കളരിപ്പയറ്റ്

വിക്കിപീഡിയ, ഒരു സ്വതന്ത്ര വിജ്ഞാനകോശം.
Vaalum-parichayum.jpeg

കേരളത്തിന്റെ തനത് ആയോധനകലയാണ് കളരിപ്പയറ്റ്. കേരളത്തിലും തമിഴ്നാടിന്റെ ചില ഭാഗങ്ങളിലും ഈ പുരാതനമായ ആയോധന മുറ അഭ്യസിച്ചു വരുന്നു. കരാട്ടെ,കുങ് ഫു തുടങ്ങിയ അയോധന സമ്പ്രദായങ്ങളോട് കിടപിടിക്കത്തക്കവിധത്തിൽ ശാസ്ത്രീയമായി ചിട്ടപ്പെടുത്തപ്പെട്ടതും ക്രമാനുഗതമായ പരിശീലനം കൊണ്ട് ആത്മരക്ഷയ്ക്കൊപ്പം ശാരീരികവും മാനസികവുമായ കഴിവുകളെ പരിപോഷിപ്പിക്കുന്നതുമായ സമഗ്രമായൊരു കായികകലയാണ് കളരിപ്പയറ്റ് .

കഥകളി, കോൽകളി, വേലകളി, തച്ചോളികളി, തുടങ്ങിയ കേരളത്തിലെ പല പരമ്പരാഗത കലാരൂപങ്ങളും കളരിപ്പയറ്റിൽ നിന്ന് പലതും കടം കൊണ്ടിട്ടുണ്ട്. കഥകളിയിൽ കലാകാരന്റെ ശരീരത്തിന് മെയ്‌വഴക്കം വരുത്തുന്ന സമ്പ്രദായം ഇത്തരത്തിലുള്ളതാണ് .

ഫ്യൂഡലിസം ഏറ്റവും ശക്തമായിരുന്ന മധ്യകാലകേരളമാണ് കളരിപ്പയറ്റിന്റെ പ്രതാപകാലം . നൂറ്റാണ്ടിലേറെ നീണ്ടുനിന്ന വൈദേശികാധിപത്യത്തോടൊപ്പം ജന്മിത്വത്തിന്റെ തകർച്ചയും ആധുനിക ആയുധങ്ങളുടെ വരവും മാറിയ യുദ്ധമുറകളുമെല്ലാം ഈ ആയോധന കലയുടെ പ്രാധാന്യം കുറച്ചു . കരാട്ടെ ,കുങ് ഫു തുടങ്ങിയ കായികകലകളിൽ നിന്നും വ്യത്യസ്തമായി കളരിപ്പയറ്റിന് ഇക്കാലത്ത് വേണ്ടത്ര പരിഗണന ലഭിക്കാത്ത അവസ്ഥയുണ്ട് .



Kalari.jpg


ചരിത്രം[തിരുത്തുക]

ഗുരുര് വിഷ്ണു ഗുരുര്ദേവോ മഹേശ്വരഃ ഗുരു സാക്ഷാത് പരംബ്രഹ്മ തസ്മൈ ശ്രീഗുരവേ നമഃ
കളരി എന്നും ഒരു രഹസ്യമായിരുന്നു... ഗുരുക്കൾക്കും ശിഷ്യനും ഇടയിൽ വാ മൊഴിയായി കയ്യിമാറി വന്ന രഹസ്യം....ഇന്നും അത് അങ്ങനെ തന്നെ പോകുന്നു .....പലതും നഷ്ടപെട്ടിട്ടുടെങ്കിലും നമുക്ക് അഭിമാനിക്കാം ... ലോകത്തിലെ ആയോധന കലയുടെ മാതാവ്‌ ഭാരതത്തിലാണ് .... കേരളത്തിലാണ് .....അത് ഇന്നും അവശേഷിക്കുന്നത് കടതനാട്ടിലാണ്.... വടകരയിലാണ്.....

കളരിയുടെ ചരിത്രം നിരവധി ഐതിഹ്യങ്ങളിലൂടെ പകർന്ന് വന്നതല്ലാതെ രേഖപ്പെടുത്തിയ ചരിത്രം ഇല്ല. ചില ചരിത്രകാരന്മാർ കളരിപ്പയറ്റിന് വേദ കാലത്തോളം പഴക്കമുണ്ടെന്നു കരുതുന്നു.

ജാസ്മിൻ സിംഹളൻ കളരിപ്പയറ്റ് നടത്തുന്നു

കളരി എന്ന വാക്കു തന്നെ സൈനികാഭ്യാസത്തിനുള്ള സ്ഥലം എന്നർഥം വരുന്ന ഖലൂരിക എന്ന സംസ്കൃത പദത്തിൽ നിന്നുമാണ് മലയാളത്തിലെത്തിയത് എന്ന് ഒരു അഭിപ്രായമുണ്ട്. എം.ഡി.രാഘവൻ രചിച്ച ഫോക് പ്ലേയ്സ് ആൻഡ് ഡാൻസസ് എന്ന ഗ്രന്ഥത്തിലാണ് ഇത് ആദ്യമായി ഉന്നയിച്ചുകാണുന്നത്. എന്നാൽ അതിനേക്കാൾ മുൻപ് തന്നെ കളം, മുതുമരത്തുമൺ കളരി എന്നീ പ്രയോഗങ്ങൾ സംഘകാലത്തിലെ കൃതിയായ പത്തുപാട്ടിൽ പറയുന്നുണ്ട്.വിദ്യ അഭ്യസിക്കാൻ പല വിഭാഗങ്ങൾക്കും അനുവാദം ഇല്ലാതിരുന്നതുപോലെ കളരിപ്പയറ്റും അഭ്യസിക്കാൻ പല വിഭാഗങ്ങൾക്കും അനുവാദം മുൻപുണ്ടായിരുന്നില്ല. പത്തൊൻപതാം നൂറ്റാണ്ടു വരെ ചില പ്രത്യേക ജാതിക്കാർക്ക് മാത്രമാണ് ഈ കല അനുഷ്ഠിക്കാൻ അനുവാദം ഉണ്ടായിരുന്നത്.

