ടി. ദാമോദരൻ

വിക്കിപീഡിയ, ഒരു സ്വതന്ത്ര വിജ്ഞാനകോശം.
ടി. ദാമോദരൻ
ടി. ദാമോദരൻ.jpg
ജനനം 1935 സെപ്റ്റംബർ 15(1935-09-15)
കോഴിക്കോട്, കേരളം, ഇന്ത്യ
തൊഴിൽ തിരക്കഥാകൃത്ത്
സജീവം 1975 - 2012
ജീവിതപങ്കാളി(കൾ) പുഷ്പ
കുട്ടി(കൾ) ദീദി, വാവ, രശ്മി

മലയാള ചലച്ചിത്ര മേഖലയിലെ ഒരു തിരക്കഥാകൃത്താണ്‌ ടി. ദാമോദരൻ. (15 സെപ്തംബർ 1936 - 28 മാർച്ച് 2012[1])‌. മലയാള ചലച്ചിത്ര രംഗത്ത് നിരവധി വിജയചിത്രങ്ങൾക്ക് അദ്ദേഹം തിരക്കഥ എഴുതിയിട്ടുണ്ട്. സം‌വിധായകൻ ഐ.വി. ശശി സം‌വിധാനം ചെയ്ത് ടി. ദാമോദരൻ തിരക്കഥ എഴുതി പല ചിത്രങ്ങളും വിജയമായിരുന്നു. അദ്ദേഹം തിരക്കഥ എഴുതിയ ചില ചിത്രങ്ങളാണ്‌ അങ്ങാടി, ഈ നാട്, വാർത്ത, ആവനാഴി, ഇൻസ്പെക്ടർ ബൽ‌റാം, 1921, അടിമകൾ ഉടമകൾ, എന്നിവ. പ്രിയദർശൻ സം‌വിധാനം ചെയ്ത് ടി. ദാമോദരൻ തിരക്കഥയെഴുതിയ ആര്യൻ, അദ്വൈതം, അഭിമന്യു, കാലാപാനി എന്നിവയും മലയാള ചലച്ചിത്ര രംഗത്ത് ശ്രദ്ധേയമായ ചിത്രങ്ങളായിരുന്നു.

ആദ്യകാല ജീവിതം[തിരുത്തുക]

1936 സെപ്റ്റംബർ 15-ന് കോഴിക്കോട്ട് ബേപ്പൂരിൽ ജനിച്ചു. അച്ഛൻ ചോയിക്കുട്ടി; അമ്മ മാളു. മീഞ്ചന്ത എലിമെന്ററി സ്കൂൾ, ബേപ്പൂർ ഹൈസ്കൂൾ, ചാലപ്പുറം ഗണപത് സ്കൂൾ എന്നിവിടങ്ങളിലായിരുന്നു സ്കൂൾ വിദ്യാഭ്യാസം. തുടർന്ന് ഗുരുവായൂരപ്പൻ കോളജിൽ ഇന്റർമീഡിയറ്റിനു ചേർന്നെങ്കിലും അവിടെനിന്ന് പുറത്താക്കപ്പെട്ടു. ഫാറൂഖ് കോളജിലും പഠനം പൂർത്തിയാക്കാനായില്ല. അതിനാൽ ഫിസിക്കൽ എഡ്യൂക്കേഷൻ കോളജിൽ ചേർന്നു. കോഴ്സ് പാസ്സായതോടെ മാഹി അഴിയൂർ ഗവണ്മെന്റ് ഹൈസ്കൂളിൽ ഡ്രിൽ മാസ്റ്ററായി ജോലി ലഭിച്ചു. ഒരു വർഷം കഴിഞ്ഞ് ബേപ്പൂർ സ്കൂളിലെത്തി. അവിടെ 29 വർഷക്കാലം ഡ്രിൽ മാസ്റ്ററായി ജോലി ചെയ്തു.

