റശീദ് രിദ

വിക്കിപീഡിയ, ഒരു സ്വതന്ത്ര വിജ്ഞാനകോശം.

പ്രഗല്ഭനായ ഒരു ഇസ്ലാമിക പണ്ഡിതനായിരുന്നു മുഹമ്മദ് റശീദ് രിദ (സെപ്റ്റംബർ 23, 1865,സിറിയ-ഓഗസ്റ്റ് 22, 1935, ഈജിപ്ത്). തന്റെ തലമുറയിലെ ഏറ്റവും സ്വാധീനം ചെലുത്തിയ പണ്ഡിതനും നിയമവിദ്ഗ്ദനുമായിരു‍ന്നു എന്ന് വിലയിരുത്തപ്പെടുന്നു[1]. റശീദ് രിദ എന്ന പേരിലാണ്‌ അദ്ദേഹം കൂടുതലും അറിയപ്പെടുന്നത്.

സിറിയയിലാണ്‌ റശീദ് രിദ ജനിച്ചത്. പാരമ്പര്യ ഇസ്ലാമിക വിഷയങ്ങളിൽ വിദ്യാഭ്യാസം നേടിയ അദ്ദേഹം 1884-85 കാലത്ത് മുഹമ്മദ് അബ്ദുവും ജമാലുദ്ദീൻ അഫ്ഗാനിയും നടത്തിയിരുന്ന "അൽ ഉർ‌വ-അൽ വുത്ഖ" എന്ന പ്രസിദ്ധീകരണവുമായി ആദ്യമായി പരിചയപ്പെട്ടു. 1897 ൽ സിറിയയിൽ നിന്ന് കൈറൊയിലേക്ക് പോയി അവിടെ മുഹമ്മദ് അബ്ദുവുമായി ബന്ധപ്പെട്ട് പ്രവർത്തിച്ചു. അടുത്ത വർഷം തന്നെ "അൽ‌മനാർ" എന്ന പേരിൽ ഒരു പ്രസിദ്ധീകരണം ആരംഭിക്കുകയും ചെയ്തു. ഖുർ‌ആന്റെ വ്യാഖ്യാനങ്ങൾ ഉൾപ്പെടെയുള്ള ഇസ്ലാമിക വിഷയങ്ങൾ കൈകാര്യം ചെയ്ത ഈ പ്രസിദ്ധീകരണം ആദ്യം ആഴ്ചപ്പതിപ്പായും ശേഷം മാസികയായും പ്രസിദ്ധീകരിച്ചു വന്നു[1]. 1935 ൽ തന്റെ മരണം വരെ റശീദ് രിദ അൽ‌മനാറിൽ തുടർന്നു. തന്റെ മുൻ‌ഗാമികളെ പോലെ തന്നെ റശീദ് രിദയും മുസ്ലിം സമൂഹത്തിലെ ദൗർബല്യങ്ങളായ പാശ്ചാത്യ കോളനിവത്കരണം, സൂഫിസത്തിന്റെ അമിത കടന്നുകയറ്റം, അന്ധമായ അനുകരണം, പണ്ഡിതന്മാരുടെ നിർജീവത,ശാസ്ത്ര-സാങ്കേതിക രംഗത്ത് മുസ്ലിംകളുടെ പുരോഗതിയുടെ അഭാവംമൂലം ഉണ്ടായ പരാജയം തുടങ്ങിയ പ്രശ്നങ്ങളിൽ നിന്നുള്ള മോചനത്തിലായിരുന്നു ശ്രദ്ധകേന്ദ്രീകരിച്ചത്.

അവലംബം[തിരുത്തുക]

  1. 1.0 1.1 Encyclopedia of Islam and the Muslim World, Thompson Gale (2004), p.597

പുറം കണ്ണി[തിരുത്തുക]

"https://ml.wikipedia.org/w/index.php?title=റശീദ്_രിദ&oldid=1798277" എന്ന താളിൽനിന്നു ശേഖരിച്ചത്