ത്രിവിക്രമമംഗലം ക്ഷേത്രം
തിരുവനന്തപുരം ജില്ലയിലെ കരമനയാറ്റിന്റെ തീരത്ത് തമലത്താണ് ത്രിവിക്രമമംഗലം വാമനമൂർത്തിക്ഷേത്രം. കേരള പുരാവസ്തുവകുപ്പിന്റെ സംരക്ഷിത സ്മാരകങ്ങളുടെ പട്ടികയിൽപ്പെട്ടതാണ് ഈ ക്ഷേത്രം. ശില്പകലയ്ക്ക് പേരു കേട്ടതാണ് ഈ ക്ഷേത്രം. ശ്രീകോവിലിന്റെ താഴത്തെ ചുണ്ണാമ്പ് പ്ലാസ്റ്ററിട്ട ചുവരുകളിലുള്ള ചുവർച്ചിത്രങ്ങൾ ഏതാണ്ട് കേടായ നിലയിലാണ്. പുരാവസ്തു വകുപ്പ് 2005-ൽ വടക്കൻ മതിലിലെ ചില ചിത്രങ്ങൾ ശാസ്ത്രീയമായി സംരക്ഷിച്ചു.[1]
ചരിത്രം[തിരുത്തുക]
എണ്ണൂറോളം വർഷങ്ങൾക്ക് മുൻപ് ചോളരാജവംശത്തിലെ വിക്രമൻ എന്ന നാട്ടുരാജാവിനുവേണ്ടി വിഴിഞ്ഞത്തുള്ള പുട്ടൻ വിക്രമൻ വീരചെട്ടിയാർ ആണ് ഈ ക്ഷേതം പണിതത് എന്നതിന് രേഖകളുണ്ട്.[2] വിക്രമൻ വീരചെട്ടിയാരുടെ പേരിൽ നിന്നാണ് ത്രിവിക്രമമംഗലം എന്ന പേരുണ്ടായതെന്ന് ചരിത്രകാരന്മാർ സംശയിയ്ക്കുന്നു.
ഘടന[തിരുത്തുക]
മൂന്ന് നിലകളുള്ളതും ടൈലുകൾ കൊണ്ട് പൊതിഞ്ഞതുമാണ് ക്ഷേത്രത്തിൻറെ ശ്രീകോവിൽ. കരമന ആറ്റിന്റെ തീരത്തുനിന്നും ഏകദേശം 50 അടി ഉയരത്തിലാണ് ക്ഷേത്രം സ്ഥിതി ചെയ്യുന്നത്. ക്ഷേത്രത്തിന്റെ അടിത്തറ ഉദ്ദേശം 5 അടിയോളം കട്ടികരിങ്കലിൽ നിർമിച്ചിട്ടുള്ളതും മുൻഭാഗം ലാറ്ററൈറ്റ് കട്ടകൾ കൊണ്ട് നിർമിച്ചിട്ടുള്ളതുമാണ്. പുരാതനമായ നൃത്തവിന്യാസങ്ങൾ കല്ലിൽ കൊത്തിയ ശിൽപ്പങ്ങൾ ഈ ക്ഷേത്രത്തിലുണ്ട്. ചില നൃത്തരൂപങ്ങൾ ഭരതനാട്യ ശാസ്ത്രാനുസരണമുള്ള അർഥമദദളി സമ്പ്രദായതിലുള്ളതാണ്. കരിങ്കല്ലിൽ തീർത്ത രണ്ട് ദ്വാരപാലകന്മാരെ ഗർഭഗൃഹത്തിന്റെ ഇരുവശങ്ങളിലും കൊത്തിവച്ചിരിക്കുന്നു. ഈ ശിൽപങ്ങളുടെ നാസിക വികൃതമാക്കിയിട്ടുണ്ട്. ചവിട്ടുപടികളുടെ പാർശ്വങ്ങളിൽ കൊത്തുപണികളോട് കൂടിയുള്ള മുന്ന് ചിത്രഫലകങ്ങളുണ്ട്. ഇതിന്റെ പകർപ്പ് തിരുവനന്തപുരം ആർക്കിയോളജിക്കൽ മ്യൂസിയത്തിൽ സൂക്ഷിച്ചിട്ടുണ്ട്. 6 അടിയിൽ കൂടുതൽ ഉയരമുള്ള വാമനാവതാര വിഗ്രഹമാണ് ഇവിടുത്തെ പ്രധാനപ്രതിഷ്ഠ. കിഴക്കോട്ട് ദർശനമായി നിൽക്കുന്ന രൂപത്തിലുള്ള ഭഗവാനാണ്. ഉപദേവതകളായി ഗണപതി, ശിവൻ, ശാസ്താവ്, നാഗദൈവങ്ങൾ എന്നീ പ്രതിഷ്ഠകളുമുണ്ട്.
അവലംബം[തിരുത്തുക]
- ↑ "Thrivikramangalam Temple". ആർക്കിയോളജി വകുപ്പ് വെബ് സൈറ്റ്. October 5, 2020. Retrieved October 5, 2020.
- ↑ "Trivikramangalam Mahavishnu (Vamana Moorthi) Temple". ക്ഷേത്ര വെബ് സൈറ്റ്. October 5, 2020. Archived from the original on 2020-10-09. Retrieved October 5, 2020.