വന്ധ്യത

വിക്കിപീഡിയ, ഒരു സ്വതന്ത്ര വിജ്ഞാനകോശം.
Jump to navigation Jump to search
Infertility
വർഗീകരണവും ബാഹ്യ ഉറവിടങ്ങളും
സ്പെഷ്യാലിറ്റിurology, reproductive endocrinology and infertility
ICD-10N46, N97.0
ICD-9-CM606, 628
DiseasesDB21627
MedlinePlus001191
eMedicinemed/3535 med/1167
MeSHD007246

മനുഷ്യരിൽ കുട്ടികളുണ്ടാകാത്ത അവസ്ഥയെയാണ്‌ വന്ധ്യത (Infertility‌) എന്നു പറയുന്നത്. കൂടുതൽ വ്യക്തമായി നിർ‌വചിക്കുകയാനെങ്കിൽ സ്വാഭാവികമായ ലൈംഗിക ബന്ധത്തിൽ ഏർപ്പെടുന്ന ദമ്പതികൾക്ക് ഒരു നിശ്ചിത കാലയളവിനുശേഷവും ഗർഭധാരണം സാധിക്കാത്ത അവസ്ഥയെയാണ് വന്ധ്യത എന്നു പറയുന്നത്. ചുരുങ്ങിയത് ആറു മാസമെങ്കിലും ഒരുമിച്ചു താമസിക്കുകയും സ്വാഭാവിക ലൈംഗിക ബന്ധത്തിൽ ഏർപ്പെടുകയും ചെയ്തിട്ടും ഗർഭധാരണം നടക്കാതെ വരുമ്പോൾ അതിനെ വന്ധ്യതയായി വിലയിരുത്തുന്നുള്ളു.ആർത്തവ ചക്രത്തിലെ അണ്ഡവിസർജന കാലത്താണ് (ovulation) സ്ത്രീകളിൽ ഗർഭധാരണ സാധ്യത ഏറ്റവും കൂടുതലുണ്ടാവുക. അതിനാൽ ഈ ദിവസങ്ങളിൽ കുറച്ചു മാസമെങ്കിലും സംഭോഗത്തിൽ ഏർപ്പെട്ടിട്ടും ഗർഭധാരണം നടന്നില്ലെങ്കിൽ അത് വന്ധ്യത മൂലമാകാം.

സ്ത്രീവന്ധ്യത[തിരുത്തുക]

യോനിയുടെ മുൻഭാഗത്തെ കട്ടിയേറിയ കന്യാചർമം വേർപെട്ടു പോകാതിരിക്കുക, അവിടുത്തെ മാംസപേശികൾ കൂടുതലായി വളരുക, യോനീസങ്കോചം, വേദനയേറിയ സംഭോഗം, ലൈംഗിക താൽപര്യക്കുറവ്, മാനസിക പ്രശ്നങ്ങൾ തുടങ്ങി പല കാരണങ്ങൾ കൊണ്ടും ശരിയായി ലൈംഗികബന്ധത്തിൽ ഏർപ്പെടാൻ കഴിയാതെ വരാറുണ്ട്. ഇത് മൂലം ഗർഭധാരണം തടസ്സപ്പെടുന്നു. ഗർഭാശയത്തിൽ നിന്നുമുള്ള സ്രവങ്ങളുടെ തകരാറു മൂലം പുരുഷബീജങ്ങൾക്ക് ഗർഭപാത്രത്തിൽ എത്തിച്ചേരാൻ കഴിയാതെ വരുന്നതും, ഗർഭപാത്രത്തിലെ തകരാറുകൾ, മുഴകൾ (ട്യൂമർ) അണ്ഡവാഹിനിക്കുഴലിലെ തകരാറുകൾ, അണ്ഡവിസർജനത്തിലെ പ്രശ്നങ്ങൾ, പിസിഓഎസ് (PCOS), തെറ്റായ ജീവിതരീതികൾ എന്നിവമൂലവും വന്ധ്യത ഉണ്ടാകാം.

ആദ്യ പ്രസവം 28 വയസ്സിനു മുൻപ് നടക്കുന്നതാണ്‌ നല്ലത്. അല്ലാത്തപക്ഷം ചില സ്ത്രീകളിലെങ്കിലും വന്ധ്യതയ്ക്കു കാരണമാകുന്നു. 21 വയസിനും 28 വയസിനുമിടയിൽ ആദ്യത്തെ പ്രസവം നടക്കുന്നത് ആരോഗ്യമുള്ള കുഞ്ഞിന് ജന്മം കൊടുക്കാൻ സഹായിക്കുന്നു. മാത്രമല്ല ഇത് അമ്മയുടെ ആരോഗ്യത്തിനും ഉത്തമമാണ്. 35 വയസിന് ശേഷം സ്ത്രീകളിൽ വന്ധ്യതക്കുള്ള സാധ്യത ഗണ്യമായി കൂടുന്നു. എന്നാൽ 80 ശതമാനത്തിലധികം സ്ത്രീകളിലും വന്ധ്യതയുടെ യഥാർത്ഥ കാരണം കണ്ടെത്താൻ കഴിയാറുണ്ട്. അതിനാൽ ഇതിനു ഫലപ്രദമായ ചികിൽസ നൽകുവാൻ സാധിക്കും.

