ഡെമോസ്തനിസ്

വിക്കിപീഡിയ, ഒരു സ്വതന്ത്ര വിജ്ഞാനകോശം.
ഡെമോസ്തനിസ്
Demosthenes orator Louvre.jpg
Bust of Demosthenes (Louvre, Paris, France)
ജനനം 384 BC
Athens
മരണം 322 BC
Island of Kalaureia (present-day Poros)

ഡെമോസ്തനിസ് പ്രാചീന ഗ്രീസിലെ പ്രശസ്തനായ വാഗ്മിയും രാജ്യതന്ത്രജ്ഞനുമായിരുന്നു. ധനികനായ ഒരു ആയുധ നിർമാതാവിന്റെ മകനായി ഇദ്ദേഹം ബി.സി. 384-ൽ ഏഥൻസിൽ ജനിച്ചു. ഡെമോസ്തനിസിന് ഏഴു വയസ്സു പ്രായമെത്തിയപ്പോൾ പിതാവു മരണമടഞ്ഞു. മറ്റു രക്ഷാകർത്താക്കളുടെ സംരക്ഷണത്തിലായിരുന്നു തുടർന്നുള്ള ജീവിതം.

പ്രസംഗകലയിൽ പ്രവീണൻ[തിരുത്തുക]

ഡെമോസ്തനിസിന് പൈതൃകമായി ലഭിച്ചിരുന്ന സ്വത്ത് രക്ഷകർത്താക്കളായി നിന്നവർ കയ്യടക്കി. ഇതു വീണ്ടെടുക്കാനായി ഡെമോസ്തനിസ് സ്വയം കേസുകൾ വാദിച്ചു. ഇതിന്റെ വിജയത്തിനുവേണ്ടി പ്രസംഗകല അഭ്യസിച്ച് പ്രത്യേക പ്രാവീണ്യം നേടി. പിൽക്കാലത്ത് വാഗ്മിയെന്ന നിലയിൽ പ്രശസ്തനായതിന്റെ തുടക്കം ഇതിൽ നിന്നായിരുന്നു. അക്കാലത്ത് സാധാരണമായിരുന്ന കായികവിദ്യാഭ്യാസം നേടുന്നതിന് ഇദ്ദേഹത്തിന്റെ ദുർബലമായ ശരീരപ്രകൃതി തടസ്സമായി നിന്നു. പ്രസംഗകലയിൽ കൂടുതൽ ശ്രദ്ധ കേന്ദ്രീകരിക്കുവാൻ ഡെമോസ്തനിസിന് ഈ സാഹചര്യം പ്രേരണ നൽകി. ഗ്രീസിലെ പ്രസിദ്ധ വാഗ്മിയായിരുന്ന ഇസേയസിൽ (Isaeus) നിന്നായിരുന്നു ഇദ്ദേഹം പ്രസംഗകലയിൽ പരിശീലനം നേടിയത്. പ്രസംഗത്തിൽ നൈപുണ്യം നേടാനായി കടൽക്കരയിൽച്ചെന്ന് തിരമാലകളെ അഭിസംബോധന ചെയ്തുകൊണ്ട് പ്രസംഗം നടത്തി പരിശീലിച്ചുവെന്നും സംസാരശേഷിയിലുള്ള വൈകല്യം സുഗമമായ വാഗ്ധോരണിക്കു തടസ്സം സൃഷ്ടിക്കുന്നതു പരിഹരിക്കാനായി വായിൽ കല്ലുകളിട്ടുകൊണ്ടും, അത്യുച്ചത്തിൽ ശബ്ദിച്ചുകൊണ്ടും പരിശീലനം നടത്തിയിരുന്നുവെന്നുമാണ് ഇദ്ദേഹത്തിന്റെ പ്രസംഗപരിശീലനത്തെപ്പറ്റി ജീവചരിത്രകാരന്മാർ രേഖപ്പെടുത്തിയിട്ടുള്ളത്.

പൊതുപ്രവർത്തകൻ[തിരുത്തുക]

