ആര്യങ്കാവ്

ഇംഗ്ലീഷ് വിലാസം

https://ml.wikipedia.org/wiki/Aryankavu

ആര്യങ്കാവ്
ഗ്രാമം
ആര്യങ്കാവ് തീവണ്ടി നിലയം
ആര്യങ്കാവ് Location in Kerala, India ആര്യങ്കാവ് ആര്യങ്കാവ് (India)
Coordinates: 8°58′0″N 77°8′35″E
Country	ഇന്ത്യ
State	കേരളം
District	കൊല്ലം ജില്ല
സർക്കാർ
• തരം	Panchayati Raj (India)
• ഭരണസമിതി	ആര്യങ്കാവ് ഗ്രാമപഞ്ചായത്ത്
വിസ്തീർണ്ണം
• ആകെ	198.84 ച.കി.മീ. (76.77 ച മൈ)
ജനസംഖ്യ  (2011)
• ആകെ	10,144
• ജനസാന്ദ്രത	51/ച.കി.മീ. (130/ച മൈ)
Languages
• Official	മലയാളം, ഇംഗ്ലീഷ്
സമയമേഖല	UTC+5:30 (IST)
PIN	691309, 691316
വാഹന രജിസ്ട്രേഷൻ	KL-25
Nearest city	കൊല്ലം 76 കിലോമീറ്റർ (47 മൈ)
Nearest town	പുനലൂർ 33 കിലോമീറ്റർ (21 മൈ)
Climate	Tropical monsoon (Köppen)

ആര്യങ്കാവ് ധർമ്മശാസ്താക്ഷേത്രം 1990ൽ

കേരളത്തിൽ കൊല്ലം ജില്ലയിലെ ഒരു ഗ്രാമമാണ് ആര്യങ്കാവ്. തമിഴ്നാട് അതിർത്തിയിൽ സ്ഥിതിചെയ്യുന്ന ആര്യങ്കാവിലൂടെയാണ് കൊല്ലം - തിരുമംഗലം ദേശീയപാത കടന്നു പോകുന്നത്. കൊല്ലം ചെങ്കോട്ട റെയിൽ പാതയും ഇതുവഴി കടന്നു പോകുന്നു. ശബരിമലയുടെ ഇതിഹാസവുമായി ബന്ധപ്പെട്ട പ്രശസ്തമായ തീർത്ഥാടന കേന്ദ്രങ്ങളിൽ ഒന്നാണിത്. ആര്യങ്കാവ് ധർമ്മശാസ്താക്ഷേത്രം, ആര്യങ്കാവ് ചുരം, പാലരുവി വെള്ളച്ചാട്ടം എന്നിവ ഇവിടുത്തെ മാത്രം പ്രത്യേകതകളാണ്. ശെന്തരുണി വന്യജീവി സങ്കേതത്തിനടുത്താണ് ഈ ഗ്രാമം സ്ഥിതി ചെയ്യുന്നത്. ഈ പ്രദേശത്തിന് ആര്യങ്കാവ് എന്ന പേരു വന്നതിന് പഴമക്കാർ പല വ്യാഖ്യാനങ്ങളും നൽകുന്നുണ്ട്.

• ഈ പ്രദേശത്ത് ആയിരം കാവുകൾ ഉണ്ടായിരുന്നതിനാൽ ആയിരം കാവ് എന്ന് അറിയപ്പെട്ടു.
• ആര്യന്മാരുടെ വരവുമായി ബന്ധപ്പെട്ട് ഈ പ്രദേശത്തിന് ആര്യങ്കാവ് എന്ന പേരു വന്നു.
• അച്ചൻകോവിൽ ക്ഷേത്ര പ്രതിഷ്ഠ അരശനും ആര്യങ്കാവിൽ അയ്യനും ആണ്. അരശന്റെ കോവിൽ അരശൻ കോവിലും അയ്യന്റെ കാവ് അയ്യൻ കാവും. കാലക്രമേണ ഇത് യഥാക്രമം അച്ചൻകോവിലും ആര്യങ്കാവുമായി മാറി.

സ്ഥാനം

ദേശീയ പാത 744 ൽ കൊല്ലം ജില്ലയുടെ കിഴക്കേയറ്റത്ത് തെങ്കാശിയിൽ നിന്ന് ഏകദേശം 22 കിലോമീറ്റർ (14 മൈൽ) അകലെയും പുനലൂരിൽ നിന്ന് 36 കിലോമീറ്റർ (22 മൈൽ) അകലെയുമാണ് ഈ ഗ്രാമം സ്ഥിതി ചെയ്യുന്നത്. തമിഴ്‌നാട് സ്റ്റേറ്റ് ട്രാൻസ്‌പോർട്ട് കോർപ്പറേഷന്റെയും കേരള സ്റ്റേറ്റ് റോഡ് ട്രാൻസ്‌പോർട്ട് കോർപ്പറേഷന്റേയും ബസുകൾ വഴി പുനലൂർ, കൊല്ലം, തെങ്കാശി, തിരുവനന്തപുരം എന്നിവയുമായി ഈ ഗ്രാമം നന്നായി ബന്ധപ്പെട്ടിരിക്കുന്നു.

