താപഗതികം
വിക്കിപീഡിയ, ഒരു സ്വതന്ത്ര വിജ്ഞാനകോശം.
താപോര്ജത്തെ മറ്റ് വിവിധ ഊര്ജ രൂപങ്ങളിലേക്കൂം (യാന്ത്രികം, രാസ, ഇലക്ട്രിക്കല് തുടങ്ങിയ); മറ്റ് വിവിധ ഊര്ജങ്ങളെ താപോര്ജമായും മാറ്റം വരുത്തുന്നതിനേയും അതുമായി ബന്ധപ്പെട്ട വിഷയങ്ങളെയും പറ്റി പഠിക്കുന്നതിന് ഭൗതികശാസ്ത്രത്തില് താപഗതികം (Thermodynamics) എന്ന് പറയുന്നു. ഊഷ്മാവ്, മര്ദ്ദം, വ്യാപ്തം തുടങ്ങിയവയുമായുള്ള ബഹുതലവീക്ഷണത്തിലുള്ള ബന്ധവും ഇതില് പഠന വിധേയമാകുന്നു. ഇവിടെ താപം എന്നതുകൊണ്ട് "കൈമാറ്റത്തിലുള്ള ഊര്ജത്തെയും" ഗതികം (dynamic) എന്നതുകൊണ്ട് "ചലനാത്മകം" എന്നും അര്ത്ഥമാക്കുമ്പോള് ഊര്ജത്തിന്റെ കൈമാറ്റത്തെയും അത് കൈമാറ്റം ചെയ്യപ്പെടുന്ന ഘട്ടങ്ങളുടെയും പഠനം താപഗതികത്തില് ഉള്പ്പെടുന്നു. ചരിത്രപരമായി താപഗതിക ശാഖയുടെ വികസനത്തിനു വഴിതെളിച്ചത് ആദ്യകാല നീരാവിയന്ത്രങ്ങളുടെ ദക്ഷത വര്ദ്ധിപ്പിക്കുന്നതിനു വേണ്ടിയുള്ള അന്വേഷണങ്ങളില് നിന്നാണ്.
ഈ ശാഖയുടെ പഠനത്തിന്റെ ആരംഭം താപഗതിക തത്ത്വങ്ങളിലൂടെയാണ് (laws of thermodynamics). ഈ തത്ത്വങ്ങള് പ്രകാരം ഊര്ജം താപത്തിന്റെയും പ്രവര്ത്തിയുടെയും രൂപത്തില് ഭൗതിക വ്യുഹങ്ങള്ക്കിടയില് കൈമാറ്റം ചെയ്യപ്പെടാന് സാധിക്കും. ഇവ എന്ട്രോപ്പി എന്ന ഒരു ഊര്ജത്തിന്റെ അവസ്ഥയെയും പ്രതിപാദിക്കുന്നുണ്ട്[1][2][3].