സ്വയം കേസുവാദിച്ചതിലൂടെ നിയമകാര്യങ്ങളിലും കേസുവിസ്താരത്തിലും ഇദ്ദേഹം വൈദഗ്ധ്യം നേടി. ഇതോടെ മറ്റുള്ളവർക്കുവേണ്ടി കേസു നടത്തിക്കുന്ന പ്രവർത്തനങ്ങളിലും ഏർപ്പെട്ടു. ക്രമേണ പൊതുപ്രവർത്തനങ്ങളിലും വ്യാപൃതനായി. ഏഥൻസിലെ സാമ്പത്തിക-സൈനിക നയങ്ങളിൽ അഭിപ്രായം പ്രകടിപ്പിച്ചുകൊണ്ട് ബി.സി. 355-ഓടുകൂടി ഡെമോസ്തനിസ് രാഷ്ട്രീയ രംഗത്തു പ്രവർത്തിച്ചുതുടങ്ങി. മാസിഡോണിയയിലെ രാജാവായ ഫിലിപ്പ് II-ൽ നിന്നും ഗ്രീസിനെതിരെ ആക്രമണ ഭീഷണി ഉണ്ടായതോടെ ഡെമോസ്തനിസ് നാടൊട്ടുക്ക് പ്രസംഗിച്ചുനടന്ന് ജനങ്ങളെ ഫിലിപ്പിനെതിരായി അണിനിരത്താൻ പ്രേരിപ്പിക്കുകയും സൈനിക തയ്യാറെടുപ്പുകൾക്ക് ഉദ്ബോധിപ്പിക്കുകയും ചെയ്തു.

ഫിലിപ്പിക്സ്, ഒളിന്തിയക്സ് എന്നീ പേരുകളിൽ പ്രസിദ്ധൻ[തിരുത്തുക]

ഫിലിപ്പിക്സ് (ബി.സി. 352/351-40) ഒളിന്തിയാക്സ് (ബി.സി. 349) എന്നീ പേരുകളിൽ പ്രസിദ്ധി നേടിയ ഇദ്ദേഹത്തിന്റെ പ്രസംഗങ്ങൾ ഫിലിപ്പിനെതിരായി ഗ്രീക്കുകാരെ രംഗത്തിറക്കാനുദ്ദേശിച്ചുള്ളവയായിരുന്നു. ഏഥൻസുമായി സഖ്യത്തിലായിരുന്ന ഒളിന്തസ് നഗരത്തെ ഫിലിപ്പ് ആക്രമിച്ചപ്പോൾ നടത്തിയ പ്രസംഗമാണ് ഒളിന്തിയാക്സ്. ഫിലിപ്പുമായി സമാധാന ചർച്ചയിൽ ഡെമോസ്തനിസ് ഏർപ്പെടുകയുണ്ടായി. ഫിലിപ്പിന്റെ പക്ഷത്തിനുവേണ്ടി വാദിച്ചിരുന്ന ഏഥൻസിലെ മറ്റൊരു വാഗ്മിയും രാഷ്ട്രീയക്കാരനുമായ എസ്കിനീസിനെ (Aeschines) കുറ്റപ്പെടുത്തിക്കൊണ്ട് ബി.സി. 343-ൽ ഡെമോസ്തനിസ് നടത്തിയതാണ് ഓൺ ദ് ഫാൾസ് ലെഗേഷൻ(On the False Legation) എന്ന പ്രസംഗം. ഏഥൻസും തീബ്സും പരമ്പരാഗത ശത്രുരാജ്യങ്ങളായിരുന്നു. എന്നാൽ ഫിലിപ്പിനെതിരായി യുദ്ധം ചെയ്യുന്ന കാര്യത്തിൽ അവരെ എകോപിപ്പിക്കുന്നതിൽ വിജയം നേടുവാൻ ദീർഘകാലത്തെ ശ്രമഫലമായി ഡെമോസ്തനിസിനു കഴിഞ്ഞു. എങ്കിലും ഫിലിപ്പിനെ പരാജയപ്പെടുത്തുകയെന്ന നിഗൂഢാഭിലാഷം ഫലവത്താക്കുവാൻ ഡെമോസ്തനിസിനു സാധിച്ചില്ല. ബി.സി. 338-ലെ കെയ്റോണിയ യുദ്ധത്തിൽ ഫിലിപ്പ് ഗ്രീക്കുകാരെ പരിതാപകരമായി പരാജയപ്പെടുത്തി.

അതിപ്രശസ്ത പ്രസംഗം[തിരുത്തുക]

