സ്വെറ്റ്‌ലാന സവിത്സ്കയ

വിക്കിപീഡിയ, ഒരു സ്വതന്ത്ര വിജ്ഞാനകോശം.
സ്വെറ്റ്‌ലാന സവിത്സ്കയ
1983 CPA 5375 (1).jpg
ബഹിരാകാശസഞ്ചാരി
ദേശീയത സോവിയറ്റ് / റഷ്യൻ
ജനനം (1948-08-08) ഓഗസ്റ്റ് 8, 1948 (വയസ്സ് 69)
മോസ്കോ, സോവിയറ്റ് യൂണിയൻ
മറ്റു പേരുകൾ
സ്വെറ്റ്ലാന സവിത്സ്കയ
മറ്റു തൊഴിൽ
ഫ്ലൈറ്റ് എഞ്ചിനീയർ
ബഹിരാകാശത്ത് ചെലവഴിച്ച സമയം
19 ദിവസം 17 മണിക്കൂർ 06 മിനിറ്റ്
തിരഞ്ഞെടുക്കപ്പെട്ടത് 1980 (Female Group 2)
മൊത്തം EVAകൾ
1
മൊത്തം EVA സമയം
3 മണിക്കൂർ 35 മിനിറ്റ്
ദൗത്യങ്ങൾ

സല്യുട്ട് 7-EP2 (സൊയൂസ് T-7 up, സൊയൂസ് T-5 down),

സല്യുട്ട് 7-EP4 (സൊയൂസ് T-12)
ദൗത്യമുദ്ര
Salyut program insignia.svg
അവാർഡുകൾ Hero of the Soviet Union Hero of the Soviet Union
സവിത്‌സ്കയയുടെ ബഹിരാകാശ നടത്തം ആലേഖനം ചെയ്ത തപാൽ സ്റ്റാമ്പ്

ഒരു സോവിയറ്റ് വൈമാനികയും ബഹിരാകാശസഞ്ചാരിയുമാണ് സ്വെറ്റ്ലാന സവിത്സ്കയ(റഷ്യൻ: Светла́на Евге́ньевна Сави́цкая; ജനനം ഓഗസ്റ്റ് 8, 1948) . 1982-ൽ ബഹിരാകാശത്തെത്തിയ രണ്ടാമത്തെ വനിത എന്ന ബഹുമതിയും, 1984-ൽ രണ്ട് തവണ ബഹിരാകാശത്തെത്തിയ ആദ്യ വനിത, ബഹിരാകാശത്ത് നടന്ന ആദ്യവനിത എന്ന ബഹുമതികളും കരസ്ഥമാക്കി[1][2].

ആദ്യകാല ജീവിതം[തിരുത്തുക]

രണ്ടാം ലോകമഹായുദ്ധത്തിൽ മികവ് പ്രകടിപ്പിച്ച കമാൻഡർ യെവ്‌ഗിനി സവിത്‌സ്കിയുടെ മകളായി 1948 ഓഗസ്റ്റ് 8-ന് മോസ്കോയിൽ ജനിച്ചു. നന്നേ ചെറുപ്പത്തിൽ തന്നെ വിമാനം പറത്തലിൽ താല്പര്യം പ്രകടിപ്പിച്ച സ്വെറ്റ്‌ലാന 22 വയസ്സ് തികയുന്നതിനു മുൻപേ തന്നെ 400-ൽ പരം പാരാജമ്പിങ്ങുകൾ നടത്തിയിരുന്നു. 1970-ൽ ലോക എയ്റോബാറ്റിക് ചാമ്പ്യൻഷിപ്പിൽ ഒന്നാംസ്ഥാനം കരസ്ഥമാക്കി. 1972-ൽ മോസ്കോ ഏവിയേഷൻ ഇൻസ്റ്റിറ്റ്യൂട്ടിൽ നിന്നും എഞ്ചിനീയറിംഗിൽ ബിരുദമെടുത്ത ശേഷം ഒരു ടെസ്റ്റ് പൈലറ്റ് ആയി സ്ഥാനമേറ്റു. 20-ലേറെ തരം വിമാനങ്ങൾ പറത്തുന്നതിന് യോഗ്യത നേടിയ സ്വെറ്റ്‌ലാന വേഗതയിലും ഉയരത്തിലും അനവധി ലോകറെക്കോർഡുകൾ വനിതാവിഭാഗത്തിൽ സ്ഥാപിച്ചു[3].

ബഹിരാകാശ രംഗത്ത്[തിരുത്തുക]

1980-ൽ സ്വെറ്റ്ലാന സോവിയറ്റ് ബഹിരാകാശ പദ്ധതിയിലേക്ക് തിരഞ്ഞെടുക്കപ്പെട്ടു. സൊയൂസ്, സല്യുട്ട് ബഹിരാകാശ വാഹനങ്ങളിലായിരുന്നു പരിശീലനം ആരംഭിച്ചത്. 1982 ഓഗസ്റ്റ് 19-ന് സൊയൂസ് ടി-7 എന്ന ബഹിരാകാശ വാഹനത്തിൽ സല്യുട്ട് 7 ബഹിരാകാശ നിലയത്തിലേക്ക് തിരിച്ച സ്വെറ്റ്ലാന ബഹിരാകാശത്തെത്തിയ രണ്ടാമത്തെ വനിതയായി. വാലെന്റീന തെരഷ്ക്കോവയുടെ ബഹിരാകാശയാത്ര ഇതിനും 19 വർഷങ്ങൾക്ക് മുൻപായിരുന്നു.

