കറുപ്പൻ തേൻകിളി

വിക്കിപീഡിയ, ഒരു സ്വതന്ത്ര വിജ്ഞാനകോശം.
കറുപ്പൻ തേൻകിളി
Purple Sunbird
Purple Sunbird (Nectarinia asiatica)- Male (Breeding) on Kapok (Ceiba pentandra) in Kolkata I IMG 1893.jpg
ആൺ കറുപ്പൻതേൻകിളി (കൊൽക്കത്ത, ഇന്ത്യ)
Purple Sunbird (Female) I IMG 6029.jpg
പെൺകിളി
പരിപാലന സ്ഥിതി
ശാസ്ത്രീയ വർഗ്ഗീകരണം
സാമ്രാജ്യം: Animalia
ഫൈലം: Chordata
ക്ലാസ്സ്‌: Aves
നിര: Passeriformes
കുടുംബം: Nectariniidae
ജനുസ്സ്: Cinnyris
വർഗ്ഗം: C. asiaticus
ശാസ്ത്രീയ നാമം
Cinnyris asiaticus
Latham, 1790
പര്യായങ്ങൾ

Arachnechthra intermedia
Nectarinia mahrattensis

നീണ്ടു കൂർത്തതും തീരെ വണ്ണമില്ലാത്തതും ഏറെക്കുറെ വളഞ്ഞതുമായ കൊക്കുകളുള്ള ഈ ചെറു പക്ഷിയെ നാട്ടുമ്പുറത്തും പട്ടണങ്ങളിലും ധാരാളം കാണാം. പൂക്കൾ ഉള്ള ചെടികളും മരങ്ങളും വേണമെന്നേ ഉള്ളൂ.

വിവരണം[തിരുത്തുക]

പൂവന്മാർക്ക് കമനീയമായ വർണ്ണശോഭയുണ്ടായിരിക്കും. പിടപക്ഷികൾ മങ്ങിയ നിറത്തിലായിരിക്കും. പൂവൻ സന്താനോത്പ്പാദനകാലത്ത് ആകെ തിളങ്ങുന്ന കറുപ്പാണ്. മറ്റു കാലങ്ങളിൽ നെറ്റി മുതൽ വാലുവരെ മങ്ങിയ കറുപ്പും അടിഭാഗങ്ങൾ മുഷിഞ്ഞ വെള്ളയുമായിരിക്കും. ഇക്കാലത്ത് പൂവന് താടിയിൽ നിന്ന് ഉദരം വരെ നീണ്ടുപോകുന്ന ഒരു കറുത്ത പട്ടയുണ്ടായിരിക്കും. പിടയ്ക്കു ഏതു കാലത്തും ഉപരിഭാഗമെല്ലാം പച്ചഛായയുള്ള ഇരുണ്ട തവിട്ടു നിറവും അടിഭാഗമെല്ലാം നേരിയ മഞ്ഞയുമാണ്.

ആഹാരം[തിരുത്തുക]

മറ്റു തേൻകിളികളെ പോലെ തന്നെ ആണ് കറുപ്പൻതേൻകിളികളുടെയും ആഹാരരീതി. നീണ്ട കൊക്കും അതിലും നീളമുള്ള നാക്കുമുള്ള കറുപ്പൻതേൻകിളികളുടെ പ്രധാന ആഹാരം പൂന്തേനാണ്‌. എങ്കിലും മറ്റു തേൻകിളികളെ പോലെ ചെറിയ പാറ്റകളെയും പുഴുക്കളെയും മറ്റും പതിവായി തിന്നാറുണ്ട്. മിക്ക ജാതിക്കാർക്കും എട്ടുക്കാലി അമൃതതുല്ല്യമാണ്.

