തോറ്റം പാട്ട്
വടക്കൻ കേരളത്തിൽ തെയ്യങ്ങൾക്കും അവയോടനുബന്ധിച്ച് തലേന്നാൾ കെട്ടിയാടുന്ന തോറ്റം, വെള്ളാട്ടം എന്നിവയ്ക്കും പാടുന്ന അനുഷ്ഠാനപ്പാട്ടുകളെയാണ് തോറ്റം പാട്ടുകൾ അഥവാ സ്തോത്രം പാട്ടുകൾ എന്ന് പറയുന്നത്. പൊതുവേ ദേവി പരാശക്തിയുടെ സ്തുതികൾ ആണിവ. അതിനാൽ ഭഗവതി പാട്ട് എന്നും എന്നറിയപ്പെടുന്നു. തോറ്റം പാട്ട് എന്ന് വാമൊഴിയായി പറയുന്നുണ്ടെങ്കിലും സ്തോത്രം പാട്ടുകൾ എന്നതാണ് ശരിയായ വാക്ക്. തെയ്യത്തിനു പുറമേ തെക്കൻ കേരളത്തിലെ ഭദ്രകാളി അഥവാ ഭഗവതി ക്ഷേത്രങ്ങളിൽ നടത്തിവരുന്ന ഒരു അനുഷ്ഠാനം കൂടിയാണ് തോറ്റം പാട്ട്. രണ്ടാം വിളവെടുപ്പിനു ശേഷം വാദ്യമേളങ്ങൾ, താലപ്പൊലി എന്നിവയുടെ അകമ്പടിയോടെ ഭദ്രകാളിയെ ശ്രീകോവിലിൽ നിന്നും എഴുന്നള്ളിച്ച് പട്ടാമ്പലത്തിലെ പച്ച പന്തലിൽ കുടിയിരുത്തി ഭഗവതിയുടെ അവതാര കഥ ആദ്യവസാനം പാടുന്ന ഒരു അനുഷ്ടാനമാണ് ഇത്. പ്രസിദ്ധമായ ആറ്റുകാൽ പൊങ്കാലയ്ക്കും ഇത് നടത്താറുണ്ട്. വടക്കൻ കേരളത്തിൽ വണ്ണാൻ, മലയൻ, (പുലയൻ) അഞ്ഞൂറ്റാൻ, മുന്നൂറ്റാൻ തുടങ്ങി തെയ്യം കെട്ടിയാടുന്ന സമുദായങ്ങളുടെ വംശീയമായ അനുഷ്ഠാനപ്പാട്ടുകളാണ് തോറ്റം പാട്ടുകൾ[1]. തെയ്യാട്ടത്തിന്റെ ആദിഘട്ടമാണ് തോറ്റം. ദൈവത്തെ വിളിച്ചു വരുത്താൻ ഉപയോഗിക്കുന്നതും, ദൈവചരിത്രം വർണ്ണിക്കുന്നതുമായ പാട്ടാണിത്[2]
പേരിനു പിന്നിൽ
[തിരുത്തുക]തോറ്റം എന്ന പദത്തിന് സ്തോത്രം(സ്തുതി) എന്ന് അർത്ഥം പറയാറുണ്ട്. സൃഷ്ടിക്കുക,പുനരുജ്ജീവിപ്പിക്കുക എന്നീ അർത്ഥമുള്ള തോറ്റുക എന്ന ക്രിയാരൂപത്തിന്റെ, ക്രിയാനാമരൂപമാണ് തോറ്റം എന്നാണ് ഗുണ്ടർട്ട് നിഘണ്ടു പറയുന്നത്[3]. തമിഴിൽ തോറ്റം എന്ന പദത്തിന്റെ അർത്ഥം കാഴ്ച, ഉല്പത്തി, പുകഴ്(കീർത്തി), സൃഷ്ടി, രൂപം, ഉദയം തുടങ്ങി പല അർത്ഥങ്ങളും ഉണ്ട്. തോറ്റത്തിനു തോന്നൽ, വിചാരം എന്നും തോറ്റം പാട്ടിന് സ്തോത്രമെന്നും ശ്രീകണ്ഠേശ്വരം പത്മനാഭപിള്ള അർത്ഥം നൽകുന്നു.[4]. തോന്നുക എന്ന പദത്തിന്റെ നാമമാണ് തോറ്റം. അത് അമ്മയുടെ ജനനം പരാക്രമം തുടങ്ങിയവ വിവരിക്കുന്ന പാട്ടാണെന്നു ചേലനാട്ട് അച്യുതമേനോൻ പറയുന്നു. തോറ്റി എന്നതിൻ സൃഷ്ടിച്ച എന്നാണർത്ഥമെന്നും ചേലനാട്ട് പറയുന്നു. [5]. പൂരക്കളിപ്പാട്ടിന്റെ വ്യാഖ്യാനത്തിൽ പാഞ്ചാലിഗുരുക്കൾ തോറ്റുക-ഉണ്ടാക്കുക എന്ന അർത്ഥം നൽകിയതിനെ ഉദ്ധരിച്ച് സി.എം.എസ്. ചന്തേര,തോറ്റുക എന്നതിനു ഉണ്ടാക്കുക എന്നും അർത്ഥം കൊടുത്ത് സങ്കല്പ്പിച്ചുണ്ടാക്കുന്നതാണ് തോറ്റം എന്നു പറയുന്നു[6]. ഉണ്ടാക്കൽ,പ്രത്യക്ഷപ്പെടുത്തൽ എന്നീ അർത്ഥങ്ങളാണ് തോറ്റത്തിനെന്ന് ഡോ.രാഘവൻ പയ്യനാട് അഭിപ്രായപ്പെടുന്നു[7].
