ആന്റണി രാജു

ഇംഗ്ലീഷ് വിലാസം

https://ml.wikipedia.org/wiki/Antony_Raju

ആന്റണി രാജു
സംസ്ഥാന ഗതാഗത വകുപ്പ് മന്ത്രി
പദവിയിൽ 20 മെയ് 2021- 24 ഡിസംബർ 2023
മുൻഗാമി	എ.കെ. ശശീന്ദ്രൻ
പിൻഗാമി	കെ.ബി. ഗണേഷ് കുമാർ
നിയമസഭാംഗം
പദവിയിൽ മെയ് 3 2021 - ജനുവരി 3 2026
മുൻഗാമി	വി.എസ്. ശിവകുമാർ
പിൻഗാമി	TBD
മണ്ഡലം	തിരുവനന്തപുരം
നിയമസഭാംഗം
പദവിയിൽ 1996-2001
മുൻഗാമി	എം.എം. ഹസൻ
പിൻഗാമി	എം.വി. രാഘവൻ
മണ്ഡലം	തിരുവനന്തപുരം വെസ്റ്റ്
വ്യക്തിഗത വിവരങ്ങൾ
ജനനം	(1954-11-18) 18 നവംബർ 1954 വയസ്സ്) Trivandrum
രാഷ്ട്രീയ കക്ഷി	ജനാധിപത്യ കേരള കോൺഗ്രസ്
പങ്കാളി	ഗ്രേസി രാജു
കുട്ടികൾ	റോഷ്ണി രാജു റോഹൻ രാജു
വസതി	നന്തൻകോട്
As of 5 ജനുവരി, 2025 ഉറവിടം: കേരള നിയമസഭ

2021 മുതൽ 2023 വരെ സംസ്ഥാന ഗതാഗത വകുപ്പ് മന്ത്രിയായിരുന്ന ഇടതു മുന്നണിയുടെ ഘടകകക്ഷിയായ ജനാധിപത്യ കേരള കോൺഗ്രസിൻ്റെ നേതാവും പതിനഞ്ചാം കേരള നിയമസഭാംഗവുമായിരുന്നു ആന്റണി രാജു (ജനനം: 18 നവംബർ 1954). 1996-ലെ പത്താം കേരള നിയമസഭയിൽ തിരുവനന്തപുരം വെസ്റ്റ് നിയോജകമണ്ഡലത്തിൽ നിന്നും ആദ്യമായി നിയമസഭാംഗമായി. 2021-ലെ പതിനഞ്ചാം കേരള നിയമസഭയിൽ തിരുവനന്തപുരത്തു നിന്നാണ് ഇത്തവണ നിയമസഭാംഗമായത്. 1990-ലെ മയക്കു മരുന്ന് കേസിൽ അടിവസ്ത്രത്തിൽ കൃത്രിമം കാണിച്ച കേസിലെ കോടതി വിധിയെ തുടർന്ന് 2026 ജനുവരി 3 മുതൽ നിയമസഭാംഗത്വത്തിൽ നിന്നും അയോഗ്യനാക്കപ്പെട്ടു. കേരള രാഷ്ട്രീയ ചരിത്രത്തിൽ ക്രിമിനൽ കേസിൽ ശിക്ഷിക്കപ്പെട്ട് നിയമസഭാംഗത്വം നഷ്ടമായ കേരളത്തിലെ ആദ്യ നിയമസഭ സാമാജികനാണ് ആൻ്റണി രാജു.

ജീവിതരേഖ

1954 നവംബർ 18 ന് തിരുവനന്തപുരം ജില്ലയിലെ പൂന്തുറയിൽ ലൂർദമ്മയുടേയും എസ്. അൽഫോൺസിന്റേയും മകനായി ജനിച്ചു. തിരുവനന്തപുരത്തെ സെന്റ് തോമസ് സ്കൂളിൽ പ്രാഥമിക വിദ്യാഭ്യാസം നേടിയ അദ്ദേഹം എറണാകുളം കളമശ്ശേരി രാജഗിരി സ്കൂളിൽ നിന്ന് സ്കൂൾ വിദ്യാഭ്യാസം പൂർത്തിയാക്കി. പിന്നീട് തുമ്പ സെന്റ് സേവ്യേഴ്സ് കോളേജിൽ നിന്ന് പ്രീ ഡിഗ്രീ പൂർത്തിയാക്കി. മാർ ഇവാനിയസ് കോളേജിൽ നിന്ന് ബിരുദവും. തിരുവനന്തപുരം ലോ കോളേജിൽ നിന്ന് നിയമ ബിരുദവും നേടി. ഒരു അഭിഭാഷകൻ കൂടിയാണ് ആൻ്റണി രാജു.

