ബുദ്ധപൂർണ്ണിമ
ദക്ഷിണേഷ്യൻ രാജ്യങ്ങളിലെ ബുദ്ധമതവിശ്വാസികൾ വർഷം തോറും ആഘോഷിക്കുന്ന ഒരു ഉൽസവമാണ് ബുദ്ധപൂർണ്ണിമ. ഇത് ഗൗതമബുദ്ധന്റെ ജന്മദിനം എന്ന പേരിലാണ് കൂടുതൽ അറിയപ്പെടുന്നതെങ്കിലും അദ്ദേഹത്തിന്റെ നിർവ്വാണപ്രാപ്തി, മരണം എന്നിവയുടെയും വാർഷികമായി ആചരിക്കുന്ന ഒരു ഉൽസവമാണ്. വൈശാഖമാസത്തിലെ പൗർണ്ണമി നാളിലാണ് ഈ ഉൽസവം കൊണ്ടാടുന്നത്. ശ്രീലങ്കയിലെ പ്രധാന ഉൽസവമായ ഇത് അവിടെ വേസക് എന്നറിയപ്പെടുന്നു. വിജയന്റെ നേതൃത്വത്തിലുള്ള ശ്രീലങ്കയിലെ സിംഹളസാമ്രാജ്യത്തിന്റെ സ്ഥാപനത്തേയും അനുസ്മരിപ്പിക്കുന്ന ആഘോഷവുമാണിത്[1].