മേഘം
വിക്കിപീഡിയ, ഒരു സ്വതന്ത്ര വിജ്ഞാനകോശം.
കാഴ്ചയ്ക്ക് ഗോചരമായ രീതിയില് ഭൗമാന്തരീക്ഷത്തിലെ നീരാവി ഘനീഭവിച്ചുണ്ടാകുന്ന വാതകപിണ്ഡങ്ങളാണ് മേഘങ്ങള്. അന്തരീക്ഷത്തില് മേഘങ്ങള് കാണപ്പെടുന്ന ഉയരത്തിനനുസൃതമായി അവയില് ഘനീഭവിച്ച നീരാവിയോ, മഞ്ഞുപരലുകളോ കാണപ്പെടാം. മേഘങ്ങളെപ്പറ്റി പഠിക്കുന്ന ശാസ്ത്രശാഖയാണ് നെഫോളജി.
ഉള്ളടക്കം |
[തിരുത്തുക] രൂപീകരണം
ഉയര്ന്ന ആപേക്ഷിക ആര്ദ്രതയില് നീരാവിയും വഹിച്ചുകൊണ്ട് അന്തരീക്ഷത്തിലേക്കുയരുന്ന “വായു കുമിളകള്” (thermals), അന്തരീക്ഷത്തിന്റെ മുകള് തട്ടുകളിലേക്കെത്തുമ്പോഴേക്കും വികസിക്കുകയും, തണുക്കുകയും ചെയ്യുന്നു. ഓരോ കിലോമീറ്റര് ഉയരം ചെല്ലുന്തോറും അന്തരീക്ഷവായുവിന്റെ താപനില 5-6°C / km വീതം കുറയുന്നു. ഇങ്ങനെ തണുത്ത് ഡ്യൂ പോയിന്റ് വായുവിന്റെ താപനിലയോടൊപ്പമെത്തുന്ന അവസരത്തില് നീരാവി ഘനീഭവിക്കുകയും,condensation nuclei എന്നുവിളിക്കപ്പെടുന്ന അതിസൂക്ഷ പൊടിപടലങ്ങളിലേക്ക് ഘനീഭവിച്ച് മഞ്ഞുകണങ്ങളായി മാറുകയും ചെയ്യുന്നു. ഇതാണ് നമ്മുടെ കാഴ്ചയ്ക്ക് ഗോചരമാകുന്ന മേഘങ്ങള്.
അന്തരീക്ഷവായുവിലുള്ള നീരാവി ഘനീഭവിച്ച് ഹിമകണങ്ങള്, ജലകണങ്ങള്, മഴ, മഞ്ഞ് ഇവയിലേതെങ്കിലും ഒരു രൂപത്തിലായിമാറുന്ന പ്രക്രിയയെയാണ് Precipitation എന്നു പറയുന്നത്. എല്ലാ മേഘങ്ങളും, ഇവയിലേതെങ്കിലും ഒരു രൂപത്തിലുള്ള ജലതന്മാത്രകള് വഹിച്ചിരിക്കുന്നു.
[തിരുത്തുക] മേഘങ്ങളുടെ നാമകരണം
1802 ല് ലാമര്ക്ക് (Lamarck)ആണ് ആദ്യമായി മേഘങ്ങള്ക്ക് പേരിടാനുള്ള ശ്രമങ്ങള് തുടങ്ങിയത്. 1803 ല് ലൂക്ക് ഹോവാര്ഡ് (Luke Howard) മേഘരൂപങ്ങള്ക്ക് ലാറ്റിന് പേരുകള് നിര്ദ്ദേശിച്ചു. 1887 ല് ആബെര് കോംബി, ഹില്ഡിബ്രാന്റ്സണ് (Abercromby and Hildebrandson) എന്നീ ശാസ്ത്രജ്ഞരാണ് ഇന്നത്തെ രീതിയില് ഉയരവും, ആകൃതിയും അടിസ്ഥാനമാക്കി മേഘങ്ങള്ക്ക് പേരുനല്കുന്ന പദ്ധതി ആവിഷ്കരിച്ചത്.