ഐതിഹ്യം[തിരുത്തുക]

  • ഐതിഹ്യപ്രകാരം കേരളത്തെ സമുദ്രത്തിൽ നിന്നും മഴുവെറിഞ്ഞ് ഉയർത്തിയെടുത്ത പരശുരാമനാണ് കളരിപ്പയറ്റിനു തുടക്കം കുറിച്ചത്. ശത്രു സംഹാരത്തിനായി 42 കളരികൾ സ്ഥാപിച്ച്, 21 ശിഷ്യന്മാരെ പരിശീലിപ്പിച്ച് കളരിപ്പയറ്റിനു തുടക്കമിട്ടുവത്രെ.
  • ദക്ഷയാഗത്തിനിടക്ക് ശിവൻ കോപം പൂണ്ട് നടത്തിയ ചുവടുകളാണ് കളരിപ്പയറ്റിന്റെ മൂലം എന്ന് മറ്റൊരു ഐതിഹ്യം ഉണ്ട്. [1] തന്റെ ഗുരുവായ ശിവനിൽ നിന്ന് പരശുരാമൻ ഈ വിദ്യകൾ അഭ്യസിക്കുകയും കേരളസൃഷ്ടിക്ക് ശേഷം 21 ശിഷ്യന്മാർക്ക് പകർന്നു കൊടുക്കുകയും ചെയ്തു എന്നാണ് ഈ ഐതിഹ്യം. [1]
  • കേരളത്തിലെ തെക്കൻ ജില്ലകളിലും കന്യാകുമാരിയിലും അറിയപ്പെടുന്ന തെക്കൻ സമ്പ്രദായം (അടിമുറ, അടിതട എന്നീ പേരുകളിൽ അറിയപ്പെടുന്നത്) ആവിഷ്കരിച്ചത് അഗസ്ത്യമുനിയാണെന്നാണ്‌ പരക്കെയുള്ള വിശ്വാസം.
  • കളരിപ്പയറ്റ് ധനുർവേദ പാരമ്പര്യത്തിലധിഷ്ഠിതമാണെന്നും കളരി പരിശീലനത്തിന്റെ ഭാഗമായ ഉഴിച്ചിലും കളരി ചികിത്സയും ആയുർ‌വേദ പാരമ്പര്യമാണ്‌ എന്നു വിശ്വസിക്കുന്നവരും ഉണ്ട്.

ഉത്ഭവം[തിരുത്തുക]

കളരിപ്പയറ്റിന്റെ ഉത്ഭവത്തെക്കുറിച്ച് ആഴത്തിലുള്ള പഠനങ്ങളോ ഗവേഷണങ്ങളോ നടന്നിട്ടില്ലാത്തതിനാൽ അതിനെക്കുറിച്ചുള്ള പല സിദ്ധാന്തങ്ങൾ നിലവിലുള്ളത് അംഗീകരിക്കുക പ്രയാസമാണ്‌. വ്യക്തമായ രേഖകളുടേയും തെളിവുകലുടേയും അഭാവമാണ്‌ സിദ്ധാന്തരൂപവത്കരണത്തിന്‌ തടസ്സമാകുന്നത്. ചരിത്രകാരന്മാർ കളരിപ്പയറ്റിന് വേദ കാലത്തോളം പഴക്കമുണ്ടെന്നു കരുതുന്നു.

  • ചരിത്രകാരനായ പ്രൊഫസ്സർ ഫിലിപ്പ് സാരില്ലി, കളരിപയറ്റ് പന്ത്രണ്ടാം നൂറ്റാണ്ടിലാണ് ഉദയം ചെയ്തതെന്ന് അഭിപ്രായപ്പെടുന്നു.
  • ഇളംകുളം കുഞ്ഞൻ പിള്ളയാകട്ടെ പതിനൊന്നാം നൂറ്റാണ്ടിലെ ചേര-ചോള യുദ്ധകാലത്തിന്റെ ഉല്പന്നമാണെന്ന് സിദ്ധാന്തിക്കുന്നു. ഈ നൂറ്റാണ്ടു യുദ്ധവും കളരിയുടെ ഉത്ഭവവും മറ്റു ചരിത്രകാരന്മാർ അഭ്യൂഹമായിട്ടേ കാണുന്നുള്ളൂ. ഇളംകുളം വടക്കൻ പാട്ടുകളേയും വിദേശീയരുടെ പരാമർശങ്ങളേയും മാത്രം ആധാരമാക്കി സൃഷ്ടിച്ച സിദ്ധാന്തമാണെന്നും പ്രോ. എം.ജി.എസ്. നാരയണനേപ്പോലുള്ള പണ്ഡിതന്മാർ അഭിപ്രായപ്പെടുകയും നൂറ്റാണ്ടുയുദ്ധം പാടെ നിരാകരിക്കുകയും ചെയ്തിട്ടുണ്ട്.
  • കളരികളുടെ ഉത്ഭവവും പരശുരാമ ഐതിഹ്യവുമായി ബന്ധപ്പെടുത്തിയിട്ടുണ്ട്. കേരളോല്പത്തി യിൽ പറയുന്നത് കടലിൽ നിന്ന് കേരളം ഉയർത്തിയെടുത്ത പരശുരാമൻ തന്നെ 1008 കളരികളും സ്ഥാപിച്ചു എന്നാണ്‌. എന്നാൽ വ്യത്യസ്ത കേരളോല്പത്തികളിൽ വ്യത്യസ്തമായ വിശദീകരണമാണ്‌ ഉള്ളത്. ഗുണ്ടർട്ട് ശേഖരിച്ച് പ്രസിദ്ധപ്പെടുത്തിയ കേരളോല്പത്തിയിൽ 36000 ബ്രാഹ്മണരെ പരശുരാമൻ ആയുധ പാണികളായി കല്പിച്ചുവെന്നും, കേരളത്തിൽ 108 നാല്പത്തീരടി സ്ഥാനം ഉണ്ടാക്കി അനേകം കളരിപ്പരദേവതമാരേയും സങ്കല്പിച്ച് അവിടെ വിളക്കും പൂജയും കഴിപ്പിച്ചു എന്നാണ്‌ രേഖപ്പെടുത്തിയിരിക്കുന്നത്. [2] എം.ആർ. രാഘവ വാരിയർ പ്രസിദ്ധീകരിച്ച ഗ്രന്ഥത്തിൽ (കേരളോല്പത്തി ഗ്രന്ഥവരി:കോലത്തുനാട് വഴക്കം) 108 നല്പത്തീരടി സ്ഥാനങ്ങൾ പരശുരാമൻ ഉണ്ടാക്കി എന്നാണ്‌ പറയുന്നത്. ജംബുദീപോല്പത്തി എന്ന കേരളോല്പത്തിയിൽ മഹാക്ഷേത്രങ്ങൾ ജീർണ്ണത നീക്കിയ കാര്യമല്ലാതെ ബ്രാഹ്മണർക്ക് ആയുധം കല്പിച്ചതിനെപ്പറ്റി പരാമർശിക്കുന്നില്ല.
  • സംഘകാലത്ത്‌ നിലവിലിരുന്ന ആചാരങ്ങളും വീരക്കൽ ആരാധനയും കണക്കിലെടുത്ത്‌ ചിലർ അക്കാലത്തേ കളരി നിലവിലുണ്ടായിരുന്നു എന്ന് വിശ്വസിക്കുന്നു.[3]

