യു.എസ്‌.എ.

അമേരിക്കന്‍ ഐക്യനാടുകള്‍

ദേശീയ പതാക ദേശീയ ചിഹ്നം ദേശീയ പതാക ദേശീയ ചിഹ്നം
ആപ്തവാക്യം: In God We Trust
ദേശീയ ഗാനം: The Star-Spangled Banner
തലസ്ഥാനം	വാഷിംഗ്‌ടണ്‍ ഡി.സി.
രാഷ്ട്രഭാഷ	{{{ഭാഷകൾ}}}
ഗവൺമന്റ്‌ {{{പ്രധാന പദവികൾ}}}	പ്രസിഡന്‍ഷ്യല്‍ ജനാധിപത്യം‌ {{{നേതാക്കന്മാർ}}}
രൂപീകരണം	ജൂലൈ 4, 1776
വിസ്തീർണ്ണം	{{{വിസ്തീർണ്ണം}}}ചതുരശ്ര കിലോമീറ്റർ
ജനസംഖ്യ  • ജനസാന്ദ്രത	281,421,906(2000) 32/ച.കി.മീ
നാണയം	ഡോളര്‍ (USD)
ആഭ്യന്തര ഉത്പാദനം	{{{GDP}}} ({{{GDP Rank}}})
പ്രതിശീർഷ വരുമാനം	{{{PCI}}} ({{{PCI Rank}}})
സമയ മേഖല	UTC (-)5-(-)10
ഇന്റർനെറ്റ്‌ സൂചിക	{{{ഇന്റർനെറ്റ്‌ സൂചിക}}}
ടെലിഫോൺ കോഡ്‌	+{{{ടെലിഫോൺ കോഡ്‌}}}

അമേരിക്കന്‍ ഐക്യനാടുകള്‍ അഥവാ യുണൈറ്റഡ്‌ സ്റ്റേറ്റ്‌സ്‌ ഓഫ്‌ അമേരിക്ക വടക്കേ അമേരിക്കന്‍ ഭൂഖണ്ഡത്തിലുളള 50 സംസ്ഥാനങ്ങള്‍ ചേര്‍ന്നുള്ള ഫെഡറല്‍ റിപബ്ലിക്ക്‌ ആണ്‌. യു.എസ്‌.എ., യു.എസ്‌., അമേരിക്ക എന്നിങ്ങനെയും അറിയപ്പെടുന്നു. കാനഡ, മെക്സിക്കോ എന്നിവയാണ്‌ അമേരിക്കയുടെ അയല്‍ രാജ്യങ്ങള്‍. റഷ്യ, ബഹാമസ്‌ എന്നീ രാജ്യങ്ങളുമായി സമുദ്രാതിര്‍ത്തിയുമുണ്ട്‌. അലാസ്ക, ഹവായി എന്നിവയൊഴികെ 48 സംസ്ഥാനങ്ങളും മെക്സിക്കോയ്ക്കും കാനഡയ്ക്കുമിടയിലുള്ള ഭൂപ്രദേശത്ത്‌ വ്യാപിച്ചു കിടക്കുന്നു. വലിപ്പത്തിന്റെ അടിസ്ഥാനത്തില്‍ ലോകത്തിലെ മൂന്നാമത്തെ രാജ്യമാണിത്‌. സാമ്പത്തികമായും രാഷ്ടീയമായും ലോകത്തിലെ ഏറ്റവും ശക്തമായ രാഷ്ട്രമാണ്‌ അമേരിക്കന്‍ ഐക്യനാടുകള്‍.

ചരിത്രം

പുരാതന കാലം

കുടിയേറ്റങ്ങളുടെ ചരിത്ര ഭൂമിയാണ്‌ അമേരിക്ക. പതിനായിരം മുതല്‍ നാല്‍പതിനായിരം വര്‍ഷങ്ങള്‍ക്കു മുന്‍പ്‌ തുടങ്ങിയതാണ്‌ ഈ കുടിയേറ്റ ചരിത്രം. ഏഷ്യയില്‍ നിന്നുള്ള മംഗോളി വംശജരാണ്‌ അമേരിക്കയിലേക്ക്‌ ആദ്യമെത്തിയത്‌ എന്നു കരുതപ്പെടുന്നു. ഇവര്‍ ക്രമേണ ഈ ഭൂഖണ്ഡത്തിന്റെ സ്വാഭാവിക ജനതയായി മാറി. ജനസംഖ്യയില്‍ മൂന്നുകോടിയോളമുണ്ടായിരുന്ന ഇവര്‍ക്ക് നിയതമായ സംസ്കാരവും ജീവിത രീതികളുമുണ്ടായിരുന്നതായി ആധുനിക കാലത്ത് നടത്തിയ ഗവേഷണങ്ങള്‍ സൂചിപ്പിക്കുന്നു. ഭൂലോകത്തിന്റെ മറ്റു ഭാഗങ്ങളില്‍ നിന്നും മറഞ്ഞ് സ്വൈര്യമായി കഴിഞ്ഞിരുന്ന സ്വാഭാവിക ജനതയുടെ ചരിത്രം അവസാനിക്കുന്നത് യൂറോപ്യന്‍ കുടിയേറ്റത്തോടെയാണ്.

