കുമരകം ബോട്ടപകടം
2002 ജൂലൈ 27-ന് രാവിലെ 6.10ന് വേമ്പനാട്ട് കായലിൽ കുമരകത്തിന് സമീപം 29 പേരുടെ മരണത്തിനിടയാക്കിയ ബോട്ടപകടമാണ് കുമരകം ബോട്ടപകടം എന്ന് അറിയപ്പെടുന്നത്.
മുഹമ്മയിൽ നിന്ന് രാവിലെ 5.45-ന് നിറയെ യാത്രക്കാരുമായി കുമരകത്തേക്കു പോയ സംസ്ഥാന ജലഗതാഗത വകുപ്പിന്റെ എ 53 നമ്പർ ബോട്ടാണ് അപകടത്തിൽപെട്ടത്. കുമരകം ജെട്ടിയിൽ എത്തുന്നതിന്‌ ഒരു കിലോമീറ്റർ ബാക്കി നിൽക്കേയാണ് അപകടം സംഭവിച്ചത്.[1] പി.എസ്‌.സി. ലാസ്റ്റ് ഗ്രേഡ്‌ സർവന്റ്‌ പരീക്ഷ എഴുതാൻ[2] കോട്ടയത്തേക്കു പോയ മുഹമ്മ, കായിപ്പുറം, പുത്തനങ്ങാടി പ്രദേശങ്ങളിലെ ഉദ്യോഗാർഥികളായിരുന്നു ബോട്ടിലുണ്ടായിരുന്നവരിൽ ഏറെയും. സ്ഥിരംയാത്രക്കാരായ കൂലിപ്പണിക്കാരും മത്സ്യവിൽപ്പനക്കാരും ബോട്ടിലുണ്ടായിരുന്നു. എണ്ണത്തിൽ കൂടുതൽ ആളെ കയറ്റിയ ബോട്ട് കായലിലെ മണൽത്തിട്ടയിൽ ഇടിച്ചാണ് അപകടമുണ്ടായതെന്ന് കരുതപ്പെടുന്നു. മരണമടഞ്ഞവരിൽ 15 സ്ത്രീകളും 9 മാസം പ്രായമുള്ള ഒരു ശിശുവും ഉൾപ്പെട്ടിരുന്നു.[3]
അപകടത്തെക്കുറിച്ച് അന്വേഷിക്കുവാൻ നിയോഗിക്കപ്പെട്ടിരുന്ന ജസ്റ്റിസ് നാരായണക്കുറുപ്പ് കമ്മീഷൻ മരണമടഞ്ഞവരുടെ ആശ്രിതർക്കായി 91.6 ലക്ഷം രൂപ ധനസഹായം നിർദ്ദേശിച്ചിരുന്നു. എന്നാൽ, ഒരുലക്ഷം രൂപ വീതമാണ് ഇതുവരെ നൽകപ്പെട്ടത്.[4] നഷ്ടപരിഹാരത്തുക വിതരണം സംബന്ധിച്ചും അപകടകാരണം സംബന്ധിച്ചും കേസുകൾ ഇപ്പോഴും തുടരുന്നു. അപകടത്തിനു കാരണമായ ബോട്ട് രണ്ടു കൊല്ലം മുൻപ് ജലഗതാഗത വകുപ്പ് ലേലം ചെയ്തു.[5]
അവലംബം
[തിരുത്തുക]- ↑ "കുമരകം ബോട്ടപകടത്തിന് നാളെ പത്ത് വയസ് , മെട്രോ വാർത്ത". Archived from the original on 2012-07-28. Retrieved 2012-07-27.
- ↑ "ആ ദുരന്തത്തിന് നാളെ പത്തു വയസ്സ്". മംഗളം. ജൂലൈ 26, 2012. Retrieved ജൂലൈ 27, 2012.
- ↑ "കേരളത്തിലെ ബോട്ടപകടത്തിൽ 29 പേർ മരിച്ചു" (in ഇംഗ്ലീഷ്). ദ ഹിന്ദു. ജൂലൈ 28, 2002. Retrieved ജൂലൈ 27, 2012.[പ്രവർത്തിക്കാത്ത കണ്ണി]
- ↑ "നാരായണക്കുറുപ്പ് കമ്മീഷൻ റിപ്പോർട്ട് ജലരേഖയായി". മാതൃഭൂമി. മേയ് 8, 2003. Archived from the original on 2012-07-26. Retrieved ജൂലൈ 27, 2012.
- ↑ "കുമരകം ബോട്ട് ദുരന്തത്തിന് ഇന്ന് പത്തു വയസ്സ്". മലയാള മനോരമ, പേജ് 7. ജൂലൈ 27, 2012.
{{cite web}}:|access-date=requires|url=(help); Missing or empty|url=(help)