കളരി എന്ന പദത്തിന്റെ മുൻകാലപ്രാബല്യം ഖലൂരികക്കപ്പുറത്തേക്കവർ കണ്ടെത്തിയിട്ടുണ്ട്‌. കളം, കളരി എന്നീ പദങ്ങൾ യുദ്ധക്കളം, അഭ്യാസപ്രകടന-മത്സരസ്ഥലങ്ങൾ എന്നീ അർത്ഥങ്ങളിലാണ്‌ മലയാളത്തിലും തമിഴിലും ഉപയോഗിക്കുന്നത്‌. പണ്ഡിതനായ ബറോ ഖലൂരിക കളരിയിൽ നിന്നാണ്‌ നിഷ്പന്നമായത് എന്ന അഭിപ്രായക്കാരനാണ്‌. [4] കളരി എന്ന പദം അകനാനൂറ് പുറനാനൂറ് എന്നീ സംഘകൃതികളിൽ നിരവധി തവണ ഉപയോഗിച്ചിട്ടുണ്ട്.[5] 'കള്ളിപാകിന കളരി' എന്ന പ്രയോഗം സംഘകാലകൃതികൾ ആവർത്തിക്കുന്നുണ്ട്. പിൽക്കാല സംഘകൃതിയായ പട്ടിണിപ്പാലയിൽ മക്കൾ വിളയാട്ടു കളരിയെക്കുറിച്ചും മുതുമരുത്വ മുരൺ കളരിയെക്കുറിച്ചും (ചികിത്സകൾ നടത്തിയിരുന്ന) പറയുന്നുണ്ട്.

വേദങ്ങളുമായുള്ള ബന്ധം[തിരുത്തുക]

ഭാരതിയ സംസ്കാരം വേദങ്ങളുമായി ബന്ധപെട്ടാണ് കിടക്കുന്നത്. നാലു വേദങ്ങളായ - ഋഗ്, യജുർ സാമ അഥർവ വേദങ്ങളും രണ്ടു ഉപ വേദങ്ങളായ ധനുർവേദം, ആയുർവേദം എന്നിവയാണ് വേദ സംസ്കാരത്തിന്റെ അടിസ്ഥാനം. വേദങ്ങളുടെ അടിസ്ഥാനത്തിൽ 64 കലാവിദ്യകൾ ആചാര്യന്മാർ ഉണ്ടാക്കിയിട്ടുണ്ട്.

ഇതിൽ ‘’വൃയാമകി വിദ്യ വിജഞാൻ ‘’ എന്ന കലാവിദൃയെ ഉപോത്ബലകമായി ആണ് കളരിപ്പയറ്റ് അടിസ്ഥാനപരമായി ചിട്ടപ്പെടുത്തിയത്. ധനുർ വേദവും ആയുർ വേദവും ആണ് ഇതിനു അടിസ്ഥാനപരമായി ഉപയോഗിച്ചത്.

കളരി[തിരുത്തുക]

കളരി എന്ന വാക്കു തന്നെ സൈനികാഭ്യാസത്തിനുള്ള സ്ഥലം എന്നർത്ഥം വരുന്ന ഖലൂരിക എന്ന സംസ്കൃത പദത്തിൽ നിന്നുമാണ് മലയാളത്തിലെത്തിയത് എന്ന് അഭിപ്രായമുണ്ട്. എം.ഡി.രാഘവൻ രചിച്ച ഫോക് പ്ലേയ്സ് ആൻഡ് ഡാൻസസ് എന്ന ഗ്രന്ഥത്തിലാണ് ഇത് ആദ്യമായി ഉന്നയിച്ചുകാണുന്നത്. എന്നാൽ അതിനേക്കാൾ മുൻപ് തന്നെ കളം, മുതുമരത്തുമൺ കളരി എന്നീ പ്രയോഗങ്ങൾ സംഘകാലത്തിലെ കൃതിയായ പത്തുപാട്ടിൽ കാണുന്നുമുണ്ട്. ഭാരതത്തിൽ ആയുധാഭ്യാസത്തിനും വ്യായാമത്തിനുമായി ഇത്തരം കേന്ദ്രങ്ങൾ പലപ്രദേശങ്ങളിലും നിലനിന്നിരുന്നതായും അവ പ്രാദേശികനാമങ്ങളിൽ അറിയപ്പെട്ടിരുന്നതായും കാണാം . സാമൂഹിക വ്യവസ്ഥയുടെ ഭാഗമായി രൂപം കൊണ്ട ഇത്തരം കേന്ദ്രങ്ങളെ അവയിലെ പരിശീലന സമ്പ്രദായങ്ങളുടേയും ആയോധനമുറകളുടേയും അടിസ്ഥാനത്തിൽ പരിശോധിക്കുമ്പോൾ കേരളത്തിലെ കളരികൾ വ്യത്യസ്തത പുലർത്തുന്നു .

കുഴിക്കളരിയും അങ്കക്കളരിയും[തിരുത്തുക]

ചെറുകളരി അഥവാ കുഴിക്കളരി , അങ്കക്കളരി എന്നിങ്ങനെ രണ്ടു തരം കളരികളാണ് ആദ്യകാലങ്ങളിലുണ്ടായിരുന്നത് . ആദ്യത്തേത് കളരിപ്പയറ്റ് ശാസ്ത്രീയമായി അഭ്യസിപ്പിക്കുന്ന പരിശീലനകേന്ദ്രങ്ങളാണ് . അങ്കംവെട്ടലിന്റെ ആവശ്യത്തിലേക്കാണ് അങ്കക്കളരി . എല്ലാവർക്കും സൗകര്യപ്രദമായ പൊതുസ്ഥലത്ത് താല്കാലികമായി നിർമ്മിക്കപ്പെടുന്ന അങ്കക്കളരിയിൽ വച്ചാണ് തർക്കങ്ങൾ പരിഹരിക്കുന്നതിനായുള്ള അങ്കം വെട്ടിയിരുന്നത് . തർക്കത്തിൽ ഉൾപ്പെടുന്ന കക്ഷികൾ അവരവർക്കായി അങ്കംവെട്ടാനുള്ള പോരാളികളെ ഏർപ്പാടു ചെയ്യുന്നു . ജീവഹാനി സാധാരണയായതിനാൽ അങ്കംവെട്ടുന്നവർക്ക് വൻതുക പ്രതിഫലം നൽകണമായിരുന്നു . തുടർന്ന് നിശ്ചിത സ്ഥലത്ത് മുൻകൂട്ടി നിശ്ചയിച്ച സമയത്ത് ഇരുകക്ഷികളുടേയും പോരാളികൾ അങ്കത്തട്ടിൽ ഏറ്റുമുട്ടുന്നു . അങ്കത്തിൽ ജയിച്ച പോരാളിയുടെ കക്ഷിയാണ് ജയിച്ചതായി പ്രഖ്യാപിക്കുക .