ആര്യങ്കാവ് ചുരം അല്ലെങ്കിൽ ശെങ്കോട്ട ഗ്യാപ്പ് എന്നറിയപ്പെടുന്ന പശ്ചിമഘട്ടത്തിലെ ഒരു മലനിരയുടെ അരികിലാണ് ഈ ഗ്രാമം സ്ഥിതി ചെയ്യുന്നത്. കൊല്ലം-ചെങ്കോട്ട റെയിൽവേ പാത ആര്യങ്കാവിലൂടെ കടന്നുപോകുന്നു. ന്യൂ ആര്യങ്കാവ് റെയിൽവേ സ്റ്റേഷൻ, ആര്യങ്കാവ് റെയിൽവേ സ്റ്റേഷൻ എന്നിങ്ങനെ രണ്ട് റെയിൽവേ സ്റ്റേഷനുകൾ ഈ ഗ്രാമത്തിലുണ്ട്.

തിരുവനന്തപുരം അന്താരാഷ്ട്ര വിമാനത്താവളം 98 കിലോമീറ്റർ (61 മൈൽ), മധുര വിമാനത്താവളം 148 കിലോമീറ്റർ (92 മൈൽ), തൂത്തുക്കുടി വിമാനത്താവളം 115 കിലോമീറ്റർ (71 മൈൽ) എന്നിവയാണ് ഗ്രാമത്തോട് അടുത്തുള്ള വിമാനത്താവളങ്ങൾ.

ജനസംഖ്യാശാസ്‌ത്രം

2011-ലെ ഇന്ത്യൻ സെൻസസ് പ്രകാരം ആര്യങ്കാവിലെ ജനസംഖ്യ 4896 പുരുഷന്മാരും 5248 സ്ത്രീകളും ഉൾപ്പെടെ 10144 ആയിരുന്നു. ആര്യങ്കാവിൽ ഏറ്റവും കൂടുതൽ സംസാരിക്കുന്ന ഭാഷ മലയാളമാണ്. തമിഴ്‌നാടിനോട് വളരെ അടുത്തായതിനാലും നിരവധി തമിഴ് ശബരിമല തീർത്ഥാടന കേന്ദ്രങ്ങൾ ഉള്ളതിനാലും തമിഴും ഇവിടെ വ്യാപകമായി സംസാരിക്കപ്പെടുന്നു. ആര്യങ്കാവിൽ മലപ്പണ്ടാരം ഗോത്രവർഗക്കാരും അധിവസിക്കുന്നുണ്ട്.

ആര്യങ്കാവ് ചുരം

കൊല്ലം ജില്ലയെയും തെങ്കാശി ജില്ലയെയും ബന്ധിപ്പിക്കുന്ന ഒരു മലമ്പാതയായ ആര്യങ്കാവ ചുരത്തിന് സമീപത്താണ് ഈ ഗ്രാമം സ്ഥിതി ചെയ്യുന്നത്. പാലക്കാട് ചുരം, ആരൽവൈമൊഴി വിടവ് എന്നിവയോടൊപ്പം ഈ ചുരം പശ്ചിമഘട്ടത്തിന്റെ കേരള ഭാഗത്തെ തമിഴ്‌നാട് സംസ്ഥാനത്തെ കോറമാണ്ടൽ തീരദേശ സമതലങ്ങളുമായി ബന്ധിപ്പിക്കുന്ന ഒരു പ്രധാന ചുരമാണ്. പശ്ചിമഘട്ടത്തിലെ ഒരു ഇടുങ്ങിയ താഴ്ന്ന പ്രദേശമായ ഈ ചുരം, സമുദ്രനിരപ്പിൽ നിന്ന് ഏകദേശം 300 മീറ്ററിൽ (980 അടി) താഴെയുള്ള ഉയരത്തിലാണ്. കൊല്ലം-ചെങ്കോട്ട റെയിൽ‌വേ ലൈനും നാഷണൽ ഹൈവേ 744 ഉം ഈ ചുരം വഴി കടന്നുപോകുന്നു. വിടവിന്റെ പടിഞ്ഞാറേയറ്റത്ത് കല്ലട നദീതടമുണ്ട്. പുനലൂരിലെ കാലാവസ്ഥയിൽ ഈ ചുരം ഒരു പ്രധാന പങ്ക് വഹിക്കുന്നു.