ഘടകങ്ങൾ
[തിരുത്തുക]
എല്ലാ സമുദായക്കാരുടെയും തോറ്റം പാട്ടുകൾ ഒരേ സ്വഭാവമുള്ളവയല്ല. അവതരണസ്വഭാവവും,സന്ദർഭവുമനുസരിച്ച് മിക്ക തെയ്യത്തോറ്റങ്ങൾക്കും വിവിധ അംഗങ്ങളുണ്ട്. വരവിളിത്തോറ്റം,സ്തുതികൾ, അഞ്ചടിത്തോറ്റം, മൂലത്തോറ്റങ്ങൾ, പൊലിച്ചുപാട്ട്, ഉറച്ചിൽ തോറ്റം, മുമ്പുസ്ഥാനം, കുലസ്ഥാനം, കീഴാചാരം തുടങ്ങി വിവിധ പേരുകളിൽ അറിയപ്പെടുന്ന ഘടകങ്ങൾ തെയ്യത്തോറ്റങ്ങളിൽ കാണാം[1]
വരവിളി
[തിരുത്തുക]കോലക്കാരൻ(തെയ്യം കെട്ടുന്ന ആൾ) ധരിക്കുന്ന വേഷത്തിൽ ദൈവത്തെ എഴുന്നള്ളിക്കാൻ വേണ്ടി ചൊല്ലുന്ന പാട്ടിനെയാണ് തെയ്യത്തോറ്റം എന്ന് പറയുന്നത്. വരവിളി തോറ്റത്തിലെ ഒരു പ്രധാന ഭാഗമാണ്. കോലക്കാരനിൽ ദൈവത്തെ ആവാഹിക്കാനുള്ള പ്രാർത്ഥനാപൂർവ്വമായ വിളിയാണ് വരവിളി.
പൊലിച്ചു പാട്ട്
[തിരുത്തുക]നാട്,നഗരം,പീഠം,ആയുധം,തറ,കാവ്, മറ്റു സ്ഥാനങ്ങൾ എന്നിവയ്ക്ക് പൊലിക,പൊലിക(ഐശ്വര്യം വർദ്ധിപ്പിക്കൽ)പാടുന്നതാണ് പൊലിച്ചു പാട്ട്. ഇതിൽ തെയ്യങ്ങളുടെ സഞ്ചാരപഥം(നടവഴി),കുടി കൊണ്ടസ്ഥാനം,തെയ്യത്തിന്റെ കഥ എന്നിവ ഉൾകൊള്ളുന്നു. പോരാതെ വാഴ്ക,വാഴ്ക എന്ന വാഴ്ത്തു പാട്ടും ഇതിൽ ഉണ്ടാകും.തായ്പരദേവത, മുച്ചിലോട്ട് ഭഗവതി തുടങ്ങിയ ഭഗവതിമാരുടെ പൊലിച്ചുപാട്ടിന് കൈലാസം പാടൽ എന്ന വിശേഷ പേരും ഉണ്ട്.
ഉറച്ചിൽ തോറ്റം
[തിരുത്തുക]പൊലിച്ചുപാട്ട് കഴിഞ്ഞാലുള്ള ഭാഗമാണ് ഉറച്ചിൽ തോറ്റം.
വരവിളി,പൊലിച്ചു പാട്ട്, ഉറച്ചിൽ തോറ്റം എന്നീ മൂന്നു ഭാഗങ്ങൾ എല്ലാ തോറ്റങ്ങളിലുമുണ്ട്.
പുരാവൃത്തം
[തിരുത്തുക]തോറ്റം പാട്ടുകൾ തെയ്യത്തിന്റെ കഥയാണ്. ദേവനായി അവതരിച്ച് മനുഷ്യഭാവത്തിൽ ജീവിച്ചവർ,മനുഷ്യനായി ജനിച്ച് മരണാനന്തരം ദേവതമാരായി മാറിയവർ,ദേവതകളായി പരിണമിച്ച ചരിത്രപുരുഷന്മാർ, മേൽലോകത്തു നിന്ന് കീഴ്ലോകത്തേക്കിറങ്ങി അലൗകികത കൈവിടാതെ ഭൂലോകത്തു കുടികൊള്ളുന്നവർ, ഭൂമിയിൽ ജനിച്ച് ആത്മാഹുതി ചെയ്തശേഷം ദേവതകളായി ഭൂമിയിലേക്കിറങ്ങിയവർ, മൃഗരൂപികളായ ദൈവങ്ങൾ, ദേവതാരൂപം ധരിച്ച തിര്യക്കുകൾ, സ്വർഗം പൂകിയ ശേഷം ഭൂമിയിലേക്കു തന്നെ ദേവതകളായി വന്നു ചേർന്ന പുരാതന കഥാപാത്രങ്ങൾ, അഗ്നിയിൽ നിന്നും,പാൽക്കടലിൽ നിന്നും, വെള്ളത്തിൽ നിന്നും വിയർപ്പിൽ നിന്നും പൊട്ടി മുളച്ചവർ, യോനീബന്ധമില്ലാത്ത ദിവ്യപ്പിറവികൾ, ഭദ്രകാളീ-ദാരിക യുദ്ധം, കന്യാവിന്റെയും പാലകന്റെയും കഥ എന്നിങ്ങനെ വൈവിധ്യമായ അനേകം ദേവതകളുടെ പുരാവൃത്തങ്ങൾ തെയ്യത്തോറ്റങ്ങൾ പറയുന്നു[8]
അനുഷ്ഠാനം
[തിരുത്തുക]
