എൻ. രംഗസ്വാമി

വിക്കിപീഡിയ, ഒരു സ്വതന്ത്ര വിജ്ഞാനകോശം.

ഇന്ത്യയിലെ കേന്ദ്രഭരണപ്രദേശങ്ങളിലൊന്നായ പുതുച്ചേരിയുടെ ഇപ്പോഴത്തെ മുഖ്യമന്ത്രിയും ഓൾ ഇന്ത്യ എൻ.ആർ കോൺഗ്രസ് എന്ന രാഷ്ട്രീയകക്ഷിയുടെ അധ്യക്ഷനുമാണ് എൻ. രംഗസ്വാമി (ജനനം:1950 ഓഗസ്റ്റ് 4). ഇതിനു മുൻപും രണ്ടു പ്രാവശ്യം ഇദ്ദേഹം മുഖ്യമന്ത്രി സ്ഥാനം വഹിച്ചിരുന്നു.

രാഷ്ട്രീയ ജീവിതം[തിരുത്തുക]

കോൺഗ്രസ് പാർട്ടി പ്രവർത്തകനായി രാഷ്ട്രീയ ജീവിതം ആരംഭിച്ച എൻ. രംഗസ്വാമി പെട്ടെന്ന് തന്നെ പാർട്ടിയുടെ നേതൃനിരയിലേക്കുയർന്നു. 1991 മുതൽ 2000 വരെയുള്ള കാലഘട്ടത്തിൽ അദ്ദേഹം കൃഷിവകുപ്പ്, പൊതുമരാമത്ത് വകുപ്പ് തുടങ്ങിയ പ്രധാന വകുപ്പുകളുടെ മന്ത്രിയായിരുന്നു.[1] 2001-ലെ നിയമസഭാ തെരഞ്ഞെടുപ്പിന് ശേഷം പാർട്ടി എൻ. രംഗസ്വാമിയെ മുഖ്യമന്ത്രിയായി തെരഞ്ഞെടുത്തു. 2006-ലെ തെരഞ്ഞെടുപ്പിൽ വീണ്ടും കോൺഗ്രസ് നേതൃത്വത്തിലുള്ള ജനാധിപത്യ പുരോഗമന സഖ്യത്തെ വിജയത്തിലേക്ക് നയിക്കുവാൻ സാധിച്ച രംഗസ്വാമിക്ക് മുഖ്യമന്ത്രി സ്ഥാനത്ത് തുടരാനായി.

മുഖ്യമന്ത്രി എന്ന നിലയിൽ പ്രദേശത്തിന്റെ സമഗ്ര വികസനത്തിന് ശ്രദ്ധ നൽകിയ രംഗസ്വാമിക്ക് തന്റെ ഭരണകാലത്ത് പുതുച്ചേരിയെ ഏറ്റവും മികച്ച ചെറിയ സംസ്ഥാനങ്ങളിലൊന്നാക്കുവാൻ കഴിഞ്ഞു.[2] ധാരാളം സർക്കാർ സ്കൂളുകൾ സ്ഥാപിക്കുവാനും അതു വഴി വിദ്യാഭ്യാസം സുഗമവും സൗജന്യവുമാക്കുവാൻ അദ്ദേഹത്തിന് കഴിഞ്ഞു. മുതിർന്ന പൗരന്മാർക്കുള്ള പെൻഷൻ ,പൊതു വിതരണ സമ്പ്രദായത്തിലൂടെ പ്രായമായ പ്രമേഹരോഗികൾക്കുള്ള ഗോതമ്പ് വിതരണം, സ്കൂളുകളിലെ സൗജന്യ ഉച്ചഭക്ഷണ പദ്ധതി മുതലായവ അദ്ദേഹത്തിന്റെ നടപടികൾ അദ്ദേഹത്തിന്റെ ജനകീയ അടിത്തറ ശക്തമാക്കി. ഇതിനു പുറമേ അദ്ദേഹത്തിന്റെ ലളിത ജീവിത ശൈലി പുതുച്ചേരിക്ക് പുറത്തു പോലും രംഗസ്വാമിയുടെ മതിപ്പ് വർദ്ധിപ്പിച്ചു.