പ്രതിഷ്ഠാദി സങ്കല്പങ്ങൾ[തിരുത്തുക]

കളരിപ്പയറ്റ് അഭ്യസിപ്പിക്കുന്ന കളരിയുടെ ചില പ്രത്യേക സ്ഥാനങ്ങൾ ഗുരുഭൂതന്മാർക്കായും ആരാധനാമൂർത്തികൾക്കുമായി സങ്കല്പിക്കപ്പെട്ടിരിക്കുന്നു.[6] ചില സങ്കല്പങ്ങൾക്കായി പ്രത്യേക പീഠങ്ങൾ അഥവാ തറകൾ അതാതു സ്ഥാനങ്ങളിൽ നിർമ്മിക്കുന്നു .

പൂത്തറ
  • പൂത്തറ - കളരിയിലെ ഏറ്റവും പ്രധാന സങ്കല്പമായ കളരി പരദേവതയുടെ സ്ഥാനമാണിവിടം . കളരിയുടെ തെക്കുപടിഞ്ഞാറെ മൂലയിലാണ് (കന്നിമൂല) പൂത്തറ . മൂലാധാരത്തിൽ ആരംഭിച്ച് സ്വാധിഷ്ഠാനം, മണിപൂരകം, അനാഹതം, വിശുദ്ധി, ആജ്ഞ, എന്നിങ്ങനെ ആറാധാരങ്ങളിലൂടെയുള്ള കുണ്ഡലിനിയുടെ യാത്രയുടെ സൂചന പൂത്തറയിലുണ്ട് . ഏഴു പടികളുള്ള പൂത്തറയിലെ ആറു പടികളും ആറാധാരങ്ങളെ പ്രതിനിധാനം ചെയ്യുന്നു . ഏഴാമത്തെ പടി മണിത്തറ , മണിപീഠം , ഏഴാം തൃപ്പടി എന്നെല്ലാം അറിയപ്പെടുന്നു . ഏഴുവിരൽ നീളമുളളതും ഒരു കൂമ്പാകൃതിയിൽ ചെത്തിയെടുത്തതുമായ ഒരു കല്ല് മണിത്തറയിൽ കളരി പരദേവതയെ സങ്കല്പിച്ചുകൊണ്ട് പ്രതിഷ്ഠിക്കുന്നു .
  • ഗണപതിത്തറ - ഗണപതിപീഠം അഥവാ ഗണപതിത്തറ ഗണപതിയ്ക്കായുള്ള സങ്കല്പസ്ഥാനമാണ് .
  • നാഗതറ - പൂത്തറയുടെയും ഗണപതിത്തറയുടെയും ഇടയിലാണ് നാഗത്തറ . ഇവിടെ നാഗപ്രതിഷ്ഠാസങ്കല്പം മാത്രമാണുള്ളത് . പ്രത്യക പീഠമില്ല .
  • ഗുരുപീഠങ്ങൾ - ഗണപതിത്തറയ്ക്ക് വടക്കായി മരംകൊണ്ടുണ്ടാക്കിയതും നാലു കാലുകളുള്ളതുമായ രണ്ട് പീഠങ്ങൾ സ്ഥാപിക്കുന്നു . ആദ്യപീഠം നാല് സമ്പ്രദായ ഗുരുക്കന്മാരെയും 21 ഉപഗുരുക്കന്മാരെയും സങ്കല്പിക്കാനുള്ളതാണ് . അതാതു കളരികളിലെ പ്രധാനഗുരുനാഥന്മാരുടെ ഗുരുഭൂതന്മാരെ സങ്കല്പിക്കാനാണ് രണ്ടാമത്തെ പീഠം .

ഇവയ്ക്കു പുറമേ ധനുകോണിലും മീനകോണിലും മിഥുനകോണിലും യഥാക്രമം അന്തിവീരർ, ഭദ്രകാളി, വേട്ടയ്ക്കൊരുമകൻ എന്നീ ദേവതാസങ്കല്പങ്ങളുണ്ടെങ്കിലും പ്രത്യേക പീഠങ്ങളില്ല. കൂടാതെ അഷ്ടദിക് പാലകരെ കളരിയിലെ എട്ടു ദിക്കിലും പൂവിട്ടു ആദരിക്കുന്നു

കളരിമുറകൾ[തിരുത്തുക]

ഉറുമിപ്പയറ്റ്

പ്രധാനമായും മൂന്നു ശൈലികളാണ് കളരിപ്പയറ്റിലുള്ളത്: തെക്കൻ രീതിയും, വടക്കൻ രീതിയും, തുളുനാടനും. വടക്കൻ രീതി കൂടുതൽ അനുക്രമങ്ങളും ഒഴുക്കുമുള്ള ശൈലി അനുവർത്തിക്കുമ്പോൾ, തെക്കൻ രീതിയാകട്ടെ, വേഗതയേറിയ ശക്തമായ നീക്കങ്ങൾക്ക് മുൻ‌തൂക്കം നൽകുന്നു. വടക്കൻ ശൈലി കൂടുതൽ ആയുധങ്ങൾ ഉപയോഗിക്കുമ്പോൾ, തെക്കോട്ടാകട്ടെ, മെയ്യു കൊണ്ടുള്ള പ്രയോഗങ്ങളാണ് കൂടുതൽ.

തെക്കൻ ശൈലിക്ക് സംഘകാലത്തോളം പഴക്കമുണ്ടെന്നു വിശ്വസിക്കപ്പെടുന്നു. നായൻ‌മാർ, വെള്ളാളർ, നാടാർമാർ തുടങ്ങിയ സമുദായത്തിൽ പെട്ടവരാണ് പ്രധാനമായും മുൻ‌കാലങ്ങളിൽ ഇതനുഷ്ഠിച്ചു വന്നത്. അഗസ്ത്യ മുനിയിൽ നിന്നാണ് തെക്കൻ രീതി വന്നതെന്നാണ് പഴംകഥകൾ. അടി തട, മർമ്മ അടി തുടങ്ങിയ പേരുകളും പ്രചാരത്തിലുണ്ട്.

