മാളികപ്പുറത്തമ്മ

ശബരിമല ശ്രീ ധർമ്മശാസ്താ ക്ഷേത്രത്തിൽ ആരാധിക്കപ്പെടുന്ന ഒരു പ്രധാനപ്പെട്ട ഭഗവതിയാണ് മാളികപ്പുറത്തമ്മ. ശംഖ്, ചക്രം, അഭയം, വരദമുദ്ര എന്നിവ ധരിച്ച ചതുർ ബാഹുവായ ഭഗവതിയുടെ പ്രതിഷ്ഠ ആണ് മാളികപ്പുറം ഭഗവതി ക്ഷേത്രത്തിൽ കാണപ്പെടുന്നത്. ശബരിമലയിൽ, പ്രധാന മൂർത്തിയായ ധർമ്മശാസ്താവിന് തുല്യമായ പ്രാധാന്യമുള്ള ഒരു പ്രതിഷ്ഠയാണ് മാളികപ്പുറത്തമ്മയുടേത്. അയ്യപ്പനുമായി ബന്ധപ്പെട്ട ഐതിഹ്യങ്ങളിൽ, മഹിഷിയെ നിഗ്രഹിച്ച് ശാപമോക്ഷം നൽകിയപ്പോൾ അവതരിച്ച ദേവി അയ്യപ്പനോട് വിവാഹാഭ്യർഥന നടത്തിയെന്നും എന്നാൽ അത് സാധിക്കില്ല എന്നറിഞ്ഞപ്പോൾ മാളികപുറത്തെ ഭഗവതിയിൽ ലയിച്ചു മോക്ഷം നേടിയെന്നും, അതല്ല പാണ്ഡ്യ രാജാവിന്റെ കുലദൈവവും ആദിപരാശക്തിയുമായ മധുര മീനാക്ഷിയാണ് മാളികപ്പുറത്തമ്മയെന്നും രണ്ടഭിപ്രായമുണ്ട്. ഇതുമായി ബന്ധപ്പെട്ട ഐതീഹ്യങ്ങൾ വിശദമായി താഴെ കൊടുത്തിട്ടുണ്ട്. ഈ ക്ഷേത്രത്തിന്റെ ഭിത്തിയിൽ അഷ്ടലക്ഷ്മിമാരുടെ രൂപം കാണാം. മാളികപ്പുറത്തമ്മ ആദിപരാശക്തി, ദുർഗ്ഗ, മഹാലക്ഷ്മി തുടങ്ങിയ പല ഭാവങ്ങളിലും ആരാധിക്കപ്പെടാറുണ്ട്. ലളിത സഹസ്രനാമം ഇവിടെ ചൊല്ലി കേൾക്കാറുണ്ട്. മകരവിളക്ക് ഉത്സവത്തിന് ശേഷമുള്ള അവസാന ചടങ്ങായ ഗുരുസി പൂജ മാളികപ്പുറത്തെ ഭഗവതി ക്ഷേത്രത്തിലാണ് നടക്കുന്നത്. പരാശക്തി അല്ലെങ്കിൽ ഭഗവതി സങ്കല്പത്തിലാണ് ഇവിടെ പൂജകൾ നടക്കാറുള്ളത്. ഇത് ശാക്തേയ ആരാധനയുടെ ഭാഗം കൂടിയാണ്.

ശബരിമല അയ്യപ്പ ക്ഷേത്രത്തിന്റെ പ്രധാന ശ്രീകോവിലിൽ ദർശനം നടത്തിയ ശേഷമാണ് മാളികപുറത്തമ്മയുടെ ശ്രീകോവിൽ സന്ദർശിക്കുന്നത്. ഇരുനില മാളികയുള്ള ക്ഷേത്രം ആയത് കൊണ്ടാണ് ഈ പേര് ലഭിച്ചത്.

