ചെക്പോയ്ന്റ് ചാർളി

വിക്കിപീഡിയ, ഒരു സ്വതന്ത്ര വിജ്ഞാനകോശം.
Jump to navigation Jump to search
അമേരിക്കൻ മേഖലയിലേക്കു കടക്കുന്നുവെന്ന സൂചനാ ഫലകം
അമേരിക്കൻ മേഖല അവസാനിക്കുന്നുവെന്ന സൂചനാഫലകം

ചെക്പോയ്ന്റ് ചാർളി, ബെർലിനിൽ പൂർവ-പശ്ചിമ ജർമനികൾക്കിടയിലെ അതിർത്തിയിലുള്ള കാവൽപുര ആയിരുന്നു. രണ്ടാം ആഗോളയുദ്ധക്കരാറിന്റെ തുടർച്ചയായി സോവിയറ്റ് റഷ്യയും സഖ്യകക്ഷികളും ജർമനി പങ്കിട്ടെടുത്തു. 1961-ൽ അമേരിക്കയും റഷ്യയും തമ്മിലുള്ള ശീതസമരം മൂർധന്യത്തിലെത്തിയ സമയത്ത് പൂർവ-പശ്ചിമ ജർമനികളെ വിഭജിച്ചുകൊണ്ട് ഉയർന്നു വന്നതായിരുന്നു ബെർലിൻ മതിലും. ചെക് പോയ്ന്റ് ചാർളിയും.

ചരിത്രം[തിരുത്തുക]

സോവിയറ്റ് അധീനതയിലായിരുന്ന പൂർവജർമനിയിൽ നിന്ന് അസംഖ്യം പേർ സഖ്യകക്ഷികളുടെ അധീനതയിലായിരുന്ന പശ്ചിമജർമനിയിലേക്ക് കടക്കുന്നതിനെ വിലക്കാനായി സോവിയറ്റ് റഷ്യ പടുത്തുയർത്തിയതാണ് ബെർലിൻ മതിൽ. ആ മതിലിലെ അമേരിക്കൻ ഭാഗത്തുള്ള കാവൽപുരകളിൽ ഒന്നായിരുന്നു ചെക്പോയ്ന്റ് ചാർളി. ബെർലിൻ പട്ടണത്തിന്റെ ഹൃദയഭാഗത്തായിരുന്നു ഈ കാവൽപുര എന്നതാണ് ഇതിന്റെ പ്രത്യേകത. ഈ കവാടത്തിലൂടെ മാത്രമേ സഖ്യകക്ഷികളുടെ നയതന്ത്രവിദഗ്ദർക്ക് പൂർവജർമനിയിലേക്ക് പ്രവേശനം ഉണ്ടായിരുന്നുള്ളു. അതിസാധാരണ കാവൽപുരയായിരുന്നു ചെക്പോയ്ന്റ് ചാർളി. എന്നാൽ അതിനഭിമുഖമായി നിലകൊണ്ട സോവിയറ്റ് കാവൽപുരക്ക് ഉയരത്തിലുള്ള നിരീക്ഷണഗോപുരങ്ങളും, കോൺക്രീറ്റ് തടമതിലുകളും പരിശോധനാമുറികളും ഉണ്ടായിരുന്നു.

സംഭവവികാസങ്ങൾ[തിരുത്തുക]

മതിയായ വിവരങ്ങൾ അഥവാ രേഖകൾ ഇല്ലെന്ന് പറഞ്ഞ് പലപ്പോഴും പശ്ചിമജർമനിയിൽ നിന്നുള്ള സന്ദർശകർക്ക് സോവിയറ്റ് കാവൽക്കാർ പ്രവേശനം നിഷേധിച്ചു. ഇത് അമേരിക്കയും റഷ്യയും തമ്മിൽ വാഗ്വാദങ്ങൾക്കും, പിരിമുറുക്കങ്ങൾക്കും വഴിവെച്ചു. ഇരു പക്ഷക്കാരും സ്വന്തം അതിരിനകത്ത് വ്യോമ-കര സൈന്യ ഖണ്ഡങ്ങൾ, മിലിറ്ററി ജീപ്പുകൾ, ടാങ്കുകൾ എന്നിവ നിരത്തി ശക്തിപ്രദർശനം നടത്തി. ഒടുവിൽ അന്നത്തെ രാഷ്ട്രത്തലവന്മാരായിരുന്ന ജോൺ കെന്നഡിയും ക്രൂഷ്ചെവും ഇടപെടേണ്ടതായി വന്നു.

