‘മലബാർ ഗസ്റ്റ്’ ചൂണ്ടിക്കാട്ടുന്നുണ്ട് .

കലാപത്തിന് ശേഷമുണ്ടായ പരിണിതി ഫലങ്ങൾ താങ്ങാനാവാതെ യാഥാസ്ഥിതിക പണ്ഡിതരും സൂഫികളും പിന്നീട് ബ്രിട്ടീഷ് സർക്കാരുമായി രഞ്ജിപ്പിലെത്തിയതും ശ്രദ്ധേയമാണ് . പതിനായിരക്കണക്കിന് അനാഥരുടെയും വിധവകളുടെയും പ്രശ്നത്തിന് പരിഹാരം കാണുകയെന്നത് അവരെ സംബന്ധിച്ചയിടത്തോളം അസാധ്യമായിരുന്നു . ഇതോടെ അടഞ്ഞ മത പാഠശാലകളും ,പുതിയ അനാഥ ശാലകളും മറ്റും തുറക്കാനായി ബ്രിട്ടീഷ് സർക്കാരുമായി ഏറ്റുമുട്ടലിന്റെ പാത ഒഴിവാക്കാൻ യാഥാസ്ഥിതിക മുസ്ലിം പണ്ഡിതർ നിർബന്ധിതരാവുകയായിരുന്നു.

മലബാർ കലാപത്തെ കുറിച്ചുള്ള മറ്റൊരാക്ഷേപം അത് ഹിന്ദു വിരുദ്ധമാണ് എന്നാണ് . ബ്രിട്ടീഷ് വിരുദ്ധ കലാപം പിന്നീട് ഹിന്ദുക്കൾക്ക് നേരെയുള്ള വർഗീയ കലാപത്തിന്റെ രൂപം പ്രാപിച്ചു . കലാപകാലത്ത് ക്രൂരമായ കൊലപാതകങ്ങളും,ബലം പ്രയോഗിച്ചുള്ള മതപരിവർത്തനങ്ങളും നടന്നുവെന്നും പ്രചരിപ്പിക്കപ്പെടുന്നു [19].ഏറനാടിൽ 38 ഓളം ഹിന്ദുക്കൾ ഖിലാഫത്തുകാരാൽ കൊല ചെയ്യപ്പെട്ടതായി ഗോപാല നായർ സാക്ഷ്യപ്പെടുത്തുന്നുണ്ട്[20] ഖിലാഫത്തു പ്രവർത്തകർ ഹിന്ദു വിരുദ്ധ കലാപം നടത്തിയെന്ന് ബ്രിട്ടീഷ് സർക്കാരിന്റെ കുറ്റ പത്രത്തിൽ വിശദീകരിക്കുന്നുണ്ട്. നൂറിലധികം ഹിന്ദുക്കളെ കൊന്നുവെന്നും വീടുകൾ കൊള്ളയടിച്ചെന്നും കുറ്റപത്രത്തിൽ ആരോപിക്കുന്നുണ്ട്. ഹിന്ദുക്കളായ ജന്മികളും, നമ്പൂതിരിമാരും, നായന്മാരും ഖിലാഫത്തു പ്രവർത്തകരാൽ കൂട്ടക്കൊല ചെയ്യപ്പെട്ടുവെന്നു ബ്രിട്ടീഷ് രേഖകളും സമർത്ഥിക്കുന്നുണ്ട്[21]. കൂടെ ബ്രിട്ടീഷ് അനുകൂലികളായ ജന്മികളാണ് കൊല്ലപ്പെട്ടതെന്നും മത പരമായി അതിനെ കാണുന്നത് ജനങ്ങളെ വിഭജിക്കാനുള്ള ബ്രിട്ടീഷ് ശ്രമത്തിന്റെ ഭാഗമാണെന്ന അഭിപ്രായവും നിലനിൽക്കുന്നു

