ബാഹ്യകേളി

വിക്കിപീഡിയ, ഒരു സ്വതന്ത്ര വിജ്ഞാനകോശം.
(Foreplay എന്ന താളിൽ നിന്നും തിരിച്ചുവിട്ടതു പ്രകാരം)
Jump to navigation Jump to search
ബാഹ്യകേളിയിൽ ഏർപ്പെടുന്ന ഇണകൾ

മനുഷ്യരുടെ ലൈംഗികതയിലെ ഒഴിച്ചുകൂടാനാകാത്ത ഒരു ഘട്ടമാണ് ബാഹ്യകേളി. മുഖ്യമായും ഇത് രണ്ട്‌ രീതിയിൽ കാണപ്പെടുന്നു. ലൈംഗികബന്ധത്തിന് മുൻപും അതിന് ശേഷവും. ഇണയിൽ പരമാവധി ലൈംഗിക ഉത്തേജനമുണ്ടാക്കി സംഭോഗത്തിന് തയ്യാറാക്കുന്ന മാനസികവും ശാരീരികവുമായ പ്രവൃത്തിയാണ് സംഭോഗപൂർവ ബാഹ്യകേളി, ആമുഖലീലകൾ അഥവാ രതിപൂർവലീലകൾ എന്നൊക്കെ അറിയപ്പെടുന്നത്. "ഫോർപ്ലേ (Foreplay)" എന്ന ഇംഗ്ലീഷ് വാക്ക് കൊണ്ടുദ്ദേശിക്കുന്നത് ഇതാണ്. വേഴ്ചയ്ക്ക് ശേഷമുള്ളവയെ സംഭോഗശേഷലീലകൾ അഥവാ ആഫ്റ്റർ പ്ലേ എന്ന് പറയുന്നു. ഇതൊരു സ്നേഹപ്രകടനം കൂടിയാണ്‌. അതിനാൽ സെക്സ് എന്നതിലുപരിയായി ലവ് മേക്കിങ് എന്ന ആംഗലേയപദം ഇവിടെ കുറേക്കൂടി അർത്ഥവത്താണ് എന്ന് പറയപ്പെടുന്നു. ലൈംഗിക ബന്ധത്തിനുള്ള തയ്യാറെടുപ്പ്, രതിമൂർച്ഛയിലേക്കുള്ള പ്രവേശന കവാടം എന്നൊക്കെ ബാഹ്യകേളിയെപ്പറ്റി പറയാറുണ്ട്. ഇതുകൊണ്ട് മാത്രം രതിമൂർച്ഛ അനുഭവപ്പെടുന്ന ആളുകളുണ്ട്. ലിംഗയോനി ബന്ധമില്ലാതെ ഇതുമാത്രം ഇഷ്ടപ്പെടുന്ന ആളുകളുമുണ്ട്. ഇതുകൊണ്ട് സ്ത്രീ ഗർഭം ധരിക്കാനുള്ള സാധ്യത ഇല്ലാതാകുന്നു എന്ന മെച്ചവുമുണ്ട്. സ്ത്രീകൾ മാത്രമല്ല പുരുഷന്മാരും ലിംഗ-ലൈംഗിക ന്യൂനപക്ഷങ്ങളിൽ പെട്ടവരും ഇത് ഇഷ്ടപ്പെടുന്നു. മാസ്റ്റേഴ്സ് ആൻഡ് ജോൺസൻ പോലെയുള്ള ലൈംഗികവിദഗ്ദർ ഇതേപ്പറ്റി ധാരാളം പഠനങ്ങൾ നടത്തിയിട്ടുണ്ട്. സംഭോഗമില്ലാത്ത ലൈംഗികബന്ധം എന്നവർ ഇതിനെ വിശേഷിപ്പിച്ചിട്ടുണ്ട്. ഇതേപറ്റി ധാരാളം പുസ്തകങ്ങൾ ഇന്ന് ലഭ്യമാണ്. വാത്സ്യായന മഹര്ഷിയാൽ രചിക്കപ്പെട്ട കാമസൂത്രം ഇതേപറ്റി സവിസ്തരം പ്രതിപാദിക്കുന്നുണ്ട്.