എന്നാൽ 2008 ആയപ്പോഴേക്കും അദ്ദേഹത്തിനെതിരായി കലാപശബ്ദമുയർന്നു. രംഗസ്വാമിക്കെതിരെ എതിർപ്പുകളുമായി എത്തിയത് അദ്ദേഹത്തിന്റെ തന്നെ മന്ത്രിസഭയിലെ സഹപ്രവർത്തകരായിരുന്നു.[3] കൂട്ടായ തീരുമാനമില്ലാതെ ഏകപക്ഷീയ നിലപാടുകളാണ് അദ്ദേഹം എടുക്കുന്നതെന്നും സർക്കാർ ഉദ്യോഗങ്ങളുടെ കാര്യത്തിൽ സ്വജന പക്ഷപാതം കാട്ടുന്നുവെന്നും അവർ ആരോപിച്ചു. ഒപ്പം പ്രദേശത്തിന്റെ മുഴുവനായുള്ള വികസനത്തിന് പകരം സ്വന്തം മണ്ഡലത്തിലെ വികസന പരിപാടികളിലാണ് അദ്ദേഹം ശ്രദ്ധ നൽകുന്നത് എന്ന വാദവും അദ്ദേഹത്തിന്റെ എതിരാളികൾ മുന്നോട്ടു വെച്ചു. ആരോപണങ്ങളും എതിർപ്പുകളും ശക്തമായതോടെ കോൺഗ്രസ് കേന്ദ്രനേതൃത്വം രംഗസ്വാമിയോട് സ്ഥാനം രാജി വെക്കുവാനാവശ്യപ്പെട്ടു. ഇതേ തുടർന്ന് 2008 ഓഗസ്റ്റ് 28-ന് രാജി വെക്കുകയും 2008 സെപ്റ്റംബർ 4-ന് വി.വൈത്തിലിംഗം മുഖ്യമന്ത്രി സ്ഥാനം ഏറ്റെടുക്കുകയും ചെയ്തു.

ഇതിനു ശേഷം കുറെക്കാലം രാഷ്ട്രീയത്തിൽ സജീവമായി ഇടപെടാതിരുന്ന രംഗസ്വാമി ഔദ്യോഗിക ചടങ്ങുകളിൽ നിന്നും ഒഴിഞ്ഞു നിൽക്കുന്ന സമീപനമാണ് സ്വീകരിച്ചിരുന്നത്.

2011 ജനുവരിയിൽ കോൺഗ്രസ് അംഗത്വവും നിയമസഭാ അംഗത്വവും രാജിവെച്ച അദ്ദേഹം 2011 ഫെബ്രുവരിയിൽ ഓൾ ഇന്ത്യ എൻ.ആർ കോൺഗ്രസ് എന്ന പാർട്ടി രൂപീകരിച്ചു. തുടർന്ന് മറ്റ് ഏഴ് എം.എൽ.എ-മാർ കൂടി നിയമസഭാഗത്വം രാജിവെച്ച് പുതിയ പാർട്ടിയിൽ ചേർന്നു.

2011 ഏപ്രിലിൽ നടന്ന നിയമസഭാ തെരഞ്ഞെടുപ്പിൽ ഭരണം നടത്തിക്കൊണ്ടിരുന്ന കോൺഗ്രസ് സർക്കാരിനെതിരേ പ്രകടമായ ഭരണവിരുദ്ധ വികാരം ഇല്ലാതിരുന്നിട്ട് [4] കൂടി എൻ.ആർ കോൺഗ്രസ്-ഉം സഖ്യകക്ഷിയായ അണ്ണാ ഡി.എം.കെ-യും ചേർന്ന് ആകെയുള്ള മുപ്പത് മണ്ഡലങ്ങളിൽ ഇരുപതും നേടി സർക്കാർ രൂപീകരിക്കാനാവശ്യമുള്ളതിലേറെ ഭൂരിപക്ഷം നേടി.

അവലംബം[തിരുത്തുക]

  1. N Rangaswamy, 2011 State Elections, Zee News Website
  2. India's best & worst states, India Today Website, 2007 September 18
  3. Rangasamy takes sweet revenge on Congress, Today of India Website, 2011 May 15
  4. പുതുച്ചേരി:രംഗസ്വാമിയോ കോൺഗ്രസോ, മലയാള മനോരമ, 2011 മേയ് 13
"http://ml.wikipedia.org/w/index.php?title=എൻ._രംഗസ്വാമി&oldid=1686685" എന്ന താളിൽനിന്നു ശേഖരിച്ചത്