അജിത് പവാർ

അജിത് പവാർ
അജിത് പവാർ
മഹാരാഷ്ട്ര, ഉപ-മുഖ്യമന്ത്രി(ധനകാര്യ, എക്സൈസ്, ആസൂത്രണ വകുപ്പിൻ്റെ ചുമതല)
	പദവിയിൽ; 2024-2026, 2023-2024, 2019-2022, 2019, 2012-2014, 2010-2012
മുൻഗാമി	ദേവേന്ദ്ര ഫഡ്നാവീസ്
പിൻഗാമി	സുനേത്ര പവാർ
നിയമസഭയിലെ പ്രതിപക്ഷ നേതാവ്
	പദവിയിൽ; 2022-2023
മുൻഗാമി	ദേവേന്ദ്ര ഫഡ്നാവീസ്
പിൻഗാമി	ജിതേന്ദ്ര അഹ്വാഡ്
നിയമസഭാംഗം
	പദവിയിൽ; 2024-2026, 2019, 2014, 2009, 2004, 1999, 1995, 1991
മണ്ഡലം	ബരാമതി
വ്യക്തിഗത വിവരങ്ങൾ
ജനനം	1959 ജൂലൈ 22; ബരാമതി, പൂനൈ ജില്ല, മഹാരാഷ്ട്ര
മരണം	28 ജനുവരി 2026 (66 വയസ്സ്)
രാഷ്ട്രീയ കക്ഷി	ഔദ്യോഗിക എൻ.സി.പി (അജിത് വിഭാഗം)(2023-2026); അവിഭക്ത എൻ.സി.പി(1999-2023); ഇന്ത്യൻ നാഷണൽ കോൺഗ്രസ് (1991-1999);
പങ്കാളി	സുനേത്ര
കുട്ടികൾ	2
	As of 28 ജനുവരി, 2026ഉറവിടം: സ്റ്റാർസ്‌ അൺഫോൾഡഡ്

2024 ഡിസംബർ 5 മുതൽ 2026 ജനുവരി 28 വരെ മൂന്നാം ദേവേന്ദ്ര ഫഡ്നവിസ് മന്ത്രിസഭയിലെ സംസ്ഥാന ഉപ-മുഖ്യമന്ത്രിയായിരുന്ന എൻ.സി.പിയുടെ മുതിർന്ന നേതാവായിരുന്നു അജിത് പവാർ.(22 ജൂലൈ 1959 - 28 ജനുവരി 2026) എട്ട് തവണ നിയമസഭാംഗം, അഞ്ച് തവണ മഹാരാഷ്ട്ര ഉപ-മുഖ്യമന്ത്രി, അഞ്ച് തവണ സംസ്ഥാന കാബിനറ്റ് വകുപ്പ് മന്ത്രി, ഒരു തവണ ലോക്സഭാംഗം എന്നീ നിലകളിലും പ്രവർത്തിച്ചിട്ടുണ്ട്. ^[1]^[2]^[3]^[4]^[5] സംസ്ഥാനത്ത് രൂപീകരിച്ച മന്ത്രിസഭകളിൽ ഏറ്റവും കൂടുതൽ കാലം മഹാരാഷ്ട്രയുടെ ഉപ-മുഖ്യമന്ത്രിയായിരുന്ന എൻസിപി നേതാവും അജിത് പവാറാണ്. എട്ട് വർഷവും 278 ദിവസവുമാണ് അദ്ദേഹം ഈ പദവിയിലിരുന്നത്.^[6]

ജീവിതരേഖ

മുതിർന്ന എൻ.സി.പി നേതാവായ ശരദ് പവാറിൻ്റെ ജ്യേഷ്ഠ സഹോദരനായ അനന്തറാവുവിൻ്റെയും ആശാതായിയുടെയും മകനായി മഹാരാഷ്ട്രയിലെ പൂനൈ ജില്ലയിലെ ബരാമതിയിൽ 1959 ജൂലൈ 22ന് ജനനം. മഹാരാഷ്ട്ര എഡ്യുക്കേഷൻ സൊസൈറ്റി ഹൈസ്കൂളിൽ നിന്ന് നേടിയ എസ്.എസ്.എൽ.സിയാണ് വിദ്യാഭ്യാസ യോഗ്യത. തുടർപഠനത്തിനായി കോളേജിൽ പോയെങ്കിലും കോഴ്സ് പൂർത്തിയാക്കിയില്ല.