യൂറോപ്യന്‍ അധിനിവേശങ്ങള്‍

അമേരിക്ക എന്ന ഭൂപ്രദേശത്തിന്റെ ഗതി മാറ്റിയെഴുതിയ അധിനിവേശങ്ങളായിരുന്നു പിന്നീട്‌. ക്രിസ്തുവര്‍ഷം 1500നും 1600നും ഇടയില്‍ ഇന്നത്തെ അമേരിക്കയുടെ തെക്കുപടിഞ്ഞാറായി വന്നുവാസമുറപ്പിച്ച സ്പാനിഷ്‌ കുടിയേറ്റക്കരാണ്‌ ആദ്യമെത്തിയ യൂറോപ്യന്മാര്‍. സാന്റാഫേ, ഫ്ലോറിഡയിലെ സെന്റ്‌.അഗസ്റ്റിന്‍ എന്നിവയായിരുന്നു പ്രധാന സ്പാനിഷ്‌ താവളങ്ങള്‍. വിര്‍ജീനിയയിലെ ജയിംസ്‌ ടൌണിലാണ്‌ ഇംഗ്ലീഷുകാര്‍ 1607-ല്‍ ആദ്യമായി വന്നു താവളമടിച്ചത്‌. പിന്നീടുള്ള ദശകങ്ങളില്‍ ഫ്രഞ്ചുകാരും ഡച്ചുകാരും പല പ്രദേശങ്ങളും കൈക്കലാക്കി.

ബ്രിട്ടനെതിരെ പടയൊരുക്കം

യൂറോപ്യന്‍ രാജ്യങ്ങളുടെ കോളനികളായി കുഴപ്പങ്ങളില്ലാതെ കഴിയുകയായിരുന്നു ഇവിടുത്തെ ജനത. എന്നാല്‍ ഫ്രഞ്ച്‌-ഇന്ത്യന്‍ യുദ്ധത്തില്‍ ബ്രിട്ടീഷുകാര്‍ ഫ്രാന്‍സിനുമേല്‍ വിജയം നേടിയതോടെ കഥയാകെ മാറി. കരീബിയന്‍ ദ്വീപുകളൊഴികെ വടക്കേ അമേരിക്കയിലെ ഒട്ടുമിക്ക പ്രദേശങ്ങളും ഫ്രാന്‍സിനു നഷ്ടമാവുകയും ചെയ്തു. ഈ വിജയത്തിനുശേഷം യുദ്ധച്ചിലവെന്ന പേരില്‍ ബ്രിട്ടണ്‍ 13 കോളനികളില്‍ നികുതിപ്പിരിവ് നടപ്പാക്കി. എന്നാല്‍ ബ്രിട്ടീഷ് പാര്‍ലമെന്റിലോ മറ്റ് അധികാരസ്ഥാപനങ്ങളിലോ പ്രാതിനിധ്യമില്ലാത്തതിനാല്‍ നികുതി ചുമത്തുന്നത് അന്യായമാണെന്ന് ഈ കോളനിയിലെ തദ്ദേശീയരായ ജനങ്ങള്‍ വാദിച്ചു. ഈ പ്രതിഷേധം ബ്രിട്ടനെതിരെയുള്ള പടയൊരുക്കമായി മാറി. കോളനികള്‍ നടത്തിയ ഈ വിപ്ലവ മുന്നേറ്റം കൊളോണിയല്‍ ശക്തികളുടെ ആധിപത്യം മിക്കവാറും അവസാനിപ്പിച്ചു.

പുതിയ രാജ്യം പിറക്കുന്നു

പ്രഥമ യു.എസ്. പ്രസിഡന്റ് ജോര്‍ജ് വാഷിംഗ്ടണ്‍

1776-ല്‍ 13 കോളനികള്‍ ചേര്‍ന്ന് ബ്രിട്ടനില്‍ നിന്നും സ്വാതന്ത്ര്യം പ്രഖ്യാപിച്ച് യുണെറ്റഡ് സ്റ്റേറ്റ്സ് എന്ന പേരില്‍ ലോകത്തിലെ ആദ്യത്തെ കേന്ദ്രീകൃത ജനാധിപത്യ രാജ്യം സ്ഥാപിച്ചു. തുടക്കത്തില്‍ പലരാജ്യങ്ങളുടെ കൂട്ടായ്മ എന്ന നിലയിലായിരുന്നു പ്രവര്‍ത്തനമെങ്കിലും 1789-ല്‍ ഭരണഘടനാനുസൃതമായ ഫെഡറല്‍ സ്വഭാവം കൈവരിച്ചു.

