വാട്ട്

വിക്കിപീഡിയ, ഒരു സ്വതന്ത്ര വിജ്ഞാനകോശം.

ഊർജ്ജപ്രവഹത്തിന്റെ, അല്ലെങ്കിൽ ഊർജ്ജോത്പ്പാദനത്തിന്റെ, നിരക്ക് (ശക്തി, Power) അളക്കുവാനുള്ള, അന്താരാഷ്ട്ര ഏകകവ്യവസ്ഥ (International System of Units) പ്രകാരം, നിശ്ചയിച്ച ഏകകമാണ് വാട്ട് (watt).

ഈ ഏകകത്തെ ആംഗലേയ അക്ഷരമാലയിലെ W എന്ന അക്ഷരംകൊണ്ടു സൂചിപ്പിക്കുന്നു. സാധാരണ, വിദ്യുച്ഛക്തി(Electrical Power) അളക്കുവാനും, വൈദ്യുതയന്ത്രങ്ങളുടെ ശേഷി സൂചിപ്പിക്കുവാനും ഈ ഏകകം ഉപയോഗിക്കുന്നു.

ഉദാഹരണങ്ങൾ[തിരുത്തുക]

  • കോണിപ്പടികൾ കയറുന്ന ഒരു മനുഷ്യൻ ഏകദേശം 200 വാട്ട്‌സ് നിരക്കിലാണ് ഊർജ്ജം ചെലവഴിക്കുന്നത് .
  • ഓടിക്കൊണ്ടിരിക്കുന്ന ഒരു സാധാരണ മോട്ടോർ കാറിന്റെ എഞ്ചിൻ 25,000 വാട്ട്‌സ് നിരക്കിൽ യാന്ത്രികോർജ്ജം ഉൽ‌പാദിപ്പിക്കുന്നു (ഏകദേശം 33.5 കുതിരശക്തി).
  • ഒരു സാധാരണ മച്ചുപങ്കയുടെ (Ceiling Fan) ശേഷി 60 വാട്ട്സാണ്.
  • വീടുകളിൽ ഉപയോഗിക്കുന്ന ഒരു സാധാരണ തന്തുവിളക്ക് (Incandescent light bulb) 25 മുതൽ 100 വാട്ട്‌സ് നിരക്കിൽ വരെ വൈദ്യുതോർജ്ജം ഉപയോഗിക്കുന്നു.
  • അതേസമയം ഒരു കോമ്പാക്റ്റ് ഫ്ലൂറസെന്റ് ലൈറ്റ് (സി.എഫ്.എൽ) വെറും 5 മുതൽ 30 വാട്ട്‌സ് വരെയാണ് ശേഷി.

നിർവചനം[തിരുത്തുക]

ഒരു സെക്കന്റിൽ പ്രവഹിക്കുന്ന ഒരു ജൂൾ ഊർജ്ജമാണ് ഒരു വാട്ട്.

ഗണിതരീതിയിൽ,


1~\rm{W} = 1~\dfrac{\rm{J}}{\rm{s}} = 1~\dfrac{\rm{kg} \cdot \rm{m^2}}{\rm{s^3}} = 1~\dfrac{\rm{N\cdot m}}{\rm{s}} \,
.

അതുകൊണ്ട്, ഒരു ന്യൂട്ടൺ ബലത്തിനെതിരായി ഒരു സെക്കന്റിൽ ഒരു മീറ്റർ നീങ്ങുന്ന ഒരു വസ്തു ചെലവഴിക്കുന്ന ഊർജ്ജമാണ് ഒരു വാട്ട് എന്നുപറയാം. കൂടാതെ, ഒരു വോൾട് വൈദ്യുതമർദ്ദത്തിൽ ഒരു ആമ്പിയർ വൈദ്യുതധാര പ്രവഹിക്കുമ്പോൾ ചെയ്യുന്ന പ്രവൃത്തിയായും സൂചിപ്പിക്കാം. അതായത്,


1~\rm{W} = 1~\rm{V\cdot 1~A} .

