മിശിഹ

മിശിഹ എന്ന ഹീബ്രു വാക്കിന്റെ അർത്ഥം അഭിക്ഷിപ്തൻ എന്നാകുന്നു . അഭിക്ഷേകം ചെയ്യപ്പെട്ടവൻ എന്നോ ദൈവത്താൽ തിരഞ്ഞെടുക്കപ്പെട്ടവർ എന്നോ അർത്ഥമാക്കാം . യഹൂദമതത്തിലെ മിശിഹ , ക്രിസ്തുമതത്തിലെ മിശിഹ എന്ന് രണ്ടു തരത്തിൽ മിശിഹായെ കുറിച്ച് അറിയപ്പെടുന്നുണ്ട് . ഇസ്‌ലാമിലെ കാഴ്ചപ്പാട് അനുസരിച്ചു മസീഹ എന്ന വാക്കാൽ മിശിഹയെ സൂചിപ്പിക്കുന്നു . മസീഹ എന്നാൽ രാജാവ് എന്നർത്ഥം വരുന്നുണ്ട് .

യഹൂദ മതപ്രകാരം

റോമാ ചക്രവർത്തി നിയമിച്ച രാജാക്കന്മാരുടെ കീഴിലുള്ള പ്രജകളായിരുന്നു യഹൂദർ . യഹൂദരിലെ ഒരു വിഭാഗം അക്കാലത്തു റോമാ ഭരണത്തെ എതിർക്കുകയും ഇടയ്ക്കു ബഹളം വയ്ക്കുകയും ചെയ്തിരുന്നു . പഴയനിയമം ആധാരമാക്കി ജീവിച്ചിരുന്ന യഹൂദർ , ദൈവം തന്റെ ജനതയെ ഒരു ദിവസം രക്ഷിക്കും എന്ന് പ്രതീക്ഷിച്ചിരുന്നു . രക്ഷകനായ മിശിഹായെപ്പറ്റി പല സങ്കൽപ്പങ്ങളും നിലനിന്നിരുന്നു . ദൈവം രക്ഷകനായ ഒരു മിശിഹായെ അയയ്ക്കും എന്ന് യഹൂദർ വിശ്വസിച്ചു . ചിലർ ഒരു പുരോഹിതനോ പ്രവാചകനോ വരുമെന്ന് പ്രതീക്ഷിച്ചു . സാധാരണക്കാർ ഒരു രക്ഷകനെയാണ് പ്രതീക്ഷിച്ചത് . മിശിഹ തങ്ങളുടെ വരാനിരിക്കുന്ന അഭിക്ഷിക്തനായ രാജാവാണെന്ന് യഹൂദർ കരുതിയിരുന്നു .ദാവീദിന്റെ വംശപരമ്പരയിൽ പിറന്ന് ഇസ്രായേലിന്റെ പന്ത്രണ്ടു ഗോത്രങ്ങളേയും മിശിഹ ഒന്നിപ്പിക്കുമെന്നും അവർ പ്രതീക്ഷിച്ചു .

ക്രിസ്തുമതം പ്രകാരം

ക്രിസ്തുമതം അനുസരിച്ച് യഹൂദർക്ക് വരാനിരുന്ന മിശിഹ യേശുക്രിസ്തു ആയിരുന്നു . അതിനാൽ തന്നെ യേശുവിനെ യേശു മിശിഹ എന്നാണു വിളിച്ചിരുന്നത് . ക്രിസ്തുമതപ്രകാരം യേശു ദൈവപുത്രനായ മിശിഹയാണ് . യഹൂദരുടെ പഴയനിയമത്തിന്റെ പൂർത്തീകരണമാണ് യേശുവിന്റെ ജനനത്തോടെ സംഭവിച്ചതെന്നു ക്രിസ്ത്യാനികൾ ഉറച്ചു വിശ്വസിക്കുന്നു . ദാവീദിന്റെ വംശത്തിൽ തന്നെയാണ് യേശുവും പിറന്നത് . യേശുവിന്റെ ജനനം, പ്രവർത്തനങ്ങൾ, ഉയർത്തെഴുനേൽപ്പ്‌ എന്നിവയിലൂടെ പഴയ നിയമത്തിനു പൂർത്തീകരണമുണ്ടായതായും ക്രിസ്ത്യാനികൾ കരുതി . ക്രൂശിതനായ യേശു മൂന്നാം നാൾ ഉയിർത്തെഴുന്നേറ്റ ശേഷം സ്വർഗ്ഗസ്ഥനായെന്നും അദ്ദേഹത്തിന്റെ രണ്ടാം വരവ് ഭാവിയിൽ ഉണ്ടാകുമെന്നും വിശ്വാസമുണ്ട് .

ഇസ്‌ലാമിക വിശ്വാസ പ്രകാരം

യേശു ഒരു പ്രവാചകനും മിശിഹയുമാണ് . മസീഹ് ഈസ എന്നാണു ഇസ്‌ലാമിലെ യേശുവിന്റെ നാമം . ഈ മസീഹ്‌ ലോകാവസാനത്തോടെ ഇമാം മഹ്ദി പ്രവാചകനോടൊപ്പം ലോകത്തിൽ വരുമെന്നും , അന്തിക്രിസ്തുവായ ദജ്ജാലിനെ വധിക്കുമെന്നും ഇസ്‌ലാം വിശ്വസിക്കുന്നു .

ഇവകൂടാതെ മിശിഹായിൽ വിശ്വസിക്കുന്ന മറ്റു മതങ്ങളും ഉണ്ട് .