അമേരിക്കന്‍ ആഭ്യന്തര യുദ്ധം

അടിമത്തത്തെച്ചൊല്ലിയാണ് അമേരിക്കയില്‍ ആദ്യത്തെ ആഭ്യന്തര യുദ്ധം പൊട്ടിപ്പുറപ്പെടുന്നത്. പത്തൊമ്പതാം നൂറ്റാണ്ടിന്റെ മധ്യത്തിലായിരുന്നു ഇത്. വടക്കുള്ള സംസ്ഥാനങ്ങള്‍ അടിമപ്പണിക്ക് എതിരായിരുന്നെങ്കില്‍ കൃഷി മുഖ്യ തൊഴിലാക്കിയിരുന്ന തെക്കന്‍ പ്രദേശങ്ങള്‍ അടിമപ്പണി ഒരു അനിവാര്യതയായി കണക്കാക്കി. ഈ തര്‍ക്കം ആഭ്യന്തര കലാപമായി. 1861-ല്‍ ഏഴ് വടക്കന്‍ സംസ്ഥാനങ്ങള്‍ അമേരിക്കയില്‍നിന്നും വിട്ടുപോന്നു. ഇത് ആഭ്യന്തര യുദ്ധത്തിലേക്ക് നയിച്ചു. ഈ യുദ്ധത്തിനിടയിലാണ് എബ്രഹാം ലിങ്കണ്‍ ചരിത്രപ്രസിദ്ധമായ ‘അടിമത്ത വിമോചന പ്രഖ്യാപനം’ നടത്തിയത്. ഫെഡറല്‍ സ്വഭാവത്തെപ്പറ്റിയുള്ള ചര്‍ച്ചകള്‍ക്ക് ചൂടുപിടിപ്പിച്ചാണ് ആഭ്യന്തരയുദ്ധം അവസാനിക്കുന്നത്. ഏതായാലും സംസ്ഥാനങ്ങളേക്കാള്‍ ഫെഡറല്‍ ഗവണ്‍‌മെന്റിന്റെ അധികാരങ്ങള്‍ക്ക് പ്രാധാന്യമേറി.

വിപുലീകരണം

പത്തൊന്‍‌പതാം നൂറ്റാണ്ടില്‍ കൂടുതല്‍ പ്രദേശങ്ങള്‍ സംസ്ഥാനങ്ങളായി ചേര്‍ക്കപ്പെട്ടു. തുടക്കം മുതലുണ്ടായിരുന്ന 13 കിഴക്കന്‍ സംസ്ഥാനങ്ങളിലും കുടിയേറ്റം മൂലം ജനസംഖ്യ പെരുകിയതോടെ കൂടുതല്‍ പ്രദേശങ്ങള്‍ വെട്ടിപ്പിടിക്കാന്‍ തുടങ്ങി. അമേരിക്കയിലെ യഥാര്‍ഥ ജനതയായ അമേരിക്കന്‍ ഇന്ത്യക്കാര്‍ മിക്കവയും തെക്കു പടിഞ്ഞാറ് ഭാഗങ്ങളിലായിരുന്നു വ്യാപിച്ചിരുന്നത്. മൂന്നു കോടിയോളമുണ്ടായിരുന്ന ഇവരില്‍ അധികവും യൂറോപ്യന്‍ കുടിയേറ്റം സമ്മാനിച്ച സാംക്രമിക രോഗങ്ങള്‍മൂലം ചത്തൊടുങ്ങി. ശേഷിച്ച പ്രദേശങ്ങള്‍ പുതിയ ‘’യുണൈറ്റഡ് സ്റ്റേറ്റ്സ്‘’ വെട്ടിപ്പിടിച്ചു. പത്തൊന്‍‌പതാം നൂറ്റാണ്ടിന്റെ അവസാനത്തൊടെ ഒട്ടുമിക്ക അമേരിക്കന്‍ ഇന്ത്യന്‍ പ്രദേശങ്ങളും നാമാവശേഷമായി. അമേരിക്കന്‍ ഇന്ത്യക്കാര്‍ ന്യൂനപക്ഷമായി ചുരുക്കപ്പെടുകയും ചെയ്തു. വടക്കേ അമേരിക്കന്‍ ഭൂഖണ്ഡത്തില്‍ കിഴക്കുമുതല്‍ പടിഞ്ഞാറുവരെയുള്ള മിക്കപ്രദേശങ്ങളും യുണൈറ്റഡ് സ്റ്റേറ്റ്സിനു കീഴിലായി.