ആമുഖലീലകൾ എങ്ങനെ[തിരുത്തുക]

സംഭോഗപൂർവലീലകൾ പെട്ടെന്ന് തുടങ്ങുകയും അവസാനിക്കുകയും ചെയ്യേണ്ടുന്ന ഒന്നല്ല. സംഭോഗത്തിന് മുൻപ് മണിക്കൂറുകളോ, ദിവസങ്ങളോ ചിലപ്പോൾ ആഴ്ചകളോ മാസങ്ങളോ ഒക്കെ ഫോർപ്ലേയ്ക്ക് വേണ്ടി വന്നേക്കാം. അത് ഓരോ വ്യക്തിയുടെയും മനസികാവസ്ഥയുമായി ബന്ധപ്പെട്ടിരിക്കുന്നു. ആവശ്യത്തിന് സമയം ബാഹ്യകേളിക്ക് ചിലവഴിക്കാതെ നടത്തുന്ന ലൈംഗികബന്ധം ഇണയുടെ അതൃപ്തിക്ക് കാരണമായേക്കാം. ഓരോ തവണ ലൈംഗികബന്ധത്തിന് ശ്രമിക്കുമ്പോഴും ബാഹ്യകേളികൾ ആവർത്തിക്കേണ്ടതാണ്. ഇതിൽ വ്യത്യസ്തത പരീക്ഷിക്കുന്നത് ആവർത്തന വിരസത ഒഴിവാക്കും. ഇടയ്ക്ക് കട്ടിലിന്റെ സ്ഥാനം ഒന്ന് മാറ്റി ഇടുന്നതോ, വീട്ടിലെ മറ്റേതെങ്കിലും സ്ഥലത്ത് വച്ചോ ബാഹ്യകേളികൾ ആസ്വദിക്കുന്നത് പരീക്ഷിക്കാം. ഇക്കാര്യം പങ്കാളിയുമായി സംസാരിച്ചു അവരുടെ സമ്മതതോടെ തീരുമാനിക്കേണ്ട കാര്യമാണ്. ചില പുരുഷൻമാർ ശക്തി തെളിയിക്കാനെന്ന രീതിയിൽ തിടുക്കപ്പെട്ടു, ആക്രമണോത്സുകതയോടെ നടത്തുന്ന ലൈംഗികബന്ധം സ്ത്രീയുടെ യഥാർത്ഥ ആസ്വാദനത്തെ തന്നെ തകർക്കുകയും പീഡനതുല്യമായി അനുഭവപ്പെടുകയും ആ വ്യക്തിയുടെ ശീഘ്രസ്ഖലനത്തിൽ അവസാനിക്കുകയും ചെയ്യാറുണ്ട്.

വിവിധ രീതികൾ[തിരുത്തുക]

മധുരസംഭാഷണം ആമുഖലീലകളിൽ ഏറ്റവും പ്രധാനമാണ്. ചുംബനം, ആലിംഗനം, തഴുകൽ, തലോടൽ, ലാളന, വദനസുരതം എന്നിവ ബാഹ്യകേളിയിൽ പെടുന്നു. ഇണയുടെ ശിരസ്സ്, ചുണ്ട്, ചെവി, കഴുത്ത്, മാറിടം തുടങ്ങി കാൽപ്പാദങ്ങൾ വരെയുള്ള ശരീര ഭാഗങ്ങളിൽ ചുംബിക്കുന്നതും ലാളിക്കുന്നതും ഫോർപ്ലേയുടെ ഭാഗമാണ്. വയറിന്റെ ഇരുവശം, നിതംബം, തുട, മുട്ടിന്റെ പിൻഭാഗം തുടങ്ങി ശരീരത്തിലെ മിക്ക ഭാഗങ്ങളിലെയും സ്പർശനം സ്ത്രീക്കും പുരുഷനും ഒരുപോലെ അനുഭൂതി ദായകമാണ്. പലർക്കും ശരീരത്തിന്റെ ചില പ്രത്യേക ഭാഗങ്ങളിലെ സ്പർശനം ശരിയായ ഉത്തേജനത്തിന് ആവശ്യമാണ്. ചുണ്ടോ വിരലോ നാവോ ഇതിന് വേണ്ടി ഉപയോഗിക്കാം. സ്പർശിക്കുന്ന രീതിയും പങ്കാളിക്ക് ബുദ്ധിമുട്ടുണ്ടാക്കാൻ പാടില്ല എന്നത് പ്രധാനമാണ്. ഇവ ഓരോരുത്തർക്കും വ്യത്യസ്തമാകാം. ഇണയോട് തുറന്നു സംസാരിച്ചു അവരുടെ ഇഷ്ടാനിഷ്ടങ്ങൾ എന്താണെന്ന് മനസിലാക്കുന്നത് ഇതിൽ വളരെ പ്രധാനമാണ്. സ്ത്രീകളിൽ കൃസരി/ഭഗശിശ്നിക, പുരുഷന്മാരിൽ ലിംഗം തുടങ്ങി നാഡീതന്തുക്കൾ ഏറെയുള്ള ഭാഗങ്ങളിലെ മൃദുവായ പരിലാളനം അത്യാനന്ദം നൽകുന്നു. മനസ്സിനിണങ്ങിയ പങ്കാളി, അവർ തമ്മിലുള്ള ആശയവിനിമയം, വ്യക്തിശുചിത്വം, സുഗന്ധവുമുള്ള അന്തരീക്ഷം, അരണ്ട വെളിച്ചം, സംഗീതം, ഒന്നിച്ചുള്ള കുളി മുതലായവ ഇതിന്റെ മാറ്റു കൂട്ടുന്ന ഘടകങ്ങളാണ്. നിത്യജീവിതത്തിലെ മാനസിക സമ്മർദ്ദം/സ്ട്രെസ് ഒരു പരിധിവരെ ലഘൂകരിക്കാൻ ഇതുകൊണ്ട് സാധിക്കും.

