അവിയൽ

ഇംഗ്ലീഷ് വിലാസം

https://ml.wikipedia.org/wiki/Aviyal

Avial

Alternative names	അവിയൽ
Place of origin	India
Region or state	Kerala
Associated cuisine	Kerala cuisine
Main ingredients	Vegetables, Coconut, Curd
Media: Avial

അവിയൽ

വിവിധതരം പച്ചക്കറികളും കട്ടിത്തൈരും തേങ്ങയും ചേർത്തുണ്ടാക്കുന്ന ഒരു വിഭവമാണ് അവിയൽ. വിറ്റാമിനുകൾ, ധാതുക്കൾ, നാരുകൾ, പ്രോട്ടീൻ എന്നിവയാൽ സമ്പുഷ്ടമാണ് അവിയൽ. അതിനാൽ പോഷക സമൃദ്ധവും ആരോഗ്യകരവുമായ ഒരു വിഭവമായി അവിയൽ കണക്കാക്കപ്പെടുന്നു. മിക്ക പച്ചക്കറികളും അവിയലിൽ ഉപയോഗിക്കാറുണ്ട്. കേരളീയ സദ്യയിലെ ഒഴിച്ചുകൂടാനാവാത്ത ഒരു വിഭവമാണിത്. സാധാരണയായി അവിയലിൽ ചേർക്കുന്ന പച്ചക്കറികൾ നേന്ത്രക്കായ, ചേന, പയർ, പടവലങ്ങ, വെള്ളരിക്ക, മുരിങ്ങക്ക, കാരറ്റ്, വാഴക്ക, കുമ്പളങ്ങ, മത്തങ്ങ, കയ്പക്ക, മുരിങ്ങക്ക, പടവലം, ബീൻസ്, പച്ചമുളക് എന്നിവയാണ്. ചിലർ തൈരിനു പകരം തക്കാളി പുളിയോ ഉപയോഗിക്കുന്നു. ചോറിന്റെ കൂടെയോ പ്രധാന പ്രാതൽ വിഭവങ്ങളുടെ കൂടെയോ അവിയൽ ഭക്ഷിക്കാം.

ചേരുവകൾ

ചേന, കായ, കുമ്പളങ്ങ, കാരറ്റ്, പയർ, വഴുതനങ്ങ, വെള്ളരിക്ക, മുരിങ്ങക്കായ, പടവലങ്ങ, അമരപ്പയർ തുടങ്ങിയവയാണ് അവിയലിൽ സാധാരണയായി ഉപയോഗിക്കുന്ന പച്ചക്കറികൾ. ഇവയിൽ ചില പച്ചക്കറികൾ താരതമ്യേന പുതിയതായി അവിയലിൽ ഉൾപ്പെടുത്തിയവയാണ്. അതേസമയം, കോഴിക്കോട് പ്രദേശത്ത് തയ്യാറാക്കുന്ന അവിയലിൽ പാവയ്ക്ക കൂടി ഉപയോഗിക്കുന്ന രീതിയുണ്ട്. കൊല്ലം പ്രദേശത്തെ അവിയലിന്റെ ചില വകഭേദങ്ങളിൽ മറ്റ് പച്ചക്കറികൾക്കൊപ്പം തക്കാളിയും ചേർക്കാറുണ്ട്. ചിലർ അവിയലിൽ തൈര് ചേർക്കാതിരിക്കുകയോ, അതിന് പകരം പച്ചമാങ്ങ അല്ലെങ്കിൽ പുളിപ്പിച്ച പുളിയുടെ പൾപ്പ് ഉപയോഗിക്കുകയോ ചെയ്യുന്നു. തയ്യാറാക്കുന്ന രീതിയനുസരിച്ച് അവിയൽ കൂടുതലായി ചാറുള്ള കറിയായോ അൽപം വറ്റിച്ച അർധശുഷ്കമായ ഒരു കൂട്ടുകറിയായോ തയ്യാറാക്കാം. സാധാരണയായി ചോറിനൊപ്പമാണ് അവിയൽ കഴിക്കുന്നത്.

“അവിയൽ” എന്ന വാക്ക് ചില സന്ദർഭങ്ങളിൽ “വേവിച്ചത്” അല്ലെങ്കിൽ “വെള്ളത്തിൽ പുഴുങ്ങിയത്” എന്ന അർഥത്തിലും ഉപയോഗിക്കപ്പെടുന്നു. പച്ചക്കറികൾ വെള്ളത്തിൽ വേവിച്ചാണ് ഈ വിഭവം തയ്യാറാക്കുന്നത് എന്ന രീതിയുമായി ബന്ധപ്പെട്ടാണ് ഈ അർഥം ഉണ്ടായത്.

