ബലാത്സംഗം
 | വിക്കിപീഡിയ സെൻസർ ചെയ്തിട്ടില്ല. ഈ ലേഖനം കൈകാര്യം ചെയ്യുന്ന വിഷയം സമ്പൂർണ്ണമായി പ്രതിപാദിക്കുന്നതിന് ആവശ്യമായ വിവരങ്ങളോ ചിത്രങ്ങളോ ചിലർക്ക് അപ്രിയകരമോ എതിർപ്പുണ്ടാക്കുന്നതോ ആകാം.
ഒരു താളിലെ ചിത്രങ്ങൾ മറയ്ക്കുന്നതിന് സഹായം:ഒരു ചിത്രം എങ്ങനെ മറയ്ക്കാം നോക്കുക. |
_-_LRW-SCALE-11.svg)
ക്രിമിനൽ നിയമപ്രകാരം, ഒരു വ്യക്തി, മറ്റൊരു വ്യക്തിയുടെ പൂർണ സമ്മതത്തോടെയല്ലാതെ നടത്തുന്ന ലൈംഗികമായ സമ്പർക്കത്തെയാണ് ബലാത്സംഗം അഥവാ റേപ്പ് (Rape) എന്ന് പറയുന്നത്. ബലം പ്രയോഗിച്ചോ ഭയപ്പെടുത്തിയോ നടത്തുന്ന ലൈംഗിക കീഴ്പ്പെടുത്തലുകളെല്ലാം ബലാത്സംഗം ആണെന്ന് പറയാം. ലൈംഗികമായ ആക്രമണങ്ങളേയും, മറ്റ് സമ്മതമില്ലാതെയുള്ള ലൈംഗിക അതിക്രമങ്ങളെയും ബലാത്സംഗമായി കണക്കാക്കുന്നു. വിവാഹബന്ധത്തിന് ഉള്ളിലായാലും ധാരാളം ബലാത്സംഗങ്ങൾ നടക്കുന്നു എന്ന് കണക്കുകൾ ചൂണ്ടിക്കാട്ടുന്നു. ചുണ്ടുകൾ, മാറിടം മറ്റു ശരീരഭാഗങ്ങൾ തുടങ്ങിയവ കടിച്ചു പൊട്ടിക്കുക, ഇടിക്കുക, സിഗരറ്റ് കുറ്റി കൊണ്ട് പൊള്ളിക്കുക, വേദനിപ്പിക്കുക തുടങ്ങി പല രീതിയിൽ ഉള്ള ക്രൂരതകൾ ബലാത്സംഗത്തിന് ഇരയാകുന്ന വ്യക്തി അനുഭവിക്കേണ്ടി വരാറുണ്ട്. പലപ്പോഴും ഇരയ്ക്ക് മരണം സംഭവിച്ചേക്കാം. പ്രായപൂർത്തിയാകാത്ത കുട്ടികളെ ഒരു മുതിർന്ന വ്യക്തി വിവാഹം ചെയ്തോ അല്ലാതെയോ ലൈംഗികമായി ചൂഷണം ചെയ്യുന്നതും ബലാത്സംഗത്തിന്റെ പരിധിയിൽ വരുന്നു. സ്ത്രീകളും പുരുഷന്മാരും കുട്ടികളും ട്രാൻസ്ജെൻഡറുകളും ഒരുപോലെ ഇതിന്‌ ഇരയാകേണ്ടി വരാറുണ്ട്. പലപ്പോഴും ദുർബലരായ വ്യക്തികൾ കൂടുതലായി ആക്രമിക്കപ്പെടാറുണ്ട്. ഇത്തരം ഇരയെ എളുപ്പം കീഴ്പ്പെടുത്താം എന്ന ചിന്തയാണ് ഇതിന്റെ കാരണം. അതുകൊണ്ട് തന്നെ സ്ത്രീകളും കുട്ടികളും വൃദ്ധജനങ്ങളും ബലാത്സംഗത്തിന് വളരെയധികം ഇരയാക്കപ്പെടുന്നതായി കാണപ്പെടുന്നു. [1][2][3]
ബലാത്സംഗവിവരം അറിയിക്കൽ, കേസുനടത്തൽ, ശിക്ഷാവിധികൾ തുടങ്ങിയവയുടെ നിരക്ക് ഓരോ രാജ്യങ്ങളിലും വ്യത്യസ്തമാണ്. ചില രാജ്യങ്ങളിൽ ഉഭയ സമ്മതത്തോടെയുള്ള ലൈംഗികബന്ധത്തിനായി വ്യക്തിയുടെ സമ്മതം(Consent) എഴുതി വാങ്ങണം എന്ന് വ്യവസ്ഥ ചെയ്തിരിക്കുന്നു. അമേരിക്കൻ നീതിന്യായ കണക്കെടുപ്പ് കാര്യാലയം 1999 -ൽ പ്രസിദ്ധീകരിച്ച കണക്കുകൾ പ്രകാരം ബലാത്സംഗത്തിനിരയാകുന്നവരിൽ 91% സ്ത്രീകളും, 9% പുരുഷൻ‌മാരുമാണ്. [4] സ്ത്രീകൾക്കിടയിൽ നടത്തിയ മറ്റൊരു സർവ്വേ പ്രകാരം, 2% പേർക്കുമാത്രമാണ് അജ്ഞാതരിൽ നിന്നും ബലാത്സംഗശ്രമം നേരിടേണ്ടി വന്നത്. [5] ഹ്യൂമൻ റൈറ്റ്സ് വാച്ച് സംഘടന നടത്തിയ പഠനപ്രകാരം ഏറ്റവും അധികം പുറത്തറിയാതെ പോകുന്ന ബലാത്സംഗങ്ങൾ ജയിലുകളിൽ നടക്കുന്ന പുരുഷ-പുരുഷ ബലാത്സംഗങ്ങളാണ്. [6][7][8]
നിർവചനം[തിരുത്തുക]
പല അധികാരാതിർത്തികളിലും നിർവചനങ്ങൾ വ്യത്യസ്തമാണെങ്കിലും, ഭൂരിപക്ഷം അധികാരാതിർത്തികളിലും ബലാത്സംഗത്തെ നിർവചിരിക്കുന്നതു
ഒരു വ്യക്തി (കുറ്റം ചെയ്തവൻ അഥവാ അതിക്രമിക്കുന്നവൻ) മറ്റൊരു വ്യക്തിക്കെതിരെ (പീഡിതൻ) അയാളുടെ സമ്മതത്തോടെയല്ലാതെ നടത്തുന്ന ലൈംഗിക സമ്പർക്കം
എന്നാണ്.