എങ്ങനെ തുടങ്ങണം[തിരുത്തുക]

വാസ്തവത്തിൽ സംഭോഗപൂർവ ലീലകൾ കിടപ്പറയിൽ മാത്രം തുടങ്ങേണ്ടുന്ന ഒന്നല്ല. പങ്കാളികൾ തമ്മിലുള്ള സന്തോഷപൂർണമായ ഇടപെടലുകൾ, ഒന്നിച്ചുള്ള യാത്ര, ഭക്ഷണം, സിനിമ, വിനോദം, ചെറിയ സമ്മാനങ്ങൾ, പങ്കാളിയുടെ ഗുണങ്ങളെ, സൗന്ദര്യത്തെ പുകഴ്ത്തി സംസാരിക്കുക, മധുവിധു ആഘോഷം, വിവാഹവാർഷികം, പ്രണയദിനം, പങ്കാളിയുടെ ജന്മദിനം മുതലായവ കഴിവുപോലെ ആഘോഷിക്കൽ എന്നിവയൊക്കെ ഇതിന്റെ ഭാഗമാണ്. കിടപ്പറയിലേക്ക് പോകുന്നതിന് മുൻപ് കുളിച്ചു വൃത്തിയായി സുഗന്ധദ്രവ്യങ്ങൾ പൂശി ആകർഷകമായ വസ്ത്രങ്ങൾ ധരിക്കുക, താല്പര്യം കെടുത്തുന്നതൊന്നും ഓർക്കാതിരിക്കുക എന്നതൊക്കെ ബാഹ്യകേളിയുടെ മാറ്റുകൂട്ടും.

ബാഹ്യകേളിയെ ബാധിക്കുന്ന പ്രശ്നങ്ങൾ[തിരുത്തുക]

