പ്രതിഭാ പാട്ടിൽ

വിക്കിപീഡിയ, ഒരു സ്വതന്ത്ര വിജ്ഞാനകോശം.
പ്രതിഭാ പാട്ടിൽ
പ്രതിഭാ പാട്ടിൽ

പ്രതിഭാ പാട്ടിൽ, ഇന്ത്യയുടെ രാഷ്ട്രപതി

പദവിയിൽ
2007 ജൂലൈ 25 – 2012 ജൂലൈ 24
മുൻഗാമി എ.പി.ജെ. അബ്ദുൾകലാം
പിൻഗാമി പ്രണബ് മുഖർജി

രാജസ്ഥാൻ ഗവർണ്ണർ
പദവിയിൽ
2004 നവംബർ 8 – 2007 ജൂൺ 21

പാർലമെന്റ് അംഗം
(ലോകസഭ, രാജ്യസഭ)
പദവിയിൽ
1985 – 1996

പദവിയിൽ
1962 – 1985

ജനനം (1934-12-19) ഡിസംബർ 19, 1934 (80 വയസ്സ്)
നഡ്ഗാഓൺ
രാഷ്ട്രീയകക്ഷി കോൺഗ്രസ് (ഐ.)
ജീവിതപങ്കാളി ദേവീസിംഗ് രൺസിംഗ് ശെഖാവത്ത്

പ്രതിഭാ ദേവീസിംഗ് പാട്ടിൽ (ജനനം ഡിസംബർ 19, 1934) ഇന്ത്യയുടെ രാഷ്ട്രപതിയാണ്. ഇന്ത്യയുടെ രാഷ്ട്രപതി സ്ഥാനത്തെത്തുന്ന ആദ്യത്തെ വനിതയുമാണ്‌ പ്രതിഭ. യുണൈറ്റഡ് പ്രോഗ്രസീവ് അലയൻസ്, ഇടത് മുന്നണി എന്നിവരുടെ രാഷ്ട്രപതി സ്ഥാനാർത്ഥിയായിരുന്ന ഇവർ 2007 ജൂലൈ 25-നാണ്‌ രാഷ്ട്രപതിയായി സ്ഥാനമേറ്റത്. ഒരു അഭിഭാഷകയായ പ്രതിഭ രാഷ്ട്രപതി സ്ഥാനത്തെത്തുന്നതിനു മുൻപ് രാജസ്ഥാൻ സംസ്ഥാനത്തിന്റെ 16-ആമത് ഗവർണർ ആയിരുന്നു. രാജസ്ഥാനിലെ ആദ്യ വനിതാ ഗവർണ്ണറും ആണ് പ്രതിഭ. 1986 മുതൽ 1988 വരെ രാജ്യസഭാ ഉപാദ്ധ്യക്ഷയുമായിരുന്നു.

1962 മുതൽ 1985 വരെ പ്രതിഭാ പാട്ടിൽ മഹാരാഷ്ട്ര നിയമസഭാംഗം ആയിരുന്നു. ജൽഗാവോൺ ജില്ലയിലെ നിയോജക മണ്ഡലങ്ങളിൽ നിന്നായിരുന്നു പ്രതിഭ മഹാരാഷ്ട്ര നിയമസഭയിലേക്ക് തിരഞ്ഞെടുക്കപ്പെട്ടത്. 1991 മുതൽ 1996 വരെ അമ്രാവതി ജില്ലയെ പ്രതിനിധാനം ചെയ്ത് പ്രതിഭ ലോകസഭാംഗമായി.

