ഒരു വൈദികന്റെ ഹൃദയമിതാ

വിക്കിപീഡിയ, ഒരു സ്വതന്ത്ര വിജ്ഞാനകോശം.
Jump to navigation Jump to search
കെ.പി. ഷിബുവിന്റെ "ഒരു വൈദികന്റെ ഹൃദയമിതാ" എന്ന ഗ്രന്ഥത്തിന്‌ ഷാരൻ പ്രിന്റേഴ്സ് രൂപകല്പന ചെയ്ത പുറംചട്ട

കേരളത്തിൽ, കത്തോലിക്കാ സന്യാസസമൂഹമായ വിൻസെൻഷ്യൻ സഭയിൽ പുരോഹിതനായിരുന്ന കെ.പി.ഷിബു, വൈദികർക്കിടയിലെ മൂല്യച്യുതിയെ സംബന്ധിച്ച ആരോപണങ്ങൾ ഉൾക്കൊള്ളിച്ച് എഴുതിയ ആത്മകഥാപരമായ ഗ്രന്ഥമാണ്‌ ഒരു വൈദികന്റെ ഹൃദയമിതാ.[1] 13 വർഷം വൈദികാർത്ഥിയായും 11 വർഷം വൈദികനായും വിൻസെൻഷ്യൻ സഭയിൽ കഴിഞ്ഞ ഗ്രന്ഥകാരൻ 2010 മാർച്ച് മാസത്തിലാണ്‌ സഭ വിട്ടുപോയത്. പുരോഹിതർക്കും സന്യസ്ഥർക്കുമിടയിൽ ലൈംഗിക അരാജകത്വവും, ആഡംബരജീവിതവും, ധനാസക്തിയും, അധികാരാസക്തിയും കൊടികുത്തിവാഴുകയാണെന്നാണ്‌ ഈ ഗ്രന്ഥത്തിലെ മുഖ്യ ആരോപണം. സ്വവർഗ്ഗരതിയും നീലച്ചിത്രങ്ങളും സന്യാസഭവനങ്ങളുടെ ഭാഗമായി മാറിയെന്നും വൈദികരുടെ കുമ്പസാരത്തിൽ കിട്ടിയ വെളിപ്പെടുത്തലുകളിൽ നിന്ന് അവരിൽ 60 ശതമാനം പേരും വിധവകളോ, കന്യാസ്ത്രികളോ, സമാജവനിതകളോ, സാധാരണ സ്ത്രീവിശ്വാസികളോ പങ്കാളികളായ രതിസംഗമങ്ങളിലൂടെ കടന്നുപോയിട്ടുള്ളവാരാണെന്ന് അനുമാനിക്കാമെന്നും ഗ്രന്ഥകാരൻ പറയുന്നു. 160 പുറങ്ങളുള്ള ഈ കൃതി ആദ്യപതിപ്പിൽ നൂറു പ്രതികൾ മാത്രമാണിറങ്ങിയത്. ഗ്രന്ഥകാരൻ തന്നെയാണ്‌ പ്രസാധകൻ. കേരള സാഹിത്യ അക്കാദമി സെക്രട്ടറി പുരുഷൻ കടലുണ്ടി ആദ്യപതിപ്പിന്റെ പ്രകാശനകർമ്മം നിർ‌വഹിച്ച ഈ കൃതിയ്ക്ക് അവതാരിക എഴുതിയിരിക്കുന്നത് വേലായുധൻ ഇളയിടത്ത് ആണ്‌. [2] [3][4][5] [6] [7]


മുൻ‌കന്യാസ്ത്രിയായ ജെസ്മിയുടെ "ആമേൻ: ഒരു കന്യാസ്ത്രിയുടെ ആത്മകഥ" എന്ന വിവാദപരമായ ഗ്രന്ഥത്തിന്റെ പ്രസിദ്ധീകരണത്തിന്‌ ഒരു വർഷത്തിനകം ഇറങ്ങുന്ന ഈ കൃതിയിൽ, കത്തോലിക്കാസഭയിലെ രഹസ്യകൂദാശയായ കുമ്പസാരത്തിൽ ഗ്രന്ഥകാരന്‌ കിട്ടിയതായി പറയപ്പെടുന്ന വിവരങ്ങളെ ആശ്രയിച്ചുള്ള വെളിപ്പെടുത്തലുകളെക്കുറിച്ച് പ്രതികരിച്ച സിറോ മലബാർ സഭയുടെ വക്താവ് ഫാദർ പോൾ തെലേക്കാട്ട്, "വിശ്വാസികളുടെ വിശ്വാസത്തെ ഒറ്റിക്കൊടുക്കാൻ തയ്യാറായ ഗ്രന്ഥകാരനെപ്പോലുള്ളവരും ജീവിക്കുകയും പ്രവർത്തിക്കുകയും ചെയ്യുന്ന പ്രസ്ഥാനമാണ്‌ സഭ" എന്ന് ഓർമ്മിപ്പിച്ചു.[8][൧] താൻ കുമ്പസാര രഹസ്യം വെളിപ്പെടുത്തിയിട്ടില്ലെന്ന് പറഞ്ഞ ഗ്രന്ഥകാരൻ, മറ്റ് വൈദികർ ഇത്തരം കാര്യങ്ങൾ പ്രസംഗങ്ങളിൽ തുറന്ന് പറയാറുള്ള കാര്യം ചൂണ്ടിക്കാട്ടി.[6]

കുറിപ്പുകൾ[തിരുത്തുക]

^ "Unfortunately the Church is one in which people like him are also living and working.... He has simply betrayed the trust of the faithful".


അവലംബം[തിരുത്തുക]

  1. ഒരു വൈദികന്റെ ഹ്രുദയമിതാ, ഷിബു കെ.പി., അച്ചടി:പി.പി.ജോർജ്ജ് & സൺസ്, അങ്കമാലി
  2. മാതൃഭൂമി ദിനപത്രത്തിലെ റിപ്പോർട്ട്, വൈദികരുടെ മൂല്യച്യുതി തുറന്നുകാട്ടി മുൻ വൈദികന്റെ ആത്മകഥ
  3. റ്റൈസ് ഓഫ് ഇൻഡ്യ ദിനപത്രത്തിലെ വാർത്ത, Ex-priest 'exposes' clergy's sex secrets
  4. India Summary, Popular News Summary from India, Oru Vaidikante Hrudayamitha – Here is The Heart of a Priest by ex Father K P Shibu
  5. ജന്മഭൂമി പത്രത്തിലെ വാർത്ത, ഒരു വൈദികന്റെ പീഡിത ഹൃദയമിതാ...
  6. 6.0 6.1 മാധ്യമം പത്രത്തിലെ വാർത്ത, കത്തോലിക്ക സഭയിലെ പീഡനങ്ങളെക്കുറിച്ച് യുവവൈദികന്റെ പുസ്തകം
  7. സഭയിൽ പീഡനവും സ്വവർഗഭോഗവും!, വെബ് ദുനിയായിലെ റിപ്പോർട്ട്
  8. ഇൻഡ്യൻ എക്സ്പ്രസ് പത്രത്തിലെ വാർത്ത, After nun, former priest writes a tell-all book on sexual exploitation
"https://ml.wikipedia.org/w/index.php?title=ഒരു_വൈദികന്റെ_ഹൃദയമിതാ&oldid=3090072" എന്ന താളിൽനിന്ന് ശേഖരിച്ചത്