ലൈംഗിക ആക്രമണം എന്ന വാക്ക് ബലാത്സംഗവുമായി വളരെ അടുത്തുനിൽക്കുന്ന ഒന്നാണ്. ചില അധികാ‍രാതിർത്തികളുടെ നിർവചനം അനുസരിച്ച്, ഒരു പ്രവൃത്തി ബലാത്സംഗം ആകുന്നത് ലിംഗം യോനിയിൽ പ്രവേശിക്കുന്ന സന്ദർഭങ്ങളിൽ മാത്രമാണ്. അല്ലാതെയുള്ളവയെ ലൈംഗിക ആക്രമണങ്ങളായി കണക്കാക്കുന്നു. ചിലപ്പോൾ ഇത്തരം ആക്രമണങ്ങളെ സൂചിപ്പിക്കാൻ “ക്രിമിനൽ ലൈംഗിക സ്വഭാവം” എന്ന പദം ഉപയോഗിക്കാറുണ്ട്. മറ്റു ചിലയിടങ്ങളിൽ പീഡിതന്റെ ശരീരത്തിൽ വസ്തുക്കളുടെ നുഴഞ്ഞുകയറ്റത്തോടെയോ അല്ലാതെയോ ഉള്ള ആക്രമണവും, അതുപോലെ തന്നെ ഏതെങ്കിലും ഒരാളുടെ ലൈംഗിക അവയവം ഉൾപ്പെടുന്ന പ്രവർത്തികളും, ഉദാഹരണത്തിന് വദനസുരതം, ഹസ്തമൈഥുനം തുടങ്ങിയവയും, ബലാത്സംഗമായി കണക്കാക്കപ്പെടുന്നു. [9][10]
സമ്മതം[തിരുത്തുക]
ഏതൊരു ലൈംഗികബന്ധത്തിലും സമ്മതം(Consent) വളരെ പ്രധാനമാണ്. ഉഭയസമ്മതത്തോടെ അല്ലാതെ നടക്കുന്ന ലൈംഗികബന്ധം ഇരയ്ക്ക് പൂർണ്ണമായും ഒരു പീഡനമായി അനുഭവപ്പെടുകയും ചെയ്യും. ബലാത്സംഗവുമായി ബന്ധപ്പെട്ട ഏതൊരു ആരോപണത്തിലും, പീഡിതന്റെ ഭാഗത്തുനിന്നും ലൈംഗികബന്ധത്തിനുള്ള സമ്മതത്തിന്റെ അഭാവം നിർണ്ണായകമാണ്. ഇവിടെ സമ്മതം സൂചിപ്പിക്കണമെന്നില്ല, മറിച്ച് ആരോപണവിധേയമായ സന്ദർഭത്തിലും, പക്ഷക്കാർ തമ്മിലുള്ള ബന്ധത്തിലും സമ്മതത്തിന്റെ ധ്വനി ഉണ്ടായാലും മതി. എന്നുവച്ച് എതിർപ്പിന്റെ അഭാവം മാത്രം സമ്മതത്തിന് തെളിവാവുന്നില്ല.