ദിവസം മുഴുവനുമുള്ള ഇണയുടെ മോശമായ പെരുമാറ്റവും, ലഹരി ഉപയോഗവും, വായ്നാറ്റവും, ശരീരത്തിന്റെ ദുർഗന്ധവുമെല്ലാം പലപ്പോഴും ആമുഖലീലകളെ മോശമായി ബാധിക്കാറുണ്ട്. പ്രത്യേകിച്ച് പരസ്പരം വേദനിപ്പിക്കുന്ന വാക്കുകൾ പറയുക, ഇണയുടെ കുടുംബാംഗങ്ങളെ അപമാനിക്കുക, താല്പര്യമില്ലാത്ത രതി രീതികൾക്ക് നിർബന്ധിക്കുക, നിർബന്ധിച്ചുള്ള ലൈംഗികബന്ധം, സാഡിസം, വേദനിപ്പിക്കുന്ന രതി തുടങ്ങിയവ മനസിൽ ആഴത്തിൽ മുറിവുകൾ ഉണ്ടാക്കുകയും പിന്നീടെത്ര സ്നേഹപ്രകടനവും ബാഹ്യകേളിയും കാഴ്ചവെച്ചാലും ഇണയ്ക്ക് താല്പര്യം ഉണ്ടായില്ലെന്നും വരാം. ചില ആളുകൾ ഇണയുടെ ശരീരത്തിൽ വേദനിപ്പിക്കുന്ന രീതിയിൽ കടിക്കുകയും നുള്ളുകയും അടിക്കുകയും മറ്റും ചെയ്യുന്നത് ഇതിന് ഉദാഹരണമാണ്. പാപബോധം, ശാസ്ത്രീയ ലൈംഗിക പരിജ്ഞാനമില്ലായ്മ, വിഷാദം, ഭയം തുടങ്ങിയ മാനസിക രോഗങ്ങൾ, തൊഴിലിടത്തെ പ്രശ്നങ്ങൾ, സ്വകാര്യതയില്ലായ്മ, പങ്കാളിയുടെ വൃത്തിക്കുറവ് തുടങ്ങിയ അനേകം ഘടകങ്ങൾ ഇതിനെ മോശമായി ബാധിക്കാറുണ്ട്. നാഡീവ്യവസ്ഥയും മത്തിഷ്ക്കവും ഈ സുഖാനുഭൂതിയിൽ പങ്ക് വഹിക്കുന്നു. മനുഷ്യൻ മാത്രമല്ല, സസ്തനികൾ ഉൾപ്പെടെ പല ജീവിവർഗങ്ങളും ബാഹ്യകേളിക്ക് ധാരാളം സമയം ചിലവഴിക്കുന്നതായി കാണാം.

സംഭോഗശേഷലീലകൾ[തിരുത്തുക]

ശാരീരികമായ ബന്ധത്തിന് ശേഷം പങ്കാളികൾ പരസ്പരം സ്നേഹം പ്രകടിപ്പിക്കുന്നതിനെ സംഭോഗശേഷരതിലീലകൾ എന്ന് പറയുന്നു. ബാഹ്യകേളിയുടെ ഒരു പ്രധാന ഭാഗമാണിത്. ഇണകൾക്കിടയിൽ ഇത് നൽകുന്ന ഗുണങ്ങൾ പലതെന്ന് ഇതു സംബന്ധിച്ച് നടത്തിയ പഠനങ്ങൾ വെളിപ്പെടുത്തുന്നു. ​ ആഫ്റ്റർ പ്ലേ എന്നത് പൊതുവേ അവഗണിയ്ക്കപ്പെടുന്ന ഒന്നാണ്. എന്നാൽ ഇതിന് സ്ത്രീയെ സംബന്ധിച്ചിടത്തോളും പുരുഷനേക്കാൾ പ്രധാന്യമുള്ള ഒന്നാണ്. ശുക്ലസ്‌ഖലനത്തോടെ പുരുഷൻ പിൻവാങ്ങുമെങ്കിലും സ്ത്രീയ്ക്കത് കൂടുതൽ സമയമെടുക്കും. ഇതിനുളള പരിഹാരമായി പറയുന്ന ഒന്നാണ് സംഭോഗശേഷലീലകൾ. കാരണം അടുപ്പിച്ചുള്ള സംഭോഗം പലപ്പോഴും പുരുഷന് ശാരീരികമായ പ്രത്യേകതകളാൽ സാധ്യമാകാതെ വരുന്നു. പങ്കാളികൾ തമ്മിലുളള ബന്ധം ഊട്ടിയുറപ്പിയ്ക്കുന്ന ഒന്നാണ് സംഭോഗത്തിന് ശേഷമുള്ള ആഫ്റ്റർപ്ലേ എന്നു പറയാം. ഇത് ഇണകൾ തമ്മിലുള്ള ശാരീരിക അടുപ്പം വര്ധിപ്പിക്കുന്നതോടൊപ്പം മാനസിക അടുപ്പവും വർദ്ധിപ്പിയ്ക്കുന്നു. ആശയ വിനിമയവും പരസ്പരമുള്ള ലാളനകളുമെല്ലാം പങ്കാളികളെ കൂടുതൽ അടുപ്പിയ്ക്കുന്നു.