കളരിപ്പയറ്റ് ശരീരത്തിനും മനസ്സിനും ഉന്മേഷവും ഏകാഗ്രതയും തരുന്നു. ഇത് ശരീരത്തിലെ ദുർമേദസ്സ് മാറ്റി ശരീരത്തിന് ആരോഗ്യവും രൂപവും നൽകുന്നു. ഇതു സത്യത്തിന്റേയും ധർമത്തിന്റെയും മാർഗ്ഗം കർശനമായി പാലിക്കണമെന്നു നിഷ്കർഷിക്കുന്നതും ഉത്തമനായ ഒരു വ്യക്തിയെ രൂപപ്പെടുത്താൻ സഹായിക്കുന്നതുമാണ്. സധർമ്മവും, ക്ഷമയും, സൽസ്വഭാവവും, ബുദ്ധിയും തുടങ്ങി എല്ലാ നല്ല ഗുണങ്ങളും ഉള്ള ശിഷ്യന്മാരെ മാത്രമേ ഗുരുക്കന്മാർ ഇതിനിടെ എല്ലാ വശങ്ങളും അഭ്യസിപ്പിച്ചിരുന്നുള്ളു.ലോകമാകമാനം വിവിധ തരത്തിലിള്ള ആയോധന കലകൾ നിലവിലുണ്ടായിരുന്നെങ്കിലും കേരളത്തിലെ ആയോധന കലയായ കളരിപ്പയറ്റ് ഇപ്പോഴും സവിശേഷമായിത്തന്നെ നിലകൊള്ളുന്നു. വിവിധ അലിഖിത നിയമങ്ങളാൽ കലരിപ്പയറ്റ് മനുഷ്യകുലത്തിന് സത്യത്തിന്റെയും, ധർമ്മത്തിന്റെയും, നീതിയുടേയും ഉന്നത മൂല്യങ്ങൾകൂടി പരിശീലിപ്പിച്ചിരുന്നു. സ്ത്രീകളോടും, കുട്ടികളോടും, വൃദ്ധരോടും അക്രമം പാടില്ലെന്ന് കളരിപ്പയറ്റ് നിഷ്കർഷിക്കുന്നു. അധർമത്തിന് വേണ്ടി പോരാടാൻ പാടില്ല. ആയുധമില്ലാത്തവനോട് ആയുധസമേതം പോരാടാൻ പാടില്ല. ചതിപ്രയോഗങ്ങൾ കളരിപ്പയറ്റ് അനുവദിക്കുന്നില്ല.

കളരി അഭ്യാസത്തിലെ രഹസ്യം[തിരുത്തുക]

കളരിയിലെ ഓരോ പഠനത്തിനും ഒരു പ്രയോഗ വശം ഉണ്ട് എന്ന് ചുരുക്കം ചില ആളുകള്ക്കെ അറിയുകയുള്ളു. ഇതിനു "കരമേറ്റം" എന്നോകെ വടകരയിൽ പറയാറുണ്ട്.. ഉദാഹരണത്തിന് "കൈ തൊഴുത് മാറിനു പിടച്ചു" ഇതിൽ മനുഷ്യ ശരീരത്തിലെ ഒട്ടു മിക്ക മർമ്മ ഭാഗങ്ങളും കൂപ്പിയ രണ്ടു കൈയി കൾക്കിടയിൽ ഒളിപിച്ചു പ്രതിരോധത്തിനും ‍ ആക്രമണത്തിനും ഉള്ള സാദ്യതകൾ അന്ദർലീനമായി കിടക്കുന്നു. പ്രയോഗവശങ്ങൾ പഠിക്കാത്തവർക്ക് കളരി ഒരു വ്യായാമ മുറ മാത്രമായി ചുരുങ്ങി പോകുന്നു.

കളരിപ്പയറ്റിലെ സമ്പ്രദായങ്ങളും അടിസ്ഥാന അഭ്യാസങ്ങളും[തിരുത്തുക]

കളരിയുടെ വികാസത്തിന് പലപ്പോഴും വികാതമായി നിൽക്കുനത് അതിനു ഒരു ഏക രൂപം ഇല്ല എന്നതാണ്. വടക്കൻ, തെക്കൻ, തുളുനാടൻ എന്നിങ്ങനെ പലവിദതിൽ പല പേരുകളിൽ ചിതറികിടക്കുന്നു .എന്തിനേറെ പറയുന്നു ഓരോ ഗുരുക്കൾക്കനുസരിച്ചു കളരി വേത്യസ്തമായി പഠിപ്പിച്ചു പോകുന്നു.

വടക്കൻ കളരിയുടെ ആസ്ഥാനമായ വടകരയിൽ പോലും പ്രദാനമായ ഗുരുക്കന്മാരുടെ ശിക്ഷണത്തിൽ വെത്യസ്തമായിട്ടാണ് കളരിപ്പയറ്റു പഠിപ്പികുന്നത്. പലപ്പോഴും ഗുരുക്കന്മാരുടെ പഠനത്തിന്റെ ആഴതിനനുസരിച്ചു സമ്പ്രദായങ്ങളും ഉണ്ടായി.

എല്ലാ സമ്പ്രദായങ്ങളും ശരിയായി അപഗ്രദനംച്ചെയിതാൽ ഒരു ഏകരൂപം നമുക്ക് ദർശിക്കാൻ കഴിയും. കാരണം ഒരു പയറ്റു ഉണ്ടാവുന്നത് അടവുകൾ, ചുവടുകൾ, നീക്കങ്ങൾ, ഓതിരം, ഓളവു, കടകം തുടങ്ങിയ അനേകം ചെറിയ ചെറിയ അഭ്യാസങ്ങൾ ചേർത്ത് വച്ചിട്ടാണ്. അതാണ് കളരിപ്പയറ്റിന്റെ അടിസ്ഥാനം. ഇത് മേയ്യിതോഴിൽ, കൊൽതാരി, അങ്കതാരി, വെറും കൈയി എന്നിവയിൽ വെവ്വേറെ നമുക്ക് നിരീക്ഷിക്കാവുന്നതാണ്.

സംഗീതത്തിൽ സപതസ്വരങ്ങൾ എന്നപോലെ കളരിപ്പയറ്റിലെ അടിസ്ഥാന അഭ്യാസങ്ങളെ ഒരു ഏക രൂപത്തിൽ എത്തിക്കാൻ കേരളത്തിലെ കളരിഗുരുക്കന്മാർക്ക് കഴിഞ്ഞാൽ കളരിപ്പയറ്റിനെ അതിന്റെ വിരാട് സ്വരൂപത്തിൽ ലോകത്തിനു പരിചയപെടുത്താൻ നമ്മുക്ക് കഴിയും. കളരിപ്പയറ്റിന്റെ അടിസ്താന സ്വരൂപം ഹൃദിസ്ഥമാക്കിയ ഒരാൾക്ക് അത് ഉപയോഗിച്ച് ഓരോരുത്തരുടെ മനോഗതവും അറിവും ഉപയോഗിച്ച് നിരവധി വെത്യസ്തമായ പയറ്റുകൾ ഉണ്ടാക്കാവുന്നതാണ്. അടിസ്ഥാന അഭ്യാസം പൂർണ്ണതയിൽ എത്തിക്കാൻ ഉതകുന്ന പഠന രീതി കളരിപ്പയറ്റിന്റെ പരിശീലന സിലബസായി ചിട്ടപെടുതാവുന്നതാണ്.