ബലാൽക്കാരം അഥവാ പീഡിതനെ ഭീഷണിപ്പെടുത്തിയോ, ബലം പ്രയോഗിച്ചോ, ആക്രമിച്ചുകീഴ്പ്പെടുത്തിയോ ബലാത്സംഗം ചെയ്യുന്ന അവസരങ്ങളിൽ ലൈംഗികബന്ധത്തിന് എതിർപ്പൊന്നും ഉണ്ടാവാതിരുന്നാലും, അത് സമ്മതമില്ലായ്മയായി കണക്കാക്കാം. റുവാണ്ടയിലെ അന്താരാഷ്ട്ര ക്രിമിനൽ ന്യായസഭ 1998 -ലെ ഒരു സുപ്രധാ‍ന വിധിന്യായത്തിൽ “സമ്മതം” എന്ന വാക്കുപയോഗിക്കാതെ തന്നെ ബലാത്സംഗത്തെ നിർവചിക്കുകയുണ്ടായി. [11]
കുട്ടികൾ, മാനസികവൈകല്യമുള്ളവർ എന്നിവർ ഉൾപ്പെട്ട സന്ദർഭങ്ങളിലും നിയമസാധുതയുള്ള സമ്മതത്തിന്റെ അഭാവം അപര്യാപ്തമാണ്. ഒരിക്കൽ നൽകപ്പെട്ട സമ്മതം എപ്പോൾ വേണമെങ്കിലും പിൻ‌വലിക്കാവുന്നതും, പിൻ‌വലിച്ചതിനു ശേഷമുള്ള ലൈംഗിക പ്രവർത്തനങ്ങൾ ബലാത്സംഗത്തിന്റെ പരിധിയിൽ വരുന്നതുമാണ്.
പ്രായപൂർത്തിയാകാത്തവരുമായി മുതിർന്നവർ നടത്തുന്ന ലൈംഗികചൂഷണങ്ങളിൽ, കുട്ടികൾ നൽകുന്ന സമ്മതം നിയമപ്രകാരം അസാധുവാകുകയും, അത്തരം പ്രവർത്തികളെ ബലാത്സംഗമായി കണക്കാക്കുകയും ചെയ്യുന്നു. ഇത്തരം സന്ദർഭങ്ങളെ ചിലപ്പോൾ നിയമപരമായ ബലാത്സംഗം എന്നു വിളിക്കുന്നു.
നിലവിൽ മിക്ക രാജ്യങ്ങളിലും വിവാഹം ലൈംഗികബന്ധത്തിനുള്ള സമ്മതമായി കണക്കാക്കപ്പെടുന്നു. എന്നിരുന്നാലും, ബലാത്സംഗമോ, ലൈംഗികാക്രമണമോ, ബാലപീഡനമോ നടക്കുന്ന സന്ദർഭങ്ങളിൽ വിവാഹം ആന്തരർത്ഥമായ സമ്മതം എന്ന രീതിയിൽ ഒരു എതിർവാദമായി അംഗീകരിക്കുന്നില്ല. [12]
വിവിധതരം[തിരുത്തുക]
ബലാത്സംഗം നടക്കുന്ന സന്ദർഭം, പീഡിതന്റെയും ആക്രമിക്കുന്നയാളിന്റെയും ലിംഗഭേദം, ലൈംഗിക സ്വഭാവം തുടങ്ങിയവയെ അടിസ്ഥാനമാക്കി, ബലാത്സംഗത്തെ പല വകുപ്പുകളാക്കി തിരിച്ചിരിക്കുന്നു. കൂട്ട ബലാത്സംഗം, വൈവാഹിക ബലാത്സംഗം, നിഷിദ്ധ ബലാത്സംഗം, ബാല ബലാത്സംഗം, തടവറ ബലാത്സംഗം, യുദ്ധ ബലാത്സംഗം, നിയമദൃഷ്ടിയിലുള്ള ബലാത്സംഗം എന്നിവ ചില ഉദാഹരണങ്ങളാണ്. [13]
നിയമദൃഷ്ടിയിലുള്ള ബലാൽസംഗം[തിരുത്തുക]
പരസ്പരസമ്മതത്തോടെ നടത്തുന്ന ലൈംഗികവേഴ്ച നിയമത്തിന്റെ കണ്ണിൽ കുറ്റകരമായി ഭവിക്കുന്നതിനെയാണ് നിയമദൃഷ്ടിയിലുള്ള ബലാൽസംഗം (statutory rape). പ്രായപൂർത്തിയാകാത്ത കുട്ടികളുമായുള്ള ലൈംഗികബന്ധം ഇതിനൊരുദാഹരണമാണ്. പീഡോഫിലിയ എന്ന അവസ്ഥയുള്ളവർ നടത്തുന്ന ഇത്തരം ലൈംഗികചൂഷണങ്ങൾ മിക്ക രാജ്യങ്ങളിലും കുറ്റകരമാണ്.
കൂട്ടബലാൽസംഗം[തിരുത്തുക]
പൊതുവായ ലക്ഷ്യത്തോടെ പ്രവർത്തിക്കുന്ന ഒരു സംഘത്തിൽപ്പെട്ട ഒന്നോ അതിലധികമോ ആൾക്കാർ ഒരു സ്ത്രീയെ ബലാത്സംഗം ചെയ്താൽ അത് ഇന്ത്യൻ പീനൽ കോഡിലെ 376-ആം വകുപ്പനുസരിച്ച് കൂട്ടബലാത്സംഗം എന്ന കുറ്റമാണ്.
