തറാവീഹ്

റമദാൻ രാത്രികളിലും അല്ലാത്തപ്പോഴും ഇശാ നിസ്ക്കാരാനന്തരം സുബഹിക്ക് മുമ്പായി (ഒന്ന് മയങ്ങി എഴുന്നേറ്റ ശേഷം) മുസ്ലിങ്ങൾ നടത്തിവരുന്ന ഒരു സുന്നത്ത് (നബിചര്യ) പ്രാർഥനയാണ് തറാവീഹ് (അറബി: تراويح).റമദാനിലല്ലാത്ത കാലങ്ങളിൽ ഇത് സംഘമായി നമസ്കരിക്കുന്നത് നബിചര്യയിൽ പെട്ടതല്ല. ഈ നമസ്കാരത്തിനു ഖിയാമുലൈൽ, വിത്‌ർ, തഹജ്ജുദ്, ഖിയാമു റമദാൻ എന്നെല്ലാം പേരുകളുണ്ട്. തറാവീഹ് എന്ന പേർ പിൽകാലത്ത് വന്നു ചേർന്ന പേരാണ്. പ്രവാചകന്റെ പ്രമാണങ്ങളിലെവിടെയും ആ പേർ കാണാൻ സാധിക്കില്ല. ദീർഘമായി ഖുർആൻ പാരായണം ചെയ്താണ് ഈ നമസ്കാരം നിർവ്വഹിക്കാറുള്ളത്. രണ്ട് റകഅത്തുകൾ കഴിഞ്ഞ് അല്പം വിശ്രമമെടുക്കുന്നതിനാലാണ് തറാവീഹ് അഥവാ വിശ്രമ നമസ്കാരം എന്ന് പേരുവന്നത്. ഹനഫി, ഷാഫി മദ്‌ഹബുകളനുസരിച്ച് തറാവീഹ് നമസ്ക്കാരത്തിന് 23 റഖഅത്തുകളാണുള്ളത്. എന്നാൽ പ്രമാണങ്ങളിലെ പ്രബലമായ അഭിപ്രായം പതിനൊന്ന് റഖഅത്തുകളാണ് നമസ്ക്കരിക്കുന്നത്. തറാവീഹ് നമസ്ക്കാരത്തിൽ റഖഅത്തുകളുടെ എണ്ണത്തേക്കാൾ നമസ്ക്കാരസമയത്തിന്റെ ദൈർഘ്യത്തിനാണ് പ്രാധാന്യം. റഖഅത്തുകളുടെ എണ്ണം കൂട്ടുകയോ കുറക്കുകയോ ചെയ്യാമെന്ന് പണ്ഡിതന്മാർ അഭിപ്രായപ്പെടുന്നു. പ്രവാചകന്റെ കാലത്ത് സംഘമായി നമസ്കരിക്കൽ വിലക്കിയ ഒരു നമസ്കാരമാണ് തറാവീഹ്. പ്രവാചകൻ ഒരു തവണ സംഘമായി നമസ്കരിച്ചപ്പോൾ അത് നിർബന്ധ നമസ്കാരങ്ങളിൽ ഉൾപെട്ടു പോവുമോ എന്ന ഭയത്താലാണ് അത് വിരോധിച്ചത്. എന്നാൽ ഉമറിന്റെ കാലത്ത് സംഘമായിട്ടുള്ള രീതി പുനഃരുജ്ജീവിപ്പിക്കുകയായിരിന്നു.

തറാവീഹ്‌ നമസ്കാരം ഹദീസുകളിൽ[തിരുത്തുക]

അബ്ദുറഹ്മാൻ(റ) പറയുന്നു. റമളാനിലെ ഒരു രാത്രിയിൽ ഉമർ(റ)ന്റെ കൂടെ പള്ളിയിലേക്ക് ഞാൻ പുറപ്പെട്ടു. അപ്പോൾ ജനങ്ങൾ വിവിധ ഇമാമുകളുടെ കീഴിൽ നമസ്കരിക്കുന്നതു കണ്ടു. ഉമർ(റ) പറഞ്ഞു. ഇവരെല്ലാം തന്നെ ഒരു ഇമാമിന്റെ കീഴിൽ യോജിപ്പിക്കുന്നത് ഏറ്റവും ഉത്തമമായി ഞാൻ കാണുന്നു. അങ്ങനെ തീരുമാനം അദ്ദേഹം എടുക്കുകയും അവരെയെല്ലാം തന്നെ ഉബയ്യബ്നു കഅ്ബിന്റെ കീഴിൽ ഏകോപിപ്പിക്കുകയും ചെയ്തു. ശേഷം മറ്റൊരു രാത്രി ഞാൻ അദ്ദേഹത്തിന്റെ കൂടെ പുറപ്പെട്ടു. ജനങ്ങൾ എല്ലാംതന്നെ അതാ! ഒരു ഇമാമിന്റെ കീഴിൽ നമസ്കരിക്കുന്നു. ഉമർ(റ) പറഞ്ഞു: ഇതു നല്ലൊരു പരിഷ്കരണം തന്നെ. എങ്കിലും ഇപ്പോൾ ഉറങ്ങുന്നവനാണ് ഇപ്പോൾ നമസ്കരിക്കുന്നവരേക്കാളും ഉത്തമന്മാർ. ജനങ്ങൾ രാത്രിയുടെ ആദ്യം നമസ്കരിക്കാറുണ്ട്. (ബുഖാരി. 3. 32. 227)

ആയിശ(റ) നിവേദനം: നബി(സ) റമളാൻ മാസത്തിൽ എങ്ങനെയാണ് നമസ്കരിച്ചതെന്ന് അബൂസലമ(റ) അവരോട് ചോദിച്ചു. അപ്പോൾ ആയിശ(റ) പറഞ്ഞു. റമളാനിലോ അല്ലാത്ത മാസത്തിലോ പതിനൊന്ന് റക്അത്തിൽ കൂടുതൽ പ്രവാചകൻ നമസ്കരിച്ചിട്ടില്ല. (ബുഖാരി. 3. 32. 230)

അബൂഹുറയ്റ(റ)യിൽ നിന്ന് നിവേദനം: റമസാനിലെ സുന്നത്ത് (തറാവീഹ്) നമസ്കാരത്തെപ്പറ്റി റസൂൽ(സ) കൂടുതൽ പ്രോത്സാഹനം നൽകിക്കൊണ്ടിരുന്നു. പക്ഷേ നിർബന്ധമായിട്ട് അത് കൽപ്പിച്ചിരുന്നില്ല. അവിടുന്ന് പറയാറുണ്ട്. റമസാനിൽ വല്ലവനും വിശ്വാസ ദാർഢ്യത്തോടെയും പ്രതിഫലേച്ഛയോടെയും നമസ്കാരം (തറാവീഹ്) നിർവ്വഹിക്കുന്നുവെങ്കിൽ മുൻകഴിഞ്ഞ ചെറുപാപങ്ങൾ അവനു പൊറുക്കപ്പെടും. (മുസ്ലിം)