രാഷ്ട്രീയ ജീവിതം

1982-ൽ പൂനൈ ജില്ലയിലെ പഞ്ചസാര ഫാക്ടറി സഹകരണ ബോർഡ് അംഗമായാണ് പൊതുരംഗ പ്രവേശനം. 1991 മുതൽ 2007 വരെ പൂനൈ ജില്ല സഹകരണ ബാങ്ക് ചെയർമാനായിരുന്നു. 1991-ലെ ലോക്സഭ തിരഞ്ഞെടുപ്പിൽ ബരാമതിയിൽ നിന്ന് പാർലമെൻ്റ് അംഗമായെങ്കിലും ശരദ് പവാറിന് മത്സരിക്കാനായി ലോക്സഭാംഗത്വം രാജിവച്ചു. 1991-ലെ മഹാരാഷ്ട്ര നിയമസഭ തിരഞ്ഞെടുപ്പിൽ ബരാമതിയിൽ നിന്ന് ആദ്യമായി നിയമസഭാംഗമായ അജിത് പിന്നീട് നടന്ന എല്ലാ നിയമസഭ തിരഞ്ഞെടുപ്പുകളിലും ബരാമതിയിൽ നിന്ന് തെരഞ്ഞെടുക്കപ്പെട്ടു. 1991-ലെ സുധാകരറാവു നായിക് മന്ത്രിസഭയിൽ ആദ്യമായി സംസ്ഥാന കൃഷി വകുപ്പ് മന്ത്രിയായ അജിത് പിന്നീട് അഞ്ച് തവണ കൂടി കാബിനറ്റ് വകുപ്പിൻ്റെ മന്ത്രിയായി.

2010-ലെ അശോക് ചവാൻ മന്ത്രിസഭയിൽ ആദ്യമായി ഉപ-മുഖ്യമന്ത്രിയായി തിരഞ്ഞെടുക്കപ്പെട്ടു. പിന്നീട് പ്രിഥിരാജ് ചവാൻ, ദേവേന്ദ്ര ഫഡ്നാവീസ്, ഉദ്ധവ് താക്കറെ, ഏകനാഥ് ഷിൻഡേ മന്ത്രിസഭകളിൽ വീണ്ടും ഉപ-മുഖ്യമന്ത്രിയായി.

പ്രധാന പദവികളിൽ

1982 : പൂനൈ, പഞ്ചസാര ഫാക്ടറി, സഹകരണ ബോർഡ് അംഗം
1991-2007 : ചെയർമാൻ, പൂനൈ ജില്ല സഹകരണ ബാങ്ക്
1991 : ലോക്സഭാംഗം, ബരാമതി
1991 : നിയമസഭാംഗം, ബരാമതി
1991-1992 : സംസ്ഥാന കൃഷിവകുപ്പ് മന്ത്രി
1992-1993 : സംസ്ഥാന വിദ്യുചക്തി വകുപ്പ് മന്ത്രി
1995 : നിയമസഭാംഗം, ബരാമതി
1999 : നിയമസഭാംഗം, ബരാമതി
1999-2003 : സംസ്ഥാന ജലവിഭവ വകുപ്പ് മന്ത്രി
2003-2004 : സംസ്ഥാന ഗ്രാമവികസന വകുപ്പ് മന്ത്രി
2004 : നിയമസഭാംഗം, ബരാമതി
2004-2008 : സംസ്ഥാന കാബിനറ്റ് വകുപ്പ് മന്ത്രി
2008-2009 : സംസ്ഥാന കാബിനറ്റ് വകുപ്പ് മന്ത്രി
2009 : നിയമസഭാംഗം, ബരാമതി
2009-2010 : സംസ്ഥാന കാബിനറ്റ് വകുപ്പ് മന്ത്രി
2010-2012 : സംസ്ഥാന ഉപ-മുഖ്യമന്ത്രി
2012-2014 : സംസ്ഥാന ഉപ-മുഖ്യമന്ത്രി
2014 : നിയമസഭാംഗം, ബരാമതി
2019 : നിയമസഭാംഗം, ബരാമതി
2019, 2019-2022 : സംസ്ഥാന ഉപ-മുഖ്യമന്ത്രി
2022-2023 : നിയമസഭയിലെ പ്രതിപക്ഷ നേതാവ്
2024-2026 : നിയമസഭാംഗം, ബരാമതി
2023-2024, 2024-2026 : സംസ്ഥാന ഉപ-മുഖ്യമന്ത്രി^[7]^[8]