ഇങ്ങനെ തിരുവനതപുരം മുതൽ കാസര്കോട് വരെ അടിസ്ഥാന പരിശീലനക്രമം ഏക രൂപത്തിൽ ഉണ്ടാക്കാൻ കഴിഞ്ഞാൽ ബ്രിടീഷു കാരുടെ നിരോദനം നീക്കിയ ശേഷം കളരിക്ക് കിട്ടുന്ന ഏറ്റവും വലിയ പ്രോത്സാഹനം ആയിരിക്കും. ഇതിനു വേണ്ടിയുള്ള ഒരു സൂചകരൂപം താഴെകൊടുക്കുന്നുണ്ട്.

പരിശീലനം[തിരുത്തുക]

മതത്തിന്റെയും ആത്മീയതയുടെയും അംശങ്ങൾ കളരിപ്പയറ്റിൽ ഉൾക്കൊണ്ടിരിക്കുന്നു. ശിഷ്യന്മാരുടെ ധാർമികത, സൽസ്വഭാവം, നീതിബോധം, ക്ഷമ, ധൈര്യം, ദൈവഭക്തി, ഗുരുഭക്തി തുടങ്ങി പല ഗുണങ്ങളും നിരീക്ഷിച്ച് ബോധ്യപ്പെട്ട ശേഷമേ പ്രധാനപ്പെട്ട പല വിദ്യകളും കളരിപ്പയറ്റിൽ ഗുരുക്കന്മാർ പരിശീലിപ്പിക്കാറുള്ളു. കാരണം മുകളിൽ പറഞ്ഞ ഗുണങ്ങൾ ഇല്ലാത്ത ഒരാൾക്കു പരിശീലനവും ആയുധവും കിട്ടിയാൽ സമൂഹത്തിന് ഗുണമാവില്ലെന്ന് ഉള്ള വിലയിരുത്തൽ തന്നെ. അഭ്യസിപ്പിക്കാനും യോഗ്യത നിശ്ചയിച്ചിരുന്നു.ഗുരുകുല സമ്പ്രദായത്തിലുള്ള പരിശീലന രീതിയാണ് കളരിപ്പയറ്റിനുള്ളത്.

പരിശീലന സമയത്ത് സംഭവിക്കുന്ന അപകടങ്ങൾ പരിഹരിക്കാൻ കൂടിയുള്ള അറിവും പരിശീലനവും ലഭിച്ച ഒരാൾ മാത്രമേ പരിശീലകനാകാവൂ.വർഷങ്ങളുടെ തപസ്യയും,നിരന്തര പരിശീലനവും, അർപ്പണബോധവും ആവശ്യമുള്ള ഒരു കലയാണ് കളരിപ്പയറ്റ്. ഗുരുവിന്റെ മരണശയ്യയിലും തന്റെ പ്രിയപ്പെട്ട ശിഷ്യന്മാർക്ക് ഉപദേശിക്കാൻ പലതും ഉണ്ടാവുമെണ് പറയപ്പെടുന്നു. ആചാ‍ര നിഷ്ടകൾ പാലിച്ച്, നിശ്ചിത അളവുകൾക്കനുസരിച്ച് തയ്യാറാക്കിയ കളരിയിൽ, പ്രത്യേക വേഷം ധരിച്ചാണ് കളരിപ്പയറ്റ് അഭ്യസിക്കാ‍റ്. കളരിപയറ്റിന്റെ പഠനം പ്രധാനമായി നാലു ഭാഗമായി ആണ് ചിട്ടപെടുത്തിയിട്ടുള്ളത്.

എം ഇ സുരേഷ് ഗുരുക്കളുടെ നേതൃത്വത്തിൽ കടത്തനാട് ചന്ദ്രൻ ഗുരുക്കളുടെ കളരി പഠന രീതി പുസ്തക രൂപത്തിൽ "കടത്തനാടൻ കളരിപ്പയറ്റ് അടിസ്ഥാന തത്വങ്ങൾ" എന്ന ഗ്രന്ഥത്തിൽ വിശദമായി പ്രതിപാതിച്ചിട്ടുണ്ട്.

മേയ്യിതോഴിൽ[തിരുത്തുക]

ചുഴറ്റികാൽ.jpeg

ഇതിലൂടെ ആണ് ഒരു അഭ്യാസി ഉണ്ടാകുന്നത്. ഇതുതന്നെ ആണ് കളരിപ്പയറ്റിലെ പ്രധാന ഭാഗവും. മേയിതോഴിൽ ശരിയായി പരിശീലിച്ച ഒരാളുടെ ശരീരവും മനസും കളരിപ്പയറ്റിന്റെ പ്രായോഗികമായ അഭ്യാസ പരിശീലനത്തിന് രൂപാന്തരപ്പെട്ടിരിക്കും.

ഇതിലൂടെ ആണു കളരി പഠനം ആരംഭിക്കുന്നത്. കടത്തനാട്ടിലെ മെയ്യിതൊഴിൽ പാഠ്യ പദ്ധതി താഴെ കൊടുക്കുന്നു.[7]

Panchu kayi vanakkam.jpeg
  • വണക്കങ്ങൾ
  • ഗുരു വണക്കം
  • ഈശ്വര വണക്കം
  • ദിക്ക് വണക്കം
  • നാഗ വണക്കം
  • സൂര്യ ചന്ദ്ര വണക്കങ്ങൾ
  • തെമ്പും കൈയ്യി വണക്കം
  • കൂട്ട് മുഷ്ട്ടി കയ്യി വണക്കം
  • പഞ്ജു കൈ വണക്കം
  • അടി കയ്യി വണക്കം
  • വെട്ടു കയ്യി വണക്കം
  • തേറ്റ കയ്യി വണക്കം
  • നേർ കാൽ വണക്കം
  • കൊണ്കാൽ വണക്കം
  • വീത് കാൽ വണക്കം
  • അകം കാൽ വണക്കം
  • വെട്ടി കാൽ വണക്കം
  • ചുഴറ്റി കാൽ വണക്കം
  • പതിനെട്ടു മെയ്യടവുകൾ
ഒറ്റക്കോൽ
  1. തിരിഞ്ഞു വലിയൽ
  2. വാങ്ങി വലിയൽ
  3. പകർന്നു വലിയൽ
  4. വീത് പുളയൽ
  5. വളയൽ
  6. സൂചിക്ക് ഇരിക്കൽ
  7. തോൾ കണ്ടു പൊങ്ങൽ
  8. കുനിഞ്ഞു പൊങ്ങൽ
  9. വളഞ്ഞു പൊങ്ങൽ
  10. ചവുട്ടി പൊങ്ങൽ
  11. തരിഞ്ഞു ചാടൽ
  12. കിടന്നു ചാടൽ
  13. പകരി ചാടൽ
  14. പതുങ്ങി ചാടൽ
  15. ഓതിരം മറിയൽ
  16. ചരിഞ്ഞു മറിയൽ
  17. കരണം മറിയൽ
  18. അന്ത മലക്കം
  • ഇരുപത്തിനാല് മെയ് പയറ്റുകൾ
  • 6 കയ്യി കുത്തി പയറ്റുകൾ
  • 6 കാലു ഉയർത്തി പയറ്റുകൾ
  • 6 പകർച്ച കയ്യി പയറ്റുകൾ
  • 6 പകർച്ച കാൽ പയറ്റുകൾ