വിദ്യാർഥിയായിരിക്കുമ്പോൾത്തന്നെ കായിക-കലാ മത്സരങ്ങളിൽ വ്യക്തിമുദ്ര പതിപ്പിച്ചിരുന്ന ഇദ്ദേഹം ചെറുപ്പത്തിലേ യുക്തി വാദ പ്രസ്ഥാനത്തിലെ സജീവ പ്രവർത്തകനുമായിരുന്നു. സ്കൂൾ മാസ്റ്റർ ആയിരിക്കെ നിരവധി നാടകങ്ങൾ എഴുതി. യുഗസന്ധിയാണ് ആദ്യ പ്രൊഫഷണൽ നാടകം. ഉടഞ്ഞ വിഗ്രഹങ്ങൾ, ആര്യൻ, അനാര്യൻ, നിഴൽ തുടങ്ങിയവ ഇദ്ദേഹമെഴുതിയ ജനപ്രിയ നാടകങ്ങളാണ്.

ചലച്ചിത്രരംഗത്ത്[തിരുത്തുക]

നിഴൽ എന്ന നാടകമാണ് ഇദ്ദേഹത്തിന് ചലച്ചിത്രരംഗത്തേക്കുള്ള വഴി തുറന്നുകൊടുത്തത്. സത്യൻ ആയിരുന്നു ആ നാടകത്തിന്റെ ഉദ്ഘാടകൻ. സത്യനും ബാസുരാജും ചേർന്ന് ഹരിഹരനെക്കൊണ്ട് ഈ നാടകം ചലച്ചിത്രമാക്കാൻ തീരുമാനിക്കുകയായിരുന്നു. അതു നടന്നില്ലെങ്കിലും ഒരു വർഷത്തിനകം ഹരിഹരന്റെ ലൌ മാര്യേജ് എന്ന ചിത്രത്തിന് ഇദ്ദേഹം തിരക്കഥയെഴുതി. തുടർന്ന് ഹരിഹരന്റെതന്നെ നിരവധി ജനപ്രിയ ചിത്രങ്ങൾക്ക് തിരക്കഥയെഴുതി. പ്രായോഗിക രാഷ്ട്രീയരംഗത്തെ അടിയൊഴുക്കുകളും അകംകഥകളും ഇതിവൃത്തമാക്കിയ ചടുലമായ ചലച്ചിത്രങ്ങളുടെ തിരക്കഥാകൃത്തായിരുന്നു ഇദ്ദേഹം - ഈനാട്, വാർത്ത, അങ്ങാടി, അടിമകൾ ഉടമകൾ തുടങ്ങിയവ ഉദാഹരണം. ആവനാഴി, ഇൻസ്പെക്ടർ ബൽറാം തുടങ്ങിയ പൊലീസ് ചിത്രങ്ങളും ഇദ്ദേഹം എഴുതിയതാണ്. പ്രിയദർശൻ സംവിധാനം ചെയ്ത കിളിച്ചുണ്ടൻ മാമ്പഴം, രഞ്ജിത് സംവിധാനം ചെയ്ത പാലേരി മാണിക്യം തുടങ്ങിയ ചിത്രങ്ങളിൽ അദ്ദേഹം ശ്രദ്ധേയമായ കഥാപാത്രങ്ങളെ അവതരിപ്പിച്ചിട്ടുണ്ട്.

ചരിത്ര പശ്ചാത്തലമുള്ള 1921 എന്ന ചലച്ചിത്രത്തിന് ഇദ്ദേഹം എഴുതിയ തിരക്കഥ ശ്രദ്ധേയമാണ്. ചലച്ചിത്ര തിരക്കഥാകൃത്ത് ദീദി ദാമോദരൻ മകളാണ്‌.

തിരക്കഥകൾ[തിരുത്തുക]

നമ്പർ വർഷം സിനിമ
1 1975 ലവ് മാര്യേജ്
2 1979 ഏഴാം കടലിനക്കരെ
3 1980 അങ്ങാടി
4 1980 മീൻ
5 1980 കരിമ്പന
6 1980 കാന്തവലയം
7 1981 അഹിംസ
8 1981 തടാകം
9 1981 തുഷാരം

അവലംബം[തിരുത്തുക]

  1. തിരക്കഥാകൃത്ത് ടി ദാമോദരൻ അന്തരിച്ചു - മാതൃഭൂമി
"http://ml.wikipedia.org/w/index.php?title=ടി._ദാമോദരൻ&oldid=1789462" എന്ന താളിൽനിന്നു ശേഖരിച്ചത്