ബാഹ്യകേളിയും ലൈംഗിക ഉത്തേജനവും[തിരുത്തുക]

ആഹ്ലാദകരമായ രതിപൂർവ്വലീലകളിലൂടെ ശരിയായ ഉത്തേജനമുണ്ടാവുകയും മനസും ശരീരവും ലൈംഗികബന്ധത്തിനു തയ്യാറാവുകയും ചെയ്യുന്നു. അതോടെ ലിംഗത്തിലെ അറകളിലേക്കും യോനീഭാഗത്തേക്കും ഉള്ള രക്തയോട്ടം വർധിക്കുന്നു. അതിന്റെ ഫലമായി പുരുഷലിംഗത്തിന് കൂടുതൽ ദൃഢമായ ഉദ്ധാരണവും നനവും ലഭിക്കുന്നു. സ്ത്രീകളിൽ മുറുകി ഇരിക്കുന്ന യോനീഭാഗത്തെ മസിലുകൾ അയഞ്ഞു വരികയും, യോനി വികസിക്കുകയും, വഴുവഴുപ്പ് നൽകുന്ന സ്നേഹദ്രവങ്ങൾ (Lubrication) കൂടുതലായി ഉൽപ്പാദിപ്പിക്കപ്പെടുകയും, കൃസരി ഉദ്ധരിക്കുകയും ചെയ്യുന്നു. ഇത് സുഗമവും സുഖകരവുമായ ലൈംഗികബന്ധത്തിന് അനിവാര്യമാണ്. അതുമൂലം വളരെ എളുപ്പത്തിൽ ലിംഗത്തിന് യോനിയിലേക്ക് വഴുതി ഇറങ്ങുവാൻ സാധിക്കുന്നു. ഇത്തരം സ്നേഹദ്രവത്തിന്റെ അഭാവത്തിൽ ലൈംഗികബന്ധം വേദനാജനകമോ അസ്വസ്ഥതയുള്ളതോ ബുദ്ധിമുട്ടേറിയതോവാകാനും സാധ്യതയുണ്ട്. ചിലപ്പോൾ ലൈംഗികവായയവങ്ങളിൽ ചെറിയ മുറിവുകൾ, പോറലുകൾ, അല്പം രക്തസ്രാവം തുടങ്ങിയവ ഉണ്ടാകുവാനും ഇടയാക്കാം. അത് ഭയത്തിനും ലൈംഗിക താല്പര്യക്കുറവിനും പങ്കാളിയോട് വെറുപ്പിനും കാരണമാകാം. ഇവിടെയാണ് രതിപൂർവ്വലാളനകളുടെ പ്രാധാന്യം. വേണ്ടത്ര ഉത്തേജനമില്ലാതെ നടത്തുന്ന സംഭോഗം പല സ്ത്രീകൾക്കും പീഡനതുല്യമായി അനുഭവപ്പെടാറുണ്ട്. ലൂബ്രിക്കേഷന്റെ അഭാവത്തിൽ യോനിയിൽ മുറുക്കം അനുഭവപ്പെടുന്നതും വാജിനിസ്മസ് ഉണ്ടാകുന്നതും അത്കൊണ്ടാണ്. ലൈംഗികജീവിതത്തിന്റെ തുടക്കത്തിൽ തന്നെ ഇത്തരം കല്ലുകടികൾ അനുഭവപ്പെടുന്നത് ലൈംഗിക വിരക്തിക്ക് കാരണമാകാറുണ്ട്. എന്നാൽ പല ആളുകൾക്കും ഇതേപറ്റി കൃത്യമായ അറിവില്ല

ബാഹ്യകേളിയുടെ പ്രാധാന്യം[തിരുത്തുക]

രതിപൂർവലീലകൾ അഥവാ ഫോർപ്ലേ, ആഫ്റ്റർപ്ലേ എന്നിവയുടെ പ്രാധാന്യം അറിയാത്ത ധാരാളം ആളുകൾ നമ്മുടെ സമൂഹത്തിലുണ്ട്. അത് പലരുടെയും ജീവിതത്തെ മോശമായി ബാധിക്കാറുണ്ട്. ചിലർക്ക് വളരെക്കുറച്ചു സമയം മാത്രം മതിയെങ്കിൽ മറ്റു ചിലർക്ക് കുറച്ചധികം സമയം ബാഹ്യകേളി ഉണ്ടായെങ്കിലേ ലൈംഗിക ഉത്തേജനം ഉണ്ടാകുകയുള്ളൂ. സംഭോഗപൂർവലീലകൾക്ക് വേണ്ടി സമയം ചിലവഴിക്കുന്നത് ലൈംഗികബന്ധത്തിന്റെ ആസ്വാദ്യത മെച്ചപ്പെടുത്തും എന്ന് പഠനങ്ങൾ പറയുന്നുണ്ട്.

