കുടുംബാസൂത്രണം

വിക്കിപീഡിയ, ഒരു സ്വതന്ത്ര വിജ്ഞാനകോശം.
(Family planning എന്ന താളിൽ നിന്നും തിരിച്ചുവിട്ടതു പ്രകാരം)
Jump to navigation Jump to search
കഴിക്കാവുന്ന ഗർഭനിരോധന ഗുളിക. 1960-ൽ പ്രയോഗത്തിൽ വന്ന ഈ ഗുളിക കുടുംബാസൂത്രണത്തിൽ വളരെയധികം ഉപയോഗിക്കപ്പെട്ടു.

ആരോഗ്യകരമായ രീതിയിൽ എപ്പോൾ ഗർഭധാരണം നടത്തണമെന്നും[1] , അമ്മയുടെയും കുഞ്ഞിന്റെയും ആരോഗ്യം ഉറപ്പുവരുത്തുവാനും, കുടുംബത്തിൽ ജനിക്കുന്ന സന്താനങ്ങളുടെ എണ്ണം നിയന്ത്രിക്കുവാനും, [2][3] അവരെ നന്നായി പോറ്റിവളർത്തുവാനും, ജനപ്പെരുപ്പം നിയന്ത്രിക്കുവാനും ഉള്ള ക്രമീകരണങ്ങളെയാണ് കുടുംബാസൂത്രണം അഥവാ കുടുംബക്ഷേമം എന്നു പറയുന്നത്. അമ്മയുടെയും കുഞ്ഞിന്റെയും ആരോഗ്യത്തിന് പ്രസവങ്ങൾ തമ്മിൽ കുറഞ്ഞത് മൂന്ന് വർഷത്തെ ഇടവേള വേണമെന്ന് ആരോഗ്യവിദഗ്ദ്ധർ ചൂണ്ടിക്കാട്ടുന്നു. ഗർഭനിരോധന മാർഗങ്ങൾക്കു പുറമേ ശാസ്ത്രീയ ലൈംഗിക വിദ്യാഭ്യാസം[3][4], സുരക്ഷിതമല്ലാത്ത ലൈംഗിക ബന്ധത്തിലൂടെ പകരുന്ന രോഗങ്ങളുടെ വ്യാപനം തടയൽ [3], ഗർഭധാരണത്തിനു മുൻപുള്ള ഉപദേശങ്ങൾ,[3] വന്ധ്യതാ നിവാരണം[2] തുടങ്ങിയവയും കുടുംബാസൂത്രണത്തിന്റെ ഭാഗമാണ്.

സാധാരണയായി വിവിധ ഗർഭനിരോധന മാർഗങ്ങളുടെ ഉപയോഗത്തെയാണ് കുടുംബാസൂത്രണം കൊണ്ടുദ്ദേശിക്കാറുള്ളതെങ്കിലും ഇതിനുപുറമേയുള്ള പല മുറകളും ഇതിൽ ഉൾപ്പെട്ടിട്ടുണ്ട്. വന്ധ്യംകരണവും ഗർഭഛിദ്രവും[5] കുടുംബാസൂത്രണത്തിന്റെ പരിധിയിൽ പെട്ടതാണ്.

പുരുഷന്മാരിൽ വാസക്ടമിയും സ്ത്രീകളിൽ ട്യൂബക്ടമിയും സ്ഥിരമായ വന്ധ്യംകരണ മാർഗങ്ങൾ ആണ്. ഇതിൽ വാസക്ടമി ലളിതമായ സ്ഥിര വന്ധ്യംകരണ മാർഗ്ഗമാകുന്നു. ഗർഭനിരോധന ഉറ ഏറ്റവും എളുപ്പമുള്ള ഒരു കുടുംബാസൂത്രണ മാർഗ്ഗമാണ്, മാത്രമല്ല ഇത് സുരക്ഷിതമല്ലാത്ത ലൈംഗികബന്ധത്തിലൂടെ പകരുന്ന രോഗങ്ങളുടെ വ്യാപനത്തെ ചെറുക്കുകയും ചെയ്യുന്നു. ഇത് ലൈംഗികവും പ്രത്യുത്പാദനപരവുമായ ആരോഗ്യത്തിന്റെ ഭാഗം കൂടിയാണ്. പങ്കാളിയോടുള്ള അന്ധമായ വിശ്വാസത്തിന്റെ പേരിൽ സുരക്ഷാ മാര്ഗങ്ങളൊന്നുമില്ലാതെ ശാരീരിക ബന്ധത്തിനൊരുങ്ങുന്നത് ഏറെ അപകടകരമാണ്.