വന്‍ശക്തിയായി വളരുന്നു

ഇരുപതാം നൂറ്റാണ്ടിലാണ് അമേരിക്ക ആഗോള ശക്തിയായി വളര്‍ന്നു വന്നത്. വ്യാവസായിക, സാങ്കേതിക മേഖലകളില്‍ കൈവരിച്ച വളര്‍ച്ച അമേരിക്കയുടെ കുതിച്ചുകയറ്റത്തിനു കാരണമായി. ഒന്നും രണ്ടും ലോകമഹായുദ്ധങ്ങളായിരുന്നു അമേരിക്കയുടെ കുതിച്ചുകയറ്റത്തിന് മറ്റൊരു കാരണം. രണ്ട് ലോക മഹായുദ്ധങ്ങളിലും അവര്‍ പങ്കെടുത്തെങ്കിലും സ്വന്തം ഭൂമിയില്‍ പടവെട്ടേണ്ടി വന്നില്ല. സഖ്യകക്ഷികളുടെ മണ്ണിലായിരുന്നു അവരുടെ പോരാട്ടങ്ങളത്രയും. ഇതിനാല്‍ യുദ്ധത്തിന്റെ ദുരിതങ്ങള്‍ അമേരിക്കയെ സ്പര്‍ശിച്ചതേയില്ല. എന്നാല്‍ അതുവരെ മേധാവിത്വം പുലര്‍ത്തിയിരുന്ന യൂറോപ്യന്‍ രാജ്യങ്ങളാ‍കട്ടെ യുദ്ധത്തിന്റെ അനന്തരഫലമായി വെട്ടിമുറിക്കപ്പെടുകയും സാമ്പത്തികമായി തളരുകയും ചെയ്തു. 1929 മുതല്‍ 1939 വരെ ലോകമെമ്പാടും രൂപംകൊണ്ട സാമ്പത്തിക മാന്ദ്യവും അമേരിക്കയ്ക്ക് പോറലേല്‍പ്പിച്ചില്ല. ചുരുക്കത്തില്‍ 1950കളില്‍ ആഗോള സമ്പത്തിന്റെ സിംഹഭാഗവും കേന്ദ്രീകരിച്ചിരുന്നത് അമേരിക്കയിലായിരുന്നു.

ശീതയുദ്ധം

സോവ്യറ്റ് യൂണിയനില്‍ നിന്നുമാത്രമാണ് ഈ കാലഘട്ടത്തില്‍ അമേരിക്ക കാര്യമായ വെല്ലുവിളി നേരിട്ടത്. ശാസ്ത്ര, സാങ്കേതിക മേഖലകളില്‍ ഇരു രാജ്യങ്ങളും തമ്മില്‍ അതിശക്തമായ മത്സരം ഉടലെടുത്തു. ലോകം രണ്ട് വന്‍ ശക്തികള്‍ക്കു കീഴിലായി വിഭജിക്കപ്പെട്ടു. സോവ്യറ്റ് യൂണിയനും അമേരിക്കയും തമ്മില്‍ നിലനിന്നിരുന്ന കിടമത്സരത്തെ ‘ശീതയുദ്ധം‘ എന്നാണ് ചരിത്രകാരന്മാര്‍ വിശേഷിപ്പിക്കുന്നത്. എന്നാല്‍ 1990കളില്‍ സോവ്യറ്റ് യൂണിയന്‍ ശിഥിലമായതോടെ അമേരിക്കന്‍ ഐക്യനാടുകള്‍ ആഗോള പൊലീസായി വളര്‍ന്നു. സമസ്ത മേഖലകളിലും അമേരിക്കന്‍ അധീശത്വം നിലവില്‍‌വന്നു. രാജ്യാന്തര പ്രശ്നങ്ങളില്‍ അമേരിക്ക ഇടപെടാന്‍ തുടങ്ങി. മിക്കയിടങ്ങളിലും അമേരിക്കയുടെ ഇടപെടലുകള്‍ സംഘര്‍ഷം സൃഷ്ടിക്കുകയും ചെയ്തു.

