കെ.വി. തോമസ്

ഇംഗ്ലീഷ് വിലാസം

https://ml.wikipedia.org/wiki/KV_Thomas

കുറുപ്പശ്ശേരി വർക്കി തോമസ്
Minister of State in the Ministry of Agriculture and Minister of State in the Ministry of Consumer Affairs, Food and Public Distribution, Central Govt. of India
പദവിയിൽ
പദവിയിൽ വന്നത് 28 മെയ് 2009
മുൻഗാമി	കാന്തിലാൽ ഭുരിയ
മണ്ഡലം	എറണാകുളം
വ്യക്തിഗത വിവരണം
ജനനം	(1946-05-10) മേയ് 10, 1946 കുമ്പളങ്ങി, കേരളം, ഇന്ത്യ
രാഷ്ട്രീയ പാർട്ടി	ഇന്ത്യൻ നാഷണൽ കോൺഗ്രസ്സ്
പങ്കാളി	ഷേർളി തോമസ്
മക്കൾ	3 മക്കൾ (രണ്ട് ആൺ, ഒരു പെൺ)
വെബ്സൈറ്റ്	http://kvthomas.in
As of May 29, 2009 ഉറവിടം: [1]

1946 മെയ് 10 ന് ജനിച്ച കെ.വി. തോമസിന്റെ മുഴുവൻ പേര് കുറുപ്പശ്ശേരി വർക്കി തോമസ് എന്നാണ്. എറണാകുളം തേവര കോളേജിൽ കെമിസ്ട്രി അധ്യാപകനായി പ്രവർത്തിച്ച ശേഷമാണ് രാഷ്ട്രീയത്തിലേക്ക് ഇറങ്ങുന്നത്.

പതിനഞ്ചാം ലോകസഭയിൽ കേരളത്തിലെ എറണാകുളം മണ്ഡലത്തിനെ പ്രതിനിധീകരിക്കുന്ന ലോകസഭാംഗവും കേന്ദ്ര ഭക്ഷ്യ പൊതുവിതരണ വകുപ്പിന്റെ സ്വതന്ത്ര ചുമതലയുള്ള മന്ത്രിയുമാണ് കെ.വി. തോമസ്. ഇന്ത്യൻ നാഷണൽ കോൺഗ്രസ് അംഗമായ ഇദ്ദേഹം കേരള നിയമസഭാംഗമായിരിക്കെ 2009-ലെ തെരഞ്ഞെടുപ്പിൽ എറണാകുളം പാർലമെന്റ് മണ്ഡലത്തിൽ മത്സരിക്കാൻ നിയോഗിക്കപ്പെടുകയായിരുന്നു. 11,790 വോട്ടിന്റെ ഭൂരിപക്ഷത്തിൽ സി.പി.ഐ.(എം)ലെ സിന്ധു ജോയിയെ തോല്പിച്ചാണ് ലോകസഭയിലെത്തുന്നത്. 2001 മുതൽ 2004 വരെ കേരള നിയമസഭയിൽ എക്സൈസും,ടൂറിസവും, ഫിഷറീസും വകുപ്പുകൾ കൈകാര്യം ചെയ്തിരുന്ന മന്ത്രിയായിരുന്നു. 1984 മുതൽ 1996 വരെ ലോകസഭാംഗമായിരുന്നു.

ഫ്രഞ്ച് ചാരക്കേസ്

പ്രധാന ലേഖനം - ഫ്രഞ്ച് ചാരക്കേസ്

കേരളത്തിൽ, പ്രത്യേകിച്ച് രാഷ്ട്രീയ രംഗത്ത് വളരെയധികം കോളിളക്കം സൃഷ്ടിച്ച ഒന്നാണ് ഫ്രഞ്ച് ചാരക്കേസ്. 1995 ഡിസംബർ 19 ന് ഗലാത്തി എന്ന ഫ്രഞ്ച് നൗകയിൽ കൊച്ചി നാവികസേനാത്താവളത്തിനടുത്ത് സർവേ ആരംഭിച്ചു. ഗോവയിൽ നിന്നാണ് ഒരു പായ്ക്കപ്പലിൽ രണ്ട് ഫ്രഞ്ച് പൗരന്മാരും ഗോവൻ സ്വദേശിയായ ക്യാപ്റ്റനും കൊച്ചിയിൽ എത്തിയത്. സർവേയിൽ സംശയം തോന്നിയ കോസ്റ്റ് ഗാർഡ് ഡിസംബർ 28ന് നൗകയിലുള്ളവരെ അറസ്റ്റ് ചെയ്തു. പിന്നീട് കേസ് സി.ബി.ഐക്ക് വിട്ടു.

ഫ്രഞ്ചുകാരായ ഫോങ്കോയിസ് ക്ളാവലും എലല്ല ഫിലിപ്പുമാണ് ആദ്യ രണ്ടു പ്രതികൾ. മൂന്നാം പ്രതി ഗോവൻ സ്വദേശി ക്യാപ്റ്റൻ എഫ്.എം. ഫുർഡെയും നാലാം പ്രതി കോൺഗ്രസ് നേതാവ് കെ.വി. തോമസുമാണ്. നാലാം പ്രതി കെ.വി. തോമസിനെ കുറ്റക്കാരനല്ല എന്ന് കണ്ട് 1998 ജനുവരി 28 ന് എറണാകുളം ചീഫ് ജുഡിഷ്യൽ മജിസ്ട്രേറ്റ് കോടതി വെറുതെ വിട്ടിരുന്നു.

