വി. വിശ്വനാഥമേനോൻ

വി.വിശ്വനാഥ മേനോൻ
കേരളത്തിലെ ധനകാര്യ വകുപ്പ് മന്ത്രി
പദവിയിൽ 1987 - 1991
മുൻഗാമി	കെ.എം. മാണി
പിൻഗാമി	ഉമ്മൻ ചാണ്ടി
കേരള നിയമസഭാംഗം
പദവിയിൽ 1987 - 1991
മണ്ഡലം	തൃപ്പൂണിത്തുറ
രാജ്യസഭാംഗം
പദവിയിൽ 1974 - 1980
മണ്ഡലം	കേരളം
ലോക്‌സഭാംഗം
പദവിയിൽ 1967 - 1971
മണ്ഡലം	എറണാകുളം
വ്യക്തിഗത വിവരങ്ങൾ
ജനനം	വടക്കൂട്ട് വിശ്വനാഥ മേനോൻ 1927 ജനുവരി 15 കലൂർ, എറണാകുളം ജില്ല
മരണം	മേയ് 3, 2019(2019-05-03) (92 വയസ്സ്) എറണാകുളം
രാഷ്ട്രീയ കക്ഷി	സി.പി.എം(1964-2002,2018-2019)
മറ്റ് രാഷ്ട്രീയ അംഗത്വം	ബി.ജെ.പി(2003-2018)
പങ്കാളി	കെ. പ്രഭാവതി
കുട്ടികൾ	2 sons
As of മെയ് 3, 2019 ഉറവിടം: കേരള നിയമസഭ

1987 മുതൽ 1991 വരെ നിലവിലിരുന്ന രണ്ടാം ഇ.കെ. നായനാർ മന്ത്രിസഭയിലെ സംസ്ഥാന ധനകാര്യ വകുപ്പ് മന്ത്രിയായിരുന്ന എറണാകുളം ജില്ലയിൽ നിന്നുള്ള മുതിർന്ന സി.പി.എം നേതാവായിരുന്നു അമ്പാടി വിശ്വം എന്നറിയപ്പെട്ടിരുന്ന വി.വിശ്വനാഥ മേനോൻ.(1927-2019) എട്ടാം കേരള നിയമസഭയിലെ അംഗം, കേരളത്തിൽ നിന്നുള്ള രാജ്യസഭാംഗം, ലോക്‌സഭാംഗം എന്നീ നിലകളിലും പ്രവർത്തിച്ചിട്ടുണ്ട്.

ജീവിതരേഖ

എറണാകുളം ജില്ലയിലെ കലൂരിൽ അമ്പാടിയിൽ നാരായണ മേനോൻ്റെയും വടക്കൂട്ട് ലക്ഷ്മിയമ്മയുടേയും മകനായി 1927 ജനുവരി 15 ന് ജനനം. നിയമബിരുദദാരിയാണ്.

മഹാരാജാസ് കോളേജിലെ പഠനകാലത്ത് രാഷ്ട്രീയപ്രവർത്തനവും സ്വാതന്ത്ര്യ സമരവും ഇദ്ദേഹം നടത്തിയിട്ടുണ്ട്. കുട്ടിക്കാലം മുതലേ ഇദ്ദേഹം ഗാന്ധിജിയുടെ ആരാധകനായിരുന്നു. വിദ്യാഭ്യാസത്തിനിടെ കമ്യൂണിസവും സോഷ്യലിസവും ഇദ്ദേഹത്തെ ആകർഷിക്കുകയുണ്ടായി.

രാഷ്ട്രീയപ്രവർത്തനം

സുഹൃത്തുക്കൾക്കിടയിൽ അമ്പാടി വിശ്വം എന്നറിയപ്പെട്ടിരുന്ന കമ്യൂണിസ്റ്റ് നേതാവാണ് വടക്കൂട്ട് വിശ്വനാഥ മേനോൻ. ഇടപ്പള്ളി പോലീസ് സ്റ്റേഷൻ ആക്രമണത്തിൽ പങ്കുണ്ടെന്ന് ആരോപിക്കപ്പെട്ട കമ്യൂണിസ്റ്റ് നേതാക്കളിൽ ഒരാളാണ് ഇദ്ദേഹം. സി.പി.ഐ. (എമ്മിന്റെ) കേരളത്തിലെ നേതാക്കളിലൊരാളായിരുന്നു.

കൊച്ചിയിൽ അവിഭക്ത കമ്യൂണിസ്റ്റ് പാർട്ടിയുടെ ആദ്യ നേതാക്കളിലൊരാളായിരുന്നു ഇദ്ദേഹം. 1940-കളിലും 1950-കളിലും പാർട്ടിയുടെ അടിത്തറ കെട്ടിപ്പടുക്കുന്നതിൽ ഇദ്ദേഹത്തിന്റെ പങ്ക് വലുതാണ്. എം.എം. ലോറൻസ് എ.പി. കുര്യൻ എന്നിവർ ഇദ്ദേഹത്തിന്റെ ആദ്യകാല സഹപ്രവർത്തകരായിരുന്നു.