ഇരുപത്തൊന്നാം നൂറ്റാണ്ടില്‍

ഇരുപത്തൊന്നാം നൂറ്റാണ്ടിന്റെ തുടക്കത്തില്‍ മറ്റൊരു വെല്ലുവിളിയാണ് അമേരിക്കയ്ക്കു മുന്നിലുള്ളത്-ഇസ്ലാമിക തീവ്രവാദം. 2001 സെപ്റ്റംബര്‍ 11ന് ന്യൂയോര്‍ക്കിലെ ലോകവ്യാപാര കേന്ദ്രത്തിനു നേരെ ഇസ്ലാമിക തീവ്രവാദികള്‍ നടത്തിയ ആക്രമണം ഈ രാജ്യത്തിന്റെ ആത്മാഭിമാനത്തിന് മുറിവേല്‍പ്പിച്ചു. അമേരിക്കന്‍ ജനത ചരിത്രത്തില്‍ നേരിട്ട ഏറ്റവും വലിയ തിരിച്ചടികളിലൊന്നായി ഈ ആക്രമണം വിലയിരുത്തപ്പെടുന്നു. സെപ്റ്റംബര്‍ 11ലെ തിരിച്ചടിക്കുശേഷം അമേരിക്ക രാജ്യാന്തര തലത്തില്‍ നടത്തിയ ഇടപെടലുകളാണ് ഇരുപത്തൊന്നാം നൂറ്റാണ്ടിലെ പ്രധാന സംഭവങ്ങള്‍. അമേരിക്കന്‍ ജനതയുടെ സുരക്ഷയ്ക്ക് ഭീഷണി ഉയര്‍ത്തുന്നു എന്ന ന്യായത്തിന്റെ പിന്‍‌ബലത്തില്‍ അഫ്ഗാനിസ്ഥാനിലും ഇറാഖിലും അമേരിക്ക നടത്തിയ ആക്രമണങ്ങളായിരുന്നു ഇത്. പ്രത്യേകിച്ച് ന്യായീകരണങ്ങളൊന്നുമില്ലാതിരുന്നിട്ടും അമേരിക്ക നടത്തിയ ആക്രമണങ്ങളെ എതിര്‍ക്കാന്‍ ഭൂമുഖത്ത് ആരും തന്നെയില്ല എന്നത് ഈ നൂറ്റാണ്ടിലും അവരുടെ ആധിപത്യത്തിന് അടിവരയിടുന്നു.

ഭൂമിശാസ്ത്രം

അമേരിക്കന്‍ ഐക്യനാടുകളുടെ ഉപഗ്രഹ ചിത്രം.

വടക്ക് കാനഡ, തെക്ക് മെക്സിക്കോ എന്നിവയാണ് അമേരിക്കയുടെ കരാതിര്‍ത്തികള്‍. റഷ്യ, ബഹാമാസ് എന്നീ രാജ്യങ്ങളുമായി ജലാതിര്‍ത്തിയുമുണ്ട്. കിഴക്കും പടിഞ്ഞാറും തെക്കും സമുദ്രത്താല്‍ ചുറ്റപ്പെട്ടിരിക്കുന്നു. പടിഞ്ഞാറ് പസഫിക് മഹാസമുദ്രം, ബെറിങ്ങ് കടല്‍, വടക്കു കിഴക്ക് ആര്‍ട്ടിക് മഹാസമുദ്രം, കിഴക്ക്, തെക്കുകിഴക്ക് ഭാഗങ്ങളിലായി അറ്റ്ലാന്റിക് മഹാസമുദ്രം, മെക്സിക്കന്‍ കടല്‍, കരീബിയന്‍ കടല്‍ എന്നിവയാണ് പ്രധാന സമുദ്രാതിര്‍ത്തികള്‍.

50 സംസ്ഥാനങ്ങളില്‍ 48 എണ്ണവും കാനഡയ്ക്കും മെക്സിക്കോയ്ക്കുമിടയിലുള്ള ഭൂപ്രദേശത്ത് വ്യാപിച്ചുകിടക്കുന്നു. ഈ 48 സംസ്ഥാനങ്ങളില്‍ നിന്ന് അകലെ വടക്കുപടിഞ്ഞാറായാണ് അലാസ്കയുടെ സ്ഥാനം. കാനഡ അലാസ്കയെ മറ്റ് സംസ്ഥാനങ്ങളില്‍ നിന്നും വേര്‍തിരിക്കുന്നു. പസഫിക് മഹാസമുദ്രത്തിലുള്ള ദ്വീപു സമൂഹമാണ് മറ്റൊരു സംസ്ഥാനമായ ഹവായി.

ഭൂപൃകൃതിയുടെ വ്യത്യാസങ്ങള്‍ക്കൊണ്ട് ശ്രദ്ധേയമാണ് അമേരിക്കന്‍ ഐക്യനാടുകള്‍. അതിശൈത്യ പ്രദേശങ്ങള്‍, തടാക ഭൂമികള്‍, പീഡഭൂമികള്‍, മരുഭൂമികള്‍, മഴക്കാടുകള്‍, മലനിരകള്‍ എന്നു തുടങ്ങി ഭൂപ്രകൃതിയുടെ എല്ലാ വിഭാഗങ്ങളും ഇവിടെ കൈകോര്‍ക്കുന്നു.