1984-ൽ വീണ്ടും സല്യുട്ട് 7-ൽ എത്തിയ സ്വെറ്റ്ലാന രണ്ട് തവണ ബഹിരാകാശത്തെത്തിയ ആദ്യത്തെ വനിതയായി. ഇതേ ഉദ്യമത്തിൽ, 1984 ജൂലൈ 25-ന് സ്വെറ്റ്ലാന സഹയാത്രികനായ വ്ലാദിമിർ ഡ്ഴാനിബെക്കോവിനോടൊത്ത് ബഹിരാകാശനിലയത്തിന് പുറത്തായി വെൽഡിംഗ് നടത്തുകയുണ്ടായി. 3 മണിക്കൂർ 35 മിനിറ്റ് നീണ്ട ഈ ഉദ്യമത്തോടെ ബഹിരാകാശത്ത് നടന്ന ആദ്യവനിത എന്ന ഖ്യാതി നേടി[1][2]. പിന്നീട് അന്താരാഷ്ട്ര വനിതാദിനത്തോടനുബന്ധിച്ച് സല്യുട്ട് 7-ലേയ്ക്ക് സ്ത്രീകൾ മാത്രമടങ്ങിയ ഒരു ദൗത്യത്തിന് നേതൃത്വം കൊടുക്കാൻ നിയുക്തയായെങ്കിലും ആ ദൗത്യം റദ്ദാക്കപ്പെട്ടു.

പിൽക്കാല ജീവിതം[തിരുത്തുക]

ഓർഡർ ഓഫ് ലെനിൻ ,ഹീറോ ഓഫ് ദ സോവിയറ്റ് യൂണിയൻ എന്നീ ബഹുമതികൾക്ക് രണ്ട് തവണ വീതം അർഹയായി. സ്വെറ്റ്ലാനയുടെ ബഹുമാനാർഥം 4118 സ്വെറ്റ, സവിത്‌സ്കയ 4303 എന്നീ ഛിന്നഗ്രഹങ്ങൾ നാമകരണം ചെയ്യപ്പെട്ടു. ഭർത്താവ് വിക്റ്റർ ഹാറ്റ്കോവ്സ്കി . മകൻ കോൺസ്റ്റാന്റിൻ 1986 നവംബർ 7-ന് ജനിച്ചു[4].

ബഹുമതികൾ[തിരുത്തുക]

  • ഹീറോ ഓഫ് സോവിയറ്റ് യൂണിയൻ, രണ്ട് തവണ (1982, 1984)
  • ഓർഡർ ഓഫ് ലെനിൻ, രണ്ട് തവണ (1982, 1984)
  • ഓർഡർ ഓഫ് ദി ബാഡ്ജ് ഓഫ് ഓണർ (1976)
  • ബഹിരാകാശപര്യവേക്ഷണത്തിലെ മികവിനുള്ള മെഡൽ (12 April 2011)
  • പൈലറ്റ് കോസ്മോനട്ട് ഓഫ് യു.എസ്.എസ്.ആർ
  • മാസ്റ്റർ ഓഫ് സ്പോർട്ട്സ്
  • എഫ്.എ.ഐ സ്വർണ്ണമെഡൽ
  • 16 സ്വർണ്ണമെഡൽ, സ്പോർട്ട്സ് ഓഫ് യു.എസ്.എസ്.ആർ
  • ബഹിരാകാശദൗത്യത്തിലെ വനിതാലോകറെക്കോർഡിന് വിശിഷ്ട മെഡൽ

2014-ലെ സോചി വിന്റർ ഒളിമ്പിക്സിൽ റഷ്യയുടെ പതാകയുയർത്താൻ തിരഞ്ഞെടുക്കപ്പെട്ട അഞ്ച് കോസ്മോനട്ടുകളിൽ ഒരാളായിരുന്നു സവിത്സ്കയ[5].

പുറത്തേക്കുള്ള കണ്ണികൾ[തിരുത്തുക]

അവലംബം[തിരുത്തുക]

  1. 1.0 1.1 "Biographies of USSR / Russian Cosmonauts". Space Facts. 9 August 2012. ശേഖരിച്ചത് 18 February 2014. 
  2. 2.0 2.1 "Space welding anniversary!". Orbiter-Forum. Jelsoft Enterprises Ltd. 16 July 2009. ശേഖരിച്ചത് 18 February 2014. 
  3. എൻസൈക്ലോപീഡിയ ബ്രിട്ടാനിക്ക
  4. ബ്രൈറ്റ് ഹബ്ബ്
  5. "The XXII Olympic Winter Games in Sochi in 2014 has opened with a grand show". www.Sochi2014.com. 8 February 2014. ശേഖരിച്ചത് 11 February 2014. 
"https://ml.wikipedia.org/w/index.php?title=സ്വെറ്റ്‌ലാന_സവിത്സ്കയ&oldid=2500015" എന്ന താളിൽനിന്നു ശേഖരിച്ചത്