സംജ്ഞ[തിരുത്തുക]

ആവിയന്ത്രം പരിഷ്ക്കരിച്ച എഞ്ജിനിയർ ജയിംസ് വാട്ടിന്റെ (James Watt; ജീവിതകാലം: 1736 – 1819) പേരിലാണ് ഈ ഏകകം. ആദ്യം, ശാസ്ത്രപുരോ‍ഗതിയ്കായുള്ള ബ്രിട്ടീഷ് സംഘടനയുടെ (British Association for the Advancement of Science) രണ്ടാം സമ്മേളനവും, പിന്നീട് അളവുതൂക്കങ്ങൾക്കായുള്ള അന്താരാഷ്ട്രയോഗം, (Conférence générale des poids et mesures - CGPM) 1960ലെ അതിന്റെ പതിനൊന്നാം സമ്മേളനത്തിലും, വാട്ട് ശക്തിയുടെ ഏകകമായി സ്വീകരിച്ചു.

യുക്തമായ ഉപസർഗ്ഗങ്ങൾ ചേർത്തുകൊണ്ട്, ശക്തിയുടെ ചെറിയ - വലിയ ഏകകങ്ങൾ നിർമ്മിക്കാം. സാധാരണ, മില്ലിവാട്ട് (ഒരുവാട്ടിന്റെ പത്തുലക്ഷത്തിലൊരംശം), കിലോവാട്ട് (ഒരുവാട്ടിന്റെ ആയിരം മടങ്ങ്), മെഗാവാട്ട് (ഒരുവാട്ടിന്റെ പത്തുലക്ഷം മടങ്ങ്) തുടങ്ങിയ ഏകകങ്ങൾ ഉപയോഗിക്കാറുണ്ട്. ഒരു ലേസർസൂചിനി(Laser Pointer)ക്ക് 5 മില്ലിവട്ട് ശക്തിയും, ഒരു എൽ.ഈ.ഡിക്ക് (Light Emitting Diode) 30 -60 മില്ലിവാട്ട് ശേഷിയുമുണ്ട്. കേരളത്തിലെ ഒരിടത്തരം വീട്ടിലെ വൈവദ്യുതോപകരണങ്ങൾക്ക് മൊത്തം 3 മുതൽ 10 കിലോവാട്ട് വരെ തോതിൽ വൈദ്യുതി ഉപയോഗിക്കാനുള്ള ശേഷിയുണ്ടാവാറുണ്ട്. ഇടുക്കിയിലെ ജലവൈദ്യുതനിലയത്തിന് 780 മെഗാവാട്ട് തോതിൽ വൈദ്യുതി ഉത്പാദിപ്പിക്കാൻ ശേഷിയുണ്ട്.

വോൾട്ടും വാട്ടും വാട്ട്-അവറും[തിരുത്തുക]

സാധാരണ ധാരണാപ്പിശകുണ്ടാക്കുന്ന വാക്കുകളാണ് വോൾട്ടും വാട്ടും വാട്ടവറും. വാസ്തവത്തിൽ വ്യത്യസ്ത അളവുകളെയാണ് അവ സൂചിപ്പിക്കുന്നത്. വോൾട്ട് (volt) വൈദ്യുതമർദ്ദത്തിന്റെ (വിദ്യുച്ചാലകബലത്തിന്റെ) ഏകകമാണ്. അലെസ്സന്ദ്രോ വോൾട്ടാ (Alessandro Giuseppe Antonio Anastasio Volta) (ജീവിതകാലം: 1745 – 1827) എന്ന ഇറ്റാലിയൻ ശാസ്ത്രജ്ഞനെ സ്മരിച്ചാണ് വോൾട്ട് എന്ന പേര് വിദ്യുച്ചാലകബലത്തിന്റെ ഏകകത്തിനു നൽകിയത്. എന്നാൽ, മേൽപ്പറഞ്ഞതുപോലെ വാട്ട് ഊർജ്ജപ്രവാഹത്തോതിന്റെ (ശക്തി) ഏകകമാണ്. വാട്ട്-അവർ(watt-hour) വാണിജ്യപരമായി പരക്കെ ഉപയോഗിക്കുന്ന വൈദ്യുതോർജ്ജത്തിന്റെ ഏകകമാണ്; ഒരുമണിക്കൂറിൽ ഒരു വാട്ട് ശക്തിയിൽ ഒഴുകുന്ന, 3600 ജൂളിനു തുല്യമായ ഊർജ്ജമാണത്.

അവലംബം[തിരുത്തുക]

http://searchcio-midmarket.techtarget.com/sDefinition/0,,sid183_gci294147,00.html

"http://ml.wikipedia.org/w/index.php?title=വാട്ട്&oldid=1716734" എന്ന താളിൽനിന്നു ശേഖരിച്ചത്