കാലാവസ്ഥ

ഭൂപ്രകൃതിയിലെ വ്യത്യാസം മൂലം കാലാവസ്ഥയിലും ഏകീകൃത സ്വഭാവമില്ല.തെക്കന്‍ സംസ്ഥാനങ്ങളധികവും(ഉദാ:ഫ്ലോറിഡ, അരിസോണ) ഉഷ്ണമേഖലകളാണെങ്കില്‍ വടക്ക് അലാസ്കയിലെത്തുമ്പോള്‍ അതിശൈത്യമായി. തെക്കും പസഫിക് തീരത്തുമുള്ള സംസ്ഥാനങ്ങളിലൊഴികെ മിക്കയിടങ്ങളിലും ഈര്‍പ്പം കുറഞ്ഞ അന്തരീക്ഷവുമാണ്. ഫ്ലോറിഡ, ടെക്സാസ്, ലൂസിയാന, ന്യൂമെക്സിക്കോ, അരിസോണ, കാ‍ലിഫോര്‍ണിയ എന്നീ സംസ്ഥാനങ്ങളില്‍ കനത്ത ചൂട് അനുഭവപ്പെടുന്നു. ആര്‍ട്ടിക് സമുദ്രത്തോടു ചേര്‍ന്നുകിടക്കുന്ന വടക്കു കിഴക്കന്‍ സംസ്ഥാനങ്ങളില്‍ തണുത്ത ദിനങ്ങളാണധികവും. അറ്റ്ലാന്റിക് മഹാസമുദ്രത്തില്‍ നിന്നും രൂപം കൊള്ളുന്ന ചുഴലിക്കാറ്റാണ് കാലാവസ്ഥയുടെ ഗതി മാറ്റുന്ന മറ്റൊരു പ്രധാന ഘടകം. വര്‍ഷത്തില്‍ പത്തിലേറെത്തവണ ഇത്തരം ചൊഴലിക്കൊടുങ്കാറ്റുകള്‍ രൂപം കൊള്ളുന്നുണ്ട്.