ആദ്യകാലം[തിരുത്തുക]

മഹാരാഷ്ട്രയിലെ നഡ്ഗാവോണിൽ നാരായൺ റാവുവിന്റെ മകളായി പ്രതിഭാ പാട്ടിൽ ജനിച്ചു. ജൽഗാവോണിലെ എം.ജെ. കോളെജിൽ നിന്ന് എം.എ ബിരുദാനന്തര ബിരുദം കരസ്ഥമാക്കി. മുംബൈ ഗവണ്മെന്റ് ലാ കോളെജിൽ നിന്ന് നിയമ ബിരുദവും പ്രതിഭ നേടി. തന്റെ കലാലയ ദിനങ്ങളിൽ പ്രതിഭ ഒരു ടേബിൾ ടെന്നീസ് താരം ആയിരുന്നു. പല അന്തർ-കലാലയ പട്ടങ്ങളും പ്രതിഭ നേടിയിട്ടുണ്ട്.[1].1962-ൽ പ്രതിഭാ പാട്ടിൽ ജൽഗാവോൺ മൂൽജീ ജൈത (എം.ജെ) കോളെജിൽ കലാലയ റാണി ആയി തിരഞ്ഞെടുക്കപ്പെട്ടു.[2] അതേവർഷം പ്രതിഭ ജൽഗാവോൺ നിയോജകമണ്ഡലത്തിൽ നിന്ന് കോൺഗ്രസ് റ്റിക്കറ്റിൽ നിയമസഭയിലേക്ക് തിരഞ്ഞെടുക്കപ്പെട്ടു. വിദ്യാഭ്യാസ പ്രവർത്തകനായ ദേവീസിംഗ് രാൺസിംഗ് ഷെഖാവത്ത് എന്ന ആളെ പ്രതിഭ 1965 ജൂലൈ 7-നു വിവാഹം കഴിച്ചു.[3]. ഈ ദമ്പതികൾക്ക് ഒരു മകനും മകളും ഉണ്ട്.

സ്ഥാപനങ്ങൾ[തിരുത്തുക]

തന്റെ ഭർത്താവിനോടൊത്ത് വിദ്യാഭാരതി ശിക്ഷൺ പ്രശാരക് മണ്ഡൽ എന്ന വിദ്യാഭ്യാസ സ്ഥാ‍പനം പ്രതിഭ സ്ഥാപിച്ചു. മുംബൈയിലും ജൽഗാവോണിലുമായി പല വിദ്യാലയങ്ങളും കലാലയങ്ങളും ഈ സ്ഥാപനത്തിനു കീഴിൽ നടത്തുന്നു.[4] ജോലി ചെയ്യുന്ന സ്ത്രീകൾക്ക് താമസിക്കുവാനായി ന്യൂ ഡെൽഹിയിലും മുംബൈയിലും ഹോസ്റ്റലുകൾ നടത്തുവാൻ ശ്രം സാധന ട്രസ്റ്റ് എന്ന സ്ഥാപനവും പ്രതിഭ സ്ഥാപിച്ചു. ഗ്രാമീണ യുവാക്കൾക്കായി ജൽഗാവോണിൽ ഒരു എഞ്ജിനിയറിംഗ് കോളെജും അവർ സ്ഥാപിച്ചു. സന്ത് മുക്തഭായി സഹകാരി ശക്കർ കർഖാന എന്ന ഒരു പഞ്ചസാര മിൽ പ്രതിഭ സ്ഥാപിച്ചു. സഹകരണമേഖലയിൽ ഇത് നടത്തുന്ന ട്രസ്റ്റിന്റെ ചെയർ പേഴ്സൺ ആണ് പ്രതിഭാ പാട്ടിൽ. സ്വന്തം പേരിൽ പ്രതിഭാ മഹിള സഹകാരി ബാങ്ക് എന്ന ഒരു സഹകരണ ബാങ്കും പ്രതിഭ സ്ഥാപിച്ചു. അന്ധവിദ്യാർത്ഥികൾക്കായി ഒരു വ്യാവസായിക പരിശീലന കേന്ദ്രവും വിമുക്ത ജമാതികളുടെയും നാടോടികളുടെയും മക്കൾക്കായി ഒരു വിദ്യാലയവും പ്രതിഭ സ്ഥാപിച്ചു.

