കുന്നംകുളം

**കുന്നംകുളം**
	കുന്നംകുളം
	കുന്നംകുളം Location of കുന്നംകുളം; in കേരളം and India
രാജ്യം	ഇന്ത്യ
സംസ്ഥാനം	കേരളം
ജില്ല(കൾ)	തൃശ്ശൂർ
ജനസംഖ്യ	51 (2001)
സമയമേഖല	IST (UTC+5:30)
വിസ്തീർണ്ണം; • സമുദ്രനിരപ്പിൽ നിന്നുള്ള ഉയരം	; • 57 m (187 ft)
• പിൻകോഡ്	• 680503

ഇംഗ്ലീഷ് വിലാസം

http://ml.wikipedia.org/wiki/Kunnamkulam

സ്ഥാനം: 10°39′N 76°05′E / 10.65°N 76.08°E / 10.65; 76.08 കേരളത്തിലെ തൃശ്ശൂർ ജില്ലയിലെ ഒരു പട്ടണവും മുനിസിപ്പാലിറ്റിയുമാണ് കുന്നംകുളം. നോട്ട് ബുക്ക്-അച്ചടി വ്യവസായത്തിന് പ്രശസ്തമാണ് കുന്നംകുളം. കേരളത്തിലെ നോട്ട് ബുക്ക് ഉദ്പാദനത്തിന്റെ 90 ശതമാനത്തിലധികവും കുന്നംകുളത്ത് നിന്നാണ്. തൃശ്ശൂർ ജില്ലാ ആസ്ഥാനത്തുനിന്ന് 22 കിലോമീറ്റർ അകലെയാണ് കുന്നംകുളം. ഒരു കാലത്ത്‌ വ്യാജ (ഡ്യൂപ്ലിക്കേറ്റ്) സാധനങ്ങൾക്കും ഉപകരണങ്ങൾക്കും കുപ്രസിദ്ധമായിരുന്നു കുന്നംകുളം. ^[1].

ഉള്ളടക്കം

1 പേരിനുപിന്നിൽ
2 ജനസംഖ്യ
3 ചരിത്രം
- 3.1 കായിക ചരിത്രം
4 രാഷ്ട്രീയം
5 ഗതാഗതം
- 5.1 അടുത്തുള്ള പ്രധാന റെയിൽവേ സ്റ്റേഷനുകൾ
- 5.2 സമീപപ്രദേശങ്ങളിൽ നിന്നുള്ള ദൂരം കിലോമീറ്ററിൽ
6 ഇതും കാണുക
7 അവലംബം
8 പുറത്തേക്കുള്ള കണ്ണികൾ

പേരിനുപിന്നിൽ [തിരുത്തുക]

കുന്നംകുളങ്ങര എന്നായിരുന്നു പൂർ‌വനാമം. കൊച്ചി രാജാക്കന്മാരുടെ 1763-ൽ പുറപ്പെടുവിച്ച ഒരു ഉത്തരവിൽ “കുന്നംകുളങ്ങരയിൽ കഴിഞ്ഞവർഷം 108 കടകൾക്കും ഈ വർഷം 11 കടകൾക്കും തീപിടിത്തം ഉണ്ടായിരിക്കുന്നു. ഇനിമുതൽ തീപിടിത്തം കൊണ്ടുള്ള അപകടങ്ങൾ ഒഴിവാക്കുന്നതിനായി എല്ലാ കട മുതലാളിമാരും അവരുടെ കടയുടെ മേൽക്കൂരകൾ ഓലയിൽ നിന്നു മാറ്റി ഓട് ആക്കുവാൻ ഉത്തരവിടുന്നു” എന്ന് എഴുതിയിരിക്കുന്നു.എന്നാൽ വാർഡിന്റെ റിപോർട്ടിൽ കൂനൻ കുളങ്ങര എന്നാണു കാണപ്പെടുന്നത്.^[2] കുളക്കരയിലെ കാവുകളാണ്‌ കുളങ്ങര എന്ന നാമത്തിനു പിന്നിൽ. കൂനൻ എന്നത് ദ്രാവിഡദേവതയായിരിക്കാൻ വഴിയുണ്ടെന്നും അല്ലെങ്കിൽ കുന്നുമായി ചേർന്ന കുളങ്ങരയുമാവാം പേരിനു പിന്നിൽ എന്ന് സ്ഥലനാമ ചരിത്രകാരൻ വി.വി.കെ വാലത്ത് അഭിപ്രായപ്പെടുന്നു. ^[3]

ജനസംഖ്യ [തിരുത്തുക]

2001-ലെ സെൻസസ് പ്രകാരം കുന്നംകുളത്തെ ജനസംഖ്യ 51,585 ആണ്. മൊത്തം ജനസംഖ്യയുടെ 47 ശതമാനം പുരുഷന്മാരും, 53 ശതമാനം സ്ത്രീകളുമാണ്. കുന്നംകുളത്തെ ശരാശരി സാക്ഷരതാനിരക്ക് 85 ശതാമാനമാണ്. ദേശീയ ശരാശരിയായ 59.5 ശതമാനത്തേക്കാൾ ഉയരത്തിലാണിത്. കുന്നംകുളത്തെ 86 ശതമാനം പുരഷന്മാരും, 83 ശതമാനം സ്ത്രീകളും സാക്ഷരരാണ്. കുന്നംകുളത്തെ ജനസംഖ്യയുടെ 10 ശതമാനം 6 വയസ്സിനു താഴെയുള്ളവരാണ്.