വൈവാഹിക ബലാത്സംഗം[തിരുത്തുക]
വിവാഹിതരായ ദമ്പതികൾക്ക് ഇടയിൽ നടക്കുന്ന ബലാത്സംഗം. ഇത് പലപ്പോഴും റിപ്പോർട്ട്‌ ചെയ്യപ്പെടാറില്ല. പല രാജ്യങ്ങളിലും വൈവാഹിക ബലാത്സംഗം ഒരു കുറ്റകൃത്യമാണ്, ഒപ്പം വിവാഹമോചനത്തിന് മതിയായ കാരണവും കൂടിയാണ്. പങ്കാളിയുടെ സമ്മതമോ താല്പര്യമോ ഇല്ലാതെ കരുത്ത് തെളിയിക്കാനെന്ന രീതിയിൽ ചില ഭർത്താക്കന്മാർ നടത്തുന്ന ബലാത്സംഗം പലപ്പോഴും ഭാര്യമാർക്ക് പീഡനമാകാറുണ്ട്. താല്പര്യമില്ലാത്ത രതിരീതികൾക്ക് നിര്ബന്ധിക്കുന്നതും വേദനിപ്പിക്കുന്നതും അസഹനീയമാണ്. വൈവാഹിക ബലാത്സംഗം പങ്കാളിയോടുള്ള ഭയത്തിനും വെറുപ്പിനും ലൈംഗികതാല്പര്യക്കുറവിനും കാരണമാകുന്നു. ഇത് സ്ത്രീകളിൽ വാജിനിസ്മസ് പോലെയുള്ള അവസ്ഥ ഉണ്ടാകാനും ദാമ്പത്യതകർച്ചക്കും കാരണമായേക്കാം. പങ്കാളി മാനസികമായും ശാരീരികമായും ലൈംഗികബന്ധത്തിന് തയ്യാറാണോ എന്നുറപ്പ് വരുത്താതെയുള്ള ആക്രമണം പലപ്പോഴും ദാമ്പത്യം ശിഥിലമാക്കാം. പങ്കാളി സമ്മതത്തോടെ ആസ്വദിക്കുന്നതാണ് ശരിയായ ലൈംഗികതയെന്നും, വേദനയുള്ളതും താല്പര്യമില്ലാത്തതുമായ രതി പങ്കാളിക്ക് ബുദ്ധിമുട്ടാണ് എന്ന തിരിച്ചറിവില്ലാത്തതും, സ്ത്രീപുരുഷ ലൈംഗികതയെ പറ്റി ശാസ്ത്രീയമായ അറിവ് ഇല്ലാത്തതും, പുരുഷന്റെ ആധിപത്യ മനോഭാവവും ഇതിലേക്ക് നയിക്കുന്ന പ്രധാന ഘടകങ്ങളാണ്.
ബാല ബലാത്സംഗം[തിരുത്തുക]
ബാലപീഡനം എന്നും അറിയപ്പെടുന്നു. ഇന്ത്യയിൽ പോക്സോ നിയമപ്രകാരം ശിക്ഷിക്കപ്പെടുന്ന ക്രിമിനൽ കുറ്റമാണ് ബാല ബലാത്സംഗം. പ്രായപൂർത്തിയാകാത്ത കുട്ടി നൽകുന്ന സമ്മതത്തിന് നിയമ സാധുത ഇല്ലാത്തതിനാൽ കുട്ടികളുമായി ഉഭയ സമ്മതത്തോടെ നടത്തുന്ന ലൈംഗിക ചൂഷണങ്ങളും ബലാത്സംഗത്തിന്റെ പരിധിയിൽ വരുന്നു. കുട്ടികളുടെ നേർക്കുള്ള ലൈംഗിക അതിക്രമങ്ങൾ അവർക്ക് ശാരീരികവും മാനസികവുമായ ആഘാതം ഏൽപ്പിക്കുന്നു. ഇതിന്റെ ഫലമായി കൗമാര പ്രായത്തിലും മറ്റും ഉണ്ടാകുന്ന ഗർഭധാരണം അമ്മയുടെയും കുഞ്ഞിന്റെയും ആരോഗ്യത്തെ ഗുരുതരമായി ബാധിക്കാറുണ്ട്. കൗമാരപ്രായക്കാരുടെ കൗതുകം മുതലെടുത്തും മുതിർന്നവർ ഇത്തരം ചൂഷണങ്ങൾ നടക്കാറുണ്ട്. ധാരാളം ആൺകുട്ടികളും ഈ രീതിയിൽ ആക്രമിക്കപ്പെടാറുണ്ട്.
തടവറ ബലാത്സംഗം[തിരുത്തുക]
ജയിലുകളിലും മറ്റ് തടവറകളിലും നടക്കുന്ന ബലാത്സംഗം. ഇവ മിക്കപ്പോഴും റിപ്പോർട്ട്‌ ചെയ്യപ്പെടുന്നില്ല. പുരുഷന്മാരും ഇത്തരത്തിൽ പീഡിപ്പിക്കപ്പെടാറുണ്ട്.
യുദ്ധ ബലാത്സംഗം[തിരുത്തുക]
യുദ്ധകാലത്ത് ഉണ്ടാകുന്ന ബലാത്സംഗം. ഇതിന്റെ ഭാഗമായി അഭയായാർഥികളും മറ്റും ഇത്തരത്തിൽ ആക്രമിക്കപ്പെടാറുണ്ട്.
