ഗുണ്ടറ മഖാം

വയനാട് ജില്ലയിലെ മാനന്തവാടി-ബാവലി-മൈസൂർ റോഡിൽ കേരള-കർണാടക അതിർത്തിയിൽ ഉൾക്കാട്ടിനകത്ത് സ്ഥിതി ചെയ്യുന്ന ഒരു മുസ്ലിം തീർത്ഥാടന കേന്ദ്രമാണ് ഗുണ്ടറ മഖാം. വർഷത്തിലൊരിക്കൽ ഇവിടെ നടക്കുന്ന ഉറൂസ് അഥവാ നേർച്ച പ്രശസ്തമാണ്. ഇതോടനുബന്ധിച്ച് മാത്രമാണ് ജനങ്ങൾക്ക് ഇവിടെ പ്രവേശനാനുമതിയുള്ളത്. സൂഫിവര്യനായ ഹസ്രത്ത് സയ്യിദ് അബ്ദുൽ ബാരിയുടെ ഖബറിടമാണ് ഇവിടെ സ്ഥിതി ചെയ്യുന്നത്. കേരള- കർണാടക അതിർത്തിയോടുചേർന്നുള്ള ബൈരക്കുപ്പ പഞ്ചായത്തിലെ മച്ചൂരിനടുത്തുള്ള ഗുണ്ടറ വനത്തിലാണ് ഇത് നിലൊകൊള്ളുന്നത്. മച്ചൂരിൽനിന്ന് കബനിപ്പുഴ മുറിച്ചുകടന്ന് കാട്ടിലൂടെ നാലുകിലോമീറ്ററോളം സഞ്ചരിച്ചുവേണം ഈ മഖാമിലെത്താൻ. ഏപ്രിൽ മാസത്തിൽ മാത്രമാണ് പ്രവേശനം.