എന്റെ...

എൻറെ...
സംവിധാനം	രാജേഷ് ടച്ച് റിവർ
നിർമ്മാണം	എം.എസ്. രാജേഷ്
തിരക്കഥ	രാജേഷ് ടച്ച് റിവർ
അഭിനേതാക്കൾ	സിദ്ദിഖ് അഞ്ജലി പാട്ടീൽ നീനാ കുറുപ്പ് സുനിൽ കുടവട്ടൂർ വാറൻ ജോസഫ് ലക്ഷ്മി മേനോൻ അനൂപ് അരവിന്ദൻ
സംഗീതം	ശരത്
ഛായാഗ്രഹണം	രാമതുളസി
രാജ്യം	ഇന്ത്യ
ഭാഷ	മലയാളം

[[രാജേഷ് ടച്ച്റിവർ] കഥയും തിരക്കഥയുമെഴുതി സംവിധാനം ചെയ്ത് 2012 ജൂണിൽ പുറത്തിറങ്ങാനിരിക്കുന്ന മലയാള ചിത്രമാണ് എന്റെ... ഇതോടൊപ്പം ചിത്രീകരിച്ച തെലുങ്ക് പതിപ്പ് പ്രത്യയം എന്ന പേരിൽ തീയേറ്ററുകളിലെത്തും. സിദ്ദിഖും അഞ്ജലി പാട്ടീലുമാണ് പ്രധാന വേഷങ്ങളിൽ അഭിനയിക്കുന്നത്. നിരവധി ഡോക്യുമെന്ററികളും ഇംഗ്ലീഷ്, തെലുങ്ക് ഭാഷകളിൽ ഫീച്ചർ ഫിലിമുകളും സംവിധാനം ചെയ്തിട്ടുള്ള രാജേഷ് ടച്ച്‌റിവർ മലയാളത്തിൽ അരങ്ങേറ്റം കുറിക്കുന്ന ഈ ചിത്രത്തിലൂടെ സിദ്ദിഖ് ആദ്യമായി തെലുങ്കിൽ നായകവേഷം ചെയ്യുകയാണ്. ഹൃദ്യമായ ഒരു കുടുംബകഥ അവതരിപ്പിക്കുന്നതിനൊപ്പം മനുഷ്യക്കടത്ത്, പെൺകുട്ടികൾക്കെതിരെ വർധിച്ചുവരുന്ന പീഡനങ്ങൾ എന്നിവയുമായി ബന്ധപ്പെട്ട വസ്തുതകളും എന്റെ... പ്രേക്ഷകർക്കുമുന്നിലെത്തിക്കുന്നു. സൺടച്ച് പ്രൊഡക്ഷൻസിന്റെ ബാനറിൽ എം.എസ്. രാജേഷാണ് ചിത്രം നിർമിക്കുന്നത്.

കഥാസംഗ്രഹം

സ്‌നേഹമയനായ ഗൃഹനാഥനും നാട്ടുകാർക്ക് സഹായിയുമാണ് ശ്രീനിവാസൻ. ഹൈദരാബാദിൽ ജോലി ചെയ്യുന്ന അയാൾ ഭാര്യ ഭദ്രയെയും ഏകമകൾ ദുർഗ്ഗയെയും കാണാൻ ഇടയ്ക്കിടെ കേരളത്തിലെ സ്വന്തം ഗ്രാമത്തിലെത്തും. പ്ലസ് ടൂവിന് ഉജ്വല വിജയം നേടിയ ദുർഗ്ഗ അച്ഛനൊപ്പം താമസിച്ച് പഠിക്കാൻ ഹൈദരാബാദിലേക്ക് പോകുന്നു. തുടർന്നുണ്ടാകുന്ന സംഭവവികാസങ്ങൾ കുടുംബത്തെ വലിയൊരു ദുരന്തത്തിലേക്ക് നയിക്കുന്നു.

രാജേഷിൻറെ ഭാര്യയും ദക്ഷിണേന്ത്യയിലെ പ്രമുഖ മനുഷ്യാവകാശ പ്രസ്ഥാനമായ പ്രജ്വലയുടെ സാരഥിയുമായ സുനിത കൃഷ്ണന്റെ അനുഭവങ്ങളെ ആധാരമാക്കിയാണ് കഥ തയാറാക്കിയിരിക്കുന്നതെന്ന് ചിത്രത്തിന്റെ അണിയറക്കാർ പറയുന്നു.

അഭിനേതാക്കളും കഥാപാത്രങ്ങളും

• സിദ്ദിഖ് - ശ്രീനവാസൻ
• അഞ്ജലി പാട്ടീൽ - ദുർഗ്ഗ
• നീന കുറുപ്പ് - ഭദ്ര
• ലക്ഷ്മി മേനോൻ - പത്മ
• രത്‌നശേഖർ റെഡ്ഡി - വിജയ്
• സുനിൽ കുടവട്ടൂർ -ഡ്രൈവർ
• അനൂപ് അരവിന്ദൻ - റെഡ്ഡി
• വാറൻ ജോസഫ് -മുരുകൻ

ഗാനങ്ങൾ

മുരുകൻ കാട്ടാക്കട രചിച്ച ഗാനങ്ങൾക്ക് ഈണം നൽകിയിരിക്കുന്നത് ശരത്തും ശന്തനു മൊയിത്രയുമാണ്.

ചിത്രീകരണം

2011 നവംബർ മുതൽ 2012 ജനുവരി വരെ ഹൈദരാബാദ്, രാജമുൻട്രി, ബാംഗ്ലൂർ തുടങ്ങിയ കേന്ദ്രങ്ങളിലാണ് എന്റെ.. ചിത്രീകരിച്ചത്.