കാരണങ്ങൾ[തിരുത്തുക]
ബലാത്സംഗത്തിന് സാമൂഹികവും സാംസ്കാരികവും വ്യക്തിത്വപരവും ലിംഗപരവും മാനസികവും സാങ്കേതികവിദ്യാപരവും ആയ വിവിധ കാരണങ്ങളുണ്ടെന്ന് സമർത്ഥിക്കപ്പെടുന്നുണ്ട്. ഇക്കാര്യത്തിൽ ഇനിയും ഗവേഷണങ്ങളും പഠനങ്ങളും അനിവാര്യമാണ്.
സാമൂഹിക ഘടകങ്ങൾ[തിരുത്തുക]
ലൈംഗികതയെക്കുറിച്ചുള്ള വികലമായ കാഴ്ചപ്പാടുകൾ, ബലം പ്രയോഗിച്ചുള്ള ലൈംഗിക പൂർത്തീകരണത്തെക്കുറിച്ചുള്ള ധാരണകൾ, സ്ത്രീകളുടെ താഴ്ന്ന ലിംഗപദവി (ലിംഗ അസമത്വം), ജാതിയും മതവുമായി ബന്ധപ്പെട്ട വർഗീയത, കലാപങ്ങൾ, താഴ്ന്ന നിലവാരത്തിലുള്ള ജീവിതസാഹചര്യങ്ങൾ, ബലാത്സംഗത്തെക്കുറിച്ചുള്ള മിഥ്യാധാരണകൾ തുടങ്ങിയവ സാമൂഹിക കാരണങ്ങളിൽ ഉൾപ്പെടുന്നു. പുരുഷാധിപത്യ സമൂഹങ്ങളിൽ ഇത്തരം അതിക്രമങ്ങൾ കൂടുതലായി കാണപ്പെടുന്നു. ദുരഭിമാനം, സ്ത്രീകളോടുള്ള പ്രതികാര മനോഭാവം, വെറുപ്പ്, ലൈംഗികദാരിദ്ര്യം എന്നിവയെല്ലാം ഇതുമായി ബന്ധപ്പെട്ടിരിക്കുന്നു.
ബലാത്സംഗത്തിന്റെ പ്രധാന കാരണം മറ്റൊരു വ്യക്തിയുടെ ശരീരത്തിൽ അധികാരവും ബലവും പ്രയോഗിച്ചുള്ള അതിക്രമം ആണെന്നും, ഇത് ഇരയ്ക്ക് മാനസികവും ശാരീരികവുമായ കടുത്ത പരിക്കുകൾ പറ്റാൻ ഇടയാക്കുന്നുവെന്നും വിദഗ്ദ്ധർ ചൂണ്ടിക്കാട്ടുന്നു. അതോടൊപ്പം സമൂഹം ഇരയോട് കാണിക്കുന്ന വിവേചനങ്ങളും അവഹേളനങ്ങളും മറ്റൊരു പ്രശ്നമാണ്. ശക്തമായ നിയമത്തിന്റെ അഭാവം, കേസ് നടത്തിപ്പിന് വേണ്ടിവരുന്ന കാലതാമസം എന്നിവ ബലാത്സംഗത്തിന്റെ തോത് വർധിപ്പിക്കുന്നു.
മാനസിക ഘടകങ്ങൾ[തിരുത്തുക]
ലൈംഗികമായി മറ്റൊരാളെ പീഡിപ്പിക്കുന്നതിൽ ആനന്ദവും സംതൃപ്തിയും കണ്ടെത്തുന്ന ആളുകളിൽ സാഡിസം പോലെയുള്ള പ്രത്യേകതരം മാനസികാവസ്ഥയും ചിന്താഗതികളും ഉണ്ടായിരിക്കുന്നതായി പഠനങ്ങളിൽ കണ്ടെത്തിയിട്ടുണ്ട്. വിദഗ്ദ്ധരുടെ നിഗമനത്തിൽ ഇക്കൂട്ടർക്ക് മനോരോഗമോ, മനോവൈകല്യങ്ങളോ, വ്യക്തിത്വത്തിലെ അപാകതകളോ ഉണ്ടായിരിക്കാമെന്നതാണ്. കടുത്ത അക്രമവാസനയും അനന്തരഫലങ്ങളെക്കുറിച്ച് ആലോചിക്കാതെ പ്രവൃത്തികളിലേർപ്പെടുന്നതും ഇക്കൂട്ടരിൽ സാധാരണമാണ്. വൈകാരികമായ ബന്ധങ്ങളിലെ തകർച്ചയും മറ്റുള്ളവരുമായി ഒത്തുപോകുവാൻ കഴിയാത്തതും സന്തോഷകരമായ ലൈംഗികജീവിതം നയിക്കാനോ പങ്കാളിയെ തൃപ്തിപ്പെടുത്താൻ സാധിക്കാത്തതോ ചിലപ്പോൾ ലൈംഗികശേഷിക്കുറവുമൊക്കെ ഇക്കൂട്ടരുടെ പ്രത്യേകതയാണ്. മറ്റുള്ളവരുടെ വേദന മനസ്സിലാക്കുവാനോ, അവരുടെ ഭാഗത്തുനിന്ന് കാര്യങ്ങൾ നോക്കിക്കാണുവാനുള്ള കഴിവും ഇവർക്ക് കുറവായിരിക്കും. താനെന്തെങ്കിലും തെറ്റു ചെയ്തുവെന്നോ, തന്റെ പ്രവൃത്തിമൂലം ഇരയ്ക്ക് ബുദ്ധിമുട്ടുകൾ ഉണ്ടാകുമെന്നോ ഇവർ ചിന്തിക്കാറില്ല. ഇത്തരം കാര്യങ്ങൾ പൂർണമായും നിഷേധിക്കുവാനായിരിക്കും ഇവർ താത്പര്യപ്പെടുക. ലൈംഗികമായി മറ്റുള്ളവരെ പീഡിപ്പിക്കുന്നതായുള്ള മനോകല്പനകളിൽ ഇവർ താത്പര്യം കാണിക്കാറുണ്ടെന്നതും വളരെ പ്രാധാന്യമർഹിക്കുന്നു. ചില മാനസിക രോഗങ്ങളുമായും ഇത് ബന്ധപ്പെട്ടിരിക്കുന്നു.