തെയ്യങ്ങൾക്കും,തിറകൾക്കും തലേന്നാൾ തോറ്റമോ,വെള്ളാട്ടമോ കെട്ടിപ്പുറപ്പെടും. കോലക്കാരൻ വേഷമണിഞ്ഞ് കാവിന്റെയോ, സ്ഥാനത്തിന്റേയോ പള്ളിയറയുടെയോ മുന്നിൽ വെച്ച് തോറ്റം പാട്ടുകൾ പാടുകയും,ചെണ്ടയോ തുടിയോ താളവാദ്യമായി ഉപയോഗിക്കുകയും,പാട്ടിന്റെ അന്ത്യത്തിൽ ഉറഞ്ഞു തുള്ളി നർത്തനം ചെയ്യുകയും ചെയ്യും. അതാണ് തോറ്റം.[1] തോറ്റത്തിന്റെ വേഷവിധാനം വളരെ ലളിതമാണ്.കാണിമുണ്ടെന്ന വസ്ത്രമുടുക്കുകയും,പട്ടും തലപ്പാളിയും തലക്കു കെട്ടുകയും ചെയ്യും.അരയിൽ ചുവപ്പ് പട്ട് ചുറ്റും.കോലക്കാരൻ പട്ടുടുത്ത് തലയിൽ പട്ടു തുണികെട്ടി കാവിന് മുമ്പിൽ വന്ന് കൈ ഉയർത്തി കൈകൂപ്പി താഴ്ന്ന് വണങ്ങുന്നു.പറിച്ച് കൂട്ടി തൊഴുക എന്നണ് ഇതിന് പറയുക. തോറ്റത്തിന് മുഖത്തുതേപ്പ് പതിവില്ല. ദേവതാസ്ഥാനത്തു നിന്നും കൊടുക്കുന്ന ചന്ദനം നെറ്റിയിലും മാറിടത്തിലും പൂശും. ചന്ദനം പൂശി ദിക്വന്ദനം നടത്തി കൊടിയില വാങ്ങുന്നു. കർമ്മിയാണ് കൊടിയില കൊടുക്കുന്നത്. പിന്നെ വീണ്ടും നാല് ദിക്വന്ദനം നടത്തി കാവിനെ വലം വെച്ചു തോറ്റത്തിനു നിൽക്കും. തോറ്റത്തിൽ പ്രധാനമായി പിന്നണിയിൽ നിന്നു പാടുന്ന ആളിനെ പൊന്നാനി എന്നു പറയുന്നു. തോറ്റം പാട്ടിന്റെ അരങ്ങിന് ഏതാണ്ട് കഥകളിയിലേതിനോടു സാമ്യമുണ്ടെങ്കിലും ഇവിടെ നടനും(തോറ്റവും) പാടുന്നു.[2]
തോറ്റം കെട്ടിയാടുന്ന കോലക്കാരനും, ഗായകസംഘവും കൂടി പാടുന്ന ഗാനമാണ് തോറ്റം പാട്ട്. തോറ്റം പാട്ട് പാടുന്ന വേഷം തോറ്റവും,തോറ്റമെന്ന വേഷം(തോറ്റക്കാരൻ) പാടുന്ന പാട്ട് തോറ്റം പാട്ടുമാണ്.[1]
സാമൂഹിക പരാമർശങ്ങൾ
[തിരുത്തുക]ഉത്തരകേരളത്തിന്റെ സാമൂഹികവും സാമുദായികവും സാംസ്കാരികവുമായ അനേകം കാര്യങ്ങൾ തോറ്റങ്ങളിലൂടെ അറിയാൻ കഴിയും. പ്രാചീനകാലത്തെ ജനജീവിതത്തിന്റെ നാനാവശങ്ങൾ അറിയാൻ തെയ്യത്തോറ്റങ്ങൾ സഹായിക്കുന്നു. ആചാരങ്ങൾ, ഉപചാരങ്ങൾ, അനുഷ്ഠാനങ്ങൾ, വിശ്വാസങ്ങൾ,ആരാധാനാക്രമം, ജനനമരണപര്യന്തമുള്ള സംസ്കാരചടങ്ങുകൾ,തൊഴിൽ, ഉല്പാദനപ്രക്രിയ, വിപണനസമ്പ്രദായം, ദായക്രമം തുടങ്ങിയവയെക്കുറിച്ചുള്ള അറിവുകൾ തോറ്റങ്ങള്ളിൽ നിന്നു ലഭിക്കുന്നു. [1]
പഴയകാലത്ത് സമൂഹത്തിലുണ്ടായിരുന്ന അനാശാസ്യപ്രവണതകളും തെയ്യത്തോറ്റങ്ങളിലൂടെ മനസ്സിലാക്കാൻ കഴിയും. ഭാര്യമാരുടെ ഏഷണി കേട്ട് സഹോദരിയെ കൊല ചെയ്യുന്ന സഹോദരൻന്മാരെ കടവാങ്കോട് മാക്കത്തിന്റെ തോറ്റത്തിൽ കാണുവാൻ കഴിയും. മരുമക്കത്തായ സമ്പ്രദായത്തിന്റെ ശൈഥില്യവും പരാജയവുമാണ് ചില തോറ്റങ്ങളിൽ ഉള്ളത്. നാടുവാഴിത്തത്തിന്റെ കെടുതികൾ വ്യക്തമാക്കുന്ന തോറ്റങ്ങളുമുണ്ട്. ജാതിവൈകൃതത്തിന്റെയും, അയിത്താചാരങ്ങളുടെയും നിരർത്ഥകത വെളിപ്പെടുത്തുന്ന ഇതിവൃത്തങ്ങളാണ് ചില തെയ്യത്തോറ്റങ്ങളിലുള്ളത്. പൊട്ടൻ തെയ്യത്തിന്റെ തോറ്റം ഒരു ഉദാഹരണമാണ്. [1]
പഴയകാലത്തെ കടൽവ്യാപാരം, വിപണനരീതികൾ തുടങ്ങിയവ തോറ്റം പാട്ടുകളിൽ കാണാം. മുൻപ് പ്രാമുഖ്യം നേടിയിരുന്ന അഴിമുഖങ്ങളുടെ പേരുകളും ഈ പാട്ടുകളിൽ കാണാം. കുടക് തുടങ്ങിയ വനമേഖലകളുമായി കച്ചവടബന്ധം നടത്തിയതിന്റെ സ്വഭാവവും കതിവന്നൂർ വീരൻ തോറ്റം, പെരുമ്പഴയച്ചൻ തോറ്റം തുടങ്ങിയവയിലൂടെ വ്യക്തമാകുന്നുണ്ട്. പരിസ്ഥിതിവിജ്ഞാനത്തിന് തെയ്യത്തോറ്റങ്ങൾ ഒരു മുതൽക്കൂട്ടാണ്. വിവിധ പ്രകൃതികളെക്കുറിച്ചറിയാൻ അവയിലൂടെ കഴിയും. നിരവധി സ്ഥലനാമങ്ങളും ഇവയിൽ കാണാം. കുടകിലേക്കുള്ള സഞ്ചാരപഥത്തിലെ ഓരോ പ്രദേശത്തെക്കുറിച്ചും കതിവന്നൂർവീരൻ തോറ്റത്തിൽ എടുത്തു പറയുന്നുണ്ട്. [1]
