അഞ്ജൻവേൽ കോട്ട
| അഞ്ജൻവേൽ കോട്ട | |
|---|---|
| അഞ്ജൻവേൽ, ഗുഹാഗർ, രത്നഗിരി, മഹാരാഷ്ട്ര | |
| |
| അഞ്ജൻവേൽ കോട്ട | |
| തരം | കോട്ട |
| Site information | |
| Owner | ഇന്ത്യാ ഗവണ്മെന്റ് |
| Controlled by | ബിജാപ്പൂർ സുൽത്താനത്ത്, മറാഠാ, ബ്രിട്ടീഷ് ഈസ്റ്റ് ഇന്ത്യ കമ്പനി |
| Condition | നാശോന്മുഖം |
| Site history | |
| Materials | ലാക്റ്റെറിക് പാറ |
മഹാരാഷ്ട്രയിലെ രത്നഗിരി ജില്ലയിൽ സ്ഥിതി ചെയ്യുന്ന ഒരു കോട്ടയാണ് അഞ്ജൻവേൽ കോട്ട. ഗോപാൽഗഡ് എന്ന പേരിലും ഈ കോട്ട അറിയപ്പെടുന്നു.
സ്ഥാനം[തിരുത്തുക]
ചിപ്ലുൺ നഗരത്തിൽ നിന്നും ഏകദേശം 51കിലോമീറ്റർ അകലെയായി അറബിക്കടലിന്റെ തീരത്ത് ഒരു കുന്നിൻ മുകളിലാണ് ഈ കോട്ട സ്ഥിതിചെയ്യുന്നത്. വശിഷ്ഠി നദി അറബിക്കടലിനോട് ചേരുന്നത് ഇതിനടുത്തായാണ്. മദ്ധ്യകാലത്തെ തിരക്കേറിയ കച്ചവടപാതയുടെ ഭാഗമായിരുന്ന ദാഭോൽ തുറമുഖം ഈ പ്രദേശത്താണ്. വിനോദസഞ്ചാരകേന്ദ്രമായ ഗുഹാഗർ കടൽത്തീരം ഇവിടെ നിന്നും ഏകദേശം 13 കിലോമീറ്റർ തെക്കു ഭാഗത്തായാണ് സ്ഥിതിചെയ്യുന്നത്. ഈ കോട്ടയുടെ ഏറ്റവുമടുത്തുള്ള പട്ടണവും ഗുഹാഗർ ആണ്. കോട്ടയിൽ നിന്നും ഏകദേശം 1.5 കിലോമീറ്റർ അകലെയായി അഞ്ജൻവേൽ ലൈറ്റ്‌ഹൗസ്, പുരാതനമായ താൾകേശ്വർ ക്ഷേത്രം എന്നിവ സ്ഥിതിചെയ്യുന്നു.
ചരിത്രം[തിരുത്തുക]
ഈ കോട്ടയുടെ നിർമ്മാണ കാലഘട്ടത്തെക്കുറിച്ചുള്ള രേഖകളൊന്നുംതന്നെ ലഭ്യമല്ല. 1660 ൽ ശിവാജി ബിജാപ്പൂരിലെ മുഹമ്മദ് ആദിൽ ഷായിൽ നിന്നും ദാഭോൽ അഴിമുഖത്തോടൊപ്പം ഈ കോട്ട പിടിച്ചടക്കിയിരുന്നു.[1] പിന്നീട് ഒരു കപ്പൽ നിർമ്മാണശാല ഒരുക്കുകയും ഈ കോട്ടയ്ക്ക് ഗോപാൽഗഡ് എന്നു പേരിടുകയും ചെയ്തു. പിന്നീട് 1699 മുതൽ 46 വർഷക്കാലം അബീസീനിയൻ ജനറൽ ആയ ഖൈരിയക്തന്റെ അധീനതയിലായിരുന്നു. 1745 ൽ തുലാജി ആംഗ്രെ ഗോപാൽഗഡ് പിടിച്ചടക്കി. പിന്നീട് പേഷ്വ രാംജി മഹാദേവ് ബിവൽക്കറിന്റെ സൈന്യാധിപൻ 1756 ൽ ഈ കോട്ട കീഴടക്കി. 1818 ൽ കേണൽ കെന്നഡിയുടെ നേതൃത്വത്തിൽ ബ്രിട്ടീഷുകാർ ഈ കോട്ട പിടിച്ചെടുത്തു.
ഘടന[തിരുത്തുക]
ഗോപാൽഗഡ് ഏകദേശം 7 ഏക്കറോളം സ്ഥലത്ത് വ്യാപിച്ചുകിടക്കുന്നു. ലാക്റ്റെറിക് പാറയിൽ നിർമ്മിച്ചതാണ് ഈ കോട്ട. കോട്ടയുടെ ചുറ്റളവ് ചതുരാകൃതിയിലാണ്. കോട്ടമതിലിന് ഏകദേശം 12 അടി ഉയരവും 8 അടി കനവുമുണ്ട്. കോട്ടയുടെ കിഴക്ക് വശത്തായി ഒരു ചെറിയ പ്രവേശന കവാടത്തിലാണ് ഈ കോട്ടയിലേക്കുള്ള വഴി അവസാനിക്കുന്നത് സ്ഥിതിചെയ്യുന്നത്. ചുറ്റുമതിലിൽ പീരങ്കികൾ ഘടിപ്പിച്ച 15 കൊത്തളങ്ങൾ ഉണ്ടായിരുന്നു. 1707 വരെ പേർഷ്യൻ ഭാഷയിലെ ഒരു ലിഖിതം അവിടെ ഉണ്ടായിരുന്നു, എന്നാൽ ഇപ്പോൾ അത് കാണുന്നില്ല. ഇന്ന് കോട്ടയ്ക്കുള്ളിൽ സ്വകാര്യ ഉടമസ്ഥതയിലുള്ള ഒരു മാവിൻതോട്ടം ഉണ്ട്.[2]
ഇതും കാണുക[തിരുത്തുക]
അവലംബം[തിരുത്തുക]
- ↑ "ആർക്കൈവ് പകർപ്പ്". Archived from the original on 2019-01-29. Retrieved 2019-01-08.
- ↑ "ആർക്കൈവ് പകർപ്പ്". Archived from the original on 2022-09-29. Retrieved 2019-01-08.
ചിത്രശാല[തിരുത്തുക]
-
കിഴക്കുവശത്തെ കോട്ടമതിൽ -
കോട്ടയുടെ ഉൾഭാഗം -
കോട്ടയ്ക്കു പിന്നിലായി അറബിക്കടലിന്റെ ദൃശ്യം -
അഞ്ജൻവേൽ വിളക്കുമാടം -
താൾകേശ്വർ ക്ഷേത്രം