സംസ്ഥാനങ്ങള്‍

സംസ്ഥാനം	തലസ്ഥാനം	പ്രമുഖ നഗരം
അരിസോണ	ഫീനിക്സ്	ഫീനിക്സ്
അലബാമ	മോണ്ട്ഗോമറി	ബെര്‍മിങ്‌ഹാം
അലാസ്ക	ജുനെയു	ആങ്കറേജ്
അര്‍ക്കന്‍സാസ്	ലിറ്റില്‍ റോക്ക്	ലിറ്റില്‍ റോക്ക്
ഇയോവ	ഡെ മൊയിന്‍സ്	ഡെ മൊയിന്‍സ്
ഇന്ത്യാന	ഇന്ത്യാനാപൊളിസ്	ഇന്ത്യാനപൊളിസ്
ഇല്ലിനോയി	സ്പ്രിങ്ഫീല്‍ഡ്	ചിക്കാഗോ
ഐഡഹോ	ബോയിസ്	ബോയിസ്
ഒക്‍ലഹോമ	ഒക്‍ലഹോമ സിറ്റി	ഒക്‍ലഹോമ സിറ്റി
ഒഹൈയോ	കൊളംബസ്	സിന്‍സിനാറ്റി
ഒറിഗോണ്‍	സലേം	പോര്‍ട്ട്‌ലാന്റ്
കന്‍സാസ്	ടൊപേക്ക	വിച്ചിറ്റ
കെന്റക്കി	ഫ്രാങ്ക്ഫര്‍ട്ട്	ലൂയിസ്‌വില്‍
കാലിഫോര്‍ണിയ	സാക്രമന്റോ	ലൊസാഞ്ചലസ്
കണക്റ്റിക്കട്ട്	ഹാര്‍ട്ട്ഫോര്‍ഡ്	ബ്രിജ്പോര്‍ട്ട്
കോളറാഡോ	ഡെന്‍‌വര്‍	ഡെന്‍‌വര്‍
ജോര്‍ജിയ	അറ്റ്‌ലാന്റ	അറ്റ്ലാന്റ
ടെക്സാസ്	ഓസ്റ്റിന്‍	ഡാലസ്
ടെന്നിസി	നാഷ്‌വില്‍	മെംഫിസ്
ഡെലാവയര്‍	ഡോവര്‍	വില്‍മിങ്ടണ്‍
നെബ്രാസ്ക	ലിങ്കണ്‍	ഒമാഹ
നെവഡ	കാഴ്‌സണ്‍ സിറ്റി	ലാസ് വെഗാസ്
ന്യൂഹാംഷെയര്‍	കോണ്‍കോര്‍ഡ്	മാഞ്ചസ്റ്റര്‍
ന്യൂജേഴ്സി	ട്രെന്റണ്‍	നെവാര്‍ക്ക്
ന്യൂമെക്സിക്കോ	സാന്റാഫേ	അല്‍ബുക്കര്‍ക്ക്
ന്യൂയോര്‍ക്ക്	ആല്‍ബനി	ന്യൂയോര്‍ക്ക് സിറ്റി
നോര്‍ത്ത് കരോളിന	റാലീ	ചാര്‍ലറ്റ്
നോര്‍ത്ത് ഡക്കോട്ട	ബിസ്മാര്‍ക്ക്	ഫാര്‍ഗോ
പെന്‍‌സില്‍‌വാനിയ	ഹാരിസ്ബര്‍ഗ്	ഫിലാഡെല്‍ഫിയ
ഫ്ലോറിഡ	ടെലഹസീ	മിയാമി
മസാച്യുസെറ്റ്സ്	ബോസ്റ്റണ്‍	ബോസ്റ്റണ്‍
മെയിനേ	ഒഗസ്റ്റ	പോര്‍ട്ട്‌ലാന്റ്
മേരിലാന്‍‌ഡ്	അന്നപോളിസ്	ബാള്‍ട്ടിമോര്‍
മിനസോട്ട	സെന്റ് പോള്‍	മിന്നെപൊളിസ്
മിസിസിപ്പി	ജാക്സണ്‍	ജാക്സണ്‍
മിസോറി	ജെഫേഴ്സണ്‍ സിറ്റി	കന്‍‌സാസ് സിറ്റി
മിഷിഗണ്‍	ലാന്‍‌സിങ്	ഡിട്രോയിറ്റ്
മൊന്റാന	ഹെലേന	ബില്ലിംഗ്സ്
യൂറ്റാ	സാള്‍ട്ട്‌ലേക്ക് സിറ്റി	സാള്‍ട്ട്‌ലേക്ക് സിറ്റി
റോഡ് ഐലന്റ്	പ്രൊവിഡന്‍‌സ്	പ്രൊവിഡന്‍സ്
ലൂസിയാന	ബാറ്റണ്‍ റോ	ന്യൂഓര്‍ലിയന്‍സ്
വാഷിങ്ടണ്‍	ഒളിമ്പ്യ	സിയാറ്റില്‍
വിസ്ക്കോണ്‍സിന്‍	മാഡിസണ്‍	മില്‍‌വോക്കി
വെര്‍മണ്ട്	മോണ്ട്പിലീര്‍	ബര്‍ലിങ്ടണ്‍
വെര്‍ജീനിയ	റിച്ച്മണ്ട്	വെര്‍ജീനിയ ബീച്ച്
വെസ്റ്റ് വെര്‍ജീനിയ	ചാള്‍സ്ടണ്‍	ചാള്‍സ്ടണ്‍
വ്യോമിങ്	ചെയ്നി	ചെയ്നി
സൌത്ത് കരോളിന	കൊളംബിയ	കൊളംബിയ
സൌത്ത് ഡക്കോട്ട	പിയറി	സിയുസ് ഫോള്‍സ്
ഹവായി	ഹൊനോലുലു	ഹൊനോലുലു

ഭരണക്രമം

മുഖ്യ ലേഖനം: അമേരിക്കന്‍ ഭരണ സംവിധാനം

പ്രസിഡന്റ് കേന്ദ്രീകൃത ജനാധിപത്യ രാജ്യമാണ് അമേരിക്ക. അമേരിക്കന്‍ ഭരണക്രമത്തെ മൂന്നായി തിരിക്കാം. ഫെഡറല്‍ ഗവണ്‍‌മെന്റുകള്‍, സംസ്ഥാന ഗവണ്‍‌മെന്റുകള്‍, പ്രാദേശിക ഗവണ്‍‌മെന്റുകള്‍. മൂന്നു തലങ്ങളിലേക്കും വോട്ടെടുപ്പിലൂടെയാണ് ആളെ കണ്ടെത്തുന്നത്. ലോകത്തിലെ ഏറ്റവും പഴക്കമേറിയ ജനാധിപത്യ സംവിധാനങ്ങളിലൊന്നായി അമേരിക്കയെ വിശേഷിപ്പിക്കാമെങ്കിലും സാര്‍വത്രിക വോട്ടവകാശം ഏറെ വൈകിയാണ് ഇവിടെ നടപ്പാക്കിയത് എന്നതു വിസ്മരിച്ചുകൂടാ. തുടക്കത്തില്‍ വെള്ളക്കാര്‍ക്കു മാത്രമായിരുന്നു വോട്ടവകാശം. 1870-ല്‍ ഭരണഘടനയുടെ പതിനഞ്ചാം ഭേദഗതിയിലൂടെ കറുത്തവര്‍ക്കും വോട്ടവകാശം നല്‍കി. സ്ത്രീകള്‍ക്ക് വോട്ടവകാശത്തിനായി ഇരുപതാം നൂറ്റാണ്ടുവരെ കാത്തിരിക്കേണ്ടി വന്നു. ഇരുപതാം നൂറ്റാണ്ടിന്റെ തുടക്കത്തില്‍ ഭരണഘടനയുടെ പത്തൊന്‍പതാം ഭേദഗതിയിലൂടെയാണ് ഇത് സാധ്യമാക്കിയത്. കുറ്റവാളികള്‍ക്ക് ഇന്നും വോട്ടവകാശമില്ല.