അമർത്തിവെച്ച ലൈംഗികവികാരങ്ങൾ, ആഗ്രഹപൂർത്തീകരണത്തിനുള്ള അവസരമില്ലായ്മകൾ, സ്ത്രീപുരുഷബന്ധത്തെ പറ്റിയുള്ള വികലമായ അറിവുകൾ, ദുർബലരെ എളുപ്പം കീഴ്പ്പെടുത്താനാകുമെന്ന ചിന്ത തുടങ്ങിയവ ബലാത്കാരങ്ങൾക്ക് വഴിതെളിയിക്കുന്നു. പക്ഷേ, പീഡിപ്പിക്കുന്നവരിൽ ലൈംഗികാസ്വാദനത്തെക്കാളും കീഴടക്കാനുള്ള മനോഭാവമാണ് സാധാരണയായി മുന്നിട്ടുനില്ക്കാറുള്ളത്.
സ്ത്രീകളോട് വെച്ചുപുലർത്തുന്ന വെറുപ്പും പകയും പീഡനങ്ങൾക്ക് കാരണമാവാറുണ്ട്. ഇങ്ങനെയുള്ളവർക്ക് സ്ത്രീയെ കീഴ്‌പ്പെടുത്തി, കോപം പ്രകടിപ്പിക്കാനുള്ള മാർഗ്ഗമാണ് ബലാത്സംഗം.
ചിലർക്ക് തന്റെ പുരുഷത്വത്തെക്കുറിച്ചുള്ള അതിരുകടന്ന മിഥ്യാധാരണകൾ ബലാത്സംഗം ചെയ്യുവാൻ പ്രചോദനമാകുന്നു. സ്ത്രീകളുടെ വസ്ത്രധാരണരീതിയോ, ചേഷ്ടകളോ തന്നോട് ലൈംഗികബന്ധം പുലർത്താൻ താത്പര്യപ്പെടുന്നുവെന്നതിനുള്ള ലക്ഷണമായി ഇക്കൂട്ടർ തെറ്റിദ്ധരിക്കുന്നു. യൗവനത്തിന് വളരെ മുൻപുള്ള ലൈംഗികചൂഷണങ്ങളും മുതിരുമ്പോൾ മറ്റുള്ളവരെ പീഡിപ്പിക്കാനുള്ള താത്പര്യത്തെ ജനിപ്പിക്കാറുണ്ട്. സ്വയംനിയന്ത്രണം നഷ്ടമാവുന്നതും സാമൂഹികമായ അതിരുകൾ കാത്തുസൂക്ഷിക്കുവാൻ കഴിയാത്തതും സ്ത്രീകളുടെ ലൈംഗികതയെപ്പറ്റിയുള്ള അശാസ്ത്രീയമായ ചിന്താഗതികളും ഇത്തരക്കാരിൽ സർവ സാധാരണമാണ്.
സാംസ്കാരിക ഘടകങ്ങൾ[തിരുത്തുക]
ചില സമൂഹങ്ങളിൽ ലൈംഗികതയെക്കുറിച്ചു സംസാരിക്കുന്നതുപോലും നിഷിദ്ധമാണ്. ലൈംഗികത എന്നാൽ വലിയ പാപമാണ് എന്നൊരു ധാരണ ഇന്നും മിക്കവരിലും പ്രബലമാണ്. അടുത്ത കാലംവരെ ഇന്ത്യയിലും ലൈംഗികപീഡനങ്ങൾ നടക്കുന്നുണ്ടെന്ന് സമ്മതിക്കാനുമുള്ള വിമുഖത പ്രകടമായിരുന്നു. മീടൂ പോലെയുള്ള പരിപാടികൾ ഇത്തരം അതിക്രമങ്ങൾ തുറന്നു പറയാൻ ലോകമെങ്ങും സ്ത്രീകൾക്ക് പ്രചോദനം നൽകിയ ഒന്നാണ്.