രാഷ്ട്രീയ ജീവിതം

വിദ്യാർത്ഥി പ്രസ്ഥാനമായ കെ.എസ്.സി.യിൽ പ്രവർത്തിച്ച് കേരള കോൺഗ്രസ് പാർട്ടിക്കാരനായി രാഷ്ട്രീയ ജീവിതമാരംഭിച്ച ആൻറണി രാജു ഒരുകാലത്ത് അതിൻ്റെ ചെയർമാനായിരുന്ന പി.ജെ. ജോസഫിൻ്റെ വിശ്വസ്ഥനായിരുന്നു.

1987 മുതൽ 1997 വരെ കേരള കോൺഗ്രസ് (ജോസഫ്) വിഭാഗത്തിൻ്റെ തിരുവനന്തപുരം ജില്ലാ പ്രസിഡൻ്റായും 1998-ൽ പാർട്ടി സംസ്ഥാന ജനറൽ സെക്രട്ടറിയായും പ്രവർത്തിച്ചു.

1990-ൽ ശംഖുമുഖം ഡിവിഷനിൽ നിന്ന് ജില്ലാ കൗൺസിൽ അംഗമായി തിരഞ്ഞെടുക്കപ്പെട്ടു. 1991-ലെ നിയമസഭ തിരഞ്ഞെടുപ്പിൽ തിരുവനന്തപുരം വെസ്റ്റിൽ നിന്ന് ഇടതു മുന്നണി സ്ഥാനാർത്ഥിയായി മത്സരിച്ചെങ്കിലും കോൺഗ്രസിലെ എം.എം. ഹസനോട് പരാജയപ്പെട്ടു.

1996-ലെ നിയമസഭ തിരഞ്ഞെടുപ്പിൽ തിരുവനന്തപുരം വെസ്റ്റ് മണ്ഡലത്തിൽ നിന്ന് കോൺഗ്രസ് നേതാവ് എം.എം. ഹസനെ പരാജയപ്പെടുത്തി ആദ്യമായി നിയമസഭാംഗമായി.

2001-ൽ തിരുവനന്തപുരം വെസ്റ്റിൽ നിന്ന് വീണ്ടും മത്സരിച്ചെങ്കിലും യു.ഡി.എഫ് സ്ഥാനാർത്ഥിയായ സി.എം.പി.യിലെ എം.വി.രാഘവനോട് പരാജയപ്പെട്ടു. 2006, 2011 നിയമസഭ തിരഞ്ഞെടുപ്പുകളിൽ മത്സരിച്ചില്ല.

2010-ൽ ജോസഫ് ഗ്രൂപ്പ് മാണി ഗ്രൂപ്പിൽ ലയിച്ചെങ്കിലും 2016-ലെ നിയമസഭ തിരഞ്ഞെടുപ്പിന് മുന്നോടിയായി മാണി ഗ്രൂപ്പ് വിട്ട് ജനാധിപത്യ കേരള കോൺഗ്രസ് എന്ന പുതിയ പാർട്ടി രൂപീകരിച്ച് ജോസഫ് പക്ഷത്തെ പ്രമുഖ നേതാക്കളായ കെ. ഫ്രാൻസിസ് ജോർജ്, ഡോ. കെ.സി. ജോസഫ് എന്നിവർക്കൊപ്പം യു.ഡി.എഫ് വിട്ട് ഇടതുപക്ഷത്തേക്ക് ചേർന്നു.

