യോനീ വരൾച്ച

സ്ത്രീകളിൽ രതിസലിലം അഥവാ ലൂബ്രിക്കേഷന്റെ അഭാവത്തെ യോനി വരൾച്ച എന്ന് പറയുന്നു. ഇംഗ്ലീഷിൽ വാജിനൽ ഡ്രൈനെസ് (അഥവാ വജൈനൽ ഡ്രൈനസ്/ Vaginal dryness). ലൈംഗിക ആസ്വാദനത്തെ തടയുന്നതും, സ്ത്രീകൾക്ക് ലൈംഗികബന്ധം വേദനാജനകമാക്കുന്നതും, യോനിയിൽ ചെറിയ മുറിവുകളോ അണുബാധയോ ഉണ്ടാകുവാനുള്ള സാധ്യത വർധിപ്പിക്കുന്നതും, പുരുഷന് ലിംഗ പ്രവേശനത്തിന് ബുദ്ധിമുട്ട് ഉണ്ടാക്കുന്നതുമായ ഒരു പ്രശ്നമാണ് യോനീ വരൾച്ച. യോനി ഭാഗത്തേക്കുള്ള രക്ത പ്രവാഹം കുറയുന്നത് ഇതിന് പ്രധാന കാരണമാകാം. (സമാനമായി പുരുഷന്മാരിൽ ലിംഗ ഭാഗത്തേക്കുള്ള രക്തയോട്ടം കുറയുമ്പോൾ ഉദ്ധാരണശേഷിക്കുറവ് ഉണ്ടാകുന്നു)

ലൂബ്രിക്കേഷന്റെ അഭാവത്തിൽ യോനി വരണ്ടും പേശികൾ മുറുകിയും കാണപ്പെടുന്നു. ഈ അവസ്ഥയിൽ ലൈംഗികബന്ധം നടന്നാൽ ഘർഷണം മൂലം സ്ത്രീകൾക്ക് കടുത്ത വേദന ഉള്ളതും (വേദനാജനകമായ ലൈംഗികബന്ധം), പുരുഷന് ലിംഗപ്രവേശനം ബുദ്ധിമുട്ടേറിയതാകാനും സാധ്യതയുണ്ട്. ഇത്തരക്കാർക്ക് രതിമൂർച്ഛയും സംതൃപ്തിയും ഉണ്ടാകാൻ സാധ്യത കുറവാണ്. ഇത് സ്ത്രീക്ക് ലൈംഗിക താല്പര്യക്കുറവ് ഉണ്ടാകുവാനും, ചിലപ്പോൾ യോനീസങ്കോചം (vaginismus) ഉണ്ടാകുവാനും പങ്കാളിയോട് വിരോധത്തിനും ഇടയാക്കുന്നു. ലൈംഗികബന്ധം ഒഴിവാക്കുവാനുള്ള ഒരു പ്രധാന കാരണം കൂടിയാണ് ഇത്.

യോനിയിലെ ലൂബ്രിക്കേഷൻ എല്ലാവർക്കും ഒരുപോലെയല്ല. ചില ദിവസങ്ങളിൽ ഇത് കുറവായിരിക്കും. ഇത് ആർത്തവചക്രവുമായി ബന്ധപെട്ടു കിടക്കുന്നു. ആർത്തവത്തിന് ശേഷമുള്ള ആദ്യത്തെ കുറച്ചു ദിവസങ്ങൾ യോനി പൊതുവേ വരണ്ടു കാണപ്പെടാറുണ്ട്. ഇതിനെ ‘ഡ്രൈ ഡേയ്‌സ് അഥവാ വരണ്ട ദിവസങ്ങൾ’ എന്നറിയപ്പെടുന്നു. ഈ സമയത്ത് ലൈംഗികബന്ധത്തിൽ ഏർപ്പെടുക ആണെങ്കിൽ ബുദ്ധിമുട്ട് ഒഴിവാക്കാൻ ചിലപ്പോൾ ലൂബ്രിക്കന്റ് ജെല്ലിഉപയോഗിക്കേണ്ടതായി വന്നേക്കാം. പ്രസവത്തിന് ശേഷം കുട്ടിക്ക് മുലയൂട്ടുന്ന കുറച്ചു മാസങ്ങളിലും ഹോർമോൺ വ്യതിയാനം മൂലം ഇങ്ങനെ സംഭവിക്കാം.