രാഷ്ട്രീയ ജീവിതം[തിരുത്തുക]

1962-ൽ 27-ആം വയസ്സിൽ പ്രതിഭാ പാട്ടിൽ രാഷ്ട്രീയത്തിൽ പ്രവേശിച്ചു. മുതിർന്ന കോൺഗ്രസ് നേതാവും മഹാരാഷ്ട്രയുടെ മുൻ മുഖ്യമന്ത്രിയുമായ യശ്വന്ത്‌റാവു ചവാൻ ആയിരുന്നു രാഷ്ട്രീയത്തിൽ പ്രതിഭയുടെ ഗുരുനാഥൻ.[5] 1967-ൽ വീണ്ടും നിയമസഭയിലേക്ക് തിരഞ്ഞെടുക്കപ്പെട്ട പ്രതിഭ വസന്ത്‌റാവു നായിക്കിന്റെ മന്ത്രിസഭയിൽ വിദ്യാഭ്യാസ സഹമന്ത്രി ആയി. 1972-1978 കാലയളവിൽ വീണ്ടും തിരഞ്ഞെടുക്കപ്പെട്ട പ്രതിഭ വിനോദസഞ്ചാരം, സാമൂഹിക ക്ഷേമം, ഭവനനിർമ്മാണം എന്നീ വകുപ്പുകളിൽ സംസ്ഥാന കാബിനറ്റ് മന്ത്രിയായി. വസന്ത്‌ദാദാ പാട്ടിൽ, ബാബാസാഹിബ് ഭോസ്ലെ, എസ്.ബി. ചവാൻ, ശരദ് പവാർ എന്നിവരുടെ മന്ത്രിസഭകളിൽ പ്രതിഭ മന്ത്രിയായിരുന്നു. ജൽ‌ഗാവോണിൽ നിന്നോ തൊട്ടടുത്തുള്ള എഡ്ലാബാദ് നിയോജക മണ്ഡലത്തിൽ നിന്നോ 1985 വരെ പ്രതിഭ തുടർച്ചയായി നിയമസഭയിലേക്ക് തിരഞ്ഞെടുക്കപ്പെട്ടു. 1985-ൽ പ്രതിഭ കോൺഗ്രസ് സ്ഥാനാർത്ഥിയായി രാജ്യസഭയിലേക്ക് തിരഞ്ഞെടുക്കപ്പെട്ടു. മത്സരിച്ച ഒരു തിരഞ്ഞെടുപ്പിൽ പോലും പ്രതിഭ പരാജയപ്പെട്ടിട്ടില്ല.[6]

രാഷ്ട്രപതി സ്ഥാനാർത്ഥി[തിരുത്തുക]

പ്രതിഭാ പാട്ടിലിന്റെ പേര് യു.പി.എ സ്ഥാനാർത്ഥിയായി നീർദ്ദേശിക്കപ്പെട്ടു. ഇന്ത്യയിലെ രാഷ്ട്രപതി ആകുന്ന ആദ്യത്തെ വനിതയാണ് പ്രതിഭാ പാട്ടിൽ.രാഷ്ട്രപതി തിരഞ്ഞെടുപ്പിലെ വോട്ടെണ്ണലിന്റെ ആദ്യഘട്ട ഫലം വരുമ്പോൾ ആന്ധ്രാപ്രദേശിൽ ബി.ജെ.പി സ്ഥാനാർത്ഥിയായ ഭൈരോൺ സിംഗ് ഷെഖാവത്തിനു 2 വോട്ടും പ്രതിഭാ പാട്ടിലിനു 223 വോട്ടും ലഭിച്ചു. അരുണാചൽ പ്രദേശിൽ പ്രതിഭാ പാട്ടിലിനു 58 വോട്ടും ഷെഖാവത്തിനു ഒരു വോട്ടും ലഭിച്ചു. ആസ്സാമിൽ പ്രതിഭാ പാട്ടിലിനു 92 വോട്ടും ഷെഖാവത്തിനു 20 വോട്ടും ലഭിച്ചു.[7]

വിവാദങ്ങൾ[തിരുത്തുക]

