രതിസലിലം

വിക്കിപീഡിയ, ഒരു സ്വതന്ത്ര വിജ്ഞാനകോശം.
Jump to navigation Jump to search
ബർത്തോളിൻ ഗ്രന്ഥി, രതിസലിലത്തിന്റെ ഉല്പാദനം ഇവിടെ നിന്നാണെന്നു വിശ്വസിക്കപ്പെടുന്നു.

സ്ത്രീകളിൽ മാനസികവും ശാരീരികവുമായ ലൈംഗിക ഉത്തേജനം ഉണ്ടാകുന്നതിന്റെ ഒരു പ്രധാന ലക്ഷണമാണ് "രതിസലിലം അഥവാ രതിജലം (Vaginal lubrication)". തലച്ചോറിലെ ഉത്തേജനത്തിന്റെ ഫലമായി യോനി തപ്തവും വിജൃംഭിതവും ആവുന്നു. യോനീകലകളിൽ രക്തം നിറഞ്ഞ് അതിന്റെ ആഴവും പരപ്പും വർദ്ധിക്കുന്നു. അപ്പോൾ യോനിമുഖത്തിനടുത്തുള്ള 'ബർത്തൊലിൻ ഗ്രന്ഥികൾ, യോനീകലകൾ തുടങ്ങിയവ വഴുവഴുപ്പുള്ള സ്രവം പുറപ്പെടുവിക്കുന്നു. ('ബർത്തൊലിൻ ഗ്രന്ഥികൾ ' മാറ്റപ്പെട്ട സ്ത്രീകളിലും സ്രവം ഉണ്ടാവുന്നുണ്ടെന്ന് വാദമുണ്ട്). ഇതിനെയാണ് 'രതിസലിലം, മദജലം' എന്നൊക്കെ വിളിക്കുന്നത്. സ്ത്രീകളുടെ ലൈംഗിക ആസ്വാദനത്തിൽ ഇത് പ്രധാന പങ്ക് വഹിക്കുന്നു. ലൈംഗികബന്ധം സുഖകരമാക്കുക, രതിമൂർച്ഛക്ക് (Orgasm) സഹായിക്കുക എന്നിവയാണ് ഇതിന്റെ ധർമ്മം.

രതിസലിലത്തിന്റെ അഭാവത്തിൽ ലൈംഗികബന്ധം സ്ത്രീക്ക് വിരസമോ വേദനാജനകമോ ആകാനും, പുരുഷന് ആയാസകരമാകാനും സാധ്യതയുണ്ട്. ഇത് ലൈംഗികതയോടുള്ള ഭയത്തിനും താല്പര്യക്കുറവിനും കാരണമാകാം.

സാധാരണയായി രതിസലിലത്തിന് പുളിരസമാണുള്ളത്. ഇതിന്റെ നിറം അല്പം വെളുപ്പു കലര്ന്നത് മുതൽ നിറമില്ലാത്തത് വരെ ആകാം, അത് സ്ത്രീകളുടെ ‌ആർത്തവ ചക്രത്തിനനുസരിച്ച് മാറിക്കൊണ്ടിരിക്കും. ആർത്തവവിരാമത്തിന് (Menopause) ശേഷം സ്ത്രീ ഹോർമോണിന്റെ കുറവ് മൂലം രതിജലത്തിന്റെ ഉത്‌പാദനം കുറഞ്ഞേക്കാം. ഇതിനെ യോനീ വരൾച്ച (Vaginal dryness) എന്നറിയപ്പെടുന്നു. അണുബാധ (Infection) തുടങ്ങി പല കാരണങ്ങൾ കൊണ്ട് യുവതികളിലും ഇത് സംഭവിക്കാം.

കൂടുതൽ സമയം സന്തോഷകരമായ രതിപൂർവ്വലീലകളിൽ (Foreplay) ഏർപ്പെടുക എന്നതാണ് രതിജലം ഉത്പാദിപ്പിക്കപ്പെടാൻ സ്വാഭാവികമായ മാർഗം. ആവശ്യമെങ്കിൽ ഏതെങ്കിലും മികച്ച ലൂബ്രിക്കന്റ് ജെല്ലി (ഉദാ: Water based lubricants: KY Gelly) യോനീനാളത്തിൽ പുരട്ടാവുന്നതാണ്. ഒരു ഡോക്ടറുടെ നിർദേശപ്രകാരം ഹോർമോൺ ക്രീം ഉപയോഗിക്കുന്നതും ഏറെ ഫലപ്രദമാണ്. ആവശ്യത്തിന് ശുദ്ധജലം കുടിക്കുന്നത് യോനീ വരൾച്ചയുടെ തോത് കുറച്ചേക്കാം.

ബാഹ്യകേളിയുടെ കുറവ്, മാനസിക പ്രശ്നങ്ങൾ, പങ്കാളിയുമായുള്ള അടുപ്പക്കുറവ്, ലൈംഗികതയോടുള്ള വെറുപ്പ്, വിഷാദം, പ്രായമായി എന്ന തോന്നൽ, പാപബോധം, യോനീസങ്കോചം (Vaginismus), പ്രമേഹം, യോനിയിലെ അണുബാധ, ഫംഗസ്, ഗർഭപാത്രം നീക്കം ചെയ്യൽ, നിർജലീകരണം തുടങ്ങിയവ ലൂബ്രിക്കേഷനെ ബാധിച്ചേക്കാം. രതിജലത്തിന്റെ അഭാവത്തിൽ ലൈംഗിക ബന്ധത്തിലേർപ്പെടുമ്പോൾ ജനനേന്ദ്രിയങ്ങളിൽ ഉണ്ടാകുന്ന പോറലുകളിലൂടെ എയ്ഡ്‌സ് മുതലായ ലൈംഗികരോഗങ്ങൾ (STDs) പെട്ടന്ന് പകരാൻ സാധ്യതയുണ്ട്. യോനിയിൽ ഉണ്ടാകുന്ന മറ്റ് സ്രവങ്ങളിൽ നിന്നും രതിജലം തികച്ചും വ്യത്യസ്തമാണ്. ആർത്തവചക്രത്തിലെ അണ്ഡവിസർജനകാലത്തും (Ovulation) യോനീസ്രവം ഉണ്ടാകാറുണ്ട്. കൃത്രിമ ലൂബ്രിക്കേഷന് വേണ്ടി വൃത്തിഹീനമായ എണ്ണകൾ (Oils) ഉപയോഗിക്കുന്നത് മൂലം അണുബാധ ഉണ്ടാകുവാനും, ലാറ്റക്സ് കോണ്ടം പൊട്ടിപ്പോകുവാനും സാധ്യതയുണ്ട്.


"https://ml.wikipedia.org/w/index.php?title=രതിസലിലം&oldid=2916172" എന്ന താളിൽനിന്നു ശേഖരിച്ചത്