എൻ.സി.പി അജിത് വിഭാഗം

2019-ലെ ലോക്സഭ തിരഞ്ഞെടുപ്പിൽ എൻ.സി.പി ശക്തികേന്ദ്രമായ മാവലിൽ നിന്ന് മത്സരിച്ച മകൻ പാർത്ഥ് പവാർ ശിവസേന സ്ഥാനാർത്ഥിയോട് പരാജയപ്പെട്ടതോടെ അജിത് പവാർ ശരദ് പവാറുമായി അകൽച്ചയിലായി.

2019-ൽ (ശിവസേന + എൻ.സി.പി + കോൺഗ്രസ്) സഖ്യം രൂപീകരിച്ച മഹാവികാസ് അഘാഡി സർക്കാരിൽ ഉപ-മുഖ്യമന്ത്രിയായി തിരഞ്ഞെടുക്കപ്പെട്ടെങ്കിലും 2022-ൽ മുഖ്യമന്ത്രിയായിരുന്ന ഉദ്ധവ് താക്കറെ സ്ഥാനം രാജിവച്ചതോടെ 2022-ൽ നിയമസഭയിലെ പ്രതിപക്ഷ നേതാവായി തിരഞ്ഞെടുക്കപ്പെട്ടു.

2023 മെയിൽ എൻ.സി.പി ദേശീയ അധ്യക്ഷ സ്ഥാനം ശരദ് പവാർ രാജിവച്ചതോടെ വർക്കിംഗ് പ്രസിഡൻറുമാരായി ശരദ് പവാറിൻ്റെ മകൾ സുപ്രിയ സുലെയും പ്രഫുൽ പട്ടേലും തിരഞ്ഞെടുക്കപ്പെട്ടു.

പാർട്ടിയിൽ പദവികൾ ഒന്നും ലഭിക്കാതെ നിരാശനായിരുന്ന അജിത് പ്രതിപക്ഷ നേതാവായി തുടരാൻ താത്പര്യം ഇല്ലെന്നും പാർട്ടി നേതൃ പദവി വേണമെന്നും ശരദ് പവാറിനോട് ആവശ്യപ്പെട്ടെങ്കിലും ശരദ് പവാർ വഴങ്ങിയില്ല.

2023 ജൂലൈ 2ന് എൻ.സി.പി പിളർത്തി അജിത് പവാർ ഏകനാഥ് ഷിൻഡെ നയിക്കുന്ന ശിവസേന - ബി.ജെ.പി സർക്കാരിൽ ഉപ-മുഖ്യമന്ത്രിയായി ചേർന്നു. നാലു വർഷത്തിനുള്ളിൽ ഇത് മൂന്നാം തവണയാണ് അജിത് ഉപ-മുഖ്യമന്ത്രിയാവുന്നത്. ശരദ്പവാറിൻ്റെ വിശ്വസ്തരായ മുതിർന്ന നേതാക്കളായ ഛഗൻ ഭുജ്ബൽ, പ്രഫുൽ പട്ടേൽ, ദിലീപ് വൽസ പാട്ടീൽ എന്നിവരുടെ പിന്തുണയും അജിത്തിന് ലഭിച്ചു.

2023 ജൂലൈ രണ്ടാം തീയതി എൻ.സി.പിയിലെ 53 എം.എൽ.എമാരിൽ 29 പേരുമായി രാജ്ഭവനിലെത്തിയാണ് അജിത് അട്ടിമറിനീക്കം നടത്തിയത്‌. 2024-ലെ ലോക്സഭ തിരഞ്ഞെടുപ്പിൽ ബി.ജെ.പിക്കെതിരെയുള്ള പ്രതിപക്ഷ ഐക്യത്തിന് ശരദ് പവാർ നേതൃത്വം നൽകുന്നതിനിടെയാണ് എൻ.സി.പിയിലെ പിളർപ്പ്.