അവിയലിന്റെ ചരിത്രം

അവിയൽ പാണ്ഡവരിൽ ഒരാളായ ഭീമൻ വനവാസകാലത്ത് കണ്ടുപിടിച്ച വിഭവമാണെന്ന് വിശ്വസിക്കപ്പെടുന്നു. ഐതിഹ്യമനുസരിച്ച്, അക്കാലത്ത് ഭീമൻ ബല്ലവൻ എന്ന പേരിൽ വിരാട രാജാവിന്റെ കൊട്ടാരത്തിലെ പാചകക്കാരനായി ജോലി ഏറ്റെടുത്തപ്പോൾ പാചകം ചെയ്യുന്നതിൽ അദ്ദേഹത്തിന് വലിയ പരിചയമുണ്ടായിരുന്നില്ല. അങ്ങനെ ഒരു ദിവസം, വിവിധതരം പച്ചക്കറികൾ ചെറുതായി അരിഞ്ഞ് ഒരുമിച്ച് വേവിക്കുകയും അതിനുമുകളിൽ ചിരകിയ തേങ്ങ ചേർക്കുകയും ചെയ്തു. അങ്ങനെയാണ് അവിയൽ ഉണ്ടായതെന്നാണ് പറയപ്പെടുന്നത്. ഈ കഥയ്ക്ക് പല ഐതിഹ്യഭേദങ്ങളും നിലവിലുണ്ട്. ഒരിക്കൽ വിരാട രാജാവിന്റെ കൊട്ടാരത്തിൽ അപ്രതീക്ഷിതമായി അതിഥികൾ എത്തിയപ്പോൾ അവർക്ക് ഭക്ഷണം തയ്യാറാക്കി നൽകേണ്ടിവന്നു. ഒരു പ്രത്യേക കറിക്കായി ഉപയോഗിക്കാവുന്നത്ര അളവിൽ ഏതെങ്കിലും ഒരു പച്ചക്കറി ലഭ്യമല്ലാതിരുന്നതിനാൽ, ലഭ്യമായിരുന്ന വിവിധ പച്ചക്കറികളെല്ലാം ചേർത്ത് ഭീമൻ ഒരു പുതിയ വിഭവം തയ്യാറാക്കി. പിന്നീട് ഈ വിഭവം അവിയൽ എന്ന പേരിൽ പ്രസിദ്ധമായെന്നാണ് ഒരു ഐതിഹ്യം.

മറ്റൊരു ഐതിഹ്യകഥ ഭീമനെ വധിക്കാൻ കൗരവർ നടത്തിയ ശ്രമവുമായി ബന്ധപ്പെട്ടതാണ്. ഭീമന് വിഷം നൽകി അബോധാവസ്ഥയിലാക്കിയ ശേഷം കൗരവർ അദ്ദേഹത്തെ കെട്ടിയിട്ട് വെള്ളത്തിലേക്ക് എറിഞ്ഞുവെന്നാണ് കഥ. ഭീമൻ വെള്ളത്തിൽ മുങ്ങിമരിച്ചതായി അവർ മറ്റുള്ളവരോട് അറിയിക്കുകയും ചെയ്തു. ദുഃഖാചരണ ദിവസങ്ങൾ പൂർത്തിയായതോടെ ഭീമന്റെ മരണാനന്തര ചടങ്ങുകൾക്കായുള്ള വിരുന്ന് സംഘടിപ്പിക്കാൻ തയ്യാറെടുപ്പുകൾ ആരംഭിച്ചു. എന്നാൽ അപ്രതീക്ഷിതമായി, നാഗന്മാർ രക്ഷപ്പെടുത്തിയ ഭീമൻ വെള്ളത്തിൽ നിന്ന് ജീവനോടെ പുറത്തുവന്നു. ഇതോടെ വിരുന്നിനുള്ള ഒരുക്കങ്ങൾ നിർത്തിവച്ചു. എന്നാൽ ഈ തീരുമാനം ഭീമന് ഇഷ്ടപ്പെട്ടില്ല. അതിനാൽ ലഭ്യമായിരുന്ന വിവിധ പച്ചക്കറികളെല്ലാം ഒരുമിച്ച് ചേർത്ത് ഒരു പുതിയ വിഭവം തയ്യാറാക്കാൻ അദ്ദേഹം തീരുമാനിച്ചു. പിന്നീട് ഈ വിഭവം അവിയൽ എന്ന പേരിൽ പ്രസിദ്ധമായെന്നാണ് ഈ ഐതിഹ്യഭേദം പറയുന്നത്.