കുടുംബാസൂത്രണം മൂലം കുട്ടികളുടെ എണ്ണം കുറക്കുവാനും, മാതാപിതാക്കൾക്ക് തങ്ങളുടെ ജീവിതനിലവാരം അനുസരിച്ചു ഒരു കുട്ടിയെ മെച്ചപ്പെട്ട രീതിയിൽ വളർത്തുവാനും സാധിക്കുന്നു. അതുവഴി കുട്ടിയുടെ ആരോഗ്യം, വിദ്യാഭ്യാസം, ഭക്ഷണം, സംരക്ഷണം തുടങ്ങിയവ ഉറപ്പുവരുത്തുവാനും സാധിക്കുന്നു. "നാമൊന്ന് നമുക്കൊന്ന്" എന്നതാണ് കുടുംബാസൂത്രണ വാക്യം.

ജനപെരുപ്പം മൂലം വീർപ്പുമുട്ടുന്ന രാജ്യങ്ങളിൽ മികച്ച കുടുംബാസൂത്രണ മാർഗങ്ങളിലൂടെ ജനസംഖ്യാവർദ്ധനവ് നിയന്ത്രിക്കുവാനും അതുവഴി മലിനീകരണം, തൊഴിൽ ഇല്ലായ്മ, ദാരിദ്ര്യം, പോഷകാഹാരക്കുറവ്, രോഗങ്ങൾ എന്നിവ ഒരു പരിധി വരെ നിയന്ത്രിക്കുവാൻ സാധിക്കും എന്ന് വിലയിരുത്തപ്പെടുന്നു. ഇത് രാഷ്ട്രത്തിന്റെ ക്ഷേമത്തിനായുള്ള ഒരു പ്രവർത്തനം കൂടി ആണ്.

വിവിധ ഗർഭനിരോധന മാർഗങ്ങൾ[തിരുത്തുക]

ഗർഭധാരണം തടയുന്നതിന്‌ ധാരാളം താൽക്കാലികമാർഗങ്ങളും സ്‌ഥിരമാർഗങ്ങളുമുണ്ട്‌.

ശരിയായി ഉപയോഗിച്ചാൽ ഏറ്റവും ലളിതമായ ഗർഭനിരോധനമാർഗ്ഗമാണ് ഗർഭനിരോധന ഉറ അഥവാ കോണ്ടം. നിരോധ് എന്ന പേരിൽ സർക്കാർ ആരോഗ്യകേന്ദ്രങ്ങൾ വഴി ഇവ സൗജന്യമായി ലഭ്യമാണ്. പുരുഷൻമാർക്ക്‌ ഉപയോഗിക്കാവുന്ന ഉറകളും സ്‌ത്രീകൾക്ക്‌ ഉപയോഗിക്കാവുന്നവയുമുണ്ട്‌. മാത്രമല്ല, സ്ത്രീക്കും പുരുഷനും ഒരുപോലെ ഉപയോഗിക്കാവുന്ന യൂണിസെക്സ് ഉറകളും ഇന്ന് ലഭ്യമാണ്. പുരുഷന്മാർക്ക് ഉദ്ധരിച്ച ലിംഗത്തിലേക്ക് ഉറ ധരിക്കാം. സ്ത്രീകൾക്ക് ഇവ യോനീ നാളത്തിലേക്ക് തിരുകി വയ്ക്കാവുന്ന രീതിയിൽ ഉള്ളതാണ്. വാങ്ങാനും ഉപയോഗിക്കാനും എളുപ്പമാണെന്നതു കൊണ്ട്തന്നെ ഏറെ പ്രചാരമുള്ളതാണ് ഈ മാർഗം.