ശാസ്ത്രീയ ലൈംഗിക വിദ്യാഭ്യാസത്തിന്റെ അഭാവത്തിൽ ഇത്തരം പ്രശ്നങ്ങൾ തിരിച്ചറിയാൻ പോലും പലർക്കും സാധിക്കുന്നില്ല എന്നതാണ് വസ്തുത. മടിയും ലജ്ജയും കാരണം പല സ്ത്രീകളും ഇത് ആരോഗ്യ വിദഗ്ദരോടോ പോലും ചർച്ച ചെയ്യാതെ സഹിക്കാറാണ് പതിവ് എന്ന്‌ വിദഗ്ദർ ചൂണ്ടിക്കാട്ടുന്നു.

കാരണങ്ങൾ, ചികിത്സ

ഏതു പ്രായക്കാരായ സ്ത്രീകളിലും യോനിവരൾച്ച ഉണ്ടാകാം. അത് പല ഘടകങ്ങളെ ആശ്രയിച്ചിരിക്കുന്നു. പൊതുവേ ഈസ്ട്രജൻ ഹോർമോണിന്റെ കുറവാണ് യോനി വരൾച്ച ഉണ്ടാകാൻ ഒരു കാരണം. ഈസ്ട്രജൻ എന്ന സ്ത്രീ ഹോർമോണിന്റെ പ്രവർത്തന ഫലമായാണ് യോനിയിൽ നനവും വഴുവഴുപ്പും ഉണ്ടാകുന്നത്.

സാധാരണ ഗതിയിൽ ജീവിതത്തിന്റെ മൂന്ന് ഘട്ടങ്ങളിലാണ് സ്ത്രീകളിൽ യോനി വരൾച്ച ഉണ്ടാകാറുള്ളത്. ആർത്തവവിരാമത്തിനും അതിന് ശേഷവുമുള്ള കാലങ്ങളിൽ, പ്രസവശേഷം മുലയൂട്ടുന്ന മാസങ്ങളിൽ, ആർത്തവചക്രവുമായി ബന്ധപ്പെട്ട് എന്നിങ്ങനെ മൂന്ന് ഘട്ടങ്ങളിൽ ഈസ്ട്രജൻ കുറവ് കാരണം സ്ത്രീകളിൽ ഇത്‌ സാധാരണമാണ്. കൂടാതെ സ്ത്രീ ലൈംഗിക ഉത്തേജന വൈകല്യം, പ്രമേഹം, അമിത കൊളസ്ട്രോൾ തുടങ്ങിയ രോഗങ്ങൾ ഉള്ളവർക്കും ഉത്തേജനക്കുറവും യോനിയിൽ വരൾച്ചയും ഉണ്ടാകാം.

ഒന്നാമതായി ആർത്തവവിരാമം അഥവാ മെനോപോസ് (Menopause) എന്ന ഘട്ടത്തിലെത്തിയ സ്ത്രീകളിലാണ് ഈ അവസ്ഥ ഏറ്റവും കൂടുതൽ കാണപ്പെടുന്നത്. സ്ത്രീ ഹോർമോണായ ഈസ്ട്രജന്റെ കുറവാണ് കാരണം. പൊതുവേ 45 മുതൽ 55 വയസ് പിന്നിട്ട സ്ത്രീകളിലാണ് ഇത് ഉണ്ടാകാറുള്ളത്. ഇത് മേനോപോസിന്റെ ഒരു പ്രധാന ലക്ഷണം കൂടിയാണ്. യോനിവരൾച്ചയും വേദനയും കാരണം പല മധ്യവയസ്ക്കരും, പ്രായമായ സ്ത്രീകളും ലൈംഗിക വിരക്തി പ്രകടിപ്പിക്കാറുണ്ട്. ഈ അവസ്ഥയിൽ ലൈംഗിക ബന്ധം നടന്നാൽ ചിലപ്പോൾ ജനനേന്ദ്രിയത്തിൽ കടുത്ത വേദനയും പൊറലുകളും ചെറിയ മുറിവുകളും രക്തസ്രാവവും മറ്റും ഉണ്ടാകാം. രണ്ടാമതായി പ്രസവത്തിന് ശേഷം കുട്ടിക്ക് മുലയൂട്ടുന്ന കാലങ്ങളിൽ ഹോർമോൺ വ്യതിയാനം മൂലം ഇങ്ങനെ സംഭവിക്കാം. മൂന്നാമത്തേത് ആർത്തവ ചക്രവുമായി ബന്ധപെട്ടു കിടക്കുന്നു. ആർത്തവത്തിന് ശേഷം ഓവുലേഷന് മുൻപായി വരുന്ന കുറച്ചു ദിവസങ്ങളിൽ യോനിയിൽ ലൂബ്രിക്കേഷൻ കുറയാൻ സാധ്യതയുണ്ട്.

