ഫിലിം സൊസൈറ്റി
വിക്കിപീഡിയ, ഒരു സ്വതന്ത്ര വിജ്ഞാനകോശം.
ചലച്ചിത്രപ്രേമികളുടെ കൂട്ടായ്മ. കലാമൂല്യമുള്ള ചലച്ചിത്രങ്ങള് കാണാനും ചര്ച്ചചെയ്യുവാനുമുള്ള വേദി. ലോകമെമ്പാടും ഇത്തരം സംഘങ്ങള് നിലവിലുണ്ട്.
[തിരുത്തുക] ഫിലിം സൊസൈറ്റികള് ഇന്ത്യയില്
ഇന്ത്യന് ഫിലിം സൊസൈറ്റി പ്രസ്ഥാനത്തിന്റെ തുടക്കം മുംബൈയിലെ ഒരു സംഘം ചലച്ചിത്രപ്രേമികളുടെ പ്രവര്ത്തനത്തിലൂടെ ആയിരുന്നു. ഇല്ലസ്ട്രേറ്റഡ് വീക്ലിയുടെ പത്രാധിപരായിരുന്ന സ്റ്റാന്ലി ജാപ്സണിന്റെ നേതൃത്വത്തില് ആദ്യത്തെ ഫിലിം സൊസൈറ്റി ആരംഭിക്കുന്നത് 1937-ലാണ്. സ്വന്തമായി സിനിമ നിര്മ്മിക്കുകയായിരുന്നു അവരുടെ ലക്ഷ്യം. 1942-ല് ഡോക്യുമെന്ററി സിനിമാതല്പരരും മുംബൈയില് ഫിലിം സൊസൈറ്റി ആരംഭിച്ചു. ചലച്ചിച്ചിത്രനിര്മ്മാണസംരംഭത്തിലായിരുന്നു ആദ്യത്തെ രണ്ടു സൊസൈറ്റികള്ക്കും താല്പര്യം.
കൃത്യമായ സാങ്കേതികാര്ത്ഥത്തില് ഇന്ത്യയിലെ ആദ്യത്തെ ഫിലിം സൊസൈറ്റി 1947-ല് സത്യജിത് റേ സുഹൃത്തുക്കളോടൊത്ത് സംഘടിപ്പിച്ച കല്ക്കത്താ ഫിലിം സൊസൈറ്റിയാണ്. ഒരു കലാരൂപം എന്ന നിലയില് സിനിമയില് തല്പരരായ ഒരു സംഘം ചലച്ചിത്രങ്ങള് കാണാനും പഠിക്കാനും അതേക്കുറിച്ച് സംവദിക്കുവാനുമാണ് ഈ സംഘടന രൂപീകരിച്ചത്. റായ്യോടൊപ്പം നൊമായ് ഘോഷ്, ചിദാനന്ദ ദാസ്ഗുപ്ത എന്നിങ്ങനെ പില്ക്കാലത്ത് ഇന്ത്യന് ചലച്ചിത്രലോകത്തെ പ്രാമാണികരായിത്തീര്ന്നവരായിരുന്നു ഉണ്ടായിരുന്നത്. ഒരു ഫിലിം സൊസൈറ്റിയില് ചേരൂ,നാം ജീവിക്കുന്ന ലോകം കാണൂ എന്നതായിരുന്നു കല്ക്കത്ത ഫിലിം സൊസൈറ്റിയുടെ മുദ്രാവാക്യം.
കല്ക്കത്ത ഫിലിം സൊസൈറ്റിയെ തുടര്ന്ന് ഇന്ത്യയിലെ പല വന് നഗരങ്ങളിലും പല ഘട്ടങ്ങളിലായി ഫിലിം സൊസൈറ്റികള് സംഘടിപ്പിക്കപ്പെട്ടു. ഇത്തരം സൊസൈറ്റികളുടെ പ്രവര്ത്തനം ഏകോപിപ്പിക്കുവാന് ന്യൂ ദല്ഹി ആസ്ഥാനമായി ഫെഡറേഷന് ഓഫ് ഫിലിം സൊസൈറ്റീസും സംഘടിപ്പിക്കപ്പെട്ടു.
[തിരുത്തുക] ഫിലിം സൊസൈറ്റികള് കേരളത്തില്
പൂനെ ഫിലിം ഇന്സ്റ്റിറ്റ്യൂട്ടില് ചലച്ചിത്രപഠനം പൂര്ത്തിയാക്കിയ അടൂര് ഗോപാലകൃഷ്ണന്, കുളത്തൂര് ഭാസ്കരന് നായര് എന്നിവരുടെ നേതൃത്വത്തില് 1965-ല് രൂപീകരിക്കപ്പെട്ട തിരുവന്തപുരത്തെ ചിത്രലേഖയാണ് കേരളത്തിലെ ആദ്യത്തെ ഫിലിം സൊസൈറ്റി.
കോഴിക്കോട്ടെ അശ്വിനി ഫിലിം സൊസൈറ്റി, കാസറഗോട് പ്രവര്ത്തന്ച്ചിരുന്ന കാസറഗോഡ് ഫിലിം സൊസൈറ്റി, തൃശ്ശൂര് മാസ്സ് ഫിലിം സൊസൈറ്റി, കോഴിക്കോട് ജില്ലയിലെ ചോമ്പാല ദൃശ്യ ഫിലിം സൊസൈറ്റി,മലപ്പുറത്തെ രശ്മി ഫിലിം സൊസൈറ്റി എന്നിവ ആദ്യകാല ഫിലിം സൊസൈറ്റികളില് ശ്രദ്ധേയമായവയാണ്. അടിയന്തരാവസ്ഥയ്ക്കു തൊട്ട് പിന്നാലെയുണ്ടായാ സാംസ്കാരിക-രാഷ്ട്രീയപ്രതിരോധത്തിന്റെ അന്തരീക്ഷം ഫിലിം സൊസൈറ്റികള്ക്ക് വളക്കൂറുള്ള മണ്ണൊരുക്കി. മിക്കവാറും എല്ലാ കേരളീയഗ്രാമങ്ങളിലും ഫിലിം സൊസൈറ്റികളുടെ പ്രവര്ത്തനം വ്യാപിച്ച കാലഘട്ടം ഇതാണ്.
[തിരുത്തുക] ഫിലിം സൊസൈറ്റികള് ഇന്ന്
- ചേതന ഫിലിം സൊസൈറ്റി,തൃശ്ശൂര്.
- രശ്മി ഫിലിം സൊസൈറ്റി,മലപ്പുറം.
- ചേതന ഫിലിം സൊസൈറ്റി,മയ്യില്,കണ്ണൂര്.
 |
ഈ ലേഖനം അപൂര്ണ്ണമാണ്. ഇതു പൂര്ത്തിയാക്കുവാന് സഹകരിക്കുക. |