ഇദ്ദേഹം രണ്ടു തവണ പാർലമെന്റംഗമായിട്ടുണ്ട്. അവിഭക്ത സി.പി.ഐ.യുടെ പ്രതിനിധിയായും പിന്നീട് സി.പി.ഐ.(എം.) പ്രതിനിധിയായും ഇദ്ദേഹം തിരഞ്ഞെടുക്കപ്പെട്ടിട്ടുണ്ട്. 1987-ൽ ഇ.കെ. നായനാരുടെ മന്ത്രിസഭയിൽ ഇദ്ദേഹം ധനകാര്യമന്ത്രിയായിരുന്നു.

12 വർഷം ഇദ്ദേഹം എഫ്.എ.സി.ടി. യൂണിയൻ പ്രസിഡന്റായിരുന്നു. ഇദ്ദേഹം 14 വർഷം ഇൻഡൽ യൂണിയന്റെയും പ്രസിഡന്റായിരുന്നിട്ടുണ്ട്. കൊച്ചി പോർട്ട് യൂണിയന്റെയും പ്രസിഡന്റായിരുന്നു.

മാർക്സിസ്റ്റ് പാർട്ടിയുടെ സംസ്ഥാന കമ്മിറ്റി അംഗമായിരുന്ന വിശ്വനാഥ മേനോൻ ആശയ സംഘട്ടനങ്ങളുടെ പേരിൽ 2002-ൽ മാർക്സിസ്റ്റ് പാർട്ടിയുമായി തെറ്റി പിരിഞ്ഞു. 2003-ലെ എറണാകുളം നിയമസഭ ഉപതിരഞ്ഞെടുപ്പിൽ ബിജെപി സ്ഥാനാർത്ഥിയായി മത്സരിച്ചു. പിന്നീട് ഏറെ നാളുകൾക്ക് ശേഷം 2018-ൽ മാർക്‌സിസ്റ്റ് പാർട്ടിയിൽ തിരിച്ചെത്തി.

തിരഞ്ഞെടുപ്പുകൾ

തിരഞ്ഞെടുപ്പുകൾ

വർഷം	മണ്ഡലം	വിജയിച്ച സ്ഥാനാർത്ഥി	പാർട്ടിയും മുന്നണിയും	മുഖ്യ എതിരാളി	പാർട്ടിയും മുന്നണിയും	രണ്ടാമത്തെ മുഖ്യ എതിരാളി	പാർട്ടിയും മുന്നണിയും
2003*	എറണാകുളം ലോകസഭാമണ്ഡലം	സെബാസ്റ്റ്യൻ പോൾ	സ്വതന്ത്ര സ്ഥാനാർത്ഥി, എൽ.ഡി.എഫ്.	എം.ഒ. ജോൺ	കോൺഗ്രസ് (ഐ.), യു.ഡി.എഫ്.	വി. വിശ്വനാഥമേനോൻ	സ്വതന്ത്ര സ്ഥാനാർത്ഥി
1996	മുകുന്ദപുരം ലോകസഭാമണ്ഡലം	പി.സി. ചാക്കോ	കോൺഗ്രസ് (ഐ.), യു.ഡി.എഫ്.	വി. വിശ്വനാഥമേനോൻ	സി.പി.എം., എൽ.ഡി.എഫ്.
1991	എറണാകുളം ലോകസഭാമണ്ഡലം	കെ.വി. തോമസ്	കോൺഗ്രസ് (ഐ.), യു.ഡി.എഫ്.	വി. വിശ്വനാഥമേനോൻ	സി.പി.എം., എൽ.ഡി.എഫ്.
1971	എറണാകുളം ലോകസഭാമണ്ഡലം	ഹെൻറി ഓസ്റ്റിൻ	കോൺഗ്രസ് (ഐ.)	വി. വിശ്വനാഥമേനോൻ	സി.പി.ഐ.എം.
1967	എറണാകുളം ലോകസഭാമണ്ഡലം	വി. വിശ്വനാഥമേനോൻ	സി.പി.ഐ.എം.	എ.എം. തോമസ്	കോൺഗ്രസ് (ഐ.)

• 2003 - ജോർജ് ഈഡൻ മരണപ്പെട്ടതിനെ തുടർന്ന് നടന്ന ഉപതിരഞ്ഞെടുപ്പ്.

പുറത്തേയ്ക്കുള്ള കണ്ണികൾ

• The Hindu on-line, September 3, 2003 Archived 2012-07-16 at the Wayback Machine