പലതരം ഉറകൾ ഇന്ന് ലഭ്യമാണ്. തീരെ നേർത്തതും, ചോക്ലേറ്റ്, ബനാനാ, വാനിലാ തുടങ്ങിയ പല ഫ്ലേവറുകളോട് കൂടിയതും, ഡോട്ടുകൾ ഉള്ളതും, ബീജനാശിനി അടങ്ങിയതും ഒക്കെ അവയിൽ ചിലതാണ്. നേർത്ത ഉറകൾ ലൈംഗിക അനുഭൂതി തെല്ലും കുറക്കുന്നില്ല എന്ന് പറയാം. ഡോട്ടുകൾ ഉള്ളത് സ്ത്രീക്ക് കൂടുതൽ അനുഭൂതി പകരുന്നതാണ് എന്നാണ് പറയപ്പെടുന്നത്. കോണ്ടം ഉപയോഗിക്കുകയാണെങ്കിൽ സുരക്ഷിതമല്ലാത്ത ലൈംഗിക ബന്ധത്തിലൂടെ പകരുന്ന എച്ച്ഐവി/എയ്ഡ്സ്, എച്ച്പിവി, പെൽവിക്ക് ഇൻഫെക്ഷൻ, സിഫിലിസ്, ഹെപ്പറ്റെറ്റിസ് ബി, ഹെർപ്പിസ് മുതലായ രോഗാണുബാധകളിൽ നിന്ന്‌ സംരക്ഷണവും ഉറപ്പാക്കാം.

കൂടാതെ ലൈംഗികബന്ധത്തിന് മുൻപ് ഉപയോഗിക്കാവുന്ന സെർവൈക്കൽ ഡയഫ്രം, സെർവൈക്കൽ റിങ്ങ്‌, ബീജങ്ങളെ നശിപ്പിക്കുന്ന ക്രീം/ ജെൽ, ഗർഭനിരോധന സ്‌പോഞ്ച്‌ എന്നിവയെല്ലാം താൽക്കാലിക ഗർഭനിരോധനമാർഗ്ഗമായി ഉപയോഗിക്കാം. ബീജങ്ങളെ നശിപ്പിക്കുന്ന തരം ലൂബ്രിക്കന്റുകൾ/ ജെൽ, ടുഡേ പോലെയുള്ള ചിലതരം ഗുളികകൾ എന്നിവ സംഭോഗത്തിന് തൊട്ട് മുൻപ് യോനിയിൽ പുരട്ടാവുന്നതോ നിക്ഷേപിക്കുന്നതോ ആണ്‌.

ശരിയായ രീതിയിൽ ഉപയോഗിച്ചാൽ ഒരു ശതമാനത്തിൽ താഴെ മാത്രം പരാജയസാധ്യത ഉള്ളതാണ്‌ ഹോർമോൺ അടങ്ങിയ ഗുളികകൾ. മറ്റ് ചില ഗുളികകളോടൊപ്പം കഴിക്കുമ്പോൾ ഇവയുടെ ഫലപ്രാപ്‌തി കുറയാം. മാത്രമല്ല, ചില ആരോഗ്യ പ്രശ്‌നങ്ങളുള്ളവർക്ക്‌ കഴിക്കാൻ പാടില്ല തുടങ്ങിയ നിയന്ത്രണങ്ങളുമുണ്ട്. അതുകൊണ്ട്‌ തന്നെ ഡോക്ടറുടെ നിർദ്ദേശാനുസരണം മാത്രമേ ഇവ കഴിക്കാൻ പാടുള്ളൂ. ഗുളിക നിർത്തിക്കഴിഞ്ഞാൽ വൈകാതെ ഗർഭധാരണശേഷി തിരിച്ച്‌ കിട്ടും. സുരക്ഷിതമല്ലാത്ത ലൈംഗിക ബന്ധം നടന്ന് സ്ത്രീകൾക്ക് ഉടനെ കഴിക്കാവുന്ന അടിയന്തിര ഗർഭനിരോധന ഗുളികകളും ഇന്ന് ലഭ്യമാണ്. ഇവയിൽ പലതും സ്ത്രീകളിൽ കാണപ്പെടുന്ന സ്തനാർബുദം പോലെയുള്ള കാൻസർ രോഗങ്ങളെപ്പോലും പ്രതിരോധിക്കുന്നതാണ്.

