മംഗളവാർത്തക്കാലം

വിക്കിപീഡിയ, ഒരു സ്വതന്ത്ര വിജ്ഞാനകോശം.
ആരാധനക്രമ വർഷം
റോമൻ റീത്ത് / ലത്തീൻ റീത്ത്
സീറോ മലബാർ റീത്ത്

സീറോ മലബാർ സഭയുടെ ആരാധനക്രമവർഷം (ആരാധനവത്സരം, സഭാപഞ്ചാംഗം) അനുസരിച്ച് യേശുവിന്റെ ജനത്തിന് മുന്നോടിയായി വരുന്ന കാലമാണ് മംഗളവാർത്തക്കാലം. റോമൻ (ലത്തീൻ ) കത്തോലിക്കാ റീത്ത് അനുസരിച്ച് വരുന്ന ആഗമനകാലം ഇതിന് സമാനമാണ്. സീറോ മലബാർ സഭയുടെ ആരാധനക്രമവർഷം ആരംഭിക്കുന്നതും മംഗളവാർത്തക്കാലത്തോട് കൂടിയാണ്. അഞ്ചുമുതൽ ആറാഴ്ച വരെ നീണ്ടുനില്കുന്ന മംഗളവാർത്തക്കാലം ആരംഭിക്കുന്നത് നവംബർ 27നും ഡിസംബർ 3നും ഇടക്ക് വരുന്ന ഞായറാഴ്ചയാണ്.

പശ്ചാത്തലം[തിരുത്തുക]

മംഗളവാർത്ത-1712 -ൽ പൌളോ ദെ മത്തെയിസ് വരച്ച ചിത്രം

സീറോ മലബാർ സഭയുടെ ആരാധനക്രമവർഷം [1]യേശുവിന്റെ രക്ഷാകര ചരിത്രത്തിലെ സംഭവങ്ങളെ കേന്ദ്രീകരിച്ചുള്ളതാണ്. [2]യേശുവിന്റെ ജനനമാണ്‌ രക്ഷാകരചരിത്രത്തിന്റെ ആരംഭം. [3]സുറിയാനി ഭാഷയിൽ സുബാറ(ܕܣܘܼܒܵܪܵܐ) എന്നാണ് മംഗളവാർത്തക്കാലം അറിയപ്പെടുന്നത്. 'അറിയിക്കുക', 'പ്രഖ്യാപിക്കുക' എന്നൊക്കെയാണ് ഈ വാക്കിനർത്ഥം. യേശുവിന്റെ ജനനം ഗബ്രിയേൽ മാലാഖ മറിയത്തെ അറിയിക്കുന്ന [4]ബൈബിൾ ഭാഗമാണ് മംഗള വാർത്ത. ഇതാണ് മംഗളവാർത്തക്കാലത്തിന്റെ അടിസ്ഥാനം. അതോടൊപ്പം തന്നെ സ്നാപക യോഹന്നാന്റെ ജനനത്തെ കുറിച്ചുള്ള മുന്നറിയിപ്പ്, സ്നാപകയോഹന്നാന്റെ ജനനം, എന്നിവയും ഈ കാലഘട്ടത്തിൽ അനുസ്മരിക്കുന്നു.

[5]ഈ കാലത്തിൽ കുർബാന മധ്യേയുള്ള വായനകൾ പ്രപഞ്ചസൃഷ്ടി, ആദിപാപം, ദൈവത്തിന്റെ വാഗ്ദാനം, യഹൂദജനത്തിന്റെ രക്ഷകന്റെ വരവിനായുള്ള കാത്തിരിപ്പ് എന്നിവയും അനുസ്മരിക്കുന്നു. രക്ഷാകര ചരിത്രത്തിൽ യേശുവിന്റെ മാതാവായ മറിയത്തിനുള്ള പങ്കും ഈ കാലത്ത് അനുസ്മരിക്കുന്നു.