കോൽത്താരി[തിരുത്തുക]

വിവിധ അളവിലുള്ള വടി കൊണ്ടുള്ള പരിശീലനവും പ്രയോഗവുമാണ്‌ ഇതിൽ ഉള്ളത്.

  • മുച്ചാ ൺ പയറ്റു
  • ആർചാൺ പയറ്റു
  • കേട്ട് താരി പയറ്റു
  • പന്തീര്ചാൺ വീശൽ
  • പട വീശൽ
  • ഒറ്റ പയറ്റു
കടത്താനാട്ടിൽ 12 ഒറ്റപ്പയറ്റുകൾ കണ്ടുവരുന്നു

കളരിൽ ഏറ്റവും മെയ് സ്വാദീനം ആവശ്യമായതും അപകടം നിറഞ്ഞതുമാണ് ഈ വിഭാഗം. ഒറ്റ പയറ്റിലെ ഓരോ പ്രയോഗവും കൃത്യമായും മർമ്മ സ്ഥാനങ്ങളിലേക്കാണ്. ആനയും സിംഹവും തമ്മിലുള്ള പയറ്റായി കണക്കാകുന്നു. ഒറ്റ പന്ത്രണ്ടും പയറ്റി തെളിഞ്ഞവൻ തികഞ്ഞ അഭ്യാസിയാണ്.

ഒറ്റ പയറ്റാൻ ഉപയോഗിക്കുന്ന "ഒറ്റ കോൽ" ആണ് ചിത്രത്തിൽ ഉള്ളത്

അങ്കത്താരി[തിരുത്തുക]

വാളും പരിചയും.jpeg

വിവിധ ലോഹ ആയുധങ്ങൾ കൊണ്ടുള്ള പരിശീലനവും പ്രയോഗവുമാണ്‌ ഇതിൽ ഉള്ളത്.

  • വാൾ പയറ്റു
  • വാളും പരിചയും പയറ്റു
  • കടാര പയറ്റു
  • കുന്ത പയറ്റു
  • മറപിടിച്ചു കുന്ത പയറ്റു
  • ഉറുമി വീശൽ


വെറും കൈ[തിരുത്തുക]

നാലാമത്തെ സ്റ്റേജ് ആണ് വെറും കയ്യി.

Prayoga kaikal
Prayoga kaalukal
അടി തട.jpeg

ആറ്‌ പ്രയോഗ കൈകൾ

  • തെമ്പു കൈ
  • പഞ്ച് കൈ
  • അടി കൈ
  • വെട്ടു കൈ
  • തെറ്റ കൈ
  • കൂട്ട് മുഷ്ടി കൈ

ഇതുമുമ്പേ ആണ് ശരീരത്തെ കാരിരുമ്പ് പോലെ ഉറപ്പിക്കാനുള്ള ശാസ്ത്രിയമായ ഒരു വിഭാഗം കളരിപ്പയറ്റിലുണ്ട്. വടകരയിൽ തന്നെ വളരെ ചുരുങ്ങിയ ഗുരുക്കൻ മാർക്കു മാത്രമെ ഇതിനെകുറിച്ചു അറിവുള്ളൂ.

മർമ്മ പ്രയോഗങ്ങൾ[തിരുത്തുക]

ഇതു കൂടാതെ നാലാം ഭാഗത്തിലൂടെ തന്നിലെ കഴിവ് പ്രായോഗികമായി ശത്രുവിനെതിരെ പ്രയോഗിക്കാൻ പരിശീലിച്ച ഒരു അഭ്യാസിക്ക് വീണ്ടും ലോകത്തിലെ ഒരു അയോധനകലയിലും ഇല്ലാത്ത ഒരു സമഗ്രമായ വിഭാഗവും കളരിയിൽ ഉണ്ട്. അതാണ് മർമ്മ പ്രയോഗങ്ങൾ. കളരിയിലെ പ്രയോഗങ്ങൾ മനുഷ്യ ശരീരത്തിലെ അറുപത്തിനാല് കുലബ്യാസ മർമ്മങ്ങളിലേക്ക് അനുയോജ്യമായി ഫോക്കസ് ചെയുക എന്നതാണ് ഇതിൽ പ്രധാനമായി പഠിക്കുന്നത്.

കളരി ചികിൽസ[തിരുത്തുക]

പിന്നെ വളരെ വലിയ ഒരു ഭാഗമാണ് കളരി ചികിൽസ. പിന്നെ ഭാരതത്തിലെ എല്ലാ കലകളുടെയും അവസാനം ആധ്യതമികതയാണ്. അതെ പോലതന്നെ അവസാനം ശാന്തതയിലൂടെ മോക്ഷത്തിലെക്കുള്ള മാർഗ്ഗമാണ് കളരിയും.