ഫിലിപ്പിന്റെ മരണ (ബി.സി. 336)ശേഷം ഭരണാധികാരിയായിത്തീർന്ന പുത്രൻ അലക്സാർ ചക്രവർത്തിയുടെ കാലത്തും മാസിഡോണിയക്കാർക്കെതിരായുള്ള പടനീക്കം ഡെമോസ്തനിസ് ഉപേക്ഷിച്ചിരുന്നില്ല. ഏഥൻസിനുവേണ്ടി നടത്തിയ സേവനങ്ങളെ പ്രകീർത്തിച്ച് ഡെമോസ്തനിസിന്റെ അനുയായികൾ സ്വർണകിരീടം നൽകി ഇദ്ദേഹത്തെ ആദരിക്കാൻ ഒരുങ്ങിയപ്പോൾ, എസ്കിനീസിന്റെ നേതൃത്വത്തിൽ ഇതിനെതിരായ പ്രവർത്തനം തലപൊക്കി. ഇതിനെത്തുടർന്ന് ഡെമോസ്തനിസ് തന്റെ രാഷ്ട്രീയവും സൈനികവുമായ നിലപാട് ന്യായീകരിച്ചുകൊണ്ട് നടത്തിയ പ്രസംഗമാണ് ഓൺ ദ് ക്രൗൺ (ബി.സി. 330). ഇത് ഇദ്ദേഹത്തിന്റെ അതിപ്രശസ്ത പ്രസംഗമായി പരിഗണിക്കപ്പെടുന്നു.

തടവുശിക്ഷ[തിരുത്തുക]

ഗവൺമെന്റുവക പണം തട്ടിയെടുത്തു എന്ന ഒരു ആക്ഷേപവുമായി ബന്ധപ്പെടുത്തി അലക് സാണ്ടറുടെ അനുയായികളിലൊരാൾ ഡെമോസ്തനിസിനെ കടുത്ത ആരോപണത്തിൽ കുടുക്കി. കുറ്റം ചുമത്തപ്പെട്ട ഡെമോസ്തനിസ് ശിക്ഷയ്ക്കു വിധിക്കപ്പെടുകയും തടവിലാക്കപ്പെടുകയുമുണ്ടായി. എന്നാൽ തടവിൽ നിന്നു രക്ഷപ്പെട്ട് ഇദ്ദേഹം ഏഥൻസിൽനിന്നും പലായനം ചെയ്തു. കുറേക്കാലം കഴിഞ്ഞ്, അലക് സാണ്ടർ മരണമടഞ്ഞതിനുശേഷം (ബി.സി. 323), മാസിഡോണിയക്കാരെ പരാജയപ്പെടുത്താൻ ഈ അവസരം ഉപയോഗപ്പെടുത്താമെന്ന പ്രതീക്ഷയിൽ അതിനു നേതൃത്വം നൽകാനായി ഏഥൻസുകാർ ഡെമോസ്തനിസിനെ തിരികെ വിളിച്ചപ്പോൾ മാത്രമാണ് ഇദ്ദേഹത്തിനു മടങ്ങിയെത്താൻ സാധിച്ചത്. എന്നാൽ അലക് സാണ്ടർക്കുശേഷം അധികാരത്തിലേറിയ ആന്റിപേറ്റർ ഈ ഉദ്യമത്തെ ശക്തിയായി നേരിട്ടു പരാജയപ്പെടുത്തി. സ്വന്തം നിലനിൽപ്പ് പ്രശ്നമായിത്തീർന്നപ്പോൾ ഡെമോസ്തനിസ് കലൗറിയ (Calauria) എന്ന ദ്വീപിലേക്ക് പലായനം ചെയ്തു. പിന്തുടർന്നുവന്ന മാസിഡോണിയൻ സേനയ്ക്കു പിടികൊടുക്കുകയോ കീഴടങ്ങുകയോ ചെയ്യാതെ, ആത്മാഭിമാനം സംരക്ഷിക്കുവാൻ വേണ്ടി ഇദ്ദേഹം ബി.സി. 322 ഒക്ടോബർ 12-ന് വിഷം കഴിച്ച് ആത്മഹത്യ ചെയ്തു.

പുറത്തേക്കുള്ള കണ്ണികൾ[തിരുത്തുക]

Heckert GNU white.svg കടപ്പാട്: കേരള സർക്കാർ ഗ്നൂ സ്വതന്ത്ര പ്രസിദ്ധീകരണാനുമതി പ്രകാരം ഓൺലൈനിൽ പ്രസിദ്ധീകരിച്ച മലയാളം സർ‌വ്വവിജ്ഞാനകോശത്തിലെ ഡെമോസ്തനിസ് (ബി.സി. 384-322) എന്ന ലേഖനത്തിന്റെ ഉള്ളടക്കം ഈ ലേഖനത്തിൽ ഉപയോഗിക്കുന്നുണ്ട്. വിക്കിപീഡിയയിലേക്ക് പകർത്തിയതിന് ശേഷം പ്രസ്തുത ഉള്ളടക്കത്തിന് സാരമായ മാറ്റങ്ങൾ വന്നിട്ടുണ്ടാകാം.
"http://ml.wikipedia.org/w/index.php?title=ഡെമോസ്തനിസ്&oldid=1765508" എന്ന താളിൽനിന്നു ശേഖരിച്ചത്