ഇരുപത്തഞ്ച് നോമ്പ്[തിരുത്തുക]

[6]മംഗളവാർത്തക്കാലത്ത് സീറോ മലബാർ ക്രിസ്ത്യാനികൾ അനുഷ്ഠിക്കുന്ന നോമ്പാണ്‌ ഇരുപത്തഞ്ച് നോമ്പ്. ഡിസംബർ 1 മുതൽ 25 വരെ നീണ്ടു നിൽക്കുന്ന 25 ദിവസത്തെ നോമ്പ് ആയതിനാൽ ഇതിനെ ഇരുപത്തഞ്ച് നോമ്പ് എന്ന് വിളിക്കുന്നു. ആത്മപരിശോധനക്കുള്ള അവസരമായിട്ടാണ് ഈ നോമ്പിനെ കാണുന്നത്.

മംഗളവാർത്തക്കാലത്തെ ഞായറാഴ്ചകൾ[തിരുത്തുക]

മംഗളവാർത്തക്കാലത്തെ ഓരോ ഞായറാഴ്ചകളിലും സീറോ മലബാർ സഭ താഴെ പറയും വിധമുള്ള സംഭവങ്ങളാണ് അനുസ്മരിക്കുന്നത്.

  • മംഗളവാർത്തക്കാലം ആദ്യ ഞായർ: സ്നാപക യോഹന്നാന്റെ ജനനത്തെ കുറിച്ചുള്ള മുന്നറിയിപ്പ്(വി. ലൂക്കാ 1; 1-25)
  • മംഗളവാർത്തക്കാലം രണ്ടാം ഞായർ: യേശുവിന്റെ ജനനത്തെ കുറിച്ചുള്ള മുന്നറിയിപ്പ്. (വി. ലൂക്കാ 1; 26-56)
  • മംഗളവാർത്തക്കാലം മൂന്നാം ഞായർ: സ്നാപക യോഹന്നാന്റെ ജനനം. (വി. ലൂക്കാ 1; 57-80)
  • മംഗളവാർത്തക്കാലം നാലാം ഞായർ: ഏശയ്യ പ്രവാചകന്റെ പ്രവചനങ്ങളുടെ പൂർത്തീകരണം. (ഏശയ്യ 7, 14) (വി. മത്തായി 1: 18-25)
  • മംഗളവാർത്തക്കാലം അഞ്ചാം ഞായർ: (ക്രിസ്മസ് കഴിഞ്ഞു വരുന്ന ആദ്യഞായർ) യേശുവിന്റെ ജനനത്തിന് ശേഷമുള്ള സംഭവങ്ങൾ. (വി. മത്തായി 2: 1-23) (വി. ലൂക്കാ 2; 21-52)

പ്രധാന ദിനങ്ങൾ[തിരുത്തുക]

മംഗളവാർത്തക്കാലത്തെ പ്രധാന ദിനങ്ങൾ താഴെ പറയുന്നവയാണ്.

  • പ. കന്യകാമറിയത്തിന്റെ അമലോൽഭവ തിരുനാൾ
  • മാർ തോമാ സ്ലീബ
  • ക്രിസ്മസ്
  • ഈശോയുടെ നാമകരണം
  • വാഴ്ത്തപ്പെട്ട ചാവറ കുര്യാക്കോസച്ചന്റെ അനുസ്മരണം
  • കൂനൻ കുരിശുസത്യം അനുസ്മരണം

അവലംബം[തിരുത്തുക]

  1. Preface, Syro Malabar Liturgical Year
  2. Annunciation, Syro Malabar Liturgical Year
  3. Period of Annunciation, Syro Malabar Church
  4. Luke 1:26-39
  5. മാർത്തോമാ മാർഗം, ഫാ. വർഗീസ്‌ പതികുളങ്ങര
  6. THE LITURGICAL YEAR OF THE SYRO-MALABAR CHURCH
"https://ml.wikipedia.org/w/index.php?title=മംഗളവാർത്തക്കാലം&oldid=1655667" എന്ന താളിൽനിന്നു ശേഖരിച്ചത്