ബാഹ്യകേളി

വിക്കിപീഡിയ, ഒരു സ്വതന്ത്ര വിജ്ഞാനകോശം.
Jump to navigation Jump to search
ബാഹ്യകേളിയിൽ ഏർപ്പെടുന്ന ഇണകൾ

ഇണയിൽ പരമാവധി ലൈംഗിക വികാരമുണർത്തി സംയോഗത്തിന് തയ്യാറാക്കുന്ന മാനസികവും, ശാരീരികവുമായ പ്രവൃത്തിയാണ് ബാഹ്യകേളി അഥവാ രതിപൂർവലീലകൾ (Foreplay). ലൈംഗികബന്ധത്തിന് മുൻപ് ഒഴിച്ചുകൂടാനാകാത്ത ഒരു ഘട്ടമാണിത്. ആവശ്യത്തിന് സമയം ബാഹ്യകേളിക്ക് ചിലവഴിക്കാതെയുള്ള ലൈംഗികബന്ധം അതൃപ്തിക്ക് കാരണമായേക്കാം. രതിപൂർവകേളി ഒരു സ്നേഹപ്രകടനം കൂടിയായി കണക്കാക്കപ്പെടുന്നു. മധുരസംസാരം, രതിഭാവന പങ്കുവെക്കൽ, ചുംബനം, ആലിംഗനം, സ്പർശനം എന്നിവ ബാഹ്യകേളിയിൽ പെടുന്നു. ഇണയുടെ ചുണ്ട്, ചെവി, കഴുത്ത് തുടങ്ങി ശരീര ഭാഗങ്ങളിൽ സ്പർശ്ശിക്കുന്നതും ലാളിക്കുന്നതും പൂർവകേളി തന്നെ. സ്ത്രീകളിൽ കൃസരി/ഭഗശിശ്നിക തുടങ്ങി നാഡീതന്തുക്കൾ ഏറെയുള്ള ഭാഗങ്ങളിലെ മൃദുവായ പരിലാളനയും ബാഹ്യകേളിയിൽ ഉൾപ്പെടുന്നു. നാഡീവ്യവസ്ഥയും മത്തിഷ്ക്കവും ഈ സുഖാനുഭൂതിയിൽ പങ്ക് വഹിക്കുന്നു.

ബാഹ്യകേളിയുടെ പ്രാധാന്യം[തിരുത്തുക]

ആസ്വാദ്യമായ ബാഹ്യകേളിയിലൂടെ ഉത്തേജനമുണ്ടാവുകയും ശരീരവും മനസും ലൈംഗികബന്ധത്തിനു തയ്യാറാവുകയും ചെയ്യുന്നു. അതോടെ ലിംഗത്തിലെ അറകളിലേക്കും യോനീഭാഗത്തേക്കും ഉള്ള രക്തയോട്ടം വർധിക്കുന്നു. അതിന്റെ ഫലമായി തളർന്നു കിടക്കുന്ന പുരുഷലിംഗം ഉദ്ധരിക്കുന്നു. സ്ത്രീകളിൽ യോനീനാളം വികസിക്കുകയും "വഴുവഴുപ്പാർന്ന സ്രവങ്ങൾ (Lubrication)" ഉൽപ്പാദിപ്പിക്കപ്പെടുകയും, കൃസരി ഉദ്ധരിക്കുകയും ചെയ്യുന്നു. ഇത് സുഖകരമായ ലൈംഗിക ബന്ധത്തിലേക്ക് നയിക്കുന്നു. ലൂബ്രിക്കേഷൻ സ്രവങ്ങളുടെ അഭാവത്തിൽ സ്ത്രീക്ക് ലൈംഗികബന്ധം വിരസമോ വേദനാജനകമോ ആകുവാനും പുരുഷന് ആയാസകരമാകാനും സാധ്യതയുണ്ട്. ഇവിടെയാണ് രതിപൂർവ്വലീലകളുടെ പ്രാധാന്യം. എന്നാൽ പങ്കാളിക്ക് താല്പര്യമില്ലാത്ത രീതികൾ ഒഴിവാക്കുക തന്നെ വേണം.