തോറ്റം പാട്ടുകളിലെ ഭാഷ
[തിരുത്തുക]തോറ്റം പാട്ടുകൾ വിവിധ സമുദായക്കരുടെ പാരമ്പര്യധാരയാണെന്നതിനാൽ ഭാഷാഭേദങ്ങൾ അവയിൽ കാണാം. ഈ പാട്ടുകളെല്ലാം ഒരേ കാലഘട്ടത്തിലുള്ളവയല്ല. സംസ്കൃതത്തിന്റെ അതിപ്രസരം ചില തോറ്റങ്ങളിൽ കാണുമ്പോൾ മറ്റു ചിലവയിൽ തുളുവിന്റെയും, തമിഴിന്റെയും സ്വാധീനം കാണാം. അത്യുത്തരകേരളത്തിലെ വ്യവഹാരഭാഷയുടെ സ്വാധീനവും തോറ്റം പാട്ടുകളിലുണ്ട്. അതേ സമയം ശുദ്ധമലയാളശൈലിയിലുള്ളവയും കാണാൻ കഴിയും.
സാഹിത്യ മൂല്യം
[തിരുത്തുക]തെയ്യത്തോറ്റങ്ങൾ ബോധപൂർവ്വമായ സാഹിത്യരചനകളാണെന്ന് പറയാൻ കഴിയില്ലെങ്കിലും അവയിൽ സാഹിത്യമൂല്യം ഇല്ലെന്നു പറയാനാവില്ല. വർണനകളുടെ സർവാംഗണീയമായ സുഭഗത തോറ്റങ്ങളുടെ ഒരു സവിശേഷതയാണ്. ദേവതകളുടെ രൂപവർണന തോറ്റത്തിലെ മുഖ്യമായൊരു വിഷയമാണ്.
| “ | ചെന്താമര മലർകർണികയുലർന്നപോൽ |
” |
| — [9] | ||
ഈ ഭാഗം മടയിൽ ചാമുണ്ഡിയുടെ രൂപവർണ്ണനയാണ്. അകൃത്രിമവും,ആശയസമ്പുഷ്ടവുമായ അലങ്കാരങ്ങൾ ചില തോറ്റങ്ങളിൽ കാണാം
| “ | തെളിവൊടുചന്ദ്രക്കലയതുപോലെ |
” |
| “ | പകലവനൊരു പതിനായിരമൊന്നി |
” |
സാമാന്യജനങ്ങൾക്ക് പോലും മനസ്സിലാകുന്ന ഉപമാലങ്കാരങ്ങളുള്ള ഈ ഭാഗം രക്തചാമുണ്ഡിത്തോറ്റത്തിലേതാണ്.
തെയ്യത്തോറ്റങ്ങളിൽ രസാവിഷ്കരണങ്ങളും കാണാം. വീരരൗദ്രഭാവങ്ങൾക്കാണ് തോറ്റങ്ങളിൽ കൂടുതൽ പ്രാമുഖ്യമെങ്കിലും വികാരങ്ങളും തോറ്റം പാട്ടുകളിൽ കാണാം. മാക്കത്തോറ്റം, ബാലിത്തോറ്റം, കതുവന്നൂർവീരൻ തോറ്റം, വിഷ്ണുമൂർത്തിത്തോറ്റം തുടങ്ങിയ തോറ്റങ്ങളിൽ കരുണരസപ്രധാനമായ ഭാഗങ്ങൾ കാണാം. തെയ്യത്തോറ്റങ്ങളിൽ ജ്ഞാനവും,ഭക്തിയും, സാഹിത്യവും സമ്മേളിക്കുന്നു.
തെയ്യത്തോറ്റങ്ങളിൽ ചരിത്രവസ്തുതകൾ നേരിട്ടു പ്രതിപാദിക്കുന്നില്ലെങ്കിലും ,ചരിത്രപരവും, ഭൂമിശാസ്ത്രപരവുമായ വസ്തുതകൾ മനസ്സിലാക്കാൻ ഇവ ഉപയോഗിക്കാം. തോറ്റം പാട്ടുകളെ പ്രാദേശിക ചരിത്രരചനക്ക് നിദാനമായി സ്വീകരിക്കാവുന്നതാണ്.
വകഭേദങ്ങൾ
[തിരുത്തുക]തോറ്റത്തിന് ഉച്ചത്തോറ്റം,അന്തിത്തോറ്റം എന്നിങ്ങനെ വകഭേദമുണ്ട്. ആ പേരുകൾ തോറ്റം പുറപ്പെടുന്ന സമയത്തെ സൂചിപ്പിക്കുന്നതാണ്. കോലക്കാരൻ പട്ട് ചുറ്റിക്കെട്ടി ദേവതാസ്ഥാനത്തിനു മുന്നിൽ ചെണ്ടയുമായി വന്നു നിന്ന് തോറ്റം പാടി അവസാനിപ്പിക്കുകയാണ് ഉച്ചത്തോറ്റത്തിൽ ചെയ്യുന്നത്. കക്കര ഭഗവതി, മുച്ചിലോട്ടു ഭഗവതി തുടങ്ങിയ തെയ്യങ്ങളുടെ ഉച്ചത്തോറ്റം ഉറഞ്ഞു തുള്ളുക കൂടി ചെയ്യും. എന്നാൽ അന്തിത്തോറ്റങ്ങൾ മിക്കതും ഉറഞ്ഞുതുള്ളാറുണ്ട്. വളരെ ചുരുക്കം ചില ദേവതകളുടെ അന്തിത്തോറ്റം മാത്രമേ ഉറഞ്ഞു തുള്ളാതിരിക്കുകയുള്ളൂ. തോറ്റങ്ങളുടെ ഉറഞ്ഞിളകിയാട്ടം ശരിയായ നർത്തനം തന്നെയാണ്[1].