ഛഗൻ ഭുജ്ബൽ അടക്കം എട്ടുപേർ മന്ത്രിമാരായും സത്യപ്രതിജ്ഞ ചെയ്തു. അജിത് പവാറിന് പുറമെ എൻ.സി.പിയിലെ മുതിർന്ന നേതാക്കളായ ഛഗൻ ഭുജ്പൽ, ദിലീപ് വൽസെ പാട്ടീൽ, ഹസൻ മുഷ്റിഫ്, ധനഞ്ജയ മുണ്ടെ, അദിതി തത്കരെ, ധർമ്മറാവു അത്രം, അനിൽ പാട്ടീൽ, സഞ്ജയ് ബൻസോഡെ എന്നിവരാണ് മന്ത്രിമാരായത്.

അജിത് പവാറിൻ്റെ മാറ്റത്തോടെ 288 അംഗ നിയമസഭയിൽ ഏകനാഥ് ഷിൻഡെ സർക്കാരിന് 204 അംഗങ്ങളുടെ പിന്തുണയായി. 2022 ജൂൺ 30നാണ് ശിവസേന നേതാവ് ഏകനാഥ് ഷിൻഡേ മുഖ്യമന്ത്രിയും ബി.ജെ.പി നേതാവ് ദേവേന്ദ്ര ഫഡ്നാവിസ് ഉപ-മുഖ്യമന്ത്രിയുമായി മഹാരാഷ്ട്രയിലെ എൻ.ഡി.എ സർക്കാർ അധികാരത്തിലേറിയത്.

നിയമസഭയിലെ അയോഗ്യത ഒഴിവാക്കുന്നതിനായി എൻ.സി.പിയുടെ ആകെയുള്ള 53 എം.എൽ.എമാരിൽ 40 പേരുടെ പിന്തുണ അജിത് പവാർ ഉറപ്പിച്ചു.^[9]

2024 ഫെബ്രുവരി 6ന് അജിത് പവാർ നേതൃത്വം നൽകുന്ന വിഭാഗത്തെ തിരഞ്ഞെടുപ്പ് കമ്മീഷൻ ഔദ്യോഗിക വിഭാഗമായി അംഗീകരിച്ചു. ഇത് പ്രകാരം നാഷണലിസ്റ്റ് കോൺഗ്രസ് പാർട്ടി അഥവാ എൻ.സി.പി എന്ന പേരും പാർട്ടി ചിഹ്നമായ ക്ലോക്കും അജിത് പവാറിന് ഉപയോഗിക്കാം. മഹാരാഷ്ട്രയിലെ എൻ.സി.പിയിൽ ആകെയുള്ള 87 ജനപ്രതിനിധികളിൽ 57 പേരും നിലവിൽ അജിത് പവാറിനൊപ്പമാണ്. ആറ് മാസം നീണ്ട് നിന്ന ഹിയറിംഗിന് ശേഷമാണ് കമ്മീഷൻ്റെ തീരുമാനം വന്നത്.^[10]^[11]

2024-ലെ നിയമസഭ തിരഞ്ഞെടുപ്പിൽ ബിജെപി നയിച്ച മഹായുതി സഖ്യത്തിൽ നിന്ന് 59 ഇടങ്ങളിൽ മത്സരിച്ച അജിത് പവാറിൻ്റെ പാർട്ടിയായ എൻ.സി.പി 41 സീറ്റുകളിൽ വിജയിച്ചു.

132 സീറ്റ് നേടിയ ബിജെപി, 57 സീറ്റുകളിൽ വിജയിച്ച ഏകനാഥ് ഷിൻഡെ വിഭാഗം നയിച്ച ഔദ്യോഗിക പാർട്ടിയായ ശിവസേന എന്നിവർക്കൊപ്പം സംസ്ഥാന രാഷ്ട്രീയത്തിലെയും മഹാരാഷ്ട്ര നിയമസഭയിലേയും മൂന്നാമത്തെ വലിയ പാർട്ടിയായി അജിത് പവാർ നയിച്ച എൻസിപി മാറി.