പങ്കാളികൾ ഇഷ്ടപെടുന്ന ഏതൊരു രീതിയും ഇതിന് വേണ്ടി ഉപയോഗപ്പെടുത്താം. അതവർ പരസ്പരം തുറന്നു സംസാരിച്ചു തീരുമാനിക്കേണ്ട കാര്യമാണ്. സ്ത്രീകളിൽ കൃസരിയിൽ നടത്തുന്ന പരിലാളനം കൊണ്ട് മാത്രം രതിമൂർച്ഛ ഉണ്ടാകാറുണ്ട്.

സ്ത്രീകളിൽ രതിമൂർച്ഛ സംഭവിക്കുന്നത് പുരുഷന്മാരേക്കാൾ വൈകിയായതിനാലും, ലൈംഗിക ഉണർവ്വ് ഏറെനേരം നീണ്ടു നിൽക്കുന്നതിനാലും ബാഹ്യകേളിയിൽ ഏർപ്പെടുന്നത് സംഭോഗത്തിന്റെ ദൈർഘ്യം വർദ്ധിപ്പിക്കുവാനും, പുരുഷന്മാരിലെ 'സമയക്കുറവ്' ചെറുക്കുവാനും സഹായിക്കുന്നു. ഇത് പുരുഷബീജങ്ങളുടെ ഗുണമേന്മ വർധിക്കുവാനും ശീഘ്രസ്ഖലനം പരിഹരിക്കാനും ഉപയുക്തമാണെന്ന് ചില പഠനങ്ങൾ തെളിയിക്കുന്നു. മുലയൂട്ടുന്ന കാലത്തോ, ആർത്തവവിരാമത്തിന് ശേഷമോ ഉണ്ടാകുന്ന യോനീവരൾച്ചയും ബന്ധപ്പെടുമ്പോഴുള്ള നീറ്റലും വേദനയും പരിഹരിക്കാൻ ദീർഘനേരം ഫോർപ്ലേയിൽ ഏർപ്പെടുന്നത് സഹായിക്കും. അതിനാൽ മധ്യവയസ്‌ക്കർക്ക് ഏറ്റവും ആവശ്യമായ ഒന്നാണ് ബാഹ്യകേളി. മധ്യവയസിൽ ഒരു രണ്ടാം ഹണിമൂണിന്റെ പ്രാധാന്യം ഇതിൽ നിന്നും മനസിലാക്കാം. പൂർവ്വലീലകൾ ആസ്വദിക്കുന്ന മിക്ക ഇണകൾക്കും കൃത്രിമ ലൂബ്രിക്കന്റുകൾ ഉപയോഗിക്കേണ്ട ആവശ്യം തന്നെ കുറവാണ്. പുതുമയുള്ള ബാഹ്യകേളികൾ ലൈംഗികതയിലെ ആവർത്തനവിരസത അകറ്റും. എല്ലാവരും പൂർവകേളികൾ ഇഷ്ടപ്പെടുന്നവരാണെങ്കിലും പൊതുവേ സ്ത്രീകൾ കൂടുതലായി ഇതാസ്വദിക്കുന്നവരാണെന്ന് പഠനങ്ങൾ പറയുന്നു.

എന്നിരുന്നാലും ധാരാളം പുരുഷന്മാരും ഫോർപ്ലേ ആഗ്രഹിക്കാറുണ്ട്. പുരുഷന്റെ ശരീരത്തിലെ ശിരസ്സ് മുതൽ കാൽപാദം വരെയുള്ള ഭാഗങ്ങൾ ഇതിന് അനുയോജ്യമാണ്. അത് പുരുഷന്മാരിലെ മാനസിക സമ്മർദം കുറയ്ക്കാനും ഉത്തേജനം മെച്ചപ്പെടുത്താനും തന്മൂലം ഉണ്ടാകുന്ന ചെറിയ തോതിലുള്ള ഉദ്ധാരണക്കുറവ് പോലെയുള്ള പ്രശ്നങ്ങൾ അകറ്റാനും സഹായിക്കും. പ്രായമായ പുരുഷന്മാർക്ക് ഉദ്ധാരണത്തിന് കൂടുതൽ സമയം ലിംഗത്തിൽ നേരിട്ടുള്ള സ്പർശനം വേണ്ടി വന്നേക്കാം. മാത്രമല്ല പെട്ടന്ന് ഉണർവിലേക്കെത്തുന്ന പുരുഷന്റെ വേഗത അല്പമൊന്ന് കുറച്ചു പങ്കാളിയുമായി സമരസപ്പെടാൻ ഇത് ഉപകരിക്കും. അതുവഴി രണ്ടുപേരുടെയും രതിമൂർച്ഛ ഏതാണ്ട് ഒരേ സമയത്ത് ക്രമീകരിക്കാനും സാധിക്കും. ഇതിന് ഇരു പങ്കാളികളും തമ്മിൽ കൃത്യമായ ധാരണ ആവശ്യമാണ്.