തോറ്റം പുറപ്പെടാത്ത തെയ്യങ്ങൾക്കും തിറകൾക്കും തൽസ്ഥാനത്ത് വെള്ളാട്ടം എന്ന വേഷമാണ് പുറപ്പെടുക.[1].
ഭദ്രകാളി പാട്ട്
[തിരുത്തുക]
കേരളത്തിന്റെ തെക്കേ അറ്റത്തുള്ള തിരുവനന്തപുരത്തും കൊല്ലത്തും കന്യാകുമാരി പ്രദേശങ്ങളിലും കാണപ്പെടുന്ന, ഭദ്രകാളിയുടെ തിരുമുടി വച്ചാരാധിക്കുന്ന മുടിപ്പുര കളിലും ക്ഷേത്രങ്ങളിലും കാവുകളിലും ഉത്സവസമയത്തു പാടുന്ന പാട്ടാണ് ഭദ്രകാളിപാട്ട് അഥവാ തോറ്റംപാട്ട്. കൊല്ലം ജില്ലയിലെ ശ്രീ മുളങ്കാടകം ദേവീ ക്ഷേത്രത്തിൽ വർഷത്തിൽ രണ്ടു കുരുതികൾ നടക്കുന്നുണ്ട്. ധനു കുരുതിയും ഇടവ കുരുതിയും. ഈ കുരുതികളോടനുബന്ധിച്ചു തോറ്റംപാട്ടു നടക്കാറുണ്ട്. വൃശ്ചികം ഒന്നിന് തുടങ്ങി തോറ്റംപാട്ടിന്റെ ഇരുപതാമത്തെ ദിവസം മാലപ്പുറം അഥവാ ദേവീ കല്യാണം നടക്കുന്നു. വൃശ്ചികം ഒന്നിന് തുടങ്ങുന്ന തോറ്റംപാട്ടിനോടനുബന്ധിച്ചുള്ള മാലപ്പുറം വളരെ ആർഭാടമായിട്ടാണ് ക്ഷേത്രത്തിൽ നടക്കുന്നത്. അന്നേദിവസം ക്ഷേത്രത്തിൽ ദേവീകല്യാണത്തോടനുബന്ധിച്ചു വിശേഷാൽ പൂജകളും അന്നദാനവും ഉണ്ടാകും. തോറ്റംപാട്ട് തുടങ്ങി മുപ്പതാം ദിവസം തോറ്റം എന്ന തോറ്റംപാട്ടിലെ സവിശേഷമായ ഭാഗം പാടും . അന്നേ ദിവസവും ക്ഷേത്രത്തിൽ പ്രത്യേക പൂജകൾ ഉണ്ടാകും . തോറ്റം കഴിഞ്ഞു വരുന്ന ധനു മാസത്തിലെ ആദ്യ തിങ്കൾ , ചൊവ്വ ദിവസങ്ങളിൽ കുരുതി മഹോത്സവം നടക്കും . ഇതുപോലെ തന്നെ മേടം ഒന്നിന് തോറ്റം പാട്ട് ആരംഭിച്ചു ഇടവമാസം ആദ്യ തിങ്കൾ ചൊവ്വ ദിവസങ്ങളിൽ നടക്കുന്ന ഇടവ കുരുതി മഹോത്സാവവും നടക്കും . വർഷത്തിൽ തൊണ്ണൂറു ദിവസമെങ്കിലും തോറ്റംപാട്ട് ശ്രീ മുളങ്കാടകം ദേവീ ക്ഷേത്രത്തിൽ നടന്നു വരുന്നു .
ഇങ്ങനെയുള്ള മുടിപ്പുരകളിലെ ഉത്സവത്തെ കാളിയൂട്ട് ഉത്സവം എന്നാണ് പറയുക. ഭദ്രകാളിയെ ഊട്ടുക എന്നാണ് ഇതിൻ്റെ അർത്ഥം. കാളിയൂട്ട് ഉത്സവത്തിന്റെ ആദ്യ ദിവസം രാത്രി പൂജാബിംബമായ തിരുമുടി ശ്രീ കോവിലിന് പുറത്തെടുത്ത് അലങ്കരിച്ച് ഒരുക്കിയ പച്ചപ്പന്തലിൽ ഇരുത്തുന്നു. തുടർന്ന് പാട്ടുകാർ ഭദ്രകാളി ദേവിയെ മൂലസ്ഥാനമായ കൊടുങ്ങല്ലൂർ ശ്രീകുരുംബ ഭഗവതി ക്ഷേത്രത്തിൽ നിന്ന് പാടി ആവാഹിച്ചശേഷം തിരുമുടിയിൽ കാപ്പുകെട്ടി കുടിയിരുത്തുന്നു. ഇതിനെ പാടിക്കുടിയിരുത്ത് എന്നാണ് പറയുന്നത്.