2016-ലെ നിയമസഭ തിരഞ്ഞെടുപ്പിൽ ജനാധിപത്യ കേരള കോൺഗ്രസ് ടിക്കറ്റിൽ തിരുവനന്തപുരത്ത് നിന്ന് മത്സരിച്ചെങ്കിലും കോൺഗ്രസിലെ വി.എസ്. ശിവകുമാറിനോട് പരാജയപ്പെട്ടു.

2020-ൽ ജനാധിപത്യ കേരള കോൺഗ്രസ് ചെയർമാൻ കെ. ഫ്രാൻസിസ് ജോർജ് പാർട്ടി വിട്ട് പി.ജെ. ജോസഫിൻ്റെ ഗ്രൂപ്പിൽ ലയിച്ചെങ്കിലും രാജുവും, കെ.സി. ജോസഫും ജനാധിപത്യ കേരള കോൺഗ്രസ് എന്ന പാർട്ടിയിൽ ഉറച്ചു ഇടതു പക്ഷത്ത് തന്നെ നിന്നു

2021-ലെ നിയമസഭ തിരഞ്ഞെടുപ്പിൽ തിരുവനന്തപുരം മണ്ഡലത്തിൽ നിന്ന് മത്സരിച്ച രാജു സിറ്റിംഗ് എം.എൽ.എയായിരുന്ന വി.എസ്. ശിവകുമാറിനെ പരാജയപ്പെടുത്തി വീണ്ടും നിയമസഭാംഗമായി

2021 മെയ് 20 മുതൽ 2023 ഡിസംബർ 24 വരെ രണ്ടാം തവണ പിണറായി വിജയൻ മുഖ്യമന്ത്രിയായ എൽ.ഡി.എഫ് മന്ത്രിസഭയിലെ ഗതാഗത വകുപ്പ് മന്ത്രിയായിരുന്നു ആൻ്റണി രാജു .

മറ്റ് പദവികൾ

• പൊതുമേഖലാ സ്ഥാപനമായ തിരുവിതാംകൂർ സിമൻറ്സ് ലിമിറ്റഡിന്റെ ചെയർമാൻ.
• കരകൗശല വികസന കോർപ്പറേഷന്റെ ചെയർമാൻ.
• കേരള സർവകലാശാലയിലെ സിൻഡിക്കേറ്റ് അംഗം

അയോഗ്യത

1990 ഏപ്രിൽ 4ന് ഓസ്ട്രേലിയൻ സ്വദേശി ആൻഡ്രൂ സാൽവഡോർ സർവലി അടിവസ്ത്രത്തിൽ ഹഷീഷ് മയക്കു മരുന്ന് കടത്തിയ കേസിൽ ഡിഫൻസ് കൗൺസിലിന് വേണ്ടി ഹാജരായ ജൂനിയർ വക്കീലായിരുന്ന ആൻ്റണി രാജു തൊണ്ടി മുതലായ അടിവസ്ത്രത്തിൽ കൃത്രിമം കാണിച്ചു എന്ന കേസിൽ 2026 ജനുവരി 2 ന് വിധി പ്രസ്ഥാവിച്ച കോടതി ഈ കേസിൽ ആൻ്റണി രാജു കുറ്റക്കാരനാണ് എന്ന് വിലയിരുത്തിയതിൻ്റെ അടിസ്ഥാനത്തിൽ നിയമസഭാംഗത്വത്തിൽ നിന്ന് 2026 ജനുവരി 3 മുതൽ അയോഗ്യനായിത്തീർന്നു. 2026 ഫെബ്രുവരി 2ന് ശിക്ഷാ വിധി കോടതി താത്കാലികമായി മരവിപ്പിച്ചു.

സ്വകാര്യ ജീവിതം

• ഭാര്യ : ഗ്രേസി (റിട്ട.ബാങ്ക് ഉദ്യോഗസ്ഥ)
• മക്കൾ
• ഡോ.റോഷ്നി
• രോഹൻ (മെഡിക്കൽ വിദ്യാർത്ഥി)

പുറത്തേക്കുള്ള കണ്ണികൾ

• Chandy Faces Heat Over Kasturirangan Repor Archived 2016-05-07 at the Wayback Machine