ഒരു നാടപോലെ നീണ്ട്, തൂവല് പോലെ മൃദുലമായ വശങ്ങളോടുകൂടിയവ, ചെറിയമേഘശകലങ്ങള് നിരത്തിയിട്ടപോലെ കാണപ്പെടുന്നവ, ആകാശം മുഴുവന് നിറഞ്ഞ് നിര്ത്താതെ മഴപെയ്യിക്കുന്നവ,കാറ്റിന്റേയും ഇടിയുടേയും അകമ്പടിയോടെ കറുത്തിരുണ്ട് വരുന്നവ എന്നിങ്ങനെ പലതരത്തില്പ്പെട്ട മേഘങ്ങളെ കാണാം. ഇവയേയൊക്കെ പ്രത്യേകരീതിയില് തരംതിരിച്ചാണ് കാലാവസ്ഥാ വിദഗ്ദ്ധര് വിളിക്കുന്നത്. മേഘങ്ങളെ അവയുടെ രൂപത്തിന്റെ (shape) അടിസ്ഥാനത്തിലും അവ സ്ഥിതിചെയ്യുന്ന ഉയരത്തിന്റെ (altitude) അടിസ്ഥാനത്തിലും തരം തിരിച്ചിരിക്കുന്നു. ഓരോ ഇനങ്ങളേയും സൂചിപ്പിക്കുന്ന പേരും ഉണ്ട്.
രൂപത്തിന്റെ അടിസ്ഥാനത്തില്, പ്രധാനമായും മൂന്നു പേരുകളില് മേഘങ്ങള് അറിയപ്പെടുന്നു.
- സ്ട്രാറ്റസ് (stratus) : ഒരു പാളിപോലെ കാണപ്പെടുന്നു, കൃത്യമായ അരികുകളില്ല
- ക്യുമുലസ് (cumulus) : ഒരു കൂന, കൂമ്പാരം പോലെ കാണപ്പെടുന്നു. കൃത്യമായ അരികുകള് ഉണ്ടായിരിക്കും
- സീറസ് (cirrus) : നാട, നാര്, തൂവല് തുടങ്ങിയ ആകൃതിയില്, വളരെ മൃദുവായി തോന്നുന്ന അരികുകള് ഉണ്ടായിരിക്കും
ഇനി ഇവയോരോന്നും ആകാശവിതാനത്തിന്റെ ഏതൊക്കെ ഭാഗങ്ങളില് കാണപ്പെടുന്നു എന്നു നോക്കാം.
താഴെക്കൊടുത്തിരിക്കുന്ന ചിത്രത്തില് കാണിച്ചിരിക്കുന്നതുപോലെ ഭൂതലത്തില് നിന്നും മുകളിലേക്ക് അന്തരീക്ഷത്തെ മൂന്നു വ്യത്യസ്ത മേഖലകളായി കാലാവസ്ഥാ നിരീക്ഷകര് തിരിച്ചിരിക്കുന്നു.
സമുദ്രനിരപ്പില്നിന്നും ഏകദേശം 2 കിലോമീറ്റര് വരെയുള്ള ഭാഗത്തെ നിമ്നതലം lower level) എന്നും ആ ഭാഗത്ത് രൂപംകൊള്ളുന്ന മേഘങ്ങളെ നിംനതല മേഘങ്ങള് (low level clouds) എന്നും വിളിക്കുന്നു. അതിനുമുകളില് 6 കിലോമീറ്റര് വരെ ഉയരത്തിലുള്ള ഭാഗത്തെ മധ്യതലം (mid level) എന്നും ആ ഭാഗത്ത് കാണപ്പെടുന്ന മേഘങ്ങളെ മദ്ധ്യതല മേഘങ്ങള്(mid level clouds) എന്നും വിളിക്കുന്നു. ആറുമുതല് ഏകദേശം 13 കിലോമീറ്റര് വരെയുള്ള വായുമണ്ഡലത്തെ ശീര്ഷതലം(high level) എന്നും ആ ഭാഗത്തെ കാണപ്പെടുന്ന മേഘങ്ങളെ ശീര്ഷതല മേഘങ്ങള് (high level clouds) എന്നും വിളിക്കുന്നു.