പൊങ്കാല ഉത്സവത്തിന് പ്രശസ്തമായ ആറ്റുകാൽ ഭഗവതി ക്ഷേത്രത്തിൽ ഉത്സവം തുടങ്ങുന്നത് കുടിയിരുത്തോടെയും അവസാനിക്കുന്നത് കുടിയിളക്കോടെയുമാണ്. പാലകന്റെയും കന്യാവിന്റെയും കഥയാണ് തോറ്റംപാട്ടിലെ ഇതിവൃത്തം. ചിലപ്പതികാരം കഥയോട് സാദൃശ്യമുള്ള കഥയാണിത്. ആറ്റുകാലിലെ കീഴ്വഴക്കം അനുസരിച്ചു പാലകരുടെ ജനനം മുതൽ പാടി തുടങ്ങുന്നു.
ദേവിയുടെ ഭൂമിയിലേക്കുള്ള വരവ്, ദേവിയുടെ ഭർത്താവായ പാലകരുടെ ജനനം ഇവയാണ് ഒന്നാം ദിവസത്തെ പാട്ടിലെ ഇതിവൃത്തം. വടക്കൻ കൊല്ലത്തെ രാജാവായ മാരായർക്കും മാരുതിയ്ക്കും വളരെ കാലമായി മക്കളില്ല. അവർ ശിവഭജനം നടത്തിയതിന്റെ ഫലമായി ഉണ്ണി പാലകന് ജന്മം നൽകുന്നു. തെക്കും കൊല്ലത്തെ രാജാവായ നാരായണർക്കും മക്കളില്ല. അദ്ദേഹവും ശിവഭജനം നടത്തുന്നു. ശ്രീ പരമേശ്വരൻ തന്റെ മകളായ കാളിയെ നാരായണർക്കു വളർത്തുവാൻ നൽകുന്നു. ഭൂമിയിലേക്ക് പോരാൻ നേരം നാഗപടമുള്ള രണ്ട് കാൽ ചിലമ്പും പള്ളിവാളും ത്രിശൂലവും ഭഗവാൻ മകൾക്ക് നൽകുന്നു. അങ്ങനെ കാളി ദൈവകന്യാവ് എന്നറിയപ്പെടുന്നു. അവൾ വളർന്ന് കല്യാണപ്രായം ആയപ്പോൾ വടക്കൻ കൊല്ലക്കാരും തെക്കൻ കൊല്ലക്കാരും ഒരു വഴിയമ്പലത്തിൽ വച്ചു കണ്ടുമുട്ടുന്നു; കല്യാണം നിശ്ചയിക്കുന്നു.
രണ്ടാംദിവസം വിവാഹം ഉറപ്പിക്കലാണ്. തൃക്കല്യാണ ഒരുക്കങ്ങളാണ് ഈ ദിവസം പാടുന്നത്. ദേവിയും പാലകനുമായുള്ള കല്യാണമാണ് മൂന്നാം ദിവസം പാടുന്നത് . വളരെ ഇമ്പമാർന്നതും ശ്രവണമധുരവുമായ ഈ ഭാഗം മാലപ്പുറം പാട്ട് എന്നാണ് അറിയപ്പെടുന്നത്.
നാലാം ദിവസത്തെ പാട്ടിൽ ദേവിയുടെ ഭർതൃഗൃഹത്തിലേക്കുള്ള യാത്രയും ഭർതൃഗൃഹത്തിലെ സ്വീകരണങ്ങളും പ്രതിപാദിക്കുന്നു. ദേവിയുടെ നിർബന്ധത്തിനു വഴങ്ങി പാലകർ വാണിഭം ചെയ്യാൻ പോകാമെന്ന് സമ്മതിക്കുന്നു.
പാലകൻ്റെ പാണ്ഡ്യ നാട്ടിലേക്കുള്ള യാത്രയാണ് അഞ്ചാം ദിവസം വർണ്ണിക്കുന്നത്. പോകാൻ നേരം തന്റെ രണ്ട് ചിലമ്പുകൾ പാലകൻ്റെ കയ്യിൽ കൊടുത്തിട്ട്; ആ ചിലമ്പിന്റെ ഗുണഗണങ്ങളും അതിനു ചോദിക്കേണ്ട വിലയും ദേവി അവനോട് പറയുന്നു. അങ്ങനെ വാണിഭ സാധനങ്ങളും രണ്ട് പൊൻ ചിലമ്പുമായി പാലകൻ യാത്ര തിരിക്കുന്നു. പാണ്ഡ്യനാട്ടിലെത്തിയ പാലകൻ ചിലമ്പ് വിൽക്കാൻ തട്ടാനെ സമീപിക്കുന്നു. പാലകനെ വഴിയമ്പലത്തിൽ ഇരുത്തിയിട്ട് തട്ടാൻ കൊട്ടാരത്തിൽ ചെന്ന് രാജാവിനോട് ഇങ്ങനെ പറഞ്ഞു, "മഹാറാണിയുടെ കാൽ ചിലമ്പു മോഷ്ടിച്ച കള്ളനെ കണ്ടു കിട്ടിയിട്ടുണ്ട്". ഉടനെ രാജകിങ്കരന്മാർ പാലകനെ തിരുമുമ്പിൽ എത്തിക്കുന്നു.
പാലകന് രാജാവ് ശിക്ഷ വിധിക്കുന്നതാണ് ആറാം ദിവസം പാടുന്നത്. തട്ടാന്റെ ഏഷണി വിശ്വസിച്ച രാജാവ്, ഇനി മേലിൽ ആരും പാണ്ഡ്യ രാജ്യത്തു മോഷണം നടത്തരുത് അതിനാൽ മധുരയിൽ കട്ട കള്ളനെ (പാലകനെ) കഴുവേറ്റി കൊല്ലണം എന്ന് വിധിക്കുന്നു. ഇതേസമയം കന്യാവ് ഭർത്താവിനെ പ്രതീക്ഷിച്ചു ഇരിക്കുന്നു.