തൊലിക്കടിയിൽ നിക്ഷേപിക്കുന്ന ഹോർമോൺ ഇംപ്ലാന്റ്‌, ഹോർമോൺ കുത്തിവെപ്പ്, ഹോർമോൺ വളയം, ഗർഭപാത്രത്തിനകത്ത്‌ നിക്ഷേപിക്കുന്ന കോപ്പർ ടി പോലെയുള്ള ഗർഭാശയവലയം അല്ലെങ്കിൽ ലൂപ്പ് എന്നിവയാണ്‌ സ്ത്രീകൾക്കുള്ള മറ്റ്‌ മാർഗങ്ങൾ. കോപ്പർ ടിയിലെ ചെമ്പ് ബീജങ്ങളെ നശിപ്പിക്കുന്നത് വഴി ഗർഭധാരണം തടയുന്നു. ഇത്തരം ലൂപ്പുകൾ 7 വർഷം വരെ തുടർച്ചയായി ഉപയോഗിക്കാൻ സാധിക്കാറുണ്ട്. അതിനാൽ ഉടനേ കുട്ടി വേണ്ട എന്നുള്ളവർക്ക് ഇത് ഏറെ ഉപയുക്തമാണ്. എന്നാൽ കോപ്പർ ടിയുടെ സ്ഥാനം കൃത്യമാണോ എന്നുറപ്പ് വരുത്തേണ്ടത് ഇതിന്റെ ഫലപ്രാപ്തിക്ക് അനിവാര്യമാണ്. ഹോർമോൺ അടങ്ങിയ ലൂപ്പുകൾ അമിതമായ ആർത്തവ രക്തസ്രാവം കുറയ്ക്കുവാനും ഉപയോഗിക്കാം. ഇതിന്‌ ഗുരുതരമായ പാർശ്വഫലങ്ങൾ ഒന്നുമില്ല.

ഇവിടെ T ആകൃതിയിലുള്ള ഒരുപകരണം ഗർഭപാത്രത്തിനുള്ളിൽ നിക്ഷേപിക്കുകയാണ് ചെയ്യുന്നത്. പിന്നീട് ഗർഭം ധരിക്കണമെന്ന ആവശ്യം വരുമ്പോൾ ഇത് എടുത്ത് മാറ്റുന്നത് കൊണ്ട് ഗർഭധാരണ ശേഷി തിരിച്ചുകിട്ടുന്നു. പലരും ഇവ 7 വർഷം വരെ തുടർച്ചയായി ഉപയോക്കാറുണ്ട്. പ്രസവങ്ങൾ തമ്മിലുള്ള ഇടവേള കുറക്കുവാനും ഇത് ഉപയോഗിക്കാം. സർക്കാർ ആശുപത്രികൾ വഴിയും സാമൂഹിക ആരോഗ്യകേന്ദ്രങ്ങൾ വഴിയും കോപ്പർ ടി സൗജന്യമായി ലഭ്യമാണ്. ആധുനിക ഐയുഡികൾ ശരിയായ രീതിയിൽ ഉപയോഗിച്ചാൽ അണുബാധയോ മറ്റ് പ്രശ്നങ്ങളോ ഒന്നും ഉണ്ടാകുന്നില്ല.

സുരക്ഷിതമല്ലാത്ത ലൈംഗികബന്ധം കഴിഞ്ഞ്‌ 72 മണിക്കൂറിനുള്ളിൽ കഴിക്കുന്ന അടിയന്തിര ഗർഭനിരോധന ഗുളികകളും ലഭ്യമാണ്. എമർജ്ജൻസി പിൽ എന്ന പേരിലറിയപ്പെടുന്ന ഇവ ചില പാർശ്വഫലങ്ങൾ കണക്കിലെടുത്തു വല്ലപ്പോഴും മാത്രം അത്യാവശ്യഘട്ടങ്ങളിൽ ഉപയോഗിക്കാവുന്ന ഒന്നാണ്. സുരക്ഷിതമല്ലാത്ത ലൈംഗികബന്ധം നടന്ന്‌ അഞ്ച്‌ ദിവസത്തിനുള്ളിൽ സ്ത്രീ കോപ്പർ ടി ഇടുന്നതും ഗർഭധാരണം തടയും.