മേഘങ്ങളുടെ പേരുകള്ക്ക് രണ്ട് ഭാഗങ്ങള് ഉണ്ടായിരിക്കും. ഒന്നാമത്തെ ഭാഗം ആ മേഘം ഏതു തലത്തിലാണ് കാണപ്പെടുന്നതെന്നും, രണ്ടാമത്തെ ഭാഗം ആ മേഘത്തിന്റെ രൂപത്തെയും കുറിക്കുന്നു. ഉദാഹരണങ്ങള് "ആള്ട്ടോ-ക്യുമുലസ്", "സിറോ-ക്യുമുലസ്".
high level clouds ന്റെ പേരിനൊപ്പം "സിറോ" (cirro) എന്നും മധ്യതല മേഘങ്ങളുടെ പേരിനൊപ്പം "ആള്ട്ടോ" (alto) എന്നും സൂചിപ്പിച്ചിരിക്കും. ഏറ്റവും താഴെയുള്ള നിമ്നതലമേഘങ്ങളുടെ പേരിനൊപ്പം ഇത്തരത്തില് ഉയരം സൂചിപ്പിക്കുന്ന വാക്കുകള് ഉണ്ടാവില്ല; അവയുടെ രൂപം മാത്രമേ പറയാറുള്ളൂ. മേഘങ്ങളുടെ പേരിനൊപ്പം “നിംബസ്” “നിംബോ” എന്നിവയിലേതെങ്കിലും വാക്ക് ഉണ്ടെങ്കില് അവ മഴമേഘങ്ങളാണെ എന്നര്ത്ഥം.
[തിരുത്തുക] ശീര്ഷതല മേഘങ്ങള്
അന്തരീക്ഷത്തിന്റെ ശീര്ഷതലത്തില് മൂന്നുതരം മേഘങ്ങളാണ് കാണപ്പെടുന്നത്.
- സിറസ് മേഘങ്ങള്
- സിറോ ക്യുമുലസ് മേഘങ്ങള്
- സിറോ സ്ട്രാറ്റസ് മേഘങ്ങള്
[തിരുത്തുക] സിറസ് മേഘങ്ങള്
ആകാശത്തിന്റെ മുകള്ത്തട്ടിലായി മിനുമിനുത്തൊരു സില്ക്ക് ഷാള് പോലെ, നാടകെട്ടിയതുമാതിരിയുള്ള മേഘങ്ങളെ കണ്ടിട്ടില്ലേ? ഇവയാണ് "സിറസ്" (cirrus) എന്നറിയപ്പെടുന്ന മേഘങ്ങള്.
"സിറസ്" എന്ന ലാറ്റിന് വാക്കിന്റെ അര്ത്ഥം curly, നാരുപോലെയുള്ള എന്നൊക്കെയാണ്. നിശ്ചലമായി, ഒരേസ്ഥലത്ത് കുറേയേറെനേരം ഇവയുണ്ടാവും, സൂര്യന് ഉയര്ന്നതലങ്ങളില് നില്ക്കുമ്പോള് തൂവെള്ളനിറത്തിലായിരിക്കും ഇവ കാണപ്പെടുക. അന്തരീക്ഷത്തിന്റെ ശീര്ഷമേഘലയില് (high level) മാത്രമേ ഇവയെ കാണുകയുള്ളൂ. ഭൗമാന്തരീക്ഷത്തില് മുകളിലേക്കു പോകുന്തോറും ഊഷ്മാവ് കുറഞ്ഞുവരുന്നു. സിറസ് മേഘങ്ങള് കാണപ്പെടുന്ന 6 കിലോമീറ്ററിനും മുകളിലുള്ള മേഖലയിലെ താപനില -40°C യ്കും താഴെയാണ്. അതായത് ജലം തണുത്ത് ഐസായിമാറുന്ന പൂജ്യം ഡിഗ്രി സെല്ഷ്യസിനേക്കാള് 40 ഡിഗ്രി താഴെ എന്നര്ത്ഥം. ഇത്രയും വലിയ കൊടുംതണുപ്പില് വായുവിലുള്ള ജലബാഷ്പം ജലകണങ്ങളായല്ല, ഐസ് ക്രിസ്റ്റലുകളായിത്തന്നെയാണ് കാണപ്പെടുന്നത്. അതിനാല് സിറസ് മേഘങ്ങള് ഐസ് ക്രിസ്റ്റലുകള് തന്നെയാണ്, വളരെ നേരിയവ. അതുകൊണ്ടാണ് സൂര്യപ്രകാശത്തില് തട്ടിത്തിളങ്ങി അവ തൂവെള്ളനിറത്തില് കാണപ്പെടുന്നത്. ഉദയാസ്തമന വേളകളില് ചുവപ്പുനിറത്തിലും ചാരനിറത്തിലും, സൂര്യപ്രകാശത്തിന്റെ നിറവ്യത്യാസമനുസരിച്ച് ഇവയുടെ നിറവും മാറും.
