എടി2018കൗ
പ്രത്യേകം ശ്രദ്ധിക്കുക: സമകാലികസംഭവത്തെപ്പറ്റിയുള്ള ഈ ലേഖനത്തിന്റെ ഉള്ളടക്കം ഇടയ്ക്കിടെ മാറിക്കൊണ്ടിരിക്കാം. (June 2018) |
ഹെർക്കുലീസ് നക്ഷത്രസമൂഹത്തിന്റെ ഭാഗത്തായി നിരീക്ഷിക്കപ്പെട്ട അതി ശക്തമായ ജ്യോതിശാസ്ത്ര സ്ഫോടനമാണ് എടി2018കൗ. ഇത് ATLAS18qqn; സൂപ്പർനോവ 2018കൗ, SN 2018കൗ, ദ കൗ എന്നീ പേരുകളിലും വിളിക്കപ്പെടുന്നു. ഒരു സാധാരണ സൂപ്പർനോവയേക്കാൾ പത്തുമുതൽ നൂറ് മടങ്ങ് വരെ ശക്തമായതാണ് ഈ സ്ഫോടനം. ഉപരിതല താപമാനം 8900°C ന് മുകളിലുള്ളതും സെക്കന്റിൽ 20,000 കി.മീ. വേഗതയിൽ സഞ്ചരിക്കുന്നതുമായ ഈ പ്രതിഭാസം ഒരു സൂപ്പർനോവയോ ഒരു വിപരീത ചര നക്ഷത്രമോ ഒരു ഗാമാ-കിരണ സ്ഫോടനമോ ഗുരുത്വാകർഷണതരംഗമോ ആകാം.[1]
കണ്ടെത്തൽ[തിരുത്തുക]
ഹവായിയിലെ ഒരു പർവ്വതമുകളിൽ നിരന്തര നനിരീക്ഷണത്തിനായി സജ്ജമാക്കി സ്ഥാപിച്ചിട്ടുള്ള ആസ്റ്ററോയിഡ് ടെറസ്ട്രിയൽ ഇംപാക്ട് ലാസ്റ്റ് അലേർട്ട് സിസ്റ്റം എന്ടെന ലിസ്കോപ്പ് ക്യാമറ 2018 ജൂൺ 16-നു പകർത്തിയ ചിത്രമാണ് ഈ പ്രതിഭാസത്തെ പറ്റി ശാസ്ത്രലോകത്തിന് വിവരം നൽകിയത്.[2] അന്നു രാത്രിയിൽ അതിനു നല്ല തിളക്കമുണ്ടായിരുന്നു. പക്ഷേ പഴയ രേഖകൾ പരിശോധിച്ചപ്പോൾ വെറും 4 ദിവസം മുമ്പുവരെ ആ സ്ഥാനത്തു് യാതൊന്നും കാണുന്നുണ്ടായിരുന്നില്ല.
തുടർ നിരീക്ഷണങ്ങൾ[തിരുത്തുക]
എടി2018കൗ-ന്റെ തുടർ നിരീക്ഷണങ്ങൾക്ക് വലിയ ടെലിസ്കോപ്പുകളെ അണിനിരത്തിയിട്ടുണ്ട്. അതിലൊന്ന് ഇന്ത്യയിലെ ലഡാക്ക് പ്രദേശത്ത് സ്ഥാപിച്ചിട്ടുള്ള ഹിമാലയൻ ചന്ദ്ര ടെലിസ്കോപ്പാണ്. സമുദ്രനിരപ്പിൽ നിന്ന് 4500 മീറ്റർ ഉയരത്തിൽ സ്ഥിതി ചെയ്യുന്ന ഈ ടെലിസ്കോപ്പിലെ ഒബ്ജക്റ്റീവ് 2 മീറ്റർ വ്യാസമുള്ള ദർപ്പണമാണ്. ദൃശ്യപ്രകാശത്തിനു പുറമേ ഇൻഫ്രാറെഡ് പ്രകാശത്തിലും ഇതിലൂടെ പഠനങ്ങൾ നടത്താം. സ്ഥാപിച്ചിരിക്കുന്നത് ഹിമാലയത്തിലെ ഒരു ഒഴിഞ്ഞ കോണിലാണെങ്കിലും അതിന്റെ നിയന്ത്രണം ബാംഗ്ലൂരിനടുത്ത് നിന്നാണ്.[2]