ഭാവിയിൽ ഇനി കുട്ടികൾ വേണ്ട എന്ന തീരുമാനമെടുത്തവർക്ക് സ്ഥിരമായ ഗർഭനിരോധനമാർഗ്ഗങ്ങൾ ഉപയോഗിക്കാം. ഇതിനായി സ്‌ത്രീകളിൽ അണ്‌ഢവാഹിനിക്കുഴലിൽ മാറ്റങ്ങൾ വരുത്തുന്ന ട്യൂബക്‌ടമി ശസ്ത്രക്രിയയും പുരുഷൻമാരിൽ ബീജം ശുക്ലവുമായി കലരുന്നത്‌ തടയുന്ന വാസക്‌ടമിയുമാണ്‌ നിലവിലുള്ളത്. വാസക്‌ടമി ഒരു തരത്തിലും ഉദ്ധാരണശേഷിയേയോ സ്കലനത്തെയോ ലൈംഗിക ശേഷിയെയോ ബാധിക്കില്ല. സിസേറിയൻ ശസ്ത്രക്രിയ ആണെങ്കിൽ കൂടെത്തന്നെ പ്രസവം നിർത്താം എന്ന കാരണത്താൽ പലരും ട്യൂബക്‌ടമി ചെയ്യാൻ സാധ്യതയുണ്ട്. ഇതൊഴിച്ചാൽ അത്യന്തം ലളിതമായി പുരുഷൻമാരിൽ ചെയ്യാവുന്ന വാസക്‌ടമി തന്നെയാണ്‌ സ്‌ഥിര ഗർഭനിരോധനത്തിന്‌ ഏറ്റവും എളുപ്പമാർഗ്ഗം എന്ന് പറയാം. ഇതിന്‌ ആശുപത്രിവാസം ആവശ്യമില്ല. രണ്ട്‌ രീതിയായാലും 'റീകനാലൈസേഷൻ' എന്ന വഴിയിലൂടെ ഒരുപരിധി വരെ ഗർഭധാരണശേഷി തിരിച്ച്‌ കിട്ടാൻ സാധ്യതയുണ്ടെങ്കിലും ഇത് എല്ലായ്പോഴും വിജയിക്കണമെന്നില്ല. ഇന്ന് താക്കോൽ ദ്വാര ശസ്ത്രക്രിയ വഴിയും ട്യൂബക്‌ടമി ലഭ്യമാണ്.

സുരക്ഷ ഏറ്റവും കുറഞ്ഞ ഗർഭനിരോധനമാർഗങ്ങളാണ്‌ 'സുരക്ഷിതകാലം നോക്കലും ശുക്ലം സ്ഖലിക്കുന്നതിന് തൊട്ട്‌ മുൻപ്‌ ലിംഗം പുറത്തെടുക്കലും.'രണ്ടിലും വലിയ പരാജയ സാധ്യതയുണ്ട്‌. വളരെ കൃത്യമായ ആർത്തവചക്രമുള്ളവർക്ക്‌ മാത്രമേ സുരക്ഷിതകാലം നോക്കുന്നത്‌ ഒരു പരിധി വരെയെങ്കിലും ഫലപ്രദമാകൂ. ആർത്തവചക്രത്തിന്റെ ഏകദേശം മധ്യത്തിൽ വരുന്ന അണ്ഡവിസർജനകാലം (Ovulation), തുടർന്നുള്ള സുരക്ഷിതകാലം എന്നിവ നിർണ്ണയിക്കുന്നതിൽ പലർക്കും തെറ്റ് പറ്റാൻ സാധ്യതയുണ്ട്. പുരുഷന്മാരിൽ സ്‌ഖലനത്തിന്‌ മുൻപ്‌ വരുന്ന ലൂബ്രിക്കന്റ് ദ്രാവകത്തിലും ബീജങ്ങൾ അടങ്ങിയിരിക്കാം എന്നിരിക്കേ സ്ഖലനത്തിന് തൊട്ട് മുൻപ് ലിംഗം യോനിയിൽ നിന്ന് പുറത്തെടുത്താലും ഗർഭം ധരിക്കാൻ സാധ്യത ഉണ്ട്. മാത്രമല്ല, ഇവയൊന്നും തന്നെ ലൈംഗിക ബന്ധത്തിലൂടെ പകരുന്ന പലതരം രോഗാണുബാധകൾ തടയുന്നുമില്ല. എന്നാൽ മറ്റൊരു മാർഗവും ലഭ്യമല്ലാത്ത സാഹചര്യത്തിൽ ഒരു ഗർഭനിരോധന മാർഗമെന്ന നിലയിൽ പിൻവലിക്കൽ രീതി ഉപയോഗിക്കാവുന്നതാണ്. അതുകൊണ്ട് തന്നെ ഇത്തരം രീതികൾ തിരഞ്ഞെടുക്കുന്നവർ ഉറ പോലെയുള്ള മറ്റേതെങ്കിലും നിരോധന മാർഗങ്ങൾ കൂടി ഉപയോഗിക്കുന്നതാണ് സുരക്ഷിതം. ഏതൊരു രീതി ഉപയോഗിച്ചാലും 100% ഫലപ്രാപ്തി ഉറപ്പ് തരുന്നില്ല എന്നതും ശ്രദ്ധേയമാണ്.