മാലയിട്ട് വ്രതമെടുത്ത് ശബരിമലയിൽ പതിനെട്ടാംപടി കയറി തൊഴാനെത്തുത്ത എല്ലാ പുരുഷൻമാരെയും അയ്യപ്പൻ എന്നും എല്ലാ സ്ത്രീകളെയും മാളികപ്പുറത്തമ്മ എന്നുമാണ് തീർഥാടന കാലം കഴിയുന്നതുവരെ വിളിക്കുന്നത്. ചരിത്രപരമായി മാളികപ്പുറത്തമ്മ എന്നത് പുരാതന ദ്രാവിഡ മാതൃ ദൈവമായ ‘കൊറ്റവൈ’ എന്ന ഭഗവതി ആയിരുന്നു എന്നും ചൂണ്ടിക്കാണിക്കപ്പെടുന്നു. പുരാതന കാലത്തെ മാതൃ ദൈവാരാധന, ഊർവരത, കാർഷിക സമൃദ്ധി, ഐശ്വര്യം, യുദ്ധ വിജയം, ശാക്തേയ പൂജ തുടങ്ങിയവ ഈ ഭഗവതി സങ്കല്പവുമായി ബന്ധപെട്ടു കിടക്കുന്നു. ശൈവ വൈഷ്ണവ ബൗദ്ധ മതങ്ങളും അബ്രഹാമിക മതങ്ങളും ഉടലെടുക്കുന്നതിന് മുൻപ് തന്നെ മാതൃദൈവാരാധന ലോകത്തിൽ വ്യാപകമായിരുന്നു.

പദോൽപ്പത്തി

മാളികയുടെ ആകൃതിയിൽ നിർമ്മിക്കപ്പെട്ട ആലയത്തിൽ കുടികൊള്ളുന്നതിനാലാണ് മാളികപ്പുറത്തമ്മ എന്നറിയപ്പെടുന്നത് എന്നാണ് വിശ്വാസം. നേരത്തെ ഇവിടെ ഭഗവതിയുടെ ഒരു പീഠം മാത്രമാണ് ഉണ്ടായിരുന്നത്. ശാക്തേയ ആചാര പ്രകാരമുള്ള പൂജ ഇവിടെ കാണപ്പെട്ടിരുന്നു. വിപുലമായ ഭഗവതി പ്രതിഷ്ഠയോട് കൂടിയ മാളികയുള്ള ക്ഷേത്രം പിന്നീട് നിർമ്മിക്കപ്പെട്ടതാണ്.