പ്രദർശനങ്ങൾ, പ്രതിഷേധങ്ങൾ, പ്രകടനങ്ങൾ[തിരുത്തുക]

ചെക്പോയ്ന്റ് ചാർളി ഒട്ടനേകം പ്രക്ഷോഭങ്ങൾക്കും പ്രതിഷേധങ്ങൾക്കും സാക്ഷ്യം വഹിച്ചിട്ടുണ്ട്, സാഹസിക നോവലുകൾക്കും, ചലചിത്രങ്ങൾക്കും പശ്ചാത്തലമായിട്ടുണ്ട്[1]. ദി സ്പൈ ഹു കേംഇൻ ഫ്രം ദി കോൾഡ് , ഒക്റ്റോപസി, എന്നീ ജയിംസ് ബോണ്ട് ചിത്രങ്ങളും ഇവയിലുൾപ്പെടും

ബെർലിൻ മതിലിന്റെ തകർച്ച[തിരുത്തുക]

ഇരുപത്തിയെട്ടു വർഷങ്ങൾക്കു ശേഷം പൊതുജനാഭിപ്രായം മാനിച്ച് , പൂർവജർമൻ ഭരണകൂടം ,പശ്ചിമജർമനിയിലേക്കും തിരിച്ചുമുള്ള യാത്രാനിയമങ്ങൾ എടുത്തുമാറ്റി. 1989 നവമ്പർ 9-നാണ് ഇത് പ്രാബല്യത്തിൽ വന്നത്. അതോടെ ജനക്കൂട്ടം ആർത്തിരമ്പി മതിലു തന്നെ തകർത്തു കളഞ്ഞു.

സഖ്യകക്ഷികളുടേയും സോവിയറ്റ് റഷ്യയുടേയും അധികാരികൾ പങ്കെടുത്ത ഒരു ചടങ്ങിൽ ചെക്പോയ്ന്റ് ചാർളി പൊളിച്ചെടുത്ത് ബെർലിനിലെ അലൈഡ് മ്യൂസിയത്തിലേക്കു കാഴ്ചവസ്തുവായി മാറ്റിസ്ഥാപിച്ചു[2]. കാവൽപുര നിന്നിരുന്ന സ്ഥലത്ത് സന്ദർശകരെ ആകർഷിക്കാനായി അതേപോലൊന്ന് കെട്ടിപ്പൊക്കുകയും ചെയ്തു.

ചെക്പോയ്ന്റ് ചാർളി ഇന്ന്

ഇന്ന്[തിരുത്തുക]

ബെർലിൻ നഗരകാഴ്ചകളിൽ മുൻപന്തിയിൽ നില്ക്കുന്നു ചെക്പോയ്ന്റ് ചാർളി. തൊട്ടടുത്തായുള്ള മൗർ മ്യൂസിയത്തിൽ ഇതെക്കുറിച്ചുള്ള ചരിത്രവസ്തുതകൾ ലഭ്യമാണ്[3][4]. നിത്യേന രാവിലെ 9 മണി മുതൽ രാത്രി 10 വരെ തുറന്നിരിക്കുന്ന മ്യൂസിയത്തിൽ ചിത്ര/ഡോക്യുമെന്രി പ്രദർശിനികൾ സംഘടിപ്പിക്കപ്പെടുന്നു.

അവലംബം[തിരുത്തുക]

  1. Arnold, Tom (2006). Checkpoint Charlie (Novel). Infinity Publishing. ISBN 978-0741434395.
  2. "Allierten Museum, Berlin". Allierten Museum. Retrieved 2018-10-15.
  3. Frank, Sybille (2016). Wall Memorials and Heritage: The Heritage Industry of Berlin's Checkpoint Charlie. Routledge. ISBN 978-1138782938.
  4. "Welcome to the Mauermuseum". Welcome to the Mauermuseum. Retrieved 2018-10-16.
"https://ml.wikipedia.org/w/index.php?title=ചെക്പോയ്ന്റ്_ചാർളി&oldid=2896090" എന്ന താളിൽനിന്ന് ശേഖരിച്ചത്