2024-ലെ നിയമസഭ തിരഞ്ഞെടുപ്പിലെ ചരിത്ര വിജയത്തോടെ 288 അംഗ മഹാരാഷ്ട്ര നിയമസഭയിൽ 234 അംഗങ്ങളുടെ പിന്തുണയോടെ (ബിജെപി + ശിവസേന + എൻസിപി) കൂട്ടായ്മയായ മഹായുതി എന്നറിയപ്പെടുന്ന എൻ.ഡി.എ സഖ്യം മൂന്നിൽ രണ്ട് ഭൂരിപക്ഷം നേടി മഹാരാഷ്ട്രയിൽ അധികാരം നില നിർത്തി.^[12]^[13]

മരണം

2026 ജനുവരി 28 ന്, രാവിലെ ഏകദേശം 09:12ന്, മുംബൈയിലെ ഛത്രപതി ശിവാജി മഹാരാജ് അന്താരാഷ്ട്ര വിമാനത്താവളത്തിൽ നിന്ന് മഹാരാഷ്ട്രയിലെ ബാരാമതി വിമാനത്താവളത്തിലേക്ക് പവാർ യാത്ര ചെയ്ത ഒരു എയർ ചാർട്ടർ വിമാനമായ ലിയർജെറ്റ് 45 ബാരാമതി വിമാനത്താവളത്തിലെ റൺവേ 11-ലേക്ക് ഇറങ്ങാൻ ശ്രമിക്കുന്നതിനിടെ തകർന്നുവീണു. വിമാനം റൺവേയിൽ നിന്ന് തെന്നിമാറി, തീപിടുത്തത്തിൽ തകർന്നു, അതിന്റെ ഫലമായി പവാറും കൂടെ വിമാനത്തിലുണ്ടായിരുന്ന മറ്റ് നാല് പേരും മരണപ്പെട്ടു. ^[14]^[15]^[16]^[17]^[18]

സ്വകാര്യ ജീവിതം

ഭാര്യ : സുനേത്ര
മക്കൾ :
പാർത്ഥ്
ജയ്^[19]^[20]^[21]^[22]

അവലംബം

↑ എൻ.സി.പി പിളർന്നു, അജിത് പവാർ ഉപ-മുഖ്യമന്ത്രി
↑ ശിവസേനയ്ക്ക് പിന്നാലെ എൻ.സി.പിയും
↑ അജിത് പവാർ
↑ പവാർ തന്ത്രങ്ങളുടെ തലമുറമാറ്റം
↑ നിങ്ങൾക്ക് 83 വയസായിട്ടും നിർത്താറായില്ലേ...? ശരദ് പവാറിനോട് അജിത്
↑ Longest deputy CM of Maharashtra Politics
↑ മഹാരാഷ്ട്രയിൽ രണ്ടാം പവാർ പ്ലേ
↑ ഉപ-മുഖ്യമന്ത്രി അജിത് പവാറിന് ധനകാര്യ, പ്ലാനിംഗ് വകുപ്പിൻ്റെ ചുമതല
↑ സുനിൽ തത്കരെ എൻ.സി.പി അജിത് വിഭാഗത്തിൻ്റെ പുതിയ സംസ്ഥാന അധ്യക്ഷൻ
↑ അജിത് പവാർ വിഭാഗത്തിന് തിരഞ്ഞെടുപ്പ് കമ്മീഷന്റെ അംഗീകാരം
↑ ശരദ് പവാറിൻ്റെ പാർട്ടി ഇനി എൻ.സി.പി(ശരത്ചന്ദ്ര പവാർ വിഭാഗം)
↑ സേനാപതി ഷിൻഡേ പവർഫുൾ അജിത്
↑ ശരദ് അല്ല അജിത് പവർ
↑ "Ajit Pawar: Deputy chief minister of Maharashtra state dies in plane crash". www.bbc.com (in ബ്രിട്ടീഷ് ഇംഗ്ലീഷ്). 2026-01-28. Retrieved 2026-01-28.
↑ "Ajit Pawar's Flight Crash in Baramati dist Pune". CNN-News18. 28 January 2026. Retrieved 28 January 2026.
↑ "Ajit Pawar Passed Away: Maharashtra Deputy Chief Minister dies in plane crash near Baramati". Lokmat. 28 January 2026. Retrieved 28 January 2026.
↑ "Air charter crash in India's Maharashtra kills key state leader". Reuters. January 28, 2026. Retrieved January 28, 2026.
↑ "Ajit Anantrao Pawar (1959–2026): Former Maharashtra Deputy Chief Minister Passes Away". Telugu Vaadi TV (in ഇംഗ്ലീഷ്). 28 January 2025. Archived from the original on 28 January 2026. Retrieved 28 January 2026.
↑ വിടപറഞ്ഞത് മഹാരാഷ്ട്ര രാഷ്ട്രീയത്തിലെ അതികായൻ എൻസിപിയുടെ ഭാവിയെന്ത്...??
↑ ദാദ ഒഴിഞ്ഞ കസേരയിൽ എൻസിപിയിൽ നിന്ന് ഇനിയാര്...???
↑ ഐക്യം ബാക്കിനിർത്തി അജിത് പവാർ മടങ്ങി
↑ അജിത് പവാർ ഇനി മഹാരാഷ്ട്ര രാഷ്ട്രീയത്തിലെ ദീപ്തമായ ഓർമകളിൽ