കൂടാതെ ഇതിന് ശാരീരികവും മാനസികവുമായ പല കാരണങ്ങൾ ഉണ്ട്. യുവതികളിൽ ആമുഖലീല അഥവാ ഫോർപ്ലേയുടെ (ബാഹ്യകേളി) കുറവ് മൂലമാണ് പ്രധാനമായും യോനി വരൾച്ച ഉണ്ടാകുന്നത്. ഫോർപ്ലേ അഥവാ ബാഹ്യകേളിയിൽ ഏർപ്പെടുമ്പോൾ ശരീരത്തിൽ ഓക്സിടോസിൻ, എൻഡോർഫിൻ തുടങ്ങിയ സന്തോഷകരമായ ഹോർമോണുകളുടെ അളവ് വർദ്ധിക്കുകയും കോർട്ടിസോൾ തുടങ്ങിയ മാനസിക സമ്മർദത്തിന് കാരണമായ ഹോർമോണുകളുടെ അളവ് കുറയുകയും ചെയ്യുന്നു. യോനി ഭാഗത്തേക്കുള്ള രക്തയോട്ടം വർധിക്കുകയും ഇതുവഴി സ്ത്രീകൾക്ക് യോനിയുടെ ഭിത്തികൾ, ബർത്തോലിൻ ഗ്രന്ഥികൾ എന്നിവ പുറപ്പെടുവിക്കുന്ന ശരിയായ ലൂബ്രിക്കേഷൻ ഉണ്ടാകാൻ സഹായകരമാണ്. ഇത് വേദനരഹിതവും സന്തോഷകരവുമായ ലൈംഗികതയിലേക്ക് നയിക്കുന്നു.

ഹോർമോൺ അസന്തുലിതാവസ്ഥ, യോനിയിലെ അണുബാധ, പ്രമേഹം, മലബന്ധം, ഓവറി നീക്കം ചെയ്യൽ, തൈറോയ്ഡ് പ്രശ്നങ്ങൾ, ഗര്ഭനിരോധന ഗുളികകൾ, കാൻസർ ചികിസയായ കീമോതെറാപ്പി, ചില മരുന്നുകൾ, ആവശ്യത്തിന് വെള്ളം കുടിക്കാതിരിക്കുക, നിർജലീകരണം, ഗർഭാശയ മുഴകൾ തുടങ്ങിയ സ്ത്രീരോഗങ്ങൾ എന്നിവയൊക്കെ കാരണം യോനിവരൾച്ച ഉണ്ടാകാം. യോനി മുറുകി ഇരിക്കുന്നതിനാൽ പുരുഷനും ലിംഗ പ്രവേശനം ബുദ്ധിമുട്ടാകാം.

മാനസിക കാരണങ്ങളിൽ വിഷാദം, വാജിനിസ്മസ് അഥവാ യോനീസങ്കോചം, നിർബന്ധിച്ചുള്ള ലൈംഗികബന്ധം, ബലാത്സംഗം, പങ്കാളിയോടുള്ള താല്പര്യക്കുറവ്, ലൈംഗികതയോടുള്ള വെറുപ്പ്, സ്ട്രെസ്, പങ്കാളിയുടെ ശുചിത്വക്കുറവ്, വായ്നാറ്റം തുടങ്ങിയ പലവിധ കാരണങ്ങൾ ലൂബ്രിക്കേഷനെ മോശമായി ബാധിച്ചേക്കാം. അലൈംഗികർക്ക് ചിലപ്പോൾ ഇതുണ്ടായില്ലെന്നും വരാം.

രതിജലത്തിന്റെ അഭാവത്തിൽ ലൈംഗിക ബന്ധത്തിലേർപ്പെടുമ്പോൾ ജനനേന്ദ്രിയങ്ങളിൽ ഉണ്ടാകുന്ന പോറലുകളിലൂടെ എയ്‌ഡ്‌സ്‌ മുതലായ സുരക്ഷിതമല്ലാത്ത ലൈംഗികബന്ധത്തിലൂടെ പകരുന്ന രോഗങ്ങൾ (STDs) പെട്ടെന്ന് പകരാൻ സാധ്യതയുണ്ട്. ഇക്കാര്യങ്ങളിൽ ശാസ്ത്രീയമായ ബോധവൽക്കരണത്തിന്റെ അഭാവം, അറിവില്ലായ്മ എന്നിവ ഒരു പ്രശ്നമാകാറുണ്ട്. യോനിവരൾച്ച ഉള്ളവർ ഒരു ഡോക്ടറെ കണ്ടു ശരിയായ ചികിത്സ എടുക്കുന്നത് തന്നെയാണ് ഏറ്റവും നല്ലത്. എന്നാൽ പലപ്പോഴും ഇക്കാര്യങ്ങൾ ആരോഗ്യ പ്രവർത്തകരോട് പോലും തുറന്നു ചർച്ച ചെയ്യാൻ പലരും മടിക്കുന്നു. ഇത്‌ പലപ്പോഴും ബന്ധങ്ങൾ വഷളാകുന്ന ഒരവസ്ഥയിലേക്ക് കാര്യങ്ങളെ എത്തിക്കാറുണ്ട്.