[തിരുത്തുക] സിറോക്യുമുലസ് മേഘങ്ങള്
ചില അവസരങ്ങളില്, ആകാശം "കൊത്തിക്കിളച്ചിട്ടതുമാതിരി" മേഘശകലങ്ങള് നിരത്തിയിട്ടിരിക്കുന്നതുപോലെ കാണാം. താഴെയുള്ള ചിത്രം നോക്കുക. ഇംഗ്ലീഷില് ഇതിനെ mackerel sky അഥവാ "മീന്ചെതുമ്പല് പോലെയുള്ള ആകാശം" എന്നു പറയും.
ഈ മേഘങ്ങളും ശീര്ഷതലത്തിലാണ് (high level) സ്ഥിതിചെയ്യുന്നത്. ഉള്ളില് ഐസ് ക്രിസ്റ്റലുകള് തന്നെ. പക്ഷേ ആകൃതിക്ക് വ്യത്യാസമുണ്ട് - ചെറിയ കൂനകള് / കൂമ്പാരങ്ങളാണിവ - "ക്യുമുലസ്" ആകൃതി. അതുകൊണ്ടാണിവയെ സിറോക്യുമുലസ് മേഘങ്ങള് എന്നു വിളിക്കുന്നത്. സിറോ-ക്യുമുലസ് മേഘങ്ങള്ക്കിടയില് നിഴല് ഉണ്ടാവില്ല എന്നത് അവയുടെ പ്രത്യേകതയാണ്.
[തിരുത്തുക] സിറോസ്ട്രാറ്റസ് മേഘങ്ങള്
ശീര്ഷ മേഘലയില് ഒരു പാളിപോലെ കാണപ്പെടുന്ന മേഘങ്ങളാണിവ. കാഴ്ചയ്ക്ക് അത്ര ഗോചരമല്ല. പുകമൂടിയ ആകാശം പോലെയാണിവ പ്രത്യക്ഷമാവുക. നിലാവുള്ള ചില രാത്രികളില് ചന്ദ്രനുചുറ്റും ഒരു പ്രകാശവലയം കാണപ്പെടാറുണ്ടല്ലോ. ഇത്തരം മേഘങ്ങളുള്ള രാത്രികളീലാണ് ഇങ്ങനെ കാണപ്പെടുന്നത്.
[തിരുത്തുക] മധ്യതല മേഘങ്ങള്
ഭൂതലത്തില് നിന്നും രണ്ടുകിലോമീറ്ററിനു മുകളില് ആറുകിലോമീറ്റര് വരെയുള്ള അന്തരീക്ഷമേഖലയാണ് മധ്യമേഘല. ഇവിടെ രണ്ടുതരം മേഘങ്ങളാണ് കാണപ്പെടുന്നത്.
- ആള്ട്ടോ ക്യുമുലസ് മേഘങ്ങള് - ചെറിയ കൂമ്പാരം പോലെയുള്ളവ
- ആള്ട്ടോ സ്ട്രാറ്റസ് മേഘങ്ങള് - പാളിയായി കാണപ്പെടുന്നവ
[തിരുത്തുക] ആള്ട്ടോ ക്യുമുലസ് മേഘങ്ങള്
ആള്ട്ടോ ക്യുമുലസ് മേഘങ്ങളും ആകാശം കൊത്തിയിളക്കിമാതിരിയാണ് കാണപ്പെടുന്നത്. പക്ഷേ സിറോക്യുമുലസുകളേക്കാള് വലിയ കഷണങ്ങളായിരിക്കും എന്നു മാത്രം.
[തിരുത്തുക] ആള്ട്ടോ സ്ട്രാറ്റസ് മേഘങ്ങള്
ചിലദിവസങ്ങളില് സൂര്യബിംബത്തെ പ്രകാശം കുറഞ്ഞ ഒരു ഗോളമായി നഗ്നനേത്രങ്ങളാല് കാണാന് സാധിക്കുമല്ലോ? ആള്ട്ടോ മേഖലയില് കാണപ്പെടുന്ന സ്ട്രാറ്റസ് (മഞ്ഞുപോലെയുള്ള) മേഖങ്ങളാണ് സൂര്യപ്രകാശത്തെ ഈ അവസരങ്ങളില് തടയുന്നത്. ഈ മേഖലയിലുള്ള മേഘങ്ങളും ഐസ് ക്രിസ്റ്റലുകളാല് നിര്മ്മിതമാണ്, ജലത്തുള്ളികളല്ല. വിമാനത്തില് നിന്നും നോക്കിയാല് മൂടല്മഞ്ഞുപോലെ ആള്ട്ടോസ്ട്രാറ്റസ് മേഘങ്ങള് കാണപ്പെടും.