ശ്രീകോവിൽ

ധർമ്മശാസ്താവിന്റെ ശ്രീകോവിൽ സ്ഥിതി ചെയ്യുന്നതിന് വടക്കുഭാഗത്ത് ഏകദേശം ഇരുന്നൂറു മീറ്റർ മാറിയാണ് മാളികപുറത്തമ്മയുടെ ശ്രീകോവിൽ സ്ഥിതി ചെയ്യുന്നത്. ശ്രീകോവിലിലെ ഭഗവതിയുടെ പ്രതിഷ്ഠയ്ക്ക് നാല് കൈകൾ (ചതുർ ബാഹു) കാണാം. ഓരോ കയ്യിലും ശംഖ്, ചക്രം, അഭയം, മുദ്ര എന്നിവ ഉണ്ട്. ഇത് പൊതുവെ കേരളത്തിൽ കാണപ്പെടുന്ന മറ്റു ചില ഭഗവതി ക്ഷേത്രങ്ങളിലെ പ്രതിഷ്ഠയുമായി സാമ്യം ഉള്ളതാണ്. കൂടാതെ പിച്ചള പൊതിഞ്ഞ ശ്രീകോവിലിന്റെ ഭിത്തിയിൽ അഷ്ടലക്ഷ്മിമാരുടെ രൂപം കൊത്തിയിട്ടുണ്ട്. അതിനാൽ അഷ്ട ഐശ്വര്യങ്ങൾ നൽകുന്ന അഷ്ടലക്ഷ്മിമാരുടെ സാന്നിധ്യം ഇവിടെ ഉള്ളതായി വിശ്വസിക്കപ്പെടുന്നു. മാളികപുറത്തെ ഭഗവതിയെ ദുർഗ്ഗ, മഹാലക്ഷ്മി തുടങ്ങിയ പല ഭാവങ്ങളിലും ആരാധിക്കപ്പെടുന്നു. ആദ്യകാലത്ത് മാളികപ്പുറത്തമ്മയ്ക്ക് പീഠപ്രതിഷ്ഠ മാത്രമാണ് ഉണ്ടായിരുന്നത്. ശബരിമല ക്ഷേത്രം അഗ്നിക്കിരയായ ശേഷം നടത്തിയ പുനപ്രതിഷ്ഠയിൽ ബ്രഹ്മശ്രീ കണ്ഠരര് മഹേശ്വരര് തന്ത്രികളാണ് ഇന്ന് കാണുന്ന രീതിയിലുള്ള വിപുലമായ ഭഗവതി പ്രതിഷ്ഠ നടത്തിയത്. അതുപോലെ ക്ഷേത്രത്തിന്റെ മേൾക്കൂരയും സോപാനവും സ്വർണ്ണം പൊതിഞ്ഞിട്ടുണ്ട്. മണ്ഡല- മകരവിളക്ക് ഉത്സവത്തിന് ശേഷം അവസാന ചടങ്ങായ ഗുരുസി പൂജ നടക്കുന്നത് മാളികപ്പുറത്താണ്. നാളികേരം ഉരുട്ടൽ, ഭഗവതി സേവ, ലളിത സഹസ്രനാമജപം തുടങ്ങിയവ പ്രധാന വഴിപാടുകളായി ഇവിടെ കാണപ്പെടുന്നു. പുരാതന കാലത്തെ മാതൃ ദൈവാരാധന, ഊർവരത, കാർഷിക സമൃദ്ധി, ഐശ്വര്യം, യുദ്ധ വിജയം തുടങ്ങിയവ ഭഗവതി സങ്കല്പവുമായി ബന്ധപെട്ടു കിടക്കുന്നു. ശൈവ വൈഷ്ണവ ബൗദ്ധ മതങ്ങളും അബ്രഹാമിക മതങ്ങളും ഉടലെടുക്കുന്നതിന് മുൻപ് തന്നെ ലോകത്തിൽ മാതൃദൈവാരാധന വ്യാപകമായിരുന്നു.

ഐതീഹ്യം

മഹിഷീ നിഗ്രഹം

മഹിഷിയെ നിഗ്രഹിച്ച് ശാപമോക്ഷം നൽകിയപ്പോൾ മഹിഷി സുന്ദരിയായ ഒരു സ്ത്രീയായി മാറുകയും അയ്യപ്പനോട് തന്നെ വിവാഹം കഴിക്കാൻ അഭ്യർഥന നടത്തുകയും ചെയ്തു എന്നാണ് ഐതീഹ്യം.നിത്യബ്രഹ്മചാരിയായ അയ്യപ്പൻ, തന്നെക്കാണാൻ കന്നി അയ്യപ്പൻമാർ ആരും വരാതിരിക്കുന്ന കാലത്ത് ആ സ്ത്രീയെ വിവാഹം കഴിച്ചു കൊള്ളാമെന്ന് വാക്ക് നൽകിയതായാണ് വിശ്വാസം. ആ ദേവി മാളികപ്പുറത്തെ ഭഗവതിയിൽ ലയിച്ചു മോക്ഷം നേടി എന്നാണ് ഐതീഹ്യം.