ഇന്ന്‌ ഫാർമസികളിലും ഓൺലൈനിലും സൂപ്പർമാർക്കറ്റുകളിലും മറ്റും ലഭ്യമായ ഗുണമേന്മയുള്ള ലൂബ്രിക്കന്റ് ജെല്ലി അഥവാ കൃത്രിമ സ്നേഹകങ്ങൾ ലഭ്യമാണ്. ആർത്തവവിരാമത്തിലെത്തിയർക്ക് ഈസ്ട്രജൻ ഹോർമോൺ അടങ്ങിയ മികച്ച ജെല്ലുകൾ, ക്രീമുകൾ, വജൈനൽ മൊയിസ്ച്ചറൈസറുകൾ എന്നിവ ഉപയോഗിച്ച് ഈ പ്രശ്നം മറികടക്കാവുന്നതാണ്. മിക്ക സ്ത്രീകൾക്കും വരൾച്ചയും വേദനയും ഇല്ലാതാകുന്നതോടു കൂടി ലൈംഗികത പഴയത് പോലെ ആസ്വദിക്കാൻ സാധിക്കുന്നു. കെവൈ ജെല്ലി, ഡ്യൂറെക്സ്, മൂഡ്സ് തുടങ്ങിയ ലൂബ്രിക്കന്റ് ഇന്ന് വിപണിയിൽ ലഭ്യമാണ്. ഗർഭം ധരിക്കാൻ ശ്രമിക്കുന്നവർക്ക് വേണ്ടി ബേബി ഫ്രണ്ട്‌ലി അല്ലെങ്കിൽ ഫെർട്ടിലിറ്റി ഫ്രണ്ട്‌ലി ലൂബ്രിക്കന്റുകൾ ലഭ്യമാണ്. കൺസിവ് പ്ലസ് തുടങ്ങിയവ ഉദാഹരണമാണ്.

പുരുഷബീജത്തെ നശിപ്പിക്കുന്ന ബീജനാശിനികൾ (സ്‌പേർമിസൈഡ്) അടങ്ങിയ ലൂബ്രിക്കന്റ് ഇന്ന് ലഭ്യമാണ്. കുടുംബാസൂത്രണം അഥവാ ഗർഭനിരോധനത്തിനായി കൂടി തെരഞ്ഞെടുക്കുന്ന ഒരു രീതിയാണിത്. ലേപനം, ലൂബ്രിക്കന്റ് ജെല്ലിരൂപങ്ങളിലുള്ള ഇവ യോനിയിലാണ് പുരട്ടേണ്ടത്. ബന്ധപ്പെടുന്നതിന് അരമണിക്കൂർ മുമ്പ് പുരട്ടേണ്ട ലേപനങ്ങളും ഉണ്ട്. യോനീ വരൾച്ച അതുമൂലം വേദനാജനകമായ ലൈംഗികബന്ധം എന്നിവ ഉള്ളവർക്ക്‌ ഇത് ഏറെ അനുയോജ്യമാണ്. ഉപയോഗിക്കാൻ എളുപ്പമാണെങ്കിലും 73% വിജയസാധ്യതയാണ് ഈ മാർഗത്തിനുള്ളത്.

നേരിട്ട് വാങ്ങാൻ മടിയുള്ളവർക്ക് ഇവ ഓൺലൈൻ രീതിയിൽ സ്വകാര്യമായി വാങ്ങുവാൻ സാധിക്കാറുണ്ട്. ഫംഗൽ, യീസ്റ്റ് ഇൻഫെക്ഷൻ അടക്കമുള്ള അണുബാധ അനുഭവപ്പെടാൻ സാധ്യത ഉള്ളവർ സസ്യ എണ്ണകൾ ഒഴിവാക്കുന്നതാണ് നല്ലത്.