കേരളത്തിൽ കോൺഗ്രസ് ഭരണം നടക്കുമ്പോൾ കോൺഗ്രസ് നേതാവ് കെ.വി. തോമസ് പ്രതിപട്ടികയിൽ ഉൾപ്പെട്ടത് ഫ്രഞ്ച് ചാരക്കേസിന് രാഷ്ട്രീയമാനം കൈവന്നു. 1996-ലെ പാർലമെന്റ് തിരഞ്ഞെടുപ്പിൽ എറണാകുളം മണ്ഡലത്തിൽ യു.ഡി.എഫ് സ്ഥാനാർത്ഥിയായി മൽസരിച്ച കെ.വി. തോമസിന്റെ പരാജയത്തിന് ഈ വിവാദം ഒരു ഘടകമാണെന്ന് പല നിരീക്ഷകരും കരുതുന്നു.

വിവാദങ്ങൾ

കേന്ദ്ര കൃഷിവകുപ്പ് സഹമന്ത്രി ആയിരിക്കെ 2010 ഒക്ടോബറിൽ കാസർകോട് വെച്ച് നടന്ന ഒരു സെമിനാറിൽ വെച്ച് എൻഡോസൾഫാൻ മനുഷ്യരിൽ ആരോഗ്യപ്രശ്നങ്ങൾ സൃഷ്ടിക്കുമെന്ന് തെളിയിക്കപ്പെട്ടിട്ടില്ല എന്ന് അഭിപ്രായപ്പെട്ടത് കക്ഷിരാഷ്ട്രീയഭേദമന്യെ വിമർശിക്കപ്പെട്ടു.

അധികാരസ്ഥാനങ്ങൾ

• കേന്ദ്ര കൃഷി വകുപ്പ് സഹമന്ത്രി
• കെ.പി.സി.സി ട്രഷറർ
• എറണാകുളം ഡി.സി.സി. പ്രസിഡന്റ്

തിരഞ്ഞെടുപ്പുകൾ

തിരഞ്ഞെടുപ്പുകൾ

വർഷം	മണ്ഡലം	വിജയിച്ച സ്ഥാനാർത്ഥി	പാർട്ടിയും മുന്നണിയും	പരാജയപ്പെട്ട മുഖ്യസ്ഥാനാർത്ഥി	പാർട്ടിയും മുന്നണിയും
2014	എറണാകുളം ലോകസഭാമണ്ഡലം	കെ.വി. തോമസ്	കോൺഗ്രസ് (ഐ.), യു.ഡി.എഫ്.	ക്രിസ്റ്റി ഫെർണാണ്ടസ്	സ്വതന്ത്ര സ്ഥാനാർത്ഥി, എൽ.ഡി.എഫ്.
2009	എറണാകുളം ലോകസഭാമണ്ഡലം	കെ.വി. തോമസ്	കോൺഗ്രസ് (ഐ.), യു.ഡി.എഫ്.	സിന്ധു ജോയ്	സി.പി.എം., എൽ.ഡി.എഫ്.
2006	എറണാകുളം നിയമസഭാമണ്ഡലം	കെ.വി. തോമസ്	കോൺഗ്രസ് (ഐ.), യു.ഡി.എഫ്.	എം.എം. ലോറൻസ്	സി.പി.ഐ.എം., എൽ.ഡി.എഫ്.
2001	എറണാകുളം നിയമസഭാമണ്ഡലം	കെ.വി. തോമസ്	കോൺഗ്രസ് (ഐ.), യു.ഡി.എഫ്.	സെബാസ്റ്റ്യൻ പോൾ	സ്വതന്ത സ്ഥാനാർത്ഥി, എൽ.ഡി.എഫ്.
1996	എറണാകുളം ലോകസഭാമണ്ഡലം	സേവ്യർ അറക്കൽ	സ്വതന്ത്ര സ്ഥാനാർത്ഥി, എൽ.ഡി.എഫ്.	കെ.വി. തോമസ്	കോൺഗ്രസ് (ഐ.), യു.ഡി.എഫ്.
1991	എറണാകുളം ലോകസഭാമണ്ഡലം	കെ.വി. തോമസ്	കോൺഗ്രസ് (ഐ.), യു.ഡി.എഫ്.	വി. വിശ്വനാഥ മേനോൻ	സി.പി.എം., എൽ.ഡി.എഫ്.
1989	എറണാകുളം ലോകസഭാമണ്ഡലം	കെ.വി. തോമസ്	കോൺഗ്രസ് (ഐ.), യു.ഡി.എഫ്.	പി. സുബ്രമണ്യൻ പോറ്റി	സ്വതന്ത്ര സ്ഥാനാർത്ഥി, എൽ.ഡി.എഫ്.
1984	എറണാകുളം ലോകസഭാമണ്ഡലം	കെ.വി. തോമസ്	കോൺഗ്രസ് (ഐ.), യു.ഡി.എഫ്.	എ.എ. കൊച്ചുണ്ണി	ഐ.സി.എസ്., എൽ.ഡി.എഫ്.

എഴുത്തുകാരൻ

പ്രധാന കൃതികൾ

1. എന്റെ ലീഡർ
2. കുമ്പളങ്ങി വർണ്ണങ്ങൾ
3. എന്റെ കുമ്പളങ്ങി
4. എന്റെ കുമ്പളങ്ങിക്കു ശേഷം
5. അമ്മയും മകനും
6. സോണിയ പ്രിയങ്കരി
7. കുമ്പളങ്ങി ഫ്ലാഷ്

കുടുംബം

ഭാര്യ - ഷേർളി, മക്കൾ - ബിജു, രേഖ, ഡോ. ജോ