മധുര മീനാക്ഷി (ഭഗവതി/ ആദിപരാശക്തി)

പാണ്ഡ്യ പാരമ്പര്യമുള്ള പന്തളത്തെ രാജാവ് തന്റെ കുലദൈവമായി ആരാധിക്കുന്ന മധുര മീനാക്ഷി ഭഗവതിയാണ് മാളികപ്പുറത്തമ്മയെന്നാണ് മറ്റൊരു വിശ്വാസം. ഇപ്രകാരം പരാശക്തി അഥവാ ദുർഗ്ഗാ സങ്കൽപ്പവും മാളികപ്പുറം ക്ഷേത്രത്തിൽ ഉണ്ട്. ശംഖ്, ചക്രം, അഭയ, വരദ മുദ്രകൾ ധരിച്ച ചതുർ ബാഹുവായ പ്രതിഷ്ഠ പരാശക്തിയായ ഭഗവതിയെ സൂചിപ്പിക്കുന്നു. ക്ഷേത്രത്തിന്റെ ഭിത്തിയിൽ കൊത്തി വച്ചിരിക്കുന്ന അഷ്ടലക്ഷ്മിമാരെയും ഇവിടെ കാണാം. അതിനാൽ മഹാലക്ഷ്മി സങ്കല്പവും ഇവിടെ കാണാം. പരാശക്തി അഥവാ ഭഗവതി സങ്കല്പത്തിലാണ് ഇവിടെ ആരാധന അല്ലെങ്കിൽ പൂജ നടക്കുന്നത്.

ചീരപ്പൻചിറ തറവാടുമായി ബന്ധപ്പെട്ട വിശ്വാസങ്ങൾ

അയ്യപ്പൻ കളരി പഠിക്കാൻ വന്ന മുഹമ്മയിലെ ചീരപ്പൻചിറ തറവാട്ടിലെ കളരിഗുരുവിന്റെ മകളായ ചെറൂട്ടിയാണ് മാളികപ്പുറത്തമ്മ എന്നതാണ് മറ്റൊരു ഐതീഹ്യം. ചെറൂട്ടിക്ക് അയ്യപ്പനോട് തോന്നിയ പ്രണയം അയ്യപ്പനോട് തുറന്ന് പറഞ്ഞുവെന്നും, എന്നാൽ താൻ നൈഷ്ഠിക ബ്രഹ്മചാരിയായാണെന്ന് മറുപടി നൽകിയെന്നും, പിന്നീട് അയ്യപ്പനെ കാണാൻ പോയ ചെറൂട്ടിയെ വാവരുടെ നേതൃത്വത്തിൽ അയ്യപ്പന്റെ അടുത്ത് എത്തിച്ചുവെന്നുമാണ് ഐതീഹ്യം. ചെറൂട്ടിക്ക് പകരം ലീല, ലളിത, പൂങ്കുടി എന്നീ പേരുകളും മാളികപ്പുറത്തമ്മയുടേതായി പറയുന്നുണ്ട്. അയ്യപ്പൻ ശബരിമലയിൽ സമാധിയായപ്പോൾ അതിന് സമീപം ലളിത അവിടെ തപസ്സ് ചെയ്തുവെന്നും ഐതിഹ്യം. ഇവിടെ ഇരുനില മാളികയുള്ള ഭഗവതി ക്ഷേത്രം പിൽക്കാലത്ത് നിർമിച്ചു എന്ന്‌ വിശ്വാസം.