ബാംഗ്ലൂരിലെ ഇന്ത്യൻ ഇൻസ്റ്റിറ്റ്യൂട്ട് ഓഫ് അസ് ട്രോഫിസിക്സിലെ ജി.സി. അനുപമ, അവിനാഷ് സിംഗ്, ബ്രജേഷ് കുമാർ, ഡി.കെ. സാഹു, അവ്രജിത് ബന്ദോപാദ്ധ്യായ എന്നിവരെ കൂടാതെ മുംബൈ ഐ.ഐ.ടി. ഫിസിക്സ് ഡിപ്പാർട്ട്മെന്റിലെ ശുഭം ശ്രീവാസ്തവ്, ഹർഷ് കുമാർ, വരുൺ ഭലേറാവു എന്നിവർ അടങ്ങിയ എട്ടംഗ ഇന്ത്യൻ സംഘമാണ് ഹിമാലയൻ ചന്ദ്ര ടെലിസ്കോപ്പ് ഉപയോഗിച്ചുള്ള പഠനങ്ങൾ അസ്ടോണമിക്കൽ ടെലിഗ്രാമുകളിലുടെ പ്രസിദ്ധപ്പെടുത്തിയിരിക്കുന്നതു്. സംഘം നടത്തിയ നിരീക്ഷണങ്ങളിലൂടെ പുറത്തു വന്നിരിക്കുന്ന കാര്യങ്ങൾ ഇതൊക്കെയാണ്.
- ജൂൺ 20-നു രാത്രിയിൽ എടുത്ത അതിന്റെ സ്പെക്ട്രത്തിൽ നിന്നു മനസ്സിലായത് ആ സ്രോതസ്സിന്റെ താപനില 11,200 കെൽവിനാണ്.
- പിറ്റേ രാത്രിയിൽ അതിന്റെ താപനില 10,500 ആയി കുറഞ്ഞു. പിറ്റേ രാത്രിയിലും (ജൂൺ 22) അതേ താപനില തുടർന്നു.
- ഈ വൻ സ്ഫോടനത്തിലൂടെ ദ്രവ്യം പുറത്തേക്കു തെറിക്കുന്നതിന്റെ വേഗതയും അവർ കണക്കാക്കി.[2]
ഇവർക്കു പുറമേ നിരവധി ഗവേഷകർ ഭൂമിയിലും ബഹിരാകാശത്തുമായി വിന്യസിക്കപ്പെട്ടിട്ടുള്ള വിവിധയിനം ദൂരദർശിനികൾ ഉപയോഗിച്ച് ഈ ‘സംഭവ’ത്തെ നിരീക്ഷിച്ചു വരികയാണ്. ബഹിരാകാശത്തെ ചന്ദ്ര എക്സ് റേ ഒബ്സർവേറ്ററി, ഇന്റർ നാഷണൽ സ്പേസ് സ്റ്റേഷനിലെ നസ്റ്റർ ടെലിസ്കോപ്പ് എന്നിവയടക്കം വിവിധ തരംഗദൈർഘ്യ പരിധികളിൽ പ്രവർത്തിക്കുന്ന നിരീക്ഷണ സംവിധാനങ്ങൾ ഇതിനായി ഉപയോഗിക്കുന്നു.[2]
അവലംബം[തിരുത്തുക]
- ↑ "ATel #11727: ATLAS18qqn (AT2018cow) - a bright transient spatially coincident with CGCG 137-068 (60 Mpc)". ATel. Retrieved 2018-06-26.
- ↑ 2.0 2.1 2.2 2.3 "ആകാശത്ത്, എന്തോ മഹാസംഭവം നടക്കുന്നു - LUCA". LUCA. Retrieved 2018-06-26.
പുറത്തേയ്ക്കുള്ള കണ്ണികൾ[തിരുത്തുക]
- AT2018cow webpage Archived 2018-06-24 at the Wayback Machine. on the Transient Name Server
- AT2018cow webpage at Vanbuitenen.nl
- AT2018cow webpage by the Astronomy Section Rochester Academy of Science
- CGCG 137-068 webpage at the NASA/IPAC Extragalactic Database
- AT2018cow images from 21 June 2018 by Cedric Raguenaud