[1] എൻ.സി.പി പിളർന്നു, അജിത് പവാർ ഉപ-മുഖ്യമന്ത്രി

[2] ശിവസേനയ്ക്ക് പിന്നാലെ എൻ.സി.പിയും

[3] അജിത് പവാർ

[4] പവാർ തന്ത്രങ്ങളുടെ തലമുറമാറ്റം

[5] നിങ്ങൾക്ക് 83 വയസായിട്ടും നിർത്താറായില്ലേ...? ശരദ് പവാറിനോട് അജിത്

[6] Longest deputy CM of Maharashtra Politics

[7] മഹാരാഷ്ട്രയിൽ രണ്ടാം പവാർ പ്ലേ

[8] ഉപ-മുഖ്യമന്ത്രി അജിത് പവാറിന് ധനകാര്യ, പ്ലാനിംഗ് വകുപ്പിൻ്റെ ചുമതല

[9] സുനിൽ തത്കരെ എൻ.സി.പി അജിത് വിഭാഗത്തിൻ്റെ പുതിയ സംസ്ഥാന അധ്യക്ഷൻ

[10] അജിത് പവാർ വിഭാഗത്തിന് തിരഞ്ഞെടുപ്പ് കമ്മീഷന്റെ അംഗീകാരം

[11] ശരദ് പവാറിൻ്റെ പാർട്ടി ഇനി എൻ.സി.പി(ശരത്ചന്ദ്ര പവാർ വിഭാഗം)

[12] സേനാപതി ഷിൻഡേ പവർഫുൾ അജിത്

[13] ശരദ് അല്ല അജിത് പവർ

[14] "Ajit Pawar: Deputy chief minister of Maharashtra state dies in plane crash". www.bbc.com (in ബ്രിട്ടീഷ് ഇംഗ്ലീഷ്). 2026-01-28. Retrieved 2026-01-28.

[15] "Ajit Pawar's Flight Crash in Baramati dist Pune". CNN-News18. 28 January 2026. Retrieved 28 January 2026.

[16] "Ajit Pawar Passed Away: Maharashtra Deputy Chief Minister dies in plane crash near Baramati". Lokmat. 28 January 2026. Retrieved 28 January 2026.

[17] "Air charter crash in India's Maharashtra kills key state leader". Reuters. January 28, 2026. Retrieved January 28, 2026.

[18] "Ajit Anantrao Pawar (1959–2026): Former Maharashtra Deputy Chief Minister Passes Away". Telugu Vaadi TV (in ഇംഗ്ലീഷ്). 28 January 2025. Archived from the original on 28 January 2026. Retrieved 28 January 2026.

[19] വിടപറഞ്ഞത് മഹാരാഷ്ട്ര രാഷ്ട്രീയത്തിലെ അതികായൻ എൻസിപിയുടെ ഭാവിയെന്ത്...??

[20] ദാദ ഒഴിഞ്ഞ കസേരയിൽ എൻസിപിയിൽ നിന്ന് ഇനിയാര്...???

[21] ഐക്യം ബാക്കിനിർത്തി അജിത് പവാർ മടങ്ങി

[22] അജിത് പവാർ ഇനി മഹാരാഷ്ട്ര രാഷ്ട്രീയത്തിലെ ദീപ്തമായ ഓർമകളിൽ

[1]

[2]

[3]

[4]

[5]

[6]

[7]

[8]

[9]

[10]

[11]

[12]

[13]

[14]

[15]

[16]

[17]

[18]

[19]

[20]

[21]

[22]