[തിരുത്തുക] നിംനതല മേഘങ്ങള്
ഭൂതലത്തില്നിന്നും പരമാവധി രണ്ടു കിലോമീറ്റര്വരെ ഉയരത്തിലുള്ള അന്തരീക്ഷമേഘലയിലാണ് ഇവ കാണപ്പെടുന്നത്. മഴമേഘങ്ങളും ഈ മേഖലയില് മാത്രമാണ് കാണപ്പെടുന്നത്. ഇവിടെയും മേഖങ്ങളുടെ ആകൃതിക്കനുസരിച്ച് ക്യുമുലസ് (കൂമ്പാരം പോലെ), സ്ട്രാറ്റസ് (മൂടല്മഞ്ഞുപോലെ) എന്നു തന്നെയാണ് പേരുനല്കുന്നത്. എന്നാല് ഉയരം സൂചിപ്പിക്കുന്ന വാക്കുകള് പേരിനോടൊപ്പം ഉണ്ടാവില്ല.
ഈ മേഖലയിലുള്ള മേഘങ്ങളുടെ പേരിനോടൊപ്പം “നിംബോ" (nimbo) എന്ന വാക്ക് ഉണ്ടെങ്കില് അവ മഴമേഘങ്ങളാണെന്ന് അര്ത്ഥം. രണ്ടുവിധത്തിലുള്ള മഴമേഘങ്ങളേയുള്ളൂ. 1 നിംബോ സ്റ്റ്രാറ്റസ്, 2 നിംബൊ ക്യുമുലസ് ഇവയെ ക്യുമുലോ നിംബസ് എന്നും വിളിക്കാറുണ്ട്).
[തിരുത്തുക] ക്യുമുലസ് മേഘങ്ങള്
വെളുത്ത് ഉരുണ്ട പഞ്ഞിക്കെട്ടുകള്പോലെ ആകാശത്തിന്റെ താഴ്ന്ന തലങ്ങളില് ഇവ മഴക്കാലത്തോടടുത്ത സമയങ്ങളില് കാണപ്പെടും. കേരളത്തില് വളരെ സാധാരണമാണിവ. നീലാകാശത്ത്, വ്യക്തമായ അതിരുകളോടുകൂടിയാണ് ഇവ കാണപ്പെടുന്നത്. Supersaturated ആയ വായുവിലെ നീരാവി ഘനീഭവിച്ച് ജലകണങ്ങളായി മാറിയവയാണ് ഈ മേഖങ്ങള്. ഇവയക്കുള്ളിലെ വായുപ്രവാഹത്തിനനുസരിച്ച് ഇവയുടെ ആകൃതി മാറിക്കൊണ്ടേയിരിക്കും. അനുകൂല സാഹചര്യങ്ങളില് ഇവയ്ക്ക് മഴമേഘങ്ങളായി മാറാന് സാധിക്കും. എങ്കിലും ഒറ്റയായി കാണപ്പെടുമ്പോള് തെളിഞ്ഞകാലാവസ്ഥയായിരിക്കു ഉണ്ടായിരിക്കുക.