രാഷ്ട്രീയ ആരോപണങ്ങൾ നേരിടാത്ത ആളാണെന്ന നിലയിലാണ്‌ പ്രതിഭാ പാട്ടിലിനെ രാഷ്ട്രപതി സ്ഥാനത്തേക്ക് യു.പി.എ-ഇടതു സഖ്യം നിർദ്ദേശിച്ചതെങ്കിലും അതിനു ശേഷം ഏതാനം വിവാദങ്ങളിലും ആരോപണങ്ങളിലും പ്രതിഭാ പാട്ടീലിന്റെ പേര്‌ പരാമർശിക്കപ്പെടുകയുണ്ടായി. മഹാരാഷ്ട്രയിൽ ഒരു യോഗത്തിൽ വച്ച് മുഗളർ ഇന്ത്യൻ വനിതകളിൽ അടിച്ചേല്പ്പിച്ച ബുർഖ വസ്ത്രധാരണ രീതി ഉപേക്ഷിക്കേണ്ട സമയം ആയി എന്നു അവർ പ്രസംഗിച്ചതാണ്‌ ആദ്യം വിവാദത്തിനു കാരണമായത്. പിന്നീട് ഹിമാലയത്തിൽ വച്ച് മരിച്ചു പോയ ഒരു ബാബയുടെ ആത്മാവിനോടു സംസാരിച്ചു എന്നു പറഞ്ഞത് പൊതുവേ വിമർശന വിധേയമായി. പ്രതിഭാ പാട്ടിലിന്റെ നേതൃത്വത്തിൽ ഉണ്ടാക്കപ്പെട്ട പഞ്ചസാരമില്ലും സഹകരണബാങ്കും അഴിമതിയാരോപണങ്ങൾക്ക് വിധേയമാക്കപ്പെടുകയും ചെയ്തു.

പ്രത്യേകതകൾ[തിരുത്തുക]

  • ഇന്ത്യയുടെ പ്രഥമ വനിതാ രാഷ്ട്രപതി.
  • രാജസ്ഥാനിലെ ആദ്യ വനിതാഗവർണ്ണറായിരുന്ന രാഷ്ട്രപതി.

അവലംബം[തിരുത്തുക]

  1. Biographical Sketch Member of Parliament X Lok Sabha
  2. Kiran Tare, (2007-06-15). "From college queen to future prez". Mid-Day, Mumbai. ശേഖരിച്ചത് 2007-06-15.  തീയതിയ്ക്ക് നൽകിയ വില പരിശോധിക്കുക: |date= (സഹായം)
  3. "Biography of Mrs Pratibha Patil". indiastudychannel.com. ശേഖരിച്ചത് 2007-06-16. 
  4. Shyam Pandharipande, Nagpur (2007-06-15). "Pratibha Patil is Vidarbha's daughter-in-law". newKerala.com. ശേഖരിച്ചത് 2007-06-15.  തീയതിയ്ക്ക് നൽകിയ വില പരിശോധിക്കുക: |date= (സഹായം)
  5. Ravish Tiwari / Mahesh Mhatre (2007-06-15). "Pratibha's CV says it all: She backed Indira 'n was backed by Rajiv". Indian Express. ശേഖരിച്ചത് 2007-06-15.  തീയതിയ്ക്ക് നൽകിയ വില പരിശോധിക്കുക: |date= (സഹായം)
  6. Rediff.com (2007-06-14). "Profile: UPA prez nominee Pratibha Patil". Tabrez Khan in Mumbai. ശേഖരിച്ചത് 2007-06-15.  തീയതിയ്ക്ക് നൽകിയ വില പരിശോധിക്കുക: |date= (സഹായം)
  7. http://timesofindia.indiatimes.com/Presidential_polls_Pratibha_takes_early_lead/articleshow/2222659.cms


"http://ml.wikipedia.org/w/index.php?title=പ്രതിഭാ_പാട്ടിൽ&oldid=1874540" എന്ന താളിൽനിന്നു ശേഖരിച്ചത്