സ്ത്രീകളെ സംബന്ധിച്ചിടത്തോളം ആഫ്റ്റർ പ്ലേ ഏറെ പ്രധാനമെന്നു പറയാം. പങ്കാളിയിൽ നിന്നും ലാളന കൂടുതൽ ആഗ്രഹിയ്ക്കുന്ന മാനസികാവസ്ഥ കൊണ്ടാണിത്. ലൈംഗികത അവൾക്ക് മാനസികവുമായ ഘടകമാണ്. എന്നാൽ ഇത്തരമൊരു ബന്ധത്തിനു ശേഷം പുരുഷൻ പെട്ടന്ന് തിരിഞ്ഞു കിടന്നുറങ്ങുന്നത് പല സ്ത്രീകൾക്കും തങ്ങൾ അവഗണിയ്ക്കപ്പെടുന്നുവെന്നും തങ്ങളെ വെറും ഉപകരണമാക്കുന്നുവെന്ന തോന്നലുമുണ്ടാക്കുന്നതായി പഠനങ്ങൾ വെളിപ്പെടുത്തുന്നു. ഇത് സ്ത്രീകളിൽ ഇത്തരം ബന്ധത്തോട് തന്നെ താൽപര്യക്കുറവും ലൈംഗിക താൽപര്യക്കുറവുമെല്ലാമുണ്ടാക്കും. ഇതിന് പരിഹാരമാണ് ആഫ്റ്റർ പ്ലേ എന്നത്. അതിനാൽ ലൈംഗിക ജീവിതത്തോട് സ്ത്രീയ്ക്ക് താൽപര്യമുണ്ടാക്കുന്ന ഒരു ഘടകം കൂടിയാണ് സംഭോഗശേഷലീലകൾ. പരസ്പര ധാരണയും, ബഹുമാനവും ബാഹ്യകേളിയും ഫലപ്രദമായി ഉപയോഗപ്പെടുത്തുന്ന പങ്കാളികൾക്ക് മധ്യവയസിന് ശേഷവും തങ്ങളുടെ ലൈംഗികജീവിതം നല്ല രീതിയിൽ മുൻപോട്ടു കൊണ്ട് പോകുവാൻ സാധിക്കും. ഇതവരുടെ മാനസികവും ശാരീരികവുമായ ആരോഗ്യത്തിന് വളരെയേറെ ഗുണകരമാണ്.

ലൈംഗിക വികാരത്തിന്റെ യഥാർത്ഥ ഉറവിടം തലച്ചോർ തന്നെ. ഈ ഉത്തേജനം വർധിപ്പിക്കുവാൻ, തൃപ്തികരമാക്കുവാൻ ഫോർപ്ലേ, ആഫ്റ്റർപ്ലേ എന്നിവ ആവശ്യമാണ്. മാനസിക സമ്മർദം/ സ്ട്രെസ് ഒഴിവാക്കുന്നത് ബാഹ്യകേളികൾ ആസ്വദിക്കുന്നതിന് സഹായിക്കും. എന്നാൽ ലൈംഗിക ന്യൂനപക്ഷങ്ങളിൽ (LGBTIA) ഉൾപ്പെടുന്ന അലൈംഗികരായ (Asexuals) വ്യക്തികൾക്ക് ലൈംഗികതാല്പര്യമോ ചിലപ്പോൾ ലൈംഗികശേഷിയോ ഉണ്ടാകണമെന്നില്ല. ഇത്തരം സവിശേഷത ഉള്ളവർ ബാഹ്യകേളികളിൽ ഏർപ്പെട്ടത് കൊണ്ട് മാത്രം ഉത്തേജനം ഉണ്ടാവുകയില്ല.

"https://ml.wikipedia.org/w/index.php?title=ബാഹ്യകേളി&oldid=3694895" എന്ന താളിൽനിന്ന് ശേഖരിച്ചത്