ചില സമൂഹങ്ങളിൽ ആണിനും പെണ്ണിനും അടുത്തിടപഴകുവാനോ സംസാരിക്കുവാനോ അനുവാദമില്ല. സ്ത്രീപുരുഷന്മാർ അടുത്തിഴപഴകുന്നത് ലൈംഗികതയ്ക്ക് മാത്രമാണെന്നുള്ള വിശ്വാസവും പുരുഷാധിപത്യ സമൂഹങ്ങളിൽ കാണാം. ഇത് ജനാധിപത്യപരമായ സ്ത്രീപുരുഷ ബന്ധങ്ങളെ തടയുന്നു. അതുവഴി എതിർലിംഗത്തിൽപ്പെട്ടവരെ ശരിയായി മനസ്സിലാക്കുവാനുള്ള സാഹചര്യങ്ങളെ കുറയ്ക്കുകയും വികലമായ കാഴ്ചപ്പാടുകളോടെ വളരുവാനുള്ള സാധ്യത വർധിപ്പിക്കുകയും ചെയ്യുന്നു. സ്ത്രീ എന്നാൽ ഇരയും പുരുഷൻ എന്നാൽ വേട്ടക്കാരനും എന്നൊരു ചിന്താഗതിയും ഊട്ടി ഉറപ്പിക്കപ്പെടുന്നു. മാത്രമല്ല, പുരുഷന്മാരിൽ സ്ത്രീ ശരീരത്തെ പറ്റിയുള്ള മിഥ്യാധാരണകൾ ചിലപ്പോൾ ലൈംഗികാതിക്രമങ്ങൾക്ക് വഴിതെളിയിച്ചേക്കാം. ലൈംഗികതയെപ്പറ്റിയും ജെൻഡറിനെപ്പറ്റിയും ശാസ്ത്രീയമായ ധാരണകൾ ഉണ്ടാക്കിയെടുക്കുക എന്നത് നല്ലൊരു പോംവഴിയാണ്. എന്നാൽ അത്തരത്തിൽ ഉള്ളൊരു പാഠ്യപദ്ധതി ഇന്ത്യയിൽ ഇന്നും നിലവിൽ വന്നിട്ടില്ല എന്നത് ശ്രദ്ധേയമാണ്.
സാങ്കേതികവിദ്യയുടെ വളർച്ച[തിരുത്തുക]
വിവര സാങ്കേതിക വിദ്യയുടെ വളർച്ചയോടെ ചെറിയ കുട്ടികൾ ശാസ്ത്രീയമായി ലൈംഗികത എന്താണെന്ന് മനസ്സിലാക്കുന്നതിനു മുൻപുതന്നെ ലൈംഗികചിത്രങ്ങൾ കാണുകയും കൂട്ടുകാരിൽ നിന്നോ ചിലപ്പോൾ മുതിർന്നവരിൽ നിന്നോ തെറ്റിദ്ധരിപ്പിക്കുന്ന അറിവുകൾ നേടുകയും ചെയ്യുന്നു. ഇത് ലൈംഗികതയെക്കുറിച്ച് തെറ്റായ ധാരണകൾ ഉണ്ടാകാൻ കാരണമാവുകയും മനസിലാക്കിയതെല്ലാം അന്ധമായി അനുകരിക്കാനുള്ള താത്പര്യം ജനിക്കുകയും ചെയ്യുന്നു. അത് ലൈംഗിക കുറ്റകൃത്യങ്ങളിലേക്ക് നയിക്കുന്നു. കൗമാരപ്രായത്തിൽ കുട്ടികളിൽ ഉണ്ടാകുന്ന സ്വാഭാവികമായ കൗതുകങ്ങൾ പോലും ചിലപ്പോൾ ഇത്തരം പരീക്ഷണങ്ങൾ തിരഞ്ഞെടുക്കാൻ അവരെ പ്രേരിപ്പിച്ചേക്കാം. മാതാപിതാക്കളിൽ നിന്നോ അദ്ധ്യാപകരിൽ നിന്നോ മറ്റ് ആരോഗ്യവിദഗ്ധരിൽ നിന്നോ ശരിയായ അറിവ് ലഭിക്കാത്തതും ശാസ്ത്രീയ ലൈംഗിക, ജെൻഡർ വിദ്യാഭ്യാസത്തിന്റെ അഭാവവും പ്രശ്നം കൂടുതൽ വഷളാക്കാറുണ്ട്.