[തിരുത്തുക] സ്ട്രാറ്റസ് മേഘങ്ങള്
സ്ട്രാറ്റസ് മേഘ്ങ്ങളും ജലകണികകള് തന്നെയാണ്. എന്നാല് ക്യുമുലസ് മേഖങ്ങളെപ്പോലെ ഇവയ്ക്ക് വ്യക്തമായ അതിരുകളുണ്ടാവില്ല. ആകാശം മുഴുവന് "മേഘാവൃതമായിരിക്കും" എന്നു കാലാവസ്ഥാ നിരീക്ഷകര് പറയുമ്പോള് ഇത്തരം മേഘങ്ങളെപ്പറ്റിയാണ് പറയുന്നത്. സ്ട്രാറ്റസ് മേഘങ്ങള് അനുകൂല സാഹചര്യങ്ങളില് മഴക്കാറുകളായി മാറും. അപ്പോള് ഇവയെ നിംബോ സ്ട്രാറ്റസ് എന്നു വിളിക്കുന്നു. മഴക്കാലത്ത് ഇത്തരം മേഖപാളികളെ കാണാവുന്നതാണ്. ഇങ്ങനെപെയ്യുന്ന മഴയോടൊപ്പം കാറ്റോ ഇടിമിന്നലോ ഉണ്ടാവില്ല. ഹൈറേഞ്ച് മേഖലയിലുള്ളവര്ക്ക് നേരിയ സ്ട്രാറ്റസ് മേഘങ്ങള്, മഴക്കാറില്ലാതെതന്നെ പെട്ടന്നുണ്ടാവുന്ന ചാറ്റല്മഴയായും അനുഭവപ്പെടാറുണ്ട്. സ്ട്രാറ്റസ് മേഘങ്ങളില് ഉദയാസ്തമനവേളകളിലെ ചുവന്ന സൂര്യപ്രകാശം പതിക്കുമ്പോഴാണ് “ചെമ്മാനം” കാണപ്പെടുന്നത്.
[തിരുത്തുക] ക്യുമുലോ നിംബസ് മേഘങ്ങള്
മേഘങ്ങളുടെ കൂട്ടത്തില് ഏറ്റവും വലിപ്പമേറിയ ഇനം ഇതാണ്. അന്തരീക്ഷത്തിന്റെ താഴേത്തട്ടില്നിന്നാരംഭിച്ച് ഇവയുടെ മേലറ്റം സീറസ് മേഖല (13 kilometer) വരെ ഉയരത്തില് എത്താം! ഒരു വലിയ മേഘത്തൂണ് പോലെയാണ് ഇവ കാണപ്പെടുക. ഇവയുടെ മുകളറ്റം വളരെ ഉയരത്തില് പടര്ന്നുകയറുന്ന ശക്തമായ കാറ്റായി കാണാവുന്നതാണ്. കേരളത്തില് തുലാമഴയുടെ സമയത്തും, കാലവര്ഷത്തില് വലിയ കാറ്റോടുകൂടിയ മഴയുണ്ടാകുമ്പോഴും ഈ മേഘങ്ങളെ കാണാവുന്നതാണ്.
ശക്തമായ മഴയും,കാറ്റും, ഇടിയും, ചിലപ്പോഴൊക്കെ ആലിപ്പഴ വര്ഷവും ഈ മേഘങ്ങളുടെ പ്രത്യേകതയാണ് ഈ ഇനത്തില്പ്പെട്ട മേഘത്തിനുള്ളില് ശക്തിയേറിയ വായുപ്രവാഹം ഒരു കൊടുങ്കാറ്റ് പോലെ ഉണ്ടാകുന്നുണ്ട്. മേഘത്തിന്റെ നടുഭാഗത്തുകൂടി അടിയില്നിന്നു മുകളിലേക്കുയരുന്ന വായു പ്രവാഹത്തെ updraft എന്നും, മേഘത്തിന്റെ വശങ്ങളിലൂടെ താഴേക്ക് പതിക്കുന്ന വായുപ്രവാഹത്തെ down draftഎന്നും വിളിക്കുന്നു. ഈ മേഘങ്ങളുടെ താഴെത്തട്ടില് ജലകണങ്ങളും, മുകളറ്റത്ത് ഐസ് ക്രിസ്റ്റലുകളുമാണുണ്ടാവുക. ഈ മേഘങ്ങള്ക്ക് വളരെകട്ടിയുള്ളതിനാല് (10 കിലോമീറ്റര്വരെ കനം!) സൂര്യപ്രകാശത്തെ അവ ഗണ്യമായി തടഞ്ഞുനിര്ത്തുന്നു. അതിനാലാണ് മഴമേഘങ്ങളുടെ അടിഭാഗം കറുത്തിരുണ്ട് കാണപ്പെടുന്നത്.
[തിരുത്തുക] കണ്ണികള്
- http://www.geo.mtu.edu/department/classes/ge406/tjbrabec/cloud.html
- http://asd-www.larc.nasa.gov/SCOOL/tutorial/clouds/cloudtypes_transcript.html#low
- http://www.piercecollege.edu/offices/weather/stability.html
 |
ഈ ലേഖനം അപൂര്ണ്ണമാണ്. ഇതു പൂര്ത്തിയാക്കുവാന് സഹകരിക്കുക. |