ശരംകുത്തിയിലേക്കുള്ള എഴുന്നള്ളത്ത്

കന്നി അയ്യപ്പൻമാർ ആരും വരാതിരിക്കുന്ന കാലത്ത് മാളികപ്പുറത്തമ്മയെ വിവാഹം കഴിച്ചു കൊള്ളാമെന്ന് അയ്യപ്പൻ വാക്ക് നൽകി എന്ന ഐതീഹ്യവുമായി ബന്ധപ്പെട്ട് ശബരിമലയിൽ മകരവിളക്ക് ഉത്സവം സമാപിച്ചശേഷം രാത്രിയിൽ നടത്തുന്ന ചടങ്ങാണ് മാളികപ്പുറത്തമ്മയുടെ എഴുന്നള്ളത്ത് എന്ന്‌ ഒരു ഭാഷ്യം പ്രചരിക്കുന്നുണ്ട്. യഥാർത്ഥത്തിൽ ഇത് തെറ്റാണ്. മാളികപ്പുറം ഭഗവതിക്ക് എങ്ങോട്ടും‌ എഴുന്നള്ളിപ്പ് ഇല്ല എന്നതാണ് സത്യം. മാളികപ്പുറം ക്ഷേത്രത്തിന് സമീപമുള്ള അയ്യപ്പൻറെ മണിമണ്ഡപത്തിൽ നിന്നുള്ള വിളക്ക് എഴുന്നള്ളത്തു ആയത് കൊണ്ട് ഇത് ആദ്യം മാളികപ്പുറം എഴുന്നെള്ളത് എന്നും പിന്നീട് മാളികപ്പുറത്തമ്മയുടെ എഴുന്നള്ളത്തു എന്ന് തെറ്റി ധരിക്കപ്പെട്ടു.

മണിമണ്ഡപം എന്ന പീഠത്തിൽ സമാധിയിൽ കുടികൊള്ളുന്ന അയ്യപ്പസ്വാമിയാണ് ഇപ്രകാരം എഴുന്നെള്ളുന്നത്. പതിനെട്ടാം പടിക്കു മുകളിൽ കുടികൊള്ളുന്ന ശ്രീധർമ്മശാസ്താവിനെ കാണുവാൻ അയ്യപ്പസ്വാമി നടത്തുന്ന ഈ എഴുന്നെള്ളത്ത് വിളക്കെഴുന്നെള്ളത്ത് എന്നാണ് അറിയപ്പെടുന്നത്. പാരമ്പര്യമായി റാന്നി കുന്നക്കാട്ട് കുടുംബത്തിലെ അംഗങ്ങൾ മകരം ഒന്നിന് അയ്യപ്പസ്വാമിയെ ജീവസമാധിയിൽ നിന്ന് ഉണർത്തി യശേഷം മണിമണ്ഡപത്തിൽ കളമെമെഴുതുകയും തുടർന്ന് മണിമണ്ഡപത്തിൽ നിന്നും വിളക്ക് എഴുന്ന ള്ളത്തുനടത്തി പതിനെട്ടാം പടിയിൽ നായാട്ടു വിളിക്കുശേഷം തിരിച്ചു മണിമണ്ഡപത്തിലേക്കു അയ്യപ്പസ്വാമിയെ എഴുന്നെള്ളിച്ച് പൂജക്ക് ശേഷം കളംമായ്ക്കുകയും ചെയ്യുന്നു. മകരം ഒന്നു മുതൽ അഞ്ചു വരെ അയ്യപ്പസ്വാമിയുടെ അഞ്ച് ഭാവങ്ങളാണ് കളത്തിൽ വരയ്ക്കുന്നത്. ബാലകൻ, പുലിവാഹനൻ, അമ്പും വില്ലും ധരിച്ച വില്ലാളി വീരൻ, സർവ്വാഭരണഭൂഷിതൻ, ശാസ്താവിൽ വിലയിച്ച ചിന്മുദ്രയണിഞ്ഞ സമാധിസ്ഥൻ എന്നിവയാണത്.

മകരം 1 മുതൽ 4 വരെ അയ്യപ്പൻ ജീവസമാധിയായ മണിമണ്ഡപത്തിൽ നിന്നും പതിനെട്ടാം പടിയിലേക്കും മകരം 5 നു ശരം കുത്തിയിലേക്കും അയ്യപ്പൻറെ മകരവിളക്ക് വിളക്ക് എഴുന്നള്ളത്തു ആണ് നടക്കുന്നത്. യഥാർഥത്തിൽ ഈ വിളക്കെഴുന്നെള്ളിപ്പാണ് മകരവിളക്ക് എന്ന് പൗരാണിക കാലം മുതൽ അറിയപ്പെടുന്നത് .