കോൺഗ്രസ് നേതാവായ കെ.എം. മൗലവി ഇങ്ങനെ അനുസ്മരിക്കുന്നു. ആഗസ്റ്റ് 2 മുതൽ 29 വരെ തിരൂരങ്ങാടിയിലേയും സമീപപ്രദേശങ്ങളിലെയും ഹിന്ദുക്കൾ ആലിമുസ്‌ലിയാരുടെ പൂർണ്ണനിയന്ത്രണത്തിലായിരുന്നു. എന്നാൽ ആലി മുസ്‌ലിയാരും അനുയായികളും കൈയ്യൂക്കുള്ളവൻ കാര്യക്കാരൻ എന്നനിലയിൽ പ്രവർത്തിച്ചിരുന്നില്ല. അവർ ഹിന്ദു സഹോദരന്മാരെയും അവരുടെ സ്വത്തുക്കളെയും എന്തുവിലകൊടുത്തും സംരക്ഷിച്ചു. 1921 ഒക്ടോബർ 11 ാം തിയ്യതി ബ്രിട്ടീഷ് ഗവൺമെന്റിന്റെ പബ്ലിസിറ്റി ബ്യൂറോ പുറത്തിറക്കിയ ലഘുലേഖയിൽ ആലിമുസ്‌ലിയാരെക്കുറിച്ച് ഇങ്ങനെയാണ് പറഞ്ഞിരിക്കുന്നത്: ലഹളബാധിത പ്രദേശങ്ങളിൽ സർക്കാരിന്റെ പ്രവർത്തനം താൽക്കാലികമായി തടസ്സപ്പെട്ടിരിക്കുന്നതിനാൽ മുസ്‌ലിംകൾ സ്വരാജ് കൈവന്നതായി പ്രഖ്യാപിക്കുകയും ആലിമുസ്‌ലിയാരാണ് തങ്ങളുടെ രാജാവെന്ന് വിളംബരം നടത്തുകയും ചെയ്തു. അവർ ഖിലാഫത്ത് പതാക ഉയർത്തുകയും ഏറനാടും വള്ളുവനാടും ഖിലാഫത്ത് പ്രവിശ്യകളായി പ്രഖ്യാപിക്കുകയും ചെയ്തു എന്നാണ് .

വസ്തുതകൾ എന്ത് തന്നെയായാലും ആലി മുസ്ലിയാരോ മറ്റു ഖിലാഫത് നേതാക്കളോ നേരിട്ട് ഇത്തരം ഹിന്ദു വിരുദ്ധ കലാപം നടത്തിയതിനു യാതൊരു തെളിവുമില്ല എന്നത് സുവ്യക്തമത്രെ . അവർ ശിക്ഷിച്ചിരുന്നതിൽ ഭൂരിഭാഗവും ആമു കുട്ടി സാഹിബിനെ പോലെയുള്ള ബ്രിട്ടീഷ് അനുകൂലികളായ മാപ്പിളമാരെയായിരുന്നു, നമ്പൂതിരിമാരും നായന്മാരുമായ ജന്മികളും ശിക്ഷിക്കപ്പെട്ടു എന്നതും വാസ്തവമെത്രെ[22].ഹിന്ദുക്കളായ ഒരു പാട് ആളുകൾ ഖിലാഫത് സേനയിൽ പ്രവർത്തിച്ചിരുന്നതായും ചൂണ്ടിക്കാട്ടപ്പെടുന്നു[23] . മത പരമായ കലാപമെങ്കിൽ അതെങ്ങിനെ സംഭവിക്കും എന്നും ചോദ്യമുയരുന്നു. എന്നിരുന്നാലും ഖിലാഫത്തു പ്രവർത്തകർ ചിലയിടങ്ങളിൽ ഹിന്ദുക്കളെ വക വരുത്തിയതായും , കൊള്ളയടിച്ചതായും കാണാം . ഇതിനു രണ്ടു കാരണങ്ങളാണ് ചരിത്രകാരന്മാർ പറയുന്നത്

ഒന്ന്; പ്രദേശത്തെ ജന്മികൾ നമ്പൂതിരിമാരായ ഹിന്ദുക്കളായിരുന്നു അവരാകട്ടെ ബ്രിട്ടീഷ് അനുകൂലികളും ആയിരുന്നു [24], മാപ്പിളമാർ ഭൂരി ഭാഗവും കുടിയാന്മാരും ബ്രിട്ടീഷ് വിരുദ്ധരുമാണ്[25] ഈയൊരു ആശയ വൈരുധ്യം ആക്രമണങ്ങൾക്കു പ്രചോദിതമായിരുന്നേക്കാം. രണ്ടാമത്തെ ഘടകം ഏറനാട്ടിലെ മാപ്പിളമാർ ഏറെയും കീഴ് ജാതിക്കളായ പുലയ -പറയ- തീയ്യ വിഭാഗങ്ങൾ ജന്മികളുടെ പീഡനത്തിൽ നിന്നും രക്ഷ നേടാൻ മതം മാറിയവരാണ്[26]. നൂറ്റാണ്ടുകളായി അടക്കി വെച്ച പക അവസരമൊത്തു വന്നപ്പോൾ വിനിയോഗിച്ചിരിക്കാം.