വടക്കൻ കൊല്ലത്ത് ഉറങ്ങിക്കിടന്ന കന്യാവ് ഒരു ദുഃസ്വപ്നം കണ്ട് ഞെട്ടി എണീക്കുന്നു. ഭർത്താവിന് എന്തോ ആപത്ത് പറ്റിയെന്ന് മനസ്സിലാക്കി ഒരു വൃദ്ധയുടെ രൂപത്തിൽ ഭർത്താവിനെ അന്വേഷിച്ചു പോകാൻ തിരുമാനിക്കുന്നു. പലരോടും അമ്മ വഴി ചോദിക്കുകയും അവർക്കെല്ലാം വരം നൽകുകയും ചെയ്യുന്നു. പാലകനെ ഒരു പാലത്തിൻ്റെ മുകളിൽ കഴുവിലേറ്റുകയാണ് ചെയ്തത്. അടുത്ത് ജോലി ചെയ്തു കൊണ്ടിരുന്ന ഒരു മണ്ണാൻ (തുണി അലക്കുന്നവൻ) കഴുകന്മാർ കൊത്താതെ പാലകന്റെ മൃതദേഹത്തെ സംരക്ഷിച്ചു. ഇതിൽ സംപ്രീതയായ ദേവി മണ്ണാനെ അനുഗ്രഹിച്ച്, അവൻ്റെ നാവിൽ എഴുതി ക്കൊടുത്തതാണത്രെ തോറ്റം പാട്ട്. ഇത് ആവശ്യമില്ലാതെ മൂളരുതെന്നും വാമൊഴി ആയി നിലനിർത്തണമെന്നും അമ്മ താക്കീത് നൽകി.
ഭർത്താവിന്റെ ജഡം കണ്ടു അമ്മ നെഞ്ചു പൊട്ടി വിലപിക്കുന്നു; കൈലാസനാഥൻ അമൃത് നൽകി പാലകനെ ജീവിപ്പിക്കുന്നു; അതോടെ അമ്മ പ്രതികാരമൂർത്തിയായി മാറുന്നു. (ഏഴാം ദിവസം പാലകനെ കൊന്ന തോറ്റം പാടുന്ന സമയം ദുഃഖസൂചകമായി ഗോപുരത്തിലെ ശില്പം മറയ്ക്കുന്നു, ശ്രീകോവിലിനു മുന്നിലെ കെടാവിളക്കിലെ ദീപം അണയ്ക്കുന്നു.)
കാളിയുടെ പ്രതികാരമാണ് എട്ടാം ദിവസം പാടുന്നത്. തൻ്റെ ഭർത്താവിനെ ചതിച്ചവരോട് പ്രതികാരം ചെയ്യാൻ ഒരുങ്ങുകയാണ് വൃദ്ധയായി മാറിയ ശ്രീ ഭദ്രകാളി. പേടിച്ച് അറയ്ക്കകത്ത് ഇരിക്കുന്ന തട്ടാനോട്, തനിക്കു ധാരാളം സ്വർണ്ണ വകകൾ പണിയാൻ ഉണ്ടെന്നും എത്രയും വേഗം തന്റെ പണി തീർക്കണമെന്നും അതിനായി നിന്റെ കുലത്തിലെ എല്ലാപേരെയും വിളിക്കാനും വൃദ്ധ പറയുന്നു. വഴിമദ്ധ്യേ പാലകൻ കള്ളൻ അല്ലെന്നും താനും രാജാവും കൂടി ബുദ്ധിപരമായി അവനെ കള്ളനാക്കി കൊല്ലുകയായിരുന്നു എന്നു തട്ടാൻ പറയുന്നു. അമ്മ എട്ടുദിക്കും പൊട്ടുമാറുച്ചത്തിൽ അലറുന്നു. ഭയന്ന് വിറച്ചു ഓടുന്ന അവരുടെ ഇടയിലേക്ക് വസൂരി വാരി വിതറുന്നു, ശേഷം തന്റെ പള്ളിവാൾ കൊണ്ടു എല്ലാപേരെയും കൊല്ലുന്നു. ചതിച്ച തട്ടാനെ ഓടിച്ചിട്ടു പിടിച്ച് പള്ളിവാളിനാൽ അവൻ്റെ നാവറുത്ത്, ക്രൂരമായി അവനെയും കൊല്ലുന്നു.
പാണ്ഡ്യനിഗ്രഹവും ദേവിയുടെ കൈലാസ യാത്രയുമാണ് ഒമ്പതാം ദിവസം പാടുന്നത് തട്ടാനെ കുലത്തോടെ മുടിച്ചു പാണ്ഡ്യ രാജാവിൻ്റെ മുന്നിലേക്ക് എഴുന്നള്ളുന്ന ദേവി തന്റെ പള്ളിവാള് കൊണ്ടു പാണ്ഡ്യന്റെ തല അറുക്കുന്നു. അധർമ്മത്തിനു കൂട്ടു നിൽക്കാത്ത റാണി പെരുംദേവിയെ മുത്താരമ്മനായി വാഴ്ത്തി വരങ്ങൾ നൽകുന്നു. ശേഷം കൈലാസത്തിൽ ചെന്ന് പിതാവിന്റെ മുന്നിൽ നമസ്കരിച്ച് പാണ്ഡ്യ ശിരസ്സ് സമർപ്പിക്കുന്നു. ഈ സമയം ദേവീപ്രീതിയ്ക്കായി പൊങ്കാല സമർപ്പണം നടക്കുന്നു.
പത്താം ദിവസത്തെ പൊലിപ്പാട്ടിൽ ദേവിയുടെ കൊടുങ്ങല്ലൂരിലേക്കുള്ള ആഗമനമാണ് വർണ്ണിക്കുന്നത്. പിതാവായ മഹേശ്വരൻ്റെ അനുവാദത്തോടെ ഭൂമിയിലെ കൊടുങ്ങല്ലൂർ എന്ന സ്ഥലത്ത് തനിക്കും ഭർത്താവിനും പാർക്കാൻ വിശ്വകർമാവിനെക്കൊണ്ട് ഒരു ആലയം പണിയിക്കുന്നു. പതിയായ പാലകനെ ക്ഷേത്രപാലനായി അരികിൽ കുടിയിരുത്തിയ ദേവി, മുടിപ്പുരയുടെ അകത്തെ അറയിൽ നേരെ വടക്കോട്ടു നോക്കി കുടിയിരുന്നു.