സ്ത്രീകളിൽ രതിമൂർച്ഛ സംഭവിക്കുന്നത് പുരുഷന്മാരേക്കാൾ വൈകിയായതിനാലും, ലൈംഗിക ഉത്തേജനം ഏറെ നേരം നീണ്ടു നിൽക്കുന്നതിനാലും ബാഹ്യകേളിയിൽ ഏർപ്പെടുന്നത് ലൈംഗികബന്ധത്തിന്റെ ദൈർഘ്യം വർദ്ധിപ്പിക്കുവാനും, പുരുഷന്മാരിലെ 'സമയക്കുറവ്' ചെറുക്കുവാനും സഹായിക്കുന്നു. ഇത് പുരുഷ ബീജങ്ങളുടെ ഗുണമേന്മ വർധിക്കുവാനും ഉപയുക്തമാണെന്ന് ചില പഠനങ്ങൾ തെളിയിക്കുന്നു. ഇരുപതു മിനുട്ടെങ്കിലും രതിപൂർവ്വലീലകൾക്ക് ചിലവഴിക്കുന്നത് സന്തോഷകരമായ ലൈംഗികജീവിതത്തിനു ഉത്തമമാണെന്ന് ചില പഠനങ്ങൾ പറയുന്നു. പ്രത്യേകിച്ചും ആദ്യമായി ബന്ധപ്പെടുന്നവർക്കും, ആർത്തവവിരാമം കഴിഞ്ഞ സ്ത്രീകൾക്കും, പ്രായമായ പുരുഷന്മാർക്കും ഉത്തേജനം ഉണ്ടാകാൻ കൂടുതൽ സമയം രതിപൂർവലാളനകൾ വേണ്ടി വന്നേക്കാം. യോനീവരൾച്ചയും, ബന്ധപ്പെടുമ്പോൾ ഉണ്ടാകുന്ന വേദനയും പരിഹരിക്കാൻ ദീർഘനേരം ബാഹ്യകേളികളിൽ ഏർപ്പെടുന്നത് സഹായിക്കും. കൂടാതെ കൃത്രിമമായി നനവ് നൽകുന്ന ലൂബ്രിക്കന്റുകളും (Ex. KY ജെല്ലി) ഉപയോഗിക്കാം. പുതുമയുള്ള ബാഹ്യകേളികൾ ലൈംഗികതയിലെ ആവർത്തനവിരസത അകറ്റും. എല്ലാ ലിംഗവിഭാഗങ്ങളും പൂർവകേളികൾ ഇഷ്ടപ്പെടുന്നവരാണെങ്കിലും പൊതുവേ സ്ത്രീകൾ കൂടുതലായി ബാഹ്യകേളികൾ ആസ്വദിക്കുന്നവരാണെന്ന് പഠനങ്ങൾ പറയുന്നു. വൃത്തിയും സുഗന്ധവുമുള്ള അന്തരീക്ഷം ഇതിന്‌ ഏറെ അനുയോജ്യമാണ്. പാമ്പ് മുതലായ പല ജീവിവർഗങ്ങളും ധാരാളം സമയം രതിപൂർവകേളികളിൽ ഏർപ്പെടാറുണ്ട്.

ലൈംഗിക ഉത്തേജനത്തിന്റെ ഉറവിടം തലച്ചോർ തന്നെ. ഈ ഉത്തേജനം വർധിപ്പിക്കുവാൻ പൂർവ്വലീലകൾ ആവശ്യമാണ്. മാനസിക സമ്മർദങ്ങൾ ഒഴിവാക്കുന്നത് ബാഹ്യകേളികൾ ആസ്വദിക്കുന്നതിന് സഹായിക്കും. എന്നാൽ ലൈംഗിക ന്യൂനപക്ഷങ്ങളിൽ (LGBTIA) ഉൾപ്പെടുന്ന അലൈംഗികരായ (Asexuals) വ്യക്തികൾക്ക് ലൈംഗിക താല്പര്യമോ ചിലപ്പോൾ ലൈംഗികശേഷിയോ ഉണ്ടാകണമെന്നില്ല. ഇത്തരം സവിശേഷത ഉള്ളവർക്ക് ബാഹ്യകേളികളിൽ ഏർപ്പെട്ടത് കൊണ്ട് മാത്രം ലൈംഗിക ഉത്തേജനം ഉണ്ടാവുകയില്ല.

"https://ml.wikipedia.org/w/index.php?title=ബാഹ്യകേളി&oldid=3097723" എന്ന താളിൽനിന്ന് ശേഖരിച്ചത്