അതിശയോക്തി
ഒരു അർഥാലങ്കാരമാണ് അതിശയോക്തി. വസ്തുസ്ഥിതികളെ അതിക്രമിച്ചുള്ള ഏതു ചൊല്ലും അതിശയോക്തിയാണ്. ചൊല്ലുള്ളതിൽ കവിഞ്ഞുള്ളതെല്ലാമതിശയോക്തിയാം എന്ന് ഭാഷാഭൂഷണം. സാമ്യ-വാസ്തവ-ശ്ലേഷമൂലകങ്ങളായ അലങ്കാരങ്ങളിലും ഒരളവുവരെ അതിശയോക്തി ഉണ്ടായിരിക്കും.
| “ | തെല്ലതിൻ സ്പർശമില്ലാതെ- യില്ലലങ്കാരമൊന്നുമേ (ഭാഷാഭൂഷണം) |
” |
അതിശയോക്തി അലങ്കാരങ്ങൾ
[തിരുത്തുക]അതിശയം അതിപ്രകടമായിരിക്കുന്ന ഉക്തികളെയാണ് അതിശയോക്ത്യലങ്കാരങ്ങളായി പരിഗണിക്കുന്നത്. ഇവ അനേകവിധമുണ്ട്. പ്രധാനമായി ഇവയെ മൂന്നിനമായി തിരിക്കാം:-
വർണ്യത്തിന്റെ പരിമാണം
[തിരുത്തുക]അളവ്, എണ്ണം മുതലായവ ഉള്ളതിൽ കൂട്ടിയോ കുറച്ചോ പറയുന്നത്. ഇതിൽ
- സംബന്ധാതിശയോക്തി
- അസംബന്ധാതിശയോക്തി
- ഭേദകാതിശയോക്തി എന്നിവയാണ് മുഖ്യം.
| “ | അയോഗത്തിങ്കലെ യോഗം സംബന്ധാതിശയോക്തിയാം (ഉദാ. മലയോളം പോന്ന കാള) |
” |
| “ | അയോഗംചൊല്കയോഗത്തിൽ അസംബന്ധാതിശയോക്തിയും (ഉദാ. വിറ്റുവിറ്റ് ഇനി ഉടുതുണിയേ ബാക്കിയുള്ളു) |
” |
| “ | ഭേദം ചൊന്നാലഭേദത്തിൽ ഭേദകാതിശയോക്തിയും (ഉദാ. അന്യാദൃശം തന്നെ ഇവളുടെ അഴക്) ആണ് |
” |
ആധാരാധിക്യവും ആധേയാധിക്യവും പറയുന്ന അധികം എന്ന അലങ്കാരവും ഈ ഇനത്തിൽ പെടും.
കാര്യകാരണവ്യതിക്രമം
[തിരുത്തുക]ഏതുകാര്യത്തിനും കാരണമുണ്ടായിരിക്കും; കാരണത്തെ തുടർന്നേ കാര്യം സംഭവിക്കൂ. ഈ കാര്യകാരണ നിയമത്തെ അതിക്രമിച്ചുള്ള ചൊല്ലുകളാണ് ഈ ഇനത്തിൽ വരുന്നത്.
- കാര്യകാരണങ്ങൾ അഭിന്നം എന്നു കല്പിക്കുന്ന ഹേത്വതിശയോക്തി
- കാര്യവും കാരണവും ഒരുമിച്ചു സംഭവിക്കുന്നതായി പറയുന്ന അക്രമാതിശയോക്തി
- കാരണത്തിനും മുൻപേ കാര്യം സംഭവിച്ചതായി പറയുന്ന അത്യന്താതിശയോക്തി
- കാരണമില്ലാതെയും കാര്യമുണ്ടായതായി പറയുന്ന വിഭാവന
- കാരണമുണ്ടായിട്ടും കാര്യമുണ്ടായില്ല എന്നു പറയുന്ന വിശേഷോക്തി
- കാരണം ഒരിടത്തും കാര്യം മറ്റൊരിടത്തും സംഭവിച്ചതായി പറയുന്ന അസംഗതി ഇത്രയുമാണ് ഈ ഇനത്തിൽ പ്രധാനം.
സാമ്യസംബന്ധമുള്ളവ
[തിരുത്തുക]ഈ ഇനത്തിൽ മുഖ്യം രൂപകാതിശയോക്തിയാണ്.
| “ | നിഗീര്യാധ്യവസനം താൻ രൂപകാതിശയോക്തിയാം (ഭാഷാഭൂഷണം). | ” |
| “ | ഉദാ.1. സരോജയുഗളം കാൺക ശരങ്ങൾ ചൊരിയുന്നിതാ. |
” |
{{Cquote|ഉദാ.2.ആവണിപ്പാടം കുളിച്ചു തോർത്തി
മുടിയാകെ വിടർത്തിയുലർത്തി നിന്നു
ഇവിടെ നേത്രകടാക്ഷങ്ങളെ തദുപമാനങ്ങളായ സരോജശരങ്ങളായി പറഞ്ഞിരിക്കുന്നു. തദ്ഗുണം, അതദ്ഗുണം മുതലായ അലങ്കാരങ്ങളെയും ഈ ഇനത്തിൽ പെടുത്താവുന്നതാണ്.
 | കടപ്പാട്: കേരള സർക്കാർ ഗ്നൂ സ്വതന്ത്ര പ്രസിദ്ധീകരണാനുമതി പ്രകാരം ഓൺലൈനിൽ പ്രസിദ്ധീകരിച്ച മലയാളം സർ‌വ്വവിജ്ഞാനകോശത്തിലെ അതിശയോക്തി എന്ന ലേഖനത്തിന്റെ ഉള്ളടക്കം ഈ ലേഖനത്തിൽ ഉപയോഗിക്കുന്നുണ്ട്. വിക്കിപീഡിയയിലേക്ക് പകർത്തിയതിന് ശേഷം പ്രസ്തുത ഉള്ളടക്കത്തിന് സാരമായ മാറ്റങ്ങൾ വന്നിട്ടുണ്ടാകാം. |