മുകുൾ സിൻഹ
ഗുജറാത്തിലെ മനുഷ്യാവകാശ പ്രവർത്തകനും അഭിഭാഷകനുമായിരുന്നു മുകുൾ സിൻഹ. ന്യൂ സോഷ്യലിസ്റ്റ് മൂവ്മെന്റ് എന്നൊരു രാഷ്ട്രീയപ്പാർട്ടിക്കു രൂപം നൽകി. ഗുജറാത്ത് ട്രേഡ് യൂണിയൻ ഫെഡറേഷൻ, ജനസംഘർഷ മഞ്ച് എന്നിവയുടെ നേതൃത്വത്തിലായിരുന്നു പുതിയ പാർട്ടി.
ജീവിതരേഖ[തിരുത്തുക]
ഐ.ഐ.ടി. കാൺപുരിൽനിന്ന് സയൻസിൽ മാസ്റ്റർബിരുദം നേടിയശേഷം 1973-ൽ അഹമ്മദാബാദിലെ ഫിസിക്കൽ റിസർച്ച് ലബോറട്ടറിയിൽ ശാസ്ത്രജ്ഞനായി. 1989-ൽ നിയമബിരുദം നേടി അഭിഭാഷകനായി. 2002-ലെ ഗുജറാത്ത് കലാപത്തിലെ ഇരകൾക്കുവേണ്ടിയും വ്യാജ ഏറ്റുമുട്ടലിൽ കൊല്ലപ്പെട്ടവർക്കുവേണ്ടി കോടതിയിൽ ഹാജരായി. സാദിഖ് ജമാൽ, ഇസ്രത്ത് ജഹാൻ, സൊഹ്‌റാബുദ്ദീൻ ശൈഖ്, തുൾസി പ്രജാപതി തുടങ്ങിയവരുമായി ബന്ധപ്പെട്ട നാല് വ്യാജ ഏറ്റുമുട്ടൽ കേസുകൾ പുറത്തുകൊണ്ടുവരുന്നതിൽ പ്രധാന പങ്കുവഹിച്ചു.
ജനസംഘർഷ മഞ്ച്[തിരുത്തുക]
തൊഴിൽകേസുകൾ ഏറ്റെടുത്ത് കൈകാര്യം ചെയ്യാൻ ജന സംഘർഷ് മഞ്ച് എന്ന സർക്കാറിതര സന്നദ്ധസംഘടനയ്ക്കു രൂപംനൽകി. അഹമ്മദാബാദിലെയും സംസ്ഥാന ട്രാൻസ്‌പോർട്ട് കോർപ്പറേഷനിലെയും ഡ്രൈവർമാരുടെയും കണ്ടക്ടർമാരുടെയും കുറഞ്ഞ വേതനത്തിനെതിരെ ജനസംഘർഷ മഞ്ച് ആണ് പോരാടിയത്.
ട്രൂത്ത് ഓഫ് ഗുജറാത്ത് ഡോട് കോം[തിരുത്തുക]
കലാപങ്ങൾ കൈകാര്യം ചെയ്തതിൽ ഗുജറാത്ത് സർക്കാറിന്റെ പരാജയം പുറത്തുകൊണ്ടുവരാൻ ഭാര്യക്കും മകനുമൊപ്പം ചേർന്ന് ട്രൂത്ത് ഓഫ് ഗുജറാത്ത് ഡോട് കോം എന്ന വെബ്‌സൈറ്റ് തുടങ്ങി.