പൊലിപ്പാട്ടിനുശേഷം തിരുമുടിയിൽ നിന്ന് കാപ്പഴിച്ച് കുടിയിളക്കി ഭഗവതിയെ തിരിച്ചു കൊടുങ്ങല്ലൂരിൽ കൊണ്ടുവിടുന്നു. തിരുവനന്തപുരത്തെ തിരുമുടി പ്രതിഷ്ഠയില്ലാത്ത ചില ക്ഷേത്രങ്ങളിലും ഉത്സവത്തിന്റെ ഭാഗമായി തോറ്റംപാട്ട് പാടുന്നത് കാണാനാകും.
കണ്ണകീചരിതമാണ് ആറ്റുകാലിലെ തോറ്റംപാട്ടിൽ പാടുന്നത് എന്ന് പലയിടത്തും പറഞ്ഞു കേൾക്കാറുണ്ട്. എന്നാൽ പാട്ടിലെ വരികളിൽ എവിടെയും തന്നെ കണ്ണകി എന്ന പേര് പരാമർശിക്കുന്നില്ല. ആറ്റുകാലിലെ പ്രതിഷ്ഠ വേതാളാരൂഢയായ ഭദ്രകാളി ആണെന്നും തോറ്റംപാട്ടിൽ പ്രതിപാദിക്കുന്നത് ഭദ്രകാളി ചരിതമാണെന്നും 2016 ൽ പുറത്തിറങ്ങിയ Attukalamma the goddess of millions എന്ന ലക്ഷ്മി രാജീവിൻ്റെ പുസ്തകം തെളിയിക്കുന്നു.
കേരളത്തിലെ ആദ്യത്തെ ഭദ്രകാളി ക്ഷേത്രമായ കൊടുങ്ങല്ലൂർ ശ്രീ കുരുംബ ഭഗവതി ക്ഷേത്രത്തിൽ മീനമാസത്തിലെ രേവതി നാളിൽ നടക്കുന്ന കളമെഴുത്തു പാട്ടിന്റെ ഭാഗമായി തോറ്റം പാട്ടു പാടാറുണ്ട്. ഭദ്രകാളി ദാരികവീരനെ വധിച്ച ദിവസം ‘രേവതി വിളക്ക്’ എന്ന പേരിലാണ് ഇവിടെ ആഘോഷിക്കുന്നത്.
മുഴതാങ്ങ് ശ്രീ ചാവരുകാവിലും തിരു: ഉത്സവത്തിന്റെ ഭാഗമായി 11 ദിവസം ദേവിയെ കാപ്പ് കെട്ടി കുടിയിരുത്തി തോറ്റം പാട്ട് നടത്തി വരാറുണ്ട്. കൊല്ലം കൊല്ലൂർവിള ഭരണിക്കാവ് ദേവീക്ഷേത്രത്തിൽ മീന ഭരണി മഹോത്സവത്തിന്റെ ഭാഗമായി 41 ദിവസം ദേവിയെ കാപ്പ്കെട്ടി കുടിയിരുത്തി തോറ്റംപാട്ട് നടത്തിവരുന്നു. മീനഭരണി ഉത്സവം കഴിഞ്ഞ് കാർത്തിക നാളിൽ ഗുരുസിയോടെ തോറ്റംപാട്ടുത്സവം സമാപിക്കുന്നു.
അവലംബങ്ങൾ
[തിരുത്തുക]- 1 2 3 4 5 6 7 8 9 തെയ്യം-എം.വി. വിഷ്ണു നമ്പൂതിരി ,കേരള ഭാഷാ ഇൻസ്റ്റിറ്റ്യൂട്ട്, ISBN:81-7638-566-2
- 1 2 തെയ്യത്തിലെ ജാതിവഴക്കം-ഡോ:സഞ്ജീവൻ അഴീക്കോട്
പ്രസാധകർ: കറന്റ് ബുക്സ്
ISBN:81-240-1758-1 - ↑ ഡോ. ഗുണ്ടർട്ട്,മലയാളം ഇംഗ്ലീഷ് ഡിക്ഷനറി,പുറം 494
- ↑ ശബ്ദതാരാവലി-ശ്രീകണ്ഠേശ്വരം പത്മനാഭപിള്ള -പുറം 976
- ↑ കേരളത്തിലെ കാളിസേവ-ഡോ. ചേലനാട്ട് അച്യുതമേനോൻ-പുറം 216
- ↑ കളിയാട്ടം-സി.എം.എസ്. ചന്തേര-പുറം 95,329
- ↑ ഫോക്ലോറിന് ഒരു പഠന പദ്ധതി-ഡോ.രാഘവൻ പയ്യനാട്-പുറം 94
- ↑ തോറ്റം പാട്ടുകൾ-ഒരു പഠനം- എം.വി. വിഷ്ണുനമ്പൂതിരി-പുറം 279
- ↑ തെയ്യം,എം.വി.വിഷ്ണു നമ്പൂതിരി-പുറം 178
സ്രോതസ്സുകൾ
[തിരുത്തുക]- തെയ്യം-ഡോ. എം. വി. വിഷ്ണു നമ്പൂതിരി-കേരള ഭാഷാ ഇൻസ്റ്റിറ്റയൂട്ട്,തൃശ്ശൂർ-ISBN 81-7638-566-2
- തെയ്യത്തിലെ ജാതിവഴക്കം-ഡോ. സജ്ഞീവൻ അഴീക്കോട്- കറന്റ് ബുക്ക്സ് ISBN 81-240-1758-1
 |
ഈ ലേഖനം അപൂർണ്ണമാണ്. ഇതു പൂർത്തിയാക്കുവാൻ സഹകരിക്കുക. |