പുരുഷവന്ധ്യത[തിരുത്തുക]

പുരുഷവന്ധ്യതയുടെ കാരണം കൃത്യമായി നിർണയിക്കാനും ചികിത്സിച്ചു ഭേദമാക്കാനും പലപ്പോഴും കഴിയാറില്ല. ഉദ്ധാരണശേഷിക്കുറവ്, ലൈംഗിക താൽപര്യക്കുറവ് മുതലായ പ്രശ്നങ്ങൾ മൂലം ശരിയായ സംഭോഗം നടക്കാത്തത് ഒരു കാരണമാണ്. ലോകാരോഗ്യ സംഘടനയുടെ മാനദണ്ഡങ്ങളിൽ മിനിമം ബീജസംഖ്യ 20 ദശലക്ഷമാണെങ്കിൽ മാത്രമേ ഗർഭധാരണം നടക്കുകയുള്ളൂ എന്നായിരുന്നു മുമ്പ് കണക്കാക്കിയിരുന്നത്. അത്രയുമില്ലെങ്കിൽ ബീജസംഖ്യ (കൗണ്ട്) കുറവാണെന്നു കണക്കാക്കിയിരുന്നു. തെറ്റായ ഭക്ഷണരീതി, ജീവിത ശൈലികളിൽ വന്നമാറ്റം, മദ്യം പുകയില തുടങ്ങിയ ലഹരി വസ്തുക്കളുടെ ഉപയോഗം എന്നിവയൊക്കെയാണ് ബീജസംഖ്യ കുറയാനുള്ള കാരണങ്ങളായി പറയുന്നത്. എന്നാൽ ബീജസംഖ്യ കുറയുന്നത് വന്ധ്യത വർധിക്കുന്നതിന്റെ കാരണമായി പറയുവാൻ സാധിക്കില്ല. കാരണം ആരോഗ്യമുള്ള ഒരൊറ്റ ബീജമേ ഉള്ളൂവെങ്കിലും ഗർഭധാരണം നടക്കാൻ സാധ്യതയുണ്ട്. എന്നാൽ മിക്കപ്പോഴും അങ്ങനെ സംഭവിക്കാറില്ല. കൂടുതൽ പുരുഷൻമാർക്കും ബീജസംഖ്യയിലെ കുറവാണ്‌ വന്ധ്യതാ പ്രശ്‌നത്തിനു കാരണം. 40 വയസിന് ശേഷം പുരുഷന്മാരിൽ ബീജത്തിന്റെ ഗുണമേന്മ കുറയുന്നതും ഒരു കാരണമാകാം. മാത്രമല്ല പ്രായമേറിയ പുരുഷന്മാരുടെ കുഞ്ഞുങ്ങൾക്ക് മാനസിക പ്രശ്നങ്ങൾ, ഓട്ടിസം മുതലായവ ഉണ്ടാവാനും ചെറിയ സാധ്യതയുണ്ട്. മാനസികവും ശാരീരികവുമായി മറ്റു പ്രശ്‌നങ്ങളൊന്നുമില്ലെങ്കിൽ ചികിത്സകൊണ്ട് ഒരു നിശ്ചിത ശതമാനം ആളുകളുടെയും വന്ധ്യതാ പ്രശ്‌നത്തിനു പരിഹാരം കാണുവാൻ സാധിക്കും.

ഹോർമോണിലുണ്ടാകുന്ന വ്യതിയാനങ്ങൾ, വൃഷണവീക്കം, വെരിക്കോസിൽ, വൃഷണത്തിൽ സ്ഥിരമായി ചൂട് ഏൽക്കുക, പതിവായി ബൈക്ക്‌ യാത്ര ചെയ്യുക തുടങ്ങി പല കാരണങ്ങൾ കൊണ്ടും പുരുഷവന്ധ്യത ഉണ്ടാവാം.

കാരണങ്ങൾ[തിരുത്തുക]

ദമ്പതിമാരുടെ പ്രായം,ജീവിതരീതി, ആരോഗ്യാവസ്ഥ, ലൈംഗികബന്ധത്തിന്റെ സ്വഭാവം തുടങ്ങിയ പല അവസ്ഥകളും ഇതിനു കാരണമാകുന്നു.

ചികിത്സാരീതി[തിരുത്തുക]

വിവാഹശേഷം 75-80 ശതമാനം സ്ത്രീകൾക്കും സധാരണഗതിയിൽ ഒരു വർഷത്തിനകം തന്നെ ഗർഭധാരണം നടക്കും.പിന്നീടുള്ളവരിൽ പകുതി ദമ്പതികൾക്കും അടുത്ത ആറു മാസത്തിനകം ഗർഭധാരണം സാധിക്കും. ഈ രീതിയിൽ ഒന്നര വർഷത്തിനകം 90 ശതമാനം പേർക്കും ഗർഭധാരണമുണ്ടാകാറുണ്ട്. ബാക്കി വരുന്ന 10 ശതമാനം പേർക്കാണ് വന്ധ്യതാ ചികിത്സ ആവശ്യമായി വരികയുള്ളു. വിവാഹശേഷം ഒരു വർഷമെങ്കിലും ഫലപ്രദമായ വിധം ഒരുമിച്ചു കഴിഞ്ഞിട്ടും ഗർഭധാരണം നടക്കുന്നില്ലെങ്കിൽ മാത്രമേ ചികിത്സ തുടങ്ങേണ്ട ആവശ്യമുള്ളു.

"https://ml.wikipedia.org/w/index.php?title=വന്ധ്യത&oldid=3129103" എന്ന താളിൽനിന്ന് ശേഖരിച്ചത്