അവലംബങ്ങൾ[മൂലരൂപം തിരുത്തുക]

  1. പ്രബോധനം വാരിക, 2010 നവംബർ 13
  2. http://www.islamonweb.net/article/2011/12/731/
  3. പ്രതിരോധത്തിൻറെ വേരുകൾ,പേജ് 49, സൈനുദ്ദീൻ മന്ദലാംകുന്ന്.തേജസ് പബ്ലിക്കേഷൻ,കോഴിക്കോട്
  4. http://www.thejasonline.com/java-thejason/index.jsp വിവരങ്ങൾ ശേഖരിച്ചത് തേജസ് ദിനപത്രം ഫിബ്രുവരി 17 ഞായർ]
  5. ആലി മുസ്‌ലിയാർ വിപ്ലവകാരിയായ മതപണ്ഡിതൻ ഡോ. കെ.ടി ജലീൽ
  6. ദ മാപ്പിള റെബല്ലിയൻ;പുറം 45 "The Mapilla Rebellion : 1921-1922". ശേഖരിച്ചത് 2015-10-06. 
  7. Mitaz>sdi (Calicut), 7 February I92I, cited in Report of English Papers examinedby the Criminal Investigation Department, Madras, and on Vernacular PapersExamined by the Translations to the Government of Madras (hereafter noted as Newspaper :Reports), No. 8 of I92I, pp. 230-I.
  8. As related in the Judgment in Case No. 7/2 I, quoted by Gopalan Nair,
  9. As related in the Judgment in Case No. 7/2 I, quoted by Gopalan Nair, Moplah Rebellion, p. I9, and Hitchcock, Malabar Rebellion, p. 29.
  10. Hitchcock, Malabar Rebellion, p. 29
  11. 8 Letter from Thomas to the Government of Madras, dated Calicut, August I6,
  12. March 7, I922. I.O.R.: L/P&J/6/I769x item589I (I92I).
  13. . p. Kesava Menon, 'Crusading for a Cause,' in I92I Movement: Reminiscen
  14. Rawlinson Report, p. 5
  15. പ്രതിരോധത്തിൻറെ വേരുകൾ , പേജ് 50-51, സൈനുദ്ദീൻ മന്ദലാംകുന്ന്.തേജസ് പബ്ലിക്കേഷൻ ,കോഴിക്കോട്.
  16. Rawlinson Report, pp. 3-4; Gopalan Nair, Moplah Rebellion, pp. 36-7, 76. In a brief biography of the rebel leader, it is claimed that he died a natural death, on February I7, I922, before the sentence was executed. K. A. Mohamed, sAli Musaliar,' Charitham, No. 4 (October-December I97 I )n p. I I 2.
  17. http://www.thejasnews.com/index.jsp?tp=det&det=yes&news_id=201207129013314580
  18. http://www.islamonweb.net/article/2011/12/731/
  19. കഴിഞ്ഞകാലം,കെ.പി.കേശവമേനോൻ
  20. palan Nair, Moplah Rebellion, pp. 76-9; Sreedhara Menon, KozAikode, pp. I 79-80.
  21. n Malabar ASairs, August I 8, I 92 I, in Tottenham, Mapilla Rebellion
  22. A Short History of the Peasant Movement in Lerala (Bombay: People's Publishing House, I 943), p* I v
  23. madras Mail, December I 7, I 92 I, p. 7, and December I 9, I 92 I, p. 7. 99 Report on Malabar ASairs, August I 8, I 92 I, in Tottenham, Mapilla Rebellion, p 34
  24. Highlights on Moplah Rebellion in Malabar (1921)!
  25. Madras Mail, August I, I92In p. 6. In that same issue, the Msal related Sa curious story . . . of a Walluvanad jenmi who, having lost a brass vessel, adopted the device of indemnifying himself by fining all his tenants in sums equivalent to the value of the stolen article.'
  26. Innes, Malabar, p. 26.

ഇവയും കാണുക[മൂലരൂപം തിരുത്തുക]


"https://ml.wikipedia.org/w/index.php?title=ആലി_മുസ്‌ലിയാർ&oldid=2445504" എന്ന താളിൽനിന്നു ശേഖരിച്ചത്