വടിവുകളും ചുവടുകളും[തിരുത്തുക]

  • ഗജവടിവ്
  • അശ്വവടിവ്
  • സിംഹവടിവ്
  • വരാഹവടിവ്
  • മത്സ്യവടിവ്
  • മാർജ്ജാരവടിവ്
  • കുക്കുടവടിവ്
  • സർപ്പവടിവ്

അങ്കക്കളരിയും, അങ്കത്തട്ടും[തിരുത്തുക]

കളരിപ്പയറ്റിനുപയോഗിക്കുന്ന ആയുധങ്ങൾ[തിരുത്തുക]

മൂന്ന് ഞാൺ നീളമുള്ള വടി (കുറുവടി), ആറ് അടി നീളമുള്ളതും, എട്ട് അടി നീളമുള്ളതുമായ വടികൾ, കുന്തം, കത്തി, ചുരിക, വാൾ, പരിച, ഉറുമി, ഗദ തുടങ്ങി പലതരത്തിലുള്ള ആയുധങ്ങൾ ഉപയോഗിച്ചുള്ള പരിശീലനമുറകൾ ഉണ്ടെങ്കിലും ഒരു തികഞ്ഞ അഭ്യാസിക്ക് കയ്യിൽ കിട്ടുന്നതെന്തും ആയുധമാക്കാൻ കഴിയും. കത്തിയും, ഉറുമിയും ഉൾപ്പെടെ ഏതു ആയുധവും വെറും കയ്യോടെ ശത്രുവിന്റെ കയ്യിൽ നിന്നും പിടിച്ച് വാങ്ങാനും തിരിച്ചു ഉപയോഗിക്കാനും കളരിപ്പയറ്റിൽ പരിശീലിപ്പിക്കുന്നു.

കളരിപ്പയറ്റിൽ ഉപയോഗിക്കുന്ന ആയുധങ്ങൾ
Kalaripayattu weapons.jpg
കെട്ടുകാരി/നെടുവടി/പിറമ്പ്/ശരീരവടി
Longstaff
കുരുന്താടി/ചെറുവടി/മുച്ചൻ
വടി
ലാത്തി
Long stick
ഉറുമി/ചുട്ടുവാൾ
വഴക്കമുള്ള വാൾ
കുറുവടി
നീളം കുറഞ്ഞ വടി
ഒറ്റ
വളഞ്ഞ തരം വടി
ഗദ
Club/Mace
കതാർ
ഒരു തരം കത്തി
വെട്ടുകത്തി
Machete/Kukri
ചുരിക
ചെറിയ വാൾ
വാൾ
നീളമുള്ള വാൾ
പരിച
Buckler
കുന്തം
Spear
മുൻപ് ഉപയോഗിച്ചിരുന്നത്
പോണ്ടി
അമ്പും വില്ലും
അമ്പും വില്ലും
വെണ്മഴു
ഒരു തരം മഴു
കത്തുതല
തൃശ്ശൂലം
Trident


പതിനെട്ട് അടവുകൾ[തിരുത്തുക]

  1. ഓതിരം
  2. കടകം
  3. ചടുലം
  4. മണ്ഡലം
  5. വൃത്തചക്ര
  6. സുഖംകാളം
  7. വിജയം
  8. വിശ്വമോഹനം
  9. അന്യോന്യം
  10. സുരഞ്ജയം
  11. സൌഭദ്രം
  12. പാടലം,
  13. പുരഞ്ജയം
  14. കായവൃത്തി
  15. സിലാഘണ്ഡം
  16. ഗദാശാസ്‌ത്രം
  17. അനുത്തമം
  18. ഗദായഘട്ടം

എന്നിങ്ങനെ പതിനെട്ടടവുകൾ കളരിയിൽ കാണാവുന്നതാണ്‌.

പതിനെട്ടു അടവുകളെ പറ്റിയുള്ള മറ്റൊരു വിവരം

  1. ഓതിരം
  2. ഒറ്റ പ്പയറ്റ്
  3. തട്ട്
  4. വാളുവലി
  5. പരിചതട്ട്
  6. അന്തക്കരണം
  7. കുന്തം കുത്ത്
  8. തോട്ടിവലി
  9. തടവ്
  10. തിക്ക്
  11. ചാട്ടുകയറ്റം
  12. മർമ്മക്കയ്യ്
  13. മാറിത്തടവ്
  14. ആകാശപ്പൊയ്യത്ത്
  15. കുന്നമ്പട
  16. നിലമ്പട
  17. തൂശിക്കരണം
  18. തുണ്ണിപ്പൊയ്ത്ത്

ഇതു കൂടി കാണുക[തിരുത്തുക]

അവലംബം[തിരുത്തുക]

Commons:Category
വിക്കിമീഡിയ കോമൺസിലെ Kalarippayattu എന്ന വർഗ്ഗത്തിൽ ഇതുമായി ബന്ധപ്പെട്ട കൂടുതൽ പ്രമാണങ്ങൾ ലഭ്യമാണ്:
  1. ശ്രീകൃഷ്ണശർമ്മ- കലയും വിദ്യയുമായി വികസിച്ച കേരളത്തിന്റെ ആയോധന പാരമ്പര്യം എന്ന ലേഖനത്തിൽ; കേസരി ആഴ്ചപ്പതിപ്പ് 1973. പുറം 8; പ്രതിപാദിച്ചിരിക്കുന്നത്. “കെ വിജയകുമാറിന്റെ ഗ്രന്ഥത്തിൽ
  2. ഹെർമൻ ഗുണ്ടർട്ട് കേരളോല്പത്തി, ബാലൻ പ്രസിദ്ധീകരണം, തിരുവനന്തപുരം 1961 താൾ 8,9
  3. എൻ., അജിത്ത്കുമാർ (2004). കേരള സംസ്കാരം. തിരുവനന്തപുരം: സാംസ്കാരിക പ്രസിദ്ധീകരണ വകുപ്പ്, കേരള സർക്കാർ. ഐ.എസ്.ബി.എൻ. 81-88087-17-3. 
  4. Burrow T -DraviDian Studies VII University bulletin of School of Oriental and African Studies, 1947 page 367
  5. അകനാനൂറ് വാല്യം ഒന്ന്. വിവർത്തനം നെന്മാറ പി. വിശ്വനാഥൻ നായർ. കേരള സാഹിത്യ അക്കാദമി. തൃശൂർ
  6. പി . ബാലകൃഷ്ണന് കളരിപ്പയറ്റ്, ഗ്രന്ഥകര്ത്താവ് , തിരുവനന്തപുരം 1994
  7. കടത്തനാടൻ കളരിപ്പയറ്റ് അടിസ്ഥാന തത്ത്വങ്ങൾ എന്ന ഗ്രന്ഥം

കുറിപ്പുകൾ[തിരുത്തുക]

  • ^ ചില താളിയോല ഗ്രന്ഥങ്ങളിൽ പരശുരാമനിൽ നിന്ന് ദ്രോണം വെള്ളി, ഉഗ്രം വെള്ളി, കോരം വെള്ളി, ഉള്ളൂർ തുരത്തിയാട് എന്നിങ്ങനെ നാൾ ബ്രാഹ്മണ ഇല്ലങ്ങൾക്ക് കളരി വിദ്യ ലഭിച്ചു എന്ന് കാണുന്നുണ്ട്.
"http://ml.wikipedia.org/w/index.php?title=കളരിപ്പയറ്റ്&oldid=1908323" എന്ന താളിൽനിന്നു ശേഖരിച്ചത്