ഫെഡറല്‍ ഗവണ്‍‌മെന്റ്

ഫെഡറല്‍ ഗവണ്‍‌മെന്റിനെ (കേന്ദ്ര ഗവണ്‍‌മെന്റ്) മൂന്നു വിഭാഗങ്ങളായി തിരിച്ചിരിക്കുന്നു. നിയമനിര്‍മ്മാണ വിഭാഗം, ഭരണ നിര്‍വഹണ വിഭാഗം, നീതിന്യായ വിഭാഗം. യഥാക്രമം പ്രതിനിധി സഭ(ഹൌസ് ഓഫ് റെപ്രസെന്റേറ്റീവ്സ്), പ്രസിഡന്റ്, സുപ്രീം കോടതി എന്നിവയാണ് ഇവയെ നയിക്കുന്നത്. പ്രതിരോധം, വിദേശകാര്യം, നാണയം, സംസ്ഥാനങ്ങള്‍ തമ്മിലുള്ള വാണിജ്യ ബന്ധങ്ങളുടെ ഏകോപനം, പൌരാവകാശ സംരംക്ഷണം എന്നീ ചുമതലകളാണ് ഭരണഘടന ഫെഡറല്‍ ഗവണ്‍‌മെന്റിനു നല്‍കുന്നത്. മറ്റെല്ലാ പ്രധാന അധികാരങ്ങളും സംസ്ഥാന ഗവണ്‍‌മെന്റുകളുടെ നിയന്ത്രണത്തിലാണ്. എന്നാല്‍ സാമൂഹിക ക്ഷേമം വിദ്യാഭ്യാസം എന്നീ മേഖലകളിലേക്കും ഫെഡറല്‍ അധികാര സീമ ചിലപ്പോള്‍ വ്യാപിക്കാറുണ്ട്.

സംസ്ഥാന ഗവണ്‍‌മെന്റുകള്‍

ജനങ്ങളുടെ ദൈനംദിന ജീവിതത്തില്‍ ഏറ്റവും സ്വാധീനം ചെലുത്തുന്നത് സംസ്ഥാന ഗവണ്‍‌മെന്റുകളാണ്. ഓരോ സംസ്ഥാനത്തിനും സ്വന്തം ഭരണഘടനയും നിയമസംഹിതകളുമുണ്ട്. ഓരോ സംസ്ഥാനത്തിന്റെയും ഭരണഘടനകള്‍ തമ്മില്‍ പ്രകടമായ അന്തരവുമുണ്ട്. ഉദാഹരണത്തിന് കാലിഫോര്‍ണിയ പോലുള്ള സംസ്ഥാനങ്ങളില്‍ ജനപ്രതിനിധിയെ തിരിച്ചുവിളിക്കാനുള്ള സംവിധാനമുണ്ട്. നിയമവാഴ്ച, സമ്പത്ത്, വിദ്യാഭ്യാസം എന്നിവയിലും ഓരോ സംസ്ഥാനത്തെയും നിയമങ്ങള്‍ തമ്മില്‍ ഒട്ടേറെ വ്യത്യാസങ്ങളുണ്ട്. ഗവര്‍ണറാണ് സംസ്ഥാന ഭരണത്തലവന്‍. നെബ്രാസ്ക ഒഴികെ എല്ലാ സംസ്ഥാനങ്ങളിലും ദ്വൈമണ്ഡല നിയമനിര്‍മ്മാണ സഭയാണ്.

പ്രാദേശിക ഗവണ്‍‌മെന്റുകള്‍

സംസ്ഥാന ഗവണ്‍‌മെന്റുകള്‍ക്കു താഴെയായി കൌണ്ടി, സിറ്റി, ടൌണ്‍ എന്നിങ്ങനെ പ്രാദേശിക ഭരണ സംവിധാനങ്ങളുണ്ട്. ഗതാഗത നിയന്ത്രണം, ജലവിതരണം എന്നിങ്ങനെയുള്ള ചുമതലകളാണ് പ്രധാനമായും പ്രാദേശിക ഗവണ്‍‌മെന്റുകള്‍ക്കുള്ളത്.