പ്രകൃതിദത്ത ഗർഭനിരോധന മാർഗങ്ങൾ[തിരുത്തുക]


പപ്പായ പണ്ടുമുതലേ ഉപയോഗിച്ച് വരുന്ന ഒരു ഗർഭനിരോധന മാർഗ്ഗമാണ്. ഇത് പ്രൊജസ്‌ട്രോൺ ഹോർമോണിന്റെ പ്രവർത്തനത്തെ ഇല്ലാതാക്കുന്നു. ഇതിൽ അടങ്ങിയിട്ടുള്ള പ്രോസ്റ്റാഗ്ലാന്റിൻസ്, ഓക്‌സിടോസിൻ എന്നിവ ഗർഭപാത്രത്തെ വികസിക്കാൻ അനുവദിക്കില്ല. ഇതുകൊണ്ട് തന്നെയാണ് ഗർഭാവസ്ഥയിൽ ഒരിക്കലും പപ്പായ കഴിക്കരുതെന്ന് ഡോക്ടർമാർ നിർദ്ദേശിക്കുന്നത്.

കൈതച്ചക്കയും ഗർഭഛിദ്രത്തിന് കാരണമാകുന്ന ഒന്നാണ്. ഇതിലുള്ള പ്രോട്ട്യോലിറ്റിക് എൻസൈം അഥവാ ബ്രോമെലാനിൻ സെർവിക്‌സിനെ സോഫ്റ്റ് ആക്കുന്നു. ഇത് പ്രകൃതിദത്തമായ ഗർഭമലസലിലേക്ക് നയിക്കുന്നു.

കറുവപ്പട്ട പെട്ടെന്ന് തന്നെ ഗർഭപാത്രത്തെ ഉത്തേജിപ്പിക്കുകയും ഇത് വഴി പ്രസവം പെട്ടെന്ന് നടക്കാൻ കാരണമാകുകയും ചെയ്യുന്നു. കൂടുതൽ കഴിക്കുന്നത് ഗര്ഭമലസലിന് കാരണമാകുന്നു.

കൂടുതൽ അളവിൽ എള്ള്, ഗ്രീൻടീ എന്നിവ കഴിച്ചാൽ അത് ഗര്ഭച്ഛിദ്രത്തിലേക്ക് നയിക്കുന്നു.



അവലംബം[തിരുത്തുക]

  1. "Mission Statement". U.S. Dept. of Health and Human Services, Office of Population Affairs.
  2. 2.0 2.1 Family planning — WHO
  3. 3.0 3.1 3.2 3.3 What services do family planning clinics provide? — Health Questions — NHS Direct
  4. US Dept. of Health, Administration for children and families
  5. See, e.g., Mischell, D. R. "Family planning: contraception, sterilization, and pregnancy termination." In: Katz, V. L., Lentz, G. M., Lobo, R. A., Gershenson, D. M., eds. Comprehensive Gynecology. 5th ed. Philadelphia, PA: Mosby Elsevier; 2007:chap 14.
"https://ml.wikipedia.org/w/index.php?title=കുടുംബാസൂത്രണം&oldid=3353941" എന്ന താളിൽനിന്ന് ശേഖരിച്ചത്