പന്തളം കൊട്ടാരത്തിൽ നിന്ന് ശിരസ്സിൽ ഏറ്റി എഴുന്നെള്ളി എത്തിക്കുന്ന തിരുവാഭരണപ്പെട്ടിയിൽ വീരയോദ്ധാഭാവത്തിലുള്ള സ്വാമി അയ്യപ്പൻറെ കൊമ്പൻ മീശയുള്ള തിരുമുഖം ആലേഖനം ചെയ്ത തിടമ്പും അധികാര ചിഹ്നങ്ങളായ തലപ്പാറ മല, ഉടുമ്പാറമല എന്നിവയുടെ കൊടി അകമ്പടിയോടും കൂടിയാണ് ആണ് വിളക്ക് എഴുന്നള്ളത്ത് നടക്കുന്നത്.

മകരം 5 ണ് അയ്യപ്പസ്വാമി ശരം കുത്തിയിലേക്കു എഴുന്നള്ളി തിരിച്ചു എഴുന്നള്ളുന്നു. മുമ്പ് ശബരിമല ഉത്സവ കാലം മകരം ഒന്നു മുതൽ ആയിരുന്നു. അതിനെത്തുന്ന ഭക്തജനങ്ങൾക്ക് സൗകര്യത്തിനായി സന്നിധാനത്തു നിന്ന് മലദൈവങ്ങൾ, ഭഗവാന്റെ ഗണങ്ങൾ എന്നിവർ സന്നിധാനത്തു നിന്ന് ശരംകുത്തിയിലേക്ക് ഒഴിഞ്ഞു നിൽക്കും. ഇവരെ തിരികെ ക്ഷണിച്ചു കൊണ്ട് വന്നാണ് ഗുരുതി നടത്തുന്നത്. ഉപചാരപൂർവ്വമുള്ള ഭൂതഗണങ്ങളുടെ വരവായതിനാൽ വാദ്യമേളങ്ങൾ, തീവെട്ടി ഇവ ഒഴിവാക്കുന്നു. ഇതിന് ശേഷം മണിമണ്ഡപത്തിനു മുൻപിൽ ചൈതന്യ ശുദ്ധിക്കായി ഗുരുതിയും നടത്തുന്നു.

പ്രധാന വഴിപാടുകൾ

• നാളികേരം ഉരുട്ടൽ
• ഭഗവതിസേവ
• ലളിത സഹസ്രനാമജപം, ലളിത സഹസ്രനാമാർച്ചന, പുഷ്പാഞ്ജലി, പായസം, പട്ട് ചാർത്തുക, ത്രിമധുരം, പട്ടും താലിയും നടയ്ക്ക് വയ്ക്കുക എന്നിവയാണ് മറ്റ് വഴിപാടുകൾ. ഭഗവതി സ്തോത്ര ജപങ്ങൾ പോലെ മറ്റു പല വഴിപാടുകളും ഇവിടെ കാണാം.

ശബരിമല കോടതി വിധി

ശബരിമലയിൽ ഋതുമതികളായ സ്ത്രീകൾക്ക് കൂടി പ്രവേശനം അനുവദിച്ചു കൊണ്ടുള്ള സുപ്രീം കോടതി വിധിക്ക് ശേഷം ഉണ്ടായ ചർച്ചകളിൽ മാളികപ്പുറത്തമ്മയുമായി ബന്ധപ്പെട്ട കഥകളും വ്യാപകമായി പരാമർശിക്കപ്പെടുകയുണ്ടായി. ചിലർ മാളികപ്പുറത്തമ്മയുടെ കഥ പറഞ്ഞ് യുവതീ പ്രവേശനത്തെ അനുകൂലിച്ചപ്പോൾ, മറ്റു പലരും ഇതേ കഥ പറഞ്ഞ് യുവതീ പ്രവേശനത്തെ എതിർക്കുകയും ചെയ്തു.