ബലാത്സംഗവും ലൈംഗികതയും[തിരുത്തുക]
ബലാത്സംഗത്തിന് ഇരയാക്കപ്പെടുന്ന സ്ത്രീകളിൽ മിക്കപ്പോഴും ശാരീരികവും മാനസികവുമായ ലൈംഗിക ഉത്തേജനം ഉണ്ടാകാറില്ല. അതിക്രമങ്ങൾ ഇര ആസ്വദിക്കുന്നില്ല. ഇത് ഇരുവർക്കും കഠിനവേദനയും പരിക്കും ഉണ്ടാകാൻ കാരണമാകുന്നു. ബലം പ്രയോഗിച്ചു വേഴ്ചക്ക് ശ്രമിക്കുന്ന വ്യക്തിക്കും ശരിയായ ലൈംഗികത ആസ്വദിക്കാൻ സാധിച്ചെന്നു വരില്ല. ഇത് ഇരയുടെ ശാരീരികവും മാനസികവും സാമൂഹികവുമായ ആരോഗ്യവും തകരാറിലാക്കുന്നു. ലൈംഗികതയോടുള്ള ഭയത്തിനും ഇത് കാരണമായേക്കാം. ഇത് സ്ത്രീകളിൽ വജൈനിസ്‌മസ്‌ പോലെയുള്ള പ്രശ്നങ്ങളിലേക്കും വഴിതെളിച്ചേക്കാം. സാഡിസ്റ്റ് മനോഭാവം ഉള്ളവരിലും ക്രൂരമായ ബലാത്സംഗം ചെയ്യാനുള്ള താല്പര്യം കാണാറുണ്ട്. ഇതെല്ലാം ഇരയെ മരണതുല്യമായ അവസ്ഥയിലേക്ക് തള്ളിവിട്ടേക്കാം. ലൈംഗികതയുടെ ലഭ്യത സമൂഹങ്ങളിലും ഇത്തരം പ്രശ്നങ്ങൾ വര്ധിക്കാനിടയുണ്ട്. ജൻഡർ തുല്യതയും, ശാസ്ത്രീയമായ ആരോഗ്യ ലൈംഗിക ബോധനവും അത്യാവശ്യം തന്നെയാണ് എന്നാണ് ഇത് തെളിയിക്കുന്നത്. [14]
അവലംബങ്ങൾ[തിരുത്തുക]
- ↑ Roberts, Albert R.; Ann Wolbert Bergess; CHERYL REGEHR (2009). Victimology: Theories and Applications. Sudbury, Mass: Jones & Bartlett Publishers. പുറം. 228. ISBN 978-0-7637-7210-9.
{{cite book}}: CS1 maint: multiple names: authors list (link) - ↑ "www.ena.org" (PDF).[പ്രവർത്തിക്കാത്ത കണ്ണി]
- ↑ "Violence Against Women: Worldwide Statistics". മൂലതാളിൽ നിന്നും 2007-12-12-ന് ആർക്കൈവ് ചെയ്തത്. ശേഖരിച്ചത് 2010-06-26.
- ↑ "UCSC Rape Prevention Education: Rape Statistics". www2.ucsc.edu. മൂലതാളിൽ നിന്നും 2007-12-23-ന് ആർക്കൈവ് ചെയ്തത്. ശേഖരിച്ചത് 2008-01-01. The study was conducted in Detroit, USA.
- ↑ Abbey, A., BeShears, R., Clinton-Sherrod, A. M., & McAuslan, P. (2004). Psychology of Women Quarterly, 28, 323-332."Similarities and differences in women's sexual assault experiences based on tactics used by the perpetrator" Archived 2013-01-08 at the Wayback Machine.. Accessed 10 December 2007.
- ↑ Human Rights WatchNo Escape: Male Rape In U.S. Prisons. Part VII. Anomaly or Epidemic: The Incidence of Prisoner-on-Prisoner Rape.
- ↑ Robert W. Dumond, "Ignominious Victims: Effective Treatment of Male Sexual Assault in Prison," August 15, 1995, p. 2; states that "evidence suggests that [male-male sexual assault in prison] may a staggering problem"). Quoted in Mariner, Joanne; (Organization), Human Rights Watch (2001-04-17). No escape: male rape in U.S. prisons. Human Rights Watch. പുറം. 370. ISBN 9781564322586. ശേഖരിച്ചത് 7 June 2010.
- ↑ Struckman-Johnson, Cindy (2006). "A Comparison of Sexual Coercion Experiences Reported by Men and Women in Prison". Journal of Interpersonal Violence. 21 (12): 1591ֱ615. doi:10.1177/0886260506294240. ISSN 0886-2605.
{{cite journal}}: Unknown parameter|coauthors=ignored (|author=suggested) (help); reports that "Greater percentages of men (70%) than women (29%) reported that their incident resulted in oral, vaginal, or anal sex. More men (54%) than women (28%) reported an incident that was classified as rape." - ↑ http://www.msu.edu/~sdclub/resources/criminal%20code.doc
- ↑ "Race and crime: a biosocial analysis". Anthony Walsh (2004). Nova Publishers. pp.23–24. ISBN 978-1-59033-970-1
- ↑ Fourth Annual Report of ICTR to the General Assembly (1999) Archived 2009-09-04 at the Wayback Machine. March 23, 2007
- ↑ See for example in the British Virgin Islands under the Criminal Code, 1997
- ↑ http://www.soc.ucsb.edu/sexinfo/article/rape Archived 2019-04-07 at the Wayback Machine. UCSB's SexInfo
- ↑ ഡോ. രജനി. ടി.ജി. "എന്തുകൊണ്ട് ലൈംഗികാതിക്രമങ്ങൾ സംഭവിക്കുന്നു?". ലൈംഗികാതിക്രമങ്ങൾ: ഒരു മന:ശാസ്ത്രവിശകലനം (1 പതിപ്പ്.). മാതൃഭൂമി. ISBN 978-81-8266-064-9. മൂലതാളിൽ (ലേഖനം) നിന്നും 2014-11-02-ന് ആർക്കൈവ് ചെയ്തത്. ശേഖരിച്ചത് 2 നവംബർ 2014.