അവിയൽ എന്ന സ്വാദിഷ്ഠമായ വിഭവം കണ്ടുപിടിച്ചത് സ്വാതി തിരുനാളിന്റെ കൊട്ടാരത്തിലെ കവിയായ ഇരയിമ്മൻ തമ്പിയാണെന്നു പറയപ്പെടുന്നു .ഒരിക്കൽ കൊട്ടാരത്തിൽ ഒരു ഊട്ടു നടന്നപ്പോൾ കറി തികയാതെ വരികയുണ്ടായി . അപ്പോൾ രാജാവും പരിചാരകരും എന്ത് ചെയ്യണമെന്നറിയാതെ വിഷമിച്ചു . ബുദ്ധിമാനായ ഇരയിമ്മൻ തമ്പി പാചകശാലയിൽ പോയി നോക്കിയപ്പോൾ കണ്ടത് കറിക്ക് അരിഞ്ഞു കൂട്ടിയ പച്ചക്കറികളിൽ കുറെ ഭാഗങ്ങൾ വെറുതെ കളഞ്ഞിരിക്കുന്നതാണ് . തമ്പി ഉടനെ അവിടെക്കിടന്ന അരിഞ്ഞെറിഞ്ഞിരുന്ന പച്ചക്കറിയുടെ അവശിഷ്ടങ്ങളെല്ലാം പെറുക്കിയെടുത്ത് അതിൽ നിന്നും ഭക്ഷ്യയോഗ്യമായ ഭാഗങ്ങൾ വേർതിരിച്ചെടുത്തു .അവയെല്ലാം കൂടി ഏതാണ്ട് രണ്ടു വലിയ വട്ടികൾ നിറച്ചുണ്ടായിരുന്നു . അതിനെയെല്ലാം കൂടി ഒരു പാത്രത്തിലിട്ട് വേവിച്ച് എരിശ്ശേരി എന്ന കറിയുണ്ടാക്കാൻ ശ്രമിച്ചപ്പോൾ പാചകമറിയാത്ത ഇരയിമ്മനും ബന്ധുവായ ബ്രാഹ്മണനും കൂടിയുണ്ടാക്കിയത് വേറെയൊരു കൊഴുത്ത സാധനമായി . അവ ചോറിനു വിളമ്പിയപ്പോൾ, അതിന്റെ അസാധ്യരുചിയും മണവും കണ്ടു ആൾക്കാർ തമ്മിൽ പിടിവലിയായത്രേ . തമ്പുരാനും കുറെയധികം ഭക്ഷിച്ചു . പിന്നീട് ഈ സാധനംതന്നെ ഇരയിമ്മൻ തമ്പി അവിയൽ എന്ന് പേരിടുകയും അതിനെ നേരത്തെ ഉണ്ടാക്കിയ രീതിയിൽ ഒന്നുകൂടെ ഉണ്ടാക്കുകയും ചെയ്തു . അപ്പോൾ അത് മുമ്പത്തേതിനേക്കാൾ കൂടുതൽ രുചികരമായിത്തീർന്നു . അത്തരത്തിൽ അവിയലിന്റെ ജനനമുണ്ടായി .

വിവിധതരം അവിയലുകൾ

കേരളത്തിന്റെ പല ഭാഗങ്ങളിലും പല വിധത്തിലാണ് അവിയലുണ്ടാക്കുന്നത്. മധ്യ കേരളത്തിൽ തൈര് ചേർക്കാറില്ല. ഉണക്കമീൻ ചേർത്തു മീനവിയലും മരച്ചീനി ചേർത്ത് മരച്ചീനി അവിയലും ഉണ്ടാക്കാറുണ്ട് .ഇത്തരത്തിൽ അവിയൽ പലതരത്തിലാണ് . എന്നാൽ ശരിയായ അവിയൽ എന്ന് പറഞ്ഞാൽ നേരത്തെ പറഞ്ഞിട്ടുള്ള പച്ചക്കറി അവിയലാണ്. എന്നിരിക്കിലും അവിയൽ മലയാളിയുടെ ഇഷ്ടവിഭവമാണ് . ആരോഗ്യത്തിനുത്തമവും സ്വാദിഷ്ഠവുമായ ഈ വിഭവം തികച്ചും കേരളീയമാണ്.

പുറത്തേക്കുള്ള കണ്ണികൾ

• അവിയൽ ഉണ്ടാക്കുന്ന രീതി - ഒന്ന് Archived 2010-08-23 at the Wayback Machine
• അവിയൽ ഉണ്ടാക്കുന്ന രീതി - രണ്ട് Archived 2010-11-23 at the Wayback Machine

ചിത്രശാല

• അവിയലിന്റെ ചിത്രങ്ങൾ
• 
  അവിയൽ കഷണങ്ങൾ
• 
  അവിയൽ കഷണങ്ങൾ
• 
  അവിയൽ പാചകം ചെയ്യുന്നതിന്റെ ചിത്രം
• 
  സാമ്പാറും അവിയലും
• 
  അവിയൽ കറി
• 
  അവിയൽ കറി
• 
  അവിയൽ