ചരിത്രം [തിരുത്തുക]

കേരളത്തിൽ തൃശ്ശൂരിനു വടക്കുള്ള ഒരു പ്രധാന വാണിജ്യ കേന്ദ്രമാണ് കുന്നംകുളം. ഈ ചെറിയ പട്ടണത്തിന് 300-ലേറെ വർഷത്തെ വാണിജ്യ ചരിത്രമുണ്ട്. അറബികൾ, ഗ്രീക്കുകാർ, പേർഷ്യക്കാർ, തുടങ്ങിയവർ കുന്നംകുളത്തുവന്ന് വ്യാപാരം ചെയ്തിരുന്നു.

കായിക ചരിത്രം [തിരുത്തുക]

ബാസ്കറ്റ് ബോൾ എന്ന കായികയിനത്തിൽ പേരുകേട്ട നഗരമാണ് കുന്നംകുളം^[4]. കേടായ ബസിന്റെ ബോഡി ചേസിൽ ബോർഡ് ഘടിപ്പിച്ചായിരുന്നു കുന്നംകുളത്തുകാർ ബാസ്‌കറ്റ്‌ബോൾ കളി ആരംഭിച്ചതെന്ന് പറയപ്പെടുന്നു^[4]. 1937-ലാണ് കുന്നംകുളത്ത് ആദ്യമായി ബാസ്‌കറ്റ്‌ബോൾ കോർട്ട് രൂപംകൊണ്ടത്. ചെമ്മണ്ണുകോർട്ടിനുചുറ്റും മുളകൊണ്ട് ഗ്യാലറികെട്ടിയാണ് ആദ്യകാലങ്ങളിൽ ഇവിടെ ടൂർണമെന്റുകൾ നടത്തിയിരുന്നത്. തൃശ്ശൂരിൽനിന്നുള്ള 'ജർമൻ' എന്ന വിളിപ്പേരുള്ള ആളാണ് ഈ ഗ്യാലറികളുടെ ശില്പി. 1976ൽ ആണ് സ്റ്റേഡിയം കോൺക്രീറ്റ് ചെയ്തത്. പിന്നീട് പുതിയ ബോർഡും ചുറ്റുമതിലും വന്നു. കുന്നംകുളത്ത് പോലീസ് സ്റ്റേഷനുസമീപത്തായാണ് ജില്ലയിലെതന്നെ പ്രധാന ബാസ്‌കറ്റ്‌ബോൾ കോർട്ടായ ജവാഹർ‌സ്റ്റേഡിയം സ്ഥിതി ചെയ്യുന്നത്. സ്റ്റേഡിയത്തിന്റെ രണ്ടു ഭാഗത്തായി ഗ്യാലറി, തൊട്ടടുത്ത് ഓഫീസ്, ഡ്രസ്സിങ് റൂം, മറ്റുസൗകര്യങ്ങൾ എന്നിവയും ഇവിടെയുണ്ട്. അമേരിക്കയിലും മറ്റും നടക്കുന്ന ബാസ്‌കറ്റ്‌ബോൾ ചാമ്പ്യൻഷിപ്പുകളിൽ ഉപയോഗിക്കുന്ന 'പവർറിലീസ്' (ജീംലൃ ഞലഹലമലെ) ബോർഡ് കേരളത്തിൽ ആദ്യമായി ഉപയോഗിച്ചത് കുന്നംകുളത്താണ്^[4]. കേരളത്തിൽ നിന്ന് ആദ്യമായി ഇന്ത്യൻ ടീമിൽ കളിച്ച ബാസ്കറ്റ് ബോൾ താരം സി ഐ വർഗീസ് കുന്നംകുളത്തുകാരനാണ്^[4].

രാഷ്ട്രീയം [തിരുത്തുക]

ആലത്തൂർ ലോക്‌സഭാ നിയോജകമണ്ഡലത്തിൽ ഉൾപ്പെട്ട ഒരു നിയമസഭാമണ്ഡലമാണ് കുന്നംകുളം. മുൻപ് കുന്നംകുളം ഒറ്റപ്പാലം നിയോജകമണ്ഡലത്തിൽ ഉൾപ്പെട്ടതായിരുന്നു.ശ്രീ ബാബു എം പാലിശ്ശേരിയാണു നിലവിലെ എം എൽ എ. 13-ാമത് കേരള നിയമസഭയിലേക്കുള്ള തിരഞ്ഞെടുപ്പിൽ കുന്നംകുളം അസംബ്ളി നിയോജക മണ്ഡലത്തിൽ നിന്നും 461 വോട്ടുകളുടെ ഭൂരിപക്ഷത്തിന് വിജയിച്ചു. ^[5]

കുന്നംകുളം പട്ടണം

ഗതാഗതം [തിരുത്തുക]

തൃശ്ശൂർ-കുറ്റിപ്പുറം (സംസ്ഥാന പാത 69), ചാവക്കാട്-വടക്കാഞ്ചേരി (സംസ്ഥാന പാത 50) എന്നീ രണ്ട് സംസ്ഥാന പാതകൾ കുന്നംകുളം പട്ടണത്തിലൂടെ കടന്നു പോകുന്നു. കേരളത്തിലെ പ്രധാനപട്ടണങ്ങളിലേക്ക് ഇവിടെ നിന്ന് ബസ് സർവീസ് ഉണ്ട്.