പ്രജനനം[തിരുത്തുക]

മറ്റു തേൻകിളികളെ പോലെ തന്നെ കറുപ്പൻ തേൻകിളികളുടെയും പ്രജനനകാലം ജനുവരിയ്ക്കും ഒക്ടോബറിനും ഇടയ്ക്കാണ്. ഇക്കാലത്ത് കറുപ്പൻ തേൻകിളി ചില ശ്രിംഗാര ചേഷ്ടകളും പ്രകടിപ്പിക്കാറുണ്ട്. പ്രത്യേകിച്ച് മറ്റു പൂവന്മാരുമായി മത്സരിക്കുന്ന സമയത്ത് ഈ ജാതിക്കാർ അവരുടെ പക്ഷമൂലങ്ങളിൽ ഉള്ള മഞ്ഞതൂവൽ കൂട്ടങ്ങളെ പ്രദർശിപ്പിക്കും. പൂവന്മാർ അനോന്യം തുരത്തുകയും തമ്മിൽ കൊത്തുകയും ചെയ്യും. എല്ലാ തേൻകിളികളുടെയും കൂടുകൾ ഏറെക്കുറെ ഒരുപോലിരിക്കും. നാരുകളും വേരുകളും മാറാല കൊണ്ട് ബന്ധിച്ചു പുറത്തു കരിയിലക്കഷ്ണങ്ങളും എട്ടുകാലികളുടെ മുട്ടസഞ്ചികളും ചിലതരം പുഴുക്കളുടെ കാഷ്ടവും മറ്റും പിടിപ്പിച്ചാണ്‌ കൂടുണ്ടാക്കുക. അതിന്നുള്ളിൽ മുട്ടകൾക്കും കുഞ്ഞുങ്ങൾക്കും കിടക്കുവാൻ പഞ്ഞിയും അപ്പൂപ്പൻതാടിയും കൊണ്ട് ഒരു മെത്തയും പണിയും. വല്ല ചെടിയുടെയും ശാഖാഗ്രത്തിൽ ആയിരിക്കും കൂടുതൂക്കിയിടുക. പല കൂടുകളും തറയിൽ നിന്ന് നാലഞ്ചടി പൊക്കത്തിൽ ആയിരിക്കും കാണപ്പെടുക. പക്ഷെ കരിയിലകഷ്ണങ്ങളും മറ്റും കൊണ്ട് പൊതിഞ്ഞ കൂട് കണ്ടാൽ അത് ഒരുക്കൂട്ടം ഉണക്കിലകൾ ആണെന്നെ തോന്നു. അടുത്ത് ചെന്ന് നോക്കിയാൽ ഒരു വശത്ത് മുകളിലായി ചെറിയ ഒരു പ്രവേശനദ്വാരം കാണാം. ഈ ദ്വാരത്തിനു മുകളിലായി ചെറിയൊരു 'പടിപ്പുര' യും മിക്ക കൂടുകൾക്കും ഉണ്ടായിരിക്കും. തേൻകിളികൾക്കിടയിൽ കൂടുകെട്ടുന്നതും മുട്ടകൾക്ക് മീതെ അടയിരിക്കുന്നതും പിടപ്പക്ഷികളുടെ കുത്തകയാണ്. മുട്ടകൾ വിരിഞ്ഞു കഴിഞ്ഞാൽ പൂവന്മാർ കുഞ്ഞുങ്ങളെ തീററുന്നതിനു സഹായിക്കും.

പ്രത്യേകത[തിരുത്തുക]

പല സസ്യങ്ങളുടെയും പരാഗവിതരണത്തിൽ മറ്റു തേൻകിളികളെ പോലെ തന്നെ കറുപ്പൻ തേൻകിളികൾക്കും ഗണ്യമായ പങ്കുണ്ട്. മാത്രമല്ല സസ്യശത്രുക്കൾ ആയ പലതരം കൃമികളെയും പുഴുക്കളെയും പിടിച്ചു തിന്നും ഈ പക്ഷികൾ നമുക്ക് വളരെ ഉപകാരം ചെയ്യുന്നു.


അവലംബം[തിരുത്തുക]

  1. BirdLife International (2008). "Nectarinia asiatica". IUCN - വംശനാശ ഭീഷണി നേരിടുന്ന ജീവികളുടെ റെഡ് ലിസ്റ്റ്. വെർഷൻ 2008. ഇന്റർനാഷണൽ യൂണിയൻ ഫോർ ദ കൺസർവേഷൻ ഓഫ് നേച്ചർ ആൻഡ് നാച്ചുറൽ റിസോഴ്‌സ്. ശേഖരിച്ചത് 22 July 2009. 

കേരളത്തിലെ പക്ഷികൾ, ഇന്ദുചൂഡൻ


"http://ml.wikipedia.org/w/index.php?title=കറുപ്പൻ_തേൻകിളി&oldid=1694235" എന്ന താളിൽനിന്നു ശേഖരിച്ചത്