ചെങ്ങന്നൂരാതിപ്പാട്ട്

വിക്കിപീഡിയ, ഒരു സ്വതന്ത്ര വിജ്ഞാനകോശം.
Jump to navigation Jump to search

കുട്ടനാടും പരിസരപ്രദേശങ്ങളിലും പ്രചാരത്തിലുള്ള നാടൻ പാട്ടാണ് ചെങ്ങന്നൂരാതിപ്പാട്ട്. കർഷകതൊഴിലാളികൾക്കിടയ്ക്ക് ഇതിന് ഏറെ പ്രചാരമുണ്ട്. സാംബവ വിഭാഗത്തിലെ തൊഴിലാളികളാണ് ഇതു പ്രധാനമായും പാടുന്നത്. മധ്യതിരുവിതാംകൂറിൽ, കോട്ടയം, പത്തനംതിട്ട, ആലപ്പുഴ എന്നീ ജില്ലകളിലാണ് ചെങ്ങന്നൂർ ആതിപ്പാട്ട് പാടിവരുന്നത്. [1] മുടിയാട്ടത്തിനും കല്യാണത്തിനും സാംബവർ ഈ പാട്ട് പാടും. ഈ പാട്ടിൽ അനേകം കഥകളും ഉപകഥകളുമുണ്ട്. പല പാഠഭേദങ്ങളം ഈ പാട്ടിന് നിലവിലുണ്ട്. കുന്നവം പെണ്ണിനെയും പാലുവം പെണ്ണിനെയും കൊണ്ടു വന്ന കഥയും പാലുവം കോയിയുമായി അങ്കം നടത്തിയ കഥയുമാണ് ആവേദകർ ആവേശത്തോടെ പാടുന്നത്. ഗുരുനാഥൻ കരിയാപണിക്കന്റെ വാക്കുകൾ മറികടന്ന് പത്തൊൻപതാമത്തെ കളരി കീഴടക്കാനെത്തി ചുരികത്തലയിൽ ജീവൻ നഷ്ടപ്പെട്ട ചെങ്ങന്നൂരാതിയുടെ കഥയാണ് ഈ പാട്ട്.

പ്രധാന ഉപാഖ്യാനങ്ങൾ[തിരുത്തുക]

  • ചെങ്ങന്നൂരാതിയുടെ ബാല്യവും ആയുധാഭ്യാസവും
  • പുലിമൊകം കളരിയിൽ പോയ കഥ
  • കുന്നവം പെണ്ണിനെ കൊണ്ടു വന്ന കഥ
  • പാലുവം കോയിയുമായി അങ്കം നടത്തിയ കഥ
  • കളരിയിലെ പാട്ടുപൊലിവിന്റെ കഥ
  • കുന്നവം പെണ്ണിനെ ആചാരക്കെട്ടു കെട്ടിയ കഥ
  • ഇരുമെല്ലൂപ്പെണ്ണിന്റെ വീട്ടിൽ പോയ കഥ
  • ചെങ്ങന്നൂരാതിയും മലനാട്ടിലാതിയും മൂവക്കോട്ട പിടിച്ച കഥ

വിവിധ ആവേദകർ ഒരേ കഥ പല തരത്തിൽ അവതരിപ്പിക്കാറുണ്ടെങ്കിലും കഥാ സാരം ഒന്നു തന്നെയായിരിക്കും.

പ്രമേയം[തിരുത്തുക]

സാംബവ (പറയ)ജനതയുടെ വീരനായകനും ആയുധവിദ്യയിൽ സമർത്ഥനുമാണ് ചെങ്ങന്നൂരാതി. ചിലേടങ്ങളിൽ പുലയരും ആതിയെ ആദരിക്കുന്നുണ്ട്. [2] ചെങ്ങന്നൂരപ്പനും അമ്മയ്ക്കും ഉണ്ടായ മകനാണ്ആതി. കരിയാപണിക്കൻ എന്ന പുള്ള് കരിയാത്തനാർ എന്ന പരുന്തിന്റെ പിടിയിൽ നിന്നു വീണപ്പോൾ ആതി എടുത്തു രക്ഷിച്ചു. പിന്നീട് ആ പുള്ള് ആതിക്ക് കളരി വിദ്യ ഉപദേശിച്ചു. പതിനെട്ടുകളരികളിൽ ആതിക്കു വിജയമുണ്ടാകുമെന്നും, പത്തൊൻപതാമത്തെ കളരിയിൽ പോകുവാനിടവന്നാൽ മരിക്കുമെന്നും ആ പുള്ള് പ്രസ്താവിച്ചു. പതിനെട്ടു കളരിക്കാരെയും ആതി തോൽപിച്ചു. പത്തൊൻപതാമത്തെ കളരിയിൽ വീരമരണം വരിക്കേണ്ടിവന്നു. ചെങ്ങന്നൂരാതിയുടെ സാഹസിക ജീവിതാനുഭവങ്ങളാണ് ഈ പാട്ടിന്റെ കേന്ദ്ര പ്രമേയം.

അവലംബം[തിരുത്തുക]

  1. എം.വി. വിഷ്ണു നാരായണൻ നമ്പൂതിരി. ഫോക്‌ലോർ നിഘണ്ടു. കേരള ഭാഷാ ഇൻസ്റ്റിറ്റ്യൂട്ട്.
  2. വി വി സ്വാമി. ചെങ്ങന്നൂരാതി. കോട്ടയം: ഡി.സി. ബുക്സ്. ISBN 9788126433308.
"https://ml.wikipedia.org/w/index.php?title=ചെങ്ങന്നൂരാതിപ്പാട്ട്&oldid=2879796